Низомномаи тартиби амалӣ намудани назорати муҳоҷиратӣ

1. Низомномаи мазкур тартиби амали намудани назорати муҳоҷиратӣ ва ҳамчунин ҳамкории мутақобилаи вазорату идораҳои дахлдорро ҳангоми иҷро намудани он муайян менамояд.

2. Назорати муҳоҷиратӣ - ин фаъолиятест, ки барои пешгирӣ намудани муҳоҷирати ғайриқонунии шаҳрвандони хориҷӣ ва шахсони бешаҳрвандӣ дар қаламрави Ҷумҳурии Тоҷикистон равона карда шудааст.

3. Асоси ҳуқуқии амалӣ намудани назорати муҳоҷиратӣ Конститутсияи (Сарқонуни) Ҷумҳурии Тоҷикистон, Қонуни Ҷумҳурии Тоҷикистон "Дар бораи вазъи ҳуқуқии шаҳрвандони хориҷӣ дар Ҷумҳурии Тоҷикистон", Қонуни Ҷумҳурии Тоҷикистон "Дар бораи гурезаҳо", Қонуни Ҷумҳурии Тоҷикистон "Дар бораи муҳоҷират", Фармони Президенти Ҷумҳурии Тоҷикистон аз 2 апрели соли 2001 № 544 "Дар бораи пурзӯр намудани мубориза муқобили муҳоҷирати ғайриқонунӣ дар Ҷумҳурии Тоҷикистон", қарори Ҳукумати Ҷумҳурии Тоҷикистон аз 15 майи соли 1999 № 218 "Дар бораи тасдиқи Қоидаҳои иқомати шаҳрвандони хориҷӣ дар Ҷумҳурии Тоҷикистон ва Қоидаҳои убури транзитии шаҳрвандони хориҷӣ аз тариқи қаламрави Ҷумҳурии Тоҷикистон", қарори Ҳукумати Ҷумҳурии Тоҷикистон аз 21 сентябри соли 2000 № 389 "Дар бораи амалӣ намудани бақайдгирии давлатии дактилоскопӣ" ва дигар санадҳои меъёриву ҳуқуқии Ҷумҳурии Тоҷикистон, санадҳои ҳуқуқии байналмилалие, ки онҳоро Ҷумҳурии Тоҷикистон эътироф намудааст ва Низомномаи мазкур ба шумор мераванд.

4. Ба ҳар як шаҳрванди хориҷӣ ва шахси бешаҳрвандӣ, ки ба Ҷумҳурии Тоҷикистон ворид мегардад, ҳангоми анҷом додани назорати сарҳадӣ дар нуқтаҳои гузаргоҳи Сарҳади давлатӣ варақаи муҳоҷирати хориҷӣ, ки намунаашро мақомоти ваколатдор муайян кардааст, супорида мешаванд.

Баробари ба нуқтаи таъинот расидани шаҳрванди хориҷӣ ё шахси бешаҳрвандӣ дар варақаи муҳоҷиратӣ қайди (мӯҳри мудаввар ва имзои корманди масъули) мақомоти корҳои дохилии маҳалли зисти муваққатӣ гузошта мешаванд, ба истиснои аъзои ҳайатҳои намояндагии расмии давлатҳои хориҷӣ, кормандони намояндагиҳои дипломатии давлатҳои хориҷӣ ва ташкилотҳои байналмилалӣ, инчунин хабарнигорони васоити ахбори оммаи хориҷӣ, ки дар Вазорати корҳои хориҷии Ҷумҳурии Тоҷикистон ба қайд гирифта шудаанд.

Варақаи муҳоҷиратӣ аз ҷониби ҳар як шаҳрванди хориҷӣ ва шахси бешаҳрвандӣ шахсан ҳангоми аз Ҷумҳурии Тоҷикистон хориҷ шудан ба намояндаи хадамоти сарҳадии Кумитаи давлатии амнияти миллии Ҷумҳурии Тоҷикистон дар нуқтаҳои гузаргоҳи Сарҳади давлатӣ супорида мешавад.

Дар сурати гум кардани варақаи муҳоҷиратӣ, шахсони ҳуқуқӣ ва воқеӣ, ки шаҳрвандони хориҷӣ ва шахсони бешаҳрвандиро ба Ҷумҳурии Тоҷикистон даъват намудаанд, вазифадоранд, ки барои гирифтани нусхаи варақаи муҳоҷиратии гумшуда ба мақомоти дахлдори хадамоти сарҳадии Тоҷикистон иттилоъ диҳанд.

Агар фавран гирифтани нусхаи варақаи муҳоҷиратии гумшуда ғайри имкон бошад, масъалаи иҷозати хуруҷи шахсони мазкур аз Ҷумҳурии Тоҷикистон бо мақомоти Кумитаи давлатии амнияти миллии Ҷумҳурии Тоҷикистон ва Вазорати корҳои хориҷии Ҷумҳурии Тоҷикистон мувофиқа мегардад.

5. Бо мақсади амалӣ намудани назорати муҳоҷират:

Кумитаи давлатии амнияти миллии Ҷумҳурии Тоҷикистон:

- вуруди қонуниро ба Ҷумҳурии Тоҷикистон назорат мекунад, дурустии мақсадҳои баёнёфта ва мақсадҳои аслии шаҳрвандони хориҷӣ ва шахсони бешаҳрвандиро ошкор менамояд. Бо ин мақсад пурсиши ибтидоӣ ва баҳисобгирии шаҳрвандони хориҷӣ ва шахсони бешаҳрвандиро, ки ба Ҷумҳурии Тоҷикистон ворид мегарданд, бо тартиби аз ҷониби Кумитаи муайянкардашуда, анҷом медиҳад;

- ҳангоми ба Ҷумҳурии Тоҷикистон ворид шудани шаҳрвандони хориҷӣ ва шахсони бешаҳрвандӣ ба онҳо варақаҳои муҳоҷиратӣ медиҳад ва ҳангоми аз Ҷумҳурии Тоҷикистон рафтан, аз онҳо варақаҳои муҳоҷиратиро мегирад;

- ҳар ҳафта дар бораи ба Ҷумҳурии Тоҷикисгон ворид шудан ва аз Ҷумҳурии Тоҷикистон рафтани шаҳрвандони хориҷӣ ва шахсони бешаҳрвандӣ ба мақомоти ваколатдор бо нишон додани ҳадафҳои воридшавӣ маълумот, оид ба тарафи қабулкунанда (шахси ҳуқуқӣ ва воқеӣ) ва дигар маълумоти марбут ба шахсияти шахсони ворид ва хориҷшаванда, инчунин маълумот оид ба шахсони аз ҳудуди Ҷумҳурии Тоҷикистон хориҷ карда шуда, иттилоот пешниҳод менамояд;

- дар сурати дар нуқтаҳои гузаргоҳи Сарҳади давлатии Ҷумҳурии Тоҷикистон аз ҷониби шаҳрвандони хориҷӣ ва шахсони бешаҳрвандӣ ошкор гардидани ҳодисаҳои бе раводид ба Ҷумҳурии Тоҷикистон ворид шудан ва дигар ҳолатҳои дағалона вайрон кардани қоидаҳои воридшавӣ ва иқомат ҷиҳати баргардонидани онҳо ба давлатҳое, ки аз онҳо омадаанд, тадбирҳои фаврии баргардонидани онҳоро меандешад. Дар сурати набудани имконияти таъҷилан баргардонидани онҳо, шахсони мазкур дар ҷойҳои махсуси бо ин мақсад ҷиҳозонидашудаи нуқтаҳои назорату гузаргоҳи қӯшунҳои сарҳадӣ муваққатан ҷойгир карда мешаванд;

- дар сурати дар нуқтаҳои гузаргоҳи Сарҳади давлатии Ҷумҳурии Тоҷикистон ошкор кардани далелҳои аз тарафи шаҳрвандони хориҷӣ ё шахсони бешаҳрвандӣ вайрон кардани қонунгузории Ҷумҳурии Тоҷикистон, ки таҳти амали Кодекси ҷиноятии Ҷумҳурии Тоҷикистон қарор мегиранд, мақомоти таҳқиқи Кумитаи давлатии амнияти миллии Ҷумҳурии Тоҷикистон маводро таҳия намуда, ба мақомоти салоҳиятдори Ҷумҳурии Тоҷикистон барои тибқи қонунгузории Ҷумҳурии Тоҷикистон ба ҷавобгарӣ кашидани онҳо, равона мекунад;

- дар сурати дар нуқтаҳои гузаргоҳи Сарҳади давлатии Ҷумҳурии Тоҷикистон ошкор гардидани ҳодисаҳои барои дар Ҷумҳурии Тоҷикистон паноҳгоҳ ҷӯстан омадани шаҳрвандони хориҷӣ ё шахсони бешаҳрвандӣ, дар бораи ин ба Хадамоти муҳоҷирати Вазорати корҳои дохилии Ҷумҳурии Тоҷикистон барои ҷо ба ҷо кардани шахсони мазкур дар Марказ барои иқомати муваққатии шахсони паноҳҷӯянда маълумот медиҳад;

- дар доираи салоҳияти худ дар ҳамкорӣ бо мақомотҳои корҳои дохилӣ аз болои риояи қоидаҳои иқомати шаҳрвандони хориҷӣ ва шахсони бешаҳрвандӣ дар қаламрави Ҷумҳурии Тоҷикистон назорат мебарад;

- пешбурди марказонидашудаи манбаи умумии маълумотро дар ҷиҳати баҳисобгирии муҳоҷирони ғайриқонунӣ ва шахсоне, ки тибқи қонунгузорӣ воридшавиашон ба қаламрави Ҷумҳурии Тоҷикистон манъ аст, анҷом медиҳад;

- ҳангоми ошкор намудани вайронкунии қоидаҳои иқомат дар Ҷумҳурии Тоҷикистон аз ҷониби шаҳрвандони хориҷӣ ва шахсони бешаҳрвандӣ тибқи тартиботи муқарраргардида дар хусуси ба ҷавобгарӣ кашидани шахсони мазкур ё рондани онҳо қарор қабул мекунад ва рондани онҳоро аз Ҷумҳурии Тоҷикистон ба амал мебарорад. Интиқоли шахсони рондашуда аз Ҷумҳурии Тоҷикистон аз ҳисоби маблағҳои худи шахсони рондашуда амалӣ мегардад;

- ҳар моҳ ба мақомоти ваколатдор оид ба теъдоди шахсоне, ки барои вайрон кардани қоидаҳои иқомат дар Ҷумҳурии Тоҷикистон аз Ҷумҳурии Тоҷикистон ронда шудаанд, маълумот пешниҳод менамояд ва дар доираи салоҳияти худ чорабиниҳои дигарро, ки ба мубориза муқобили муҳоҷирати ғайриқонунӣ равона карда шудаанд, анҷом медиҳад.

Вазорати корҳои дохилии Ҷумҳурии Тоҷикистон:

- назорати риояи қоидаҳои иқомат ва убури транзитии шаҳрвандони хориҷӣ ва шахсони бешаҳрвандро дар қаламрави Ҷумҳурии Тоҷикистон анҷом медиҳад;

- ҳангоми ошкор намудани вайронкунии қоидаҳои иқомат дар Ҷумҳурии Тоҷикистон аз ҷониби шаҳрвандони хориҷӣ ва шахсони бешаҳрвандӣ бобати ба ҷавобгарӣ кашидан ё ба мақомоти Кумитаи давлатии амнияти миллии Ҷумҳурии Тоҷикистон додани онҳо барои ҳал намудани масъалаи рондани онҳо аз Ҷумҳурии Тоҷикистон тибқи тартиби муқаррарнамудаи қонунгузорӣ, қарор қабул мекунад;

- ҷобаҷокунии шахсонеро, ки бояд аз Ҷумҳурии Тоҷикистон мутобиқи қарорҳои қабулшуда бо тартиби муқарраршуда ронда шаванд, дар қабулгоҳҳои тақсимоти мақомоти корҳои дохилии Ҷумҳурии Тоҷикистон, таъмин менамояд;

- назоратро оиди риояи қонунгузории Ҷумҳурии Тоҷикистон дар самти муҳоҷирати меҳнатии шаҳрвандони хориҷӣ ва шахсони бешаҳрвандӣ амалӣ менамояд;

- аз мақомоти ваколатдор дар бораи миқдори шаҳрвандони хориҷӣ ва шахсони бешаҳрвандӣ, ки ба Ҷумҳурии Тоҷикистон ворид ва хориҷ мегарданд, оид ба кишваре, ки онҳо шаҳрванди он ҳастанд, ё дар он ба таври доими истиқомат мекунанд, ҷамъоварии марказонидашудаи маълумотро анҷом медиҳад;

- хориҷ карда шуд (қарори Ҳукумати ҶТ аз 30.03.2013 № 167);

- дархост дар бораи додани мақоми гуреза ба шахсоне, ки паноҳгоҳ меҷӯянд, қабул намуда, оиди онҳо қарор қабул менамояд;

- ба Кумитаи давлатии амнияти миллии Ҷумҳурии Тоҷикистон дар хусуси шахсоне, ки дархости онҳо оид ба гирифтани мақоми гуреза рад карда шудааст, дар барои ҷойгиркунии онҳо дар қабулгоҳҳои тақсимотӣ минбаъд аз ҳудуди Ҷумҳурии Тоҷикистон хориҷ кардани ин шахсон, иттилоот медиҳад;

- чорабиниҳоро ҷиҳати бақайдгирии давлатии дактилоскопии шаҳрвандони хориҷӣ ва шахсони бешаҳрвандӣ, ки дар Ҷумҳурии Тоҷикистон паноҳгоҳ меҷӯянд, амалӣ менамояд.

Вазорати корҳои хориҷии Ҷумҳурии Тоҷикистон:

- ба мақомоти ваколатдор оид ба масъалаи воридшавии шаҳрвандони хориҷӣ ва шахсони бешаҳрвандӣ ба Ҷумҳурии Тоҷикистон ва хориҷи онҳо аз Ҷумҳурии Тоҷикистон, маълумоти заруриро пешниҳод менамояд;

- ҳангоми рондани шаҳрвандони хориҷӣ ва шахсони бешаҳрвандӣ аз Ҷумҳурии Тоҷикистон барои вайрон кардани қоидаҳои иқомат дар Ҷумҳурии Тоҷикистон бо мақомоти дахлдор ҳамкории мутақобиларо, анҷом медиҳад.

Хадамоти муҳоҷирати назди Ҳукумати Ҷумҳурии Тоҷикистон (қарори Ҳукумати ҶТ аз 30.03.2013 № 167):

- назоратро оид ба риояи қонунгузории Ҷумҳурии Тоҷикистон дар самти муҳоҷирати меҳнатии шаҳрвандони хориҷӣ ва шахсони бешаҳрвандӣ амалӣ менамояд (қарори Ҳукумати ҶТ аз 30.03.2013 № 167);

6. Шаҳрвандони хориҷӣ ва шахсони бешаҳрвандӣ, ки дар Ҷумҳурии Тоҷикистон паноҳгоҳ меҷӯянд, то таъсиси Марказ барои иқомати муваққатии шахсони паноҳҷӯянда ва то қабул намудани қарор бобати ба онҳо додани мақоми гуреза дар ҷойҳои зисти муваққатӣ, ки бо мақомоти амният ва корҳои дохилӣ мувофиқа шудаанд, истиқомат мекунанд.

7. Бо дархости якдигар мақомоти ваколатдор дар масъалаи назорати муҳоҷиратӣ ба ҳамдигар сари вақт маълумоти фавриро пешниҳод менамоянд.