ҲУКУМАТИ ҶУМҲУРИИ ТОҶИКИСТОН

ҚАРОР

Дар бораи Низомномаи дастёрони ихтиёрӣ

Мутобиқи моддаи 12 Қонуни Ҷумҳурии Тоҷикистон "Дар бораи иштироки шаҳрвандон дар таъмини тартиботи ҷамъиятӣ" ва моддаи 57 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" Ҳукумати Ҷумҳурии Тоҷикистон қарор мекунад:

1. Низомномаи дастёрони ихтиёрӣ тасдиқ карда шавад (замима мегардад).

2. Мақомоти ҳифзи ҳуқуқ:

1) барои ҷалби дастёрони ихтиёрӣ дар таъмини тартиботи ҷамъиятӣ чораҳои зарурӣ андешанд;

2) ҳамкории муштаракро бо дастёрони ихтиёрӣ тибқи санадҳои меъёрии ҳуқуқӣ ва Низомномаи мазкур ташкил намоянд;

3) таҳлил ва ҷамъбасти натиҷаҳои фаъолияти дастёрони ихтиёриро ҳамасола амалӣ намоянд;

4) якҷо бо мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳо, шаҳри Душанбе ва шаҳру ноҳияҳо, инчунин корхона, муассиса ва ташкилотҳои дигар:

- оид ба баррасии масъалаҳои ташкилии фаъолияти дастёрони ихтиёрӣ ва сари вақт аз қайди нави баҳисобгирӣ гузаштани онҳо чораҳои зарурӣ андешанд;

- барои бо ҳуҷраҳои корӣ, воситаҳои нақлиёт, алоқа ва ҳуҷҷатҳои дахлдор таъмин кардани дастёрони ихтиёрӣ ҳангоми навбатдории онҳо чораҳои зарурӣ андешанд.

3. Сардорони ситодҳои дастёрони ихтиёрӣ ҳар семоҳа ба мақомоти иҷроияи маҳаллии ҳокимияти давлатӣ ва мақомоти ҳифзи ҳуқуқ ҳисоботи омориро оид ба фаъолияти дастёрони ихтиёрӣ пешниҳод намоянд.

4. Қарори Ҳукумати Ҷумҳурии Тоҷикистон аз 2 августи соли 2010, № 400 "Оид ба тасдиқи Низомномаи дружинаи ихтиёрӣ дар Ҷумҳурии Тоҷикистон" аз эътибор соқит дониста шавад.