ФАРМОНИ ПРЕЗИДЕНТИ ҶУМҲУРИИ ТОҶИКИСТОН

Дар бораи таҷдиди сохтори Дастгоҳи иҷроияи Президенти Ҷумҳурии Тоҷикистон

Бо мақсади тақвияти низоми ҳамоҳангсозии сиёсати рушд, ҷорӣ намудани усулҳои нави идоракунӣ ва банақшагирии стратегӣ дар асоси муқаррароти Қонуни Ҷумҳурии Тоҷикистон "Дар бораи низоми мақомоти идоракунии давлатӣ" мутобиқи моддаи 69 Конститутсияи Ҷумҳурии Тоҷикистон фармон медиҳам (Фармони президенти ҶТ аз 26.09.2017 № 939):

1. Сохтори замимагардидаи Дастгоҳи иҷроияи Президенти Ҷумҳурии Тоҷикистон тасдиқ карда шавад.

2. Ба Роҳбари Дастгоҳи иҷроияи Президенти Ҷумҳурии Тоҷикистон ду муовин, аз ҷумла муовини якум муқаррар карда шавад.

3. Бо мақсади вусъат бахшидани навсозиҳои институтсионалӣ ва мутобиқсозии низоми идоракунии давлатӣ ба стандартҳои байналмилалӣ бахши мушовирони давлатии Президенти Ҷумҳурии Тоҷикистон ба бахши ёрдамчиёни Президенти Ҷумҳурии Тоҷикистон табдил дода шуда, мансабҳои мушовирони калон, мушовирони Президенти Ҷумҳурии Тоҷикистон, ёрдамчиёни Президенти Ҷумҳурии Тоҷикистон ва Сарвазири Ҷумҳурии Тоҷикистон, ки мутобиқан дар котиботи Президенти Ҷумҳурии Тоҷикистон ва котиботи Сарвазири Ҷумҳурии Тоҷикистон фаъолият менамоянд, барҳам дода шаванд.

5. Дастгоҳи иҷроияи Президенти Ҷумҳурии Тоҷикистон бо дарназардошти тағйир ёфтани мақоми бахши мушовирони давлатии Президенти Ҷумҳурии Тоҷикистон ба бахши ёрдамчиёни Президенти Ҷумҳурии Тоҷикистон барои ба Феҳристи мансабҳои давлатии Ҷумҳурии Тоҷикистон ворид кардани тағйиру иловаҳои дахлдор пешниҳодҳо манзур намояд.

6. Раёсати ҳуқуқи Дастгоҳи иҷроияи Президенти Ҷумҳурии Тоҷикистон таъсис ёфта, ба зиммаи он вазифаҳои нав вобаста ба соҳаҳои мухталифи ҳуқуқ вогузор карда шавад.

7. Ҷиҳати тавсеаи ҳамоҳангсозии банақшагирии стратегӣ, гузаронидани мониторинги татбиқи сиёсати мувофиқашуда ва нақшаҳои стратегии қабулгардида, таҳияи пешниҳодот оид ба такмили онҳо, аз ҷумла таҳлили самарабахшии фаъолияти мақомоти давлатӣ, таҳияи тавсияҳо оид ба такмили минбаъдаи фаъолияти онҳо, ҳамчунин ҳамоҳангсозии шӯроҳои назди Президенти Ҷумҳурии Тоҷикистон ва роҳбарии ислоҳоти идоракунии давлатӣ Раёсати банақшагирии стратегӣ ва ислоҳот таъсис дода шавад.

8. Бо мақсади таҳияи методологияҳои замонавии идоракунии молияи давлатӣ ва ҳамоҳангсозии фаъолияти раванди ислоҳоти идоракунии молияи давлатӣ, инчунин тақвияти кори Комиссияи буҷетӣ Раёсати молия таъсис дода шавад.

9. Ҷиҳати пешбурди ислоҳот дар идоракунии маҳал ва ҳамоҳангсозии фаъолияти мақомоти иҷроияи маҳаллии ҳокимияти давлатӣ, кор бо раисони вилоятҳо, шаҳру ноҳияҳо, ҳамоҳангсозии ҷараёни таҳия ва қабули санадҳои меъёрии ҳуқуқӣ вобаста ба ислоҳоти идоракунӣ ва таҳлили вазъи маҳал Раёсати кор бо мақомоти идоракунии маҳал таъсис дода шавад.

10. Раёсати рушди иҷтимоӣ таъсис дода шуда, фаъолияти он ба таҳлил ва мониторинги татбиқи сиёсат ва стратегияҳои дахлдор дар соҳаҳои тандурустӣ, ҳифзи иҷтимоии аҳолӣ, масъалаҳои оила ва сиёсати гендерӣ равона карда шавад. (Фармони президенти ҶТ аз 14.02.2020 № 1453)

11. Бо мақсади тақвияти фаъолият вобаста ба таҳлил дар соҳаҳои маориф, фарҳанг ва иттилоот, ҳамоҳангсозӣ дар пешбурди сиёсати давлатӣ дар тарбияву таълими ҷавонон ва рушди варзиш раёсати маориф, фарҳанг ва иттилоот таъсис дода шавад (Фармони Президенти ҶТ аз 25.06.2020 № 1565).

12. Раёсати рушди инфрасохтор таъсис дода шуда, кори он ба ҳамоҳангсозӣ, мониторинг ва ҷорӣ кардани усулҳои нави ҳисоботдиҳӣ дар соҳаҳои нақлиёт, алоқа, энергетика, саноат, меъморӣ ва сохтмон равона карда шавад.

13. Бо мақсади тақвияти чорабиниҳо дар самти мониторинг ва арзёбии раванди ислоҳоти соҳаи аграрӣ ва ҳамоҳангсозии фаъолияти ҳифзи муҳити зист Раёсати кишоварзӣ ва ҳифзи муҳити зист таъсис дода шавад.

14. Раёсати робитаҳои хориҷӣ таъсис дода шуда, вазифаҳои Котиботи комиссияи ҳукуматӣ оид ба ҳалли масъалаҳои ҳудудӣ ва сарҳадӣ ба он вогузор карда шаванд.

15. Раёсати коргузорӣ ва назорат таъсис дода шуда, инчунин вазифаҳои вобаста ба муроҷиати шахсони воқеӣ ва ҳуқуқӣ ба он вогузор карда шаванд.

16. Бо мақсади тақвияти кор дар самти ҳамоҳангсозии фаъолияти мақомоти ҳарбӣ ва ҳифзи ҳуқуқ, аз ҷумла вазифаҳои марбут ба мудофиаи гражданӣ ва ҳолатҳои фавқулодда, таъмини амнияти фазои иттилоотӣ Раёсати мудофиа ва тартиботи ҳуқуқӣ таъсис дода шавад (Фармони Президенти ҶТ аз 7.09.2019 № 1354).

17. Бо мақсади самаранок ба роҳ мондани ҳаллу фасли масъалаҳои шаҳрвандӣ, бахшиши ҷазо, мукофотҳои давлатӣ, ҳифзи ҳуқуқ ва манфиатҳои кӯдакон ва мониторинги амалишавии муқаррароти санадҳои ҳуқуқии байналмилалӣ дар соҳаи ҳуқуқи инсон раёсати кафолатҳои ҳуқуқи инсон ва дар таркиби он шӯъбаи ҳифзи ҳуқуқи кӯдак таъсис дода шавад (Фармони Президенти ҶТ аз 15.07.2015 № 523).

17(1). Барои тақвияти кор дар самти ҳамоҳангсозӣ ва таҳлили муносибатҳои меҳнатӣ, муҳоҷират, шуғли аҳолӣ ва таҳкими робитаҳо бо ҳамватанони бурунмарзӣ шуъбаи меҳнат, муҳоҷират ва шуғли аҳолӣ таъсис дода шавад (Фармони президенти ҶТ аз 14.02.2020 № 1453).

17(2). Бо мақсади арзёбии дастовардҳои илмӣ ва корҳои инноватсионӣ ва истифодаи самараноки онҳо дар фаъолияти истеҳсолкунандагони ватанӣ шуъбаи илм ва инноватсия таъсис дода шавад (Фармони президенти ҶТ  аз 25.06.2020 № 1565).

18. Бо мақсади мукаммалсозии вазифаҳо дар самти идоракунии захираҳои инсонӣ, дуруст ба роҳ мондани механизмҳои арзёбии фаъолияти хизматчиёни давлатӣ, ки дар Дастгоҳи иҷроияи Президенти Ҷумҳурии Тоҷикистон фаъолият менамоянд, шуъбаи кадрҳо таъсис дода шавад (Фармони Президенти ҶТ аз 7.09.2019 № 1354).

19. Маркази технологияҳои иттилоотӣ ва коммуникатсионӣ бо ҳуқуқи Раёсат таъсис дода шавад. Фаъолияти Марказ ба иҷро ва ҳамоҳангсозии масъалаҳои идоракунии оперативии Шабакаи ягонаи давлатии технологияҳои иттилоотӣ ва коммуникатсионӣ ва шабакаи дохилии Дастгоҳи иҷроияи Президенти Ҷумҳурии Тоҷикистон, ҷорӣ кардани хизматрасонии шабакавӣ, асосҳои мубодилаи электронии ҳуҷҷатҳо, порталҳои ягонаи мақомоти давлатӣ, танзими фаъолияти онҳо ва ривоҷи истифодабарии технологияҳои иттилоотию коммуникатсионӣ дар мақомоти идоракунии давлатӣ равона карда шавад.

19(1). Бо мақсади тақвияти фаъолияти бойгонӣ ва китобхонаи идоравӣ, ба таври доимӣ нигоҳдории ҳуҷҷатҳои бойгонӣ барои истифодаи самараноки хизматӣ, истеҳсолӣ ва илмии онҳо, инчунин ҳифзу нигоҳдории фонди китобхона бахши бойгонӣ ва китобдорӣ таъсис дода шавад (Фармони Президенти ҶТ аз 29.04.2023 № 556).

20. Бинобар таҷдиди сохтори Дастгоҳи иҷроияи Президенти Ҷумҳурии Тоҷикистон шӯъбаю сохторҳои зерин барҳам дода шаванд:

- Шӯъбаи ҳуқуқ

- Шӯъбаи ислоҳоти иқтисодӣ ва инвеститсияҳо

- Шӯъбаи молия

- Шӯъбаи ташкилӣ

- Шӯъбаи меҳнат ва ҳифзи иҷтимоии аҳолӣ

- Шӯъбаи тандурустӣ, оид ба масъалаҳои занон ва оила

- Шӯъбаи илм ва маориф

- Шӯъбаи фарҳанг

- Шӯъба оид ба масъалаҳои ҷавонон, спорт ва туризм

- Шӯъбаи иттилоотию таҳлилӣ

- Шӯъбаи саноат ва энергетика

- Шӯъбаи нақлиёт ва коммуникатсия

- Шӯъбаи сохтмон ва меъморӣ

- Шӯъбаи кишоварзӣ ва истифодаи замин

- Шӯъбаи экология ва ҳолатҳои фавқулодда

- Шӯъбаи робита бо кишварҳои хориҷӣ

- Шӯъбаи умумӣ

- Шӯъбаи назорат

- Шӯъбаи мудофиа ва тартиботи ҳуқуқӣ

- Шӯъбаи кафолатҳои конститутсионии ҳуқуқи шаҳрвандон

- Шӯъбаи кадрҳо

- Маркази иттилоотию техникӣ

- Котиботи комиссияи ҳукуматӣ оид ба ҳалли масъалаҳои ҳудудӣ ва сарҳадӣ.

21. Роҳбари Дастгоҳи иҷроияи Президенти Ҷумҳурии Тоҷикистон:

- ҷиҳати муайян намудани вазифаҳои воҳидҳои сохтории Дастгоҳи иҷроияи Президенти Ҷумҳурии Тоҷикистон, ки фаъолияти Президенти Ҷумҳурии Тоҷикистон ва Ҳукумати Ҷумҳурии Тоҷикистонро таъмин менамоянд, тадбирҳо андешида, ӯҳдадориҳои мансабии шахсони мансабдори ба ҳайати онҳо дохилшавандаро муайян намояд;

- дар мӯҳлати ду моҳ бо тартиби муқарраргардида вобаста ба шумораи штатии Дастгоҳи иҷроияи Президенти Ҷумҳурии Тоҷикистон пешниҳодҳо таҳия ва манзур намояд;

- бо тартиби муқарраргардида лоиҳаи Низомномаи Дастгоҳи иҷроияи Президенти Ҷумҳурии Тоҷикистонро бо дарназардошти муқаррароти Фармони мазкур дар мӯҳлати ду моҳ таҳия ва пешниҳод намояд.

22. Дастгоҳи иҷроияи Президенти Ҷумҳурии Тоҷикистон дар хусуси ворид намудани тағйироти дахлдор ба санадҳои амалкунандаи меъёрии ҳуқуқии Ҷумҳурии Тоҷикистон, ки фаъолияти Дастгоҳи иҷроияи Президенти Ҷумҳурии Тоҷикистонро танзим менамоянд, пешниҳодҳо манзур намояд.

23. Фармони Президенти Ҷумҳурии Тоҷикистон аз 30 октябри соли 2001, №702 "Дар бораи навсозии сохтори Дастгоҳи иҷроияи Президенти Ҷумҳурии Тоҷикистон" аз эътибор соқит дониста шавад.

Сохтори Дастгоҳи иҷроияи Президенти Ҷумҳурии Тоҷикистон

Роҳбарияти Дастгоҳи иҷроияи Президенти Ҷумҳурии Тоҷикистон

Ёрдамчии Президенти Ҷумҳурии Тоҷикистон оид ба масъалаҳои иқтисодӣ

Ёрдамчии Президенти Ҷумҳурии Тоҷикистон оид ба масъалаҳои робитаҳои хориҷӣ

Ёрдамчии Президенти Ҷумҳурии Тоҷикистон оид ба масъалаҳои кадрҳо

Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа

Ёрдамчии Президенти Ҷумҳурии Тоҷикистон оид ба масъалаҳои ҳуқуқӣ - Намояндаи ваколатдори Президенти Ҷумҳурии Тоҷикистон дар Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон