Ҳукумати Ҷумҳурии Тоҷикистон

ҚАРОР

Дар бораи тасдиқи Низомномаи тартиби амалӣ намудани назорати муҳоҷиратӣ

Мувофиқи моддаи 43 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" ва бо мақсади пурзӯр намудани мубориза муқобили муҳоҷирати ғайриқонунӣ Ҳукумати Ҷумҳурии Тоҷикистон қарор мекунад:

1. Низомномаи замимагардидаи тартиби амалӣ намудани назорати муҳоҷиратӣ тасдиқ карда шавад.

2. Вазорати корҳои дохилии Ҷумҳурии Тоҷикистон ва Кумитаи давлатии амнияти миллии Ҷумҳурии Тоҷикистон, Хадамоти муҳоҷирати назди Ҳукумати Ҷумҳурии Тоҷикистон дар сметаи хараҷот барои соли дахлдор ҷиҳати иҷрои чорабиниҳо оид ба амалӣ намудани назорати муҳоҷиратӣ маблағ пешбинӣ намоянд (қарори Ҳукумати ҶТ аз 30.03.2013 № 167).

3. Вазорати корҳои дохилии Ҷумҳурии Тоҷикистон дар соли 2012 масъалаҳои ташкилиро оид ба таъсиси Марказ барои иқомати муваққатии шахсоне, ки паноҳгоҳ меҷӯянд, ҳал намуда, онро мутобиқи қонунгузории Ҷумҳурии Тоҷикистон ба қайд гирад (қарори Ҳукумати ҶТ аз 27.02.2010 № 102).

4. Назорати муҳоҷират дар ҳамкории муштарак байни Вазорати корҳои дохилии Ҷумҳурии Тоҷикистон, Кумитаи давлатии амнияти миллии Ҷумҳурии Тоҷикистон, Хадамоти муҳоҷирати назди Ҳукумати Ҷумҳурии Тоҷикистон ва Вазорати корҳои хориҷии Ҷумҳурии Тоҷикистон анҷом дода мешавад (қарори Ҳукумати ҶТ аз 30.03.2013 № 167).

5. Қарори Ҳукумати Ҷумҳурии Тоҷикистон аз 3 ноябри соли 2001 № 493 "Дар бораи тасдиқи Низомномаи тартиби амалӣ намудани назорати муҳоҷиратӣ" беэътибор дониста шавад.