Ҳукумати Ҷумҳурии Тоҷикистон

ҚАРОР

Дар бораи Кумитаи давлатии идораи замин ва геодезии Ҷумҳурии Тоҷикистон

Мутобиқи моддаи 12 Қонуни конститутсионии Ҷумҳурии Тоҷикистон "Дар бораи Ҳукумати Ҷумҳурии Тоҷикистон", моддаи 42 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" ва ҷиҳати иҷрои Фармони Президенти Ҷумҳурии Тоҷикистон аз 9 марти соли 2010 № 832 "Дар бораи такмили минбаъдаи сохтори мақомоти марказии ҳокимияти иҷроияи Ҷумҳурии Тоҷикистон" Ҳукумати Ҷумҳурии Тоҷикистон қарор мекунад:

1) Низомнома, Сохтори дастгоҳи марказӣ, Нақшаи идоракунӣ ва Номгӯи корхонаҳо ва муассисаҳои системаи Кумитаи давлатии идораи замин ва геодезии Ҷумҳурии Тоҷикистон тасдиқ карда шаванд (замима мегарданд) (қарори Ҳукумати ҶТ аз 28.02.2014 № 134).

2) Шумораи ниҳоии кормандони Кумитаи давлатии идораи замин ва геодезии Ҷумҳурии Тоҷикистон ба миқдори 350 воҳид (бе ҳайати хизматрасон), аз ҷумла шумораи кормандони дастгоҳи марказӣ ба миқдори 100 воҳид, кумитаҳои идораи замини вилоятӣ, шаҳрӣ ва ноҳиявӣ ба миқдори 250 воҳид муқаррар карда шавад. Маблағгузории 85 воҳиди кормандони дастгоҳи марказӣ аз ҳисоби буҷети ҷумҳуриявӣ ва 15 воҳид аз ҳисоби маблағҳои махсуси Кумитаи мазкур амалӣ карда шавад (қарори Ҳукумати ҶТ аз 27.05.2017 № 272, аз 15.05.2019 № 255).

3) Ба Кумитаи давлатии идораи замин ва геодезии Ҷумҳурии Тоҷикистон иҷозат дода шавад, ки се муовини раис, аз ҷумла як муовини якум ва ҳайати мушовара иборат аз 7 нафар дошта бошад (қарори Ҳукумати ҶТ аз 28.02.2014 № 134).

4) Ба Кумитаи давлатии идораи замин ва геодезии Ҷумҳурии Тоҷикистон лимити автомашинаҳои сабукрави хизматӣ ба миқдори 19 адад, аз он ҷумла барои дастгоҳи марказӣ ба миқдори 6 адад муқаррар карда шавад (қарори Ҳукумати ҶТ аз 28.02.2014 № 134).

5) Маблағгузории дастгоҳи марказии Кумитаи давлатии идораи замин ва геодезии Ҷумҳурии Тоҷикистон, мақомоти дар Нақшаи идоракунии Кумитаи давлатии идораи замин ва геодезии Ҷумҳурии Тоҷикистон пешбинигардида аз ҳисоби маблағҳои буҷети ҷумҳуриявӣ анҷом дода шавад (қарори Ҳукумати ҶТ аз 28.02.2014 № 134).

6) Кумитаи давлатии идораи замин ва геодезии Ҷумҳурии Тоҷикистон дар мӯҳлати ду моҳ (қарори Ҳукумати ҶТ аз 28.02.2014 № 134):

- доир ба ворид намудани тағйиру иловаҳо ба санадҳои меъёрии ҳуқуқии соҳавӣ таклиф пешниҳод намояд;

- санадҳои худро бо қарори мазкур мувофиқ намояд.

7) Дар бандҳои 1 ва 2 қарори Ҳукумати Ҷумҳурии Тоҷикистон аз 29 сентябри соли 2008 № 456 "Дар бораи муайян намудани мақоми махсуси ваколатдори давлатии Ҷумҳурии Тоҷикистон дар соҳаи бақайдгирии давлатии молу мулки ғайриманқул ва ҳуқуқҳо ба он" калимаҳои "Агентии заминсозӣ, геодезӣ ва харитасозии назди Ҳукумати Ҷумҳурии Тоҷикистон" ба калимаҳои "Кумитаи давлатии идораи замин ва геодезии Ҷумҳурии Тоҷикистон" иваз карда шаванд (қарори Ҳукумати ҶТ аз 28.02.2014 № 134).

8) Қарори Ҳукумати Ҷумҳурии Тоҷикистон аз 28 декабри соли 2006  № 613 "Дар бораи Агентии заминсозӣ, геодезӣ ва харитасозии назди Ҳукумати Ҷумҳурии Тоҷикистон" аз эътибор соқит дониста шавад.