Ҳукумати Ҷумҳурии Тоҷикистон

ҚАРОР

Дар бораи Вазорати корҳои хориҷии Ҷумҳурии Тоҷикистон

Мувофиқи моддаи 12 Қонуни конститутсионии Ҷумҳурии Тоҷикистон "Дар бораи Ҳукумати Ҷумҳурии Тоҷикистон" ва ҷиҳати иҷрои Фармони Президенти Ҷумҳурии Тоҷикистон аз 30 ноябри соли 2006 № 9 "Дар бораи такмили сохтори мақомоти марказии ҳокимияти иҷроияи Ҷумҳурии Тоҷикистон" Ҳукумати Ҷумҳурии Тоҷикистон қарор мекунад:

1. Низомнома, Сохтори дастгоҳи марказӣ, Нақшаи идоракунӣ ва Номгӯи ташкилотҳои системаи Вазорати корҳои хориҷии Ҷумҳурии Тоҷикистон тасдиқ карда шаванд (замимаҳои 1,2,3 ва 4) (қарори Ҳукумати ҶТ аз 26.02.2011 № 50).

2. Шумораи ниҳоии кормандони дастгоҳи марказии Вазорати корҳои хориҷии Ҷумҳурии Тоҷикистон ба миқдори 227 воҳид (бе ҳайати хизматрасон) муқаррар карда шавад, ки аз онҳо 167 воҳид аз ҳисоби буҷети ҷумҳуриявӣ ва 60 воҳид аз ҳисоби маблағҳои махсуси Вазорат маблағгузорӣ карда мешавад (қарори Ҳукумати ҶТ аз 04.10.2013 № 456, аз 2.04.2014 № 236, аз 31.12.2014 № 792, аз 30.12.2019 № 657, аз 27.03.2021 № 92, аз 30.12.2021 № 576).

3. Ба Вазорати корҳои хориҷии Ҷумҳурии Тоҷикистон иҷозат дода шавад, ки 5 муовини Вазир, аз ҷумла як муовини якум ва ҳайати мушовараи иборат аз 7 нафар дошта бошад (қарори Ҳукумати ҶТ аз 1.08.2011 № 382, аз 27.03.2021 № 92).

Ба Вазорати корҳои хориҷии Ҷумқурии Тоҷикистон лимити автомашинаҳои сабукрави хизматӣ ба миқдори 8 адад муқаррар карда шавад.

4. Маблағгузории Вазорати корҳои хориҷии Ҷумҳурии Тоҷикистон аз ҳисоби маблағҳои буҷети ҷумҳуриявӣ анҷом дода шавад.

5. Қарори Ҳукумати Ҷумҳурии Тоҷикистон аз 3 майи соли 2006 № 190 "Дар бораи тасдиқи Низомномаи Вазорати корҳои хориҷии Ҷумҳурии Тоҷикистон" аз эътибор соқит дониста шавад.