Ҳукумати Ҷумҳурии Тоҷикистон

ҚАРОР

Дар бораи Вазорати нақлиёти Ҷумҳурии Тоҷикистон

Мутобиқи моддаи 12 Қонуни конститутсионии Ҷумҳурии Тоҷикистон "Дар бораи Ҳукумати Ҷумҳурии Тоҷикистон", моддаи 42 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" ва ҷиҳати иҷрои Фармони Президенти Ҷумҳурии Тоҷикистон аз 28 феврали соли 2011, № 1026 "Дар бораи такмили минбаъдаи сохтори мақомоти марказии ҳокимияти иҷроияи Ҷумҳурии Тоҷикистон" Ҳукумати Ҷумҳурии Тоҷикистон қарор мекунад:

1) Низомнома, Сохтори Дастгоҳи марказӣ, Нақшаи идоракунӣ ва Номгӯи корхонаҳо, муассисаҳо ва дигар ташкилотҳои системаи Вазорати нақлиёти Ҷумҳурии Тоҷикистон тасдиқ карда шаванд (замимаҳои 1, 2, 3 ва 4).

2) Шумораи ниҳоии кормандони Вазорати нақлиёти Ҷумҳурии Тоҷикистон ба миқдори 363 воҳид (бе ҳайати хизматрасон), аз ҷумла Дастгоҳи марказӣ ба миқдори 77 воҳид (бе ҳайати хизматрасон) муқаррар карда шавад (қарори Ҳукумати ҶТ аз 12.09.2012 № 485, аз 29.12.2017 № 596).

3) Ба Вазорати нақлиёти Ҷумҳурии Тоҷикистон 3 муовини Вазир, аз ҷумла як муовини якум ва ҳайати мушовара иборат аз 7 нафар муқаррар карда шавад.

4) Ба Вазорати нақлиёти Ҷумҳурии Тоҷикистон лимити мошинҳои сабукрави хизматӣ ба миқдори 22 адад, аз ҷумла барои Дастгоҳи марказӣ ба миқдори 11 адад муқаррар карда шавад.

5) Маблағгузории Дастгоҳи марказӣ ва мақомоти дар Нақшаи идоракунии Вазорати нақлиёти Ҷумҳурии Тоҷикистон зикргардида, аз ҳисоби маблағҳои буҷети ҷумҳуриявӣ ва дигар маблағҳо дар мувофиқа бо Вазорати молияи Ҷумҳурии Тоҷикистон амалӣ карда шавад.

6) Бо роҳи муттаҳидсозии корхонаҳои воҳиди давлатии "Экспедитсияи нақлиётии минтақаи Ҳисор", "Экспедитсияи нақлиётии минтақаи Рашт", "Экспедитсияи нақлиётии минтақаи Суғд", "Экспедитсияи нақлиётии минтақаи Кӯлоб", "Экспедитсияи нақлиётии минтақаи Қӯрғонтеппа" ва "Экспедитсияи нақлиётии минтақаи ВМКБ" Корхонаи воҳиди давлатии "Нақлиёти автомобилӣ ва хизматрасонии логистикӣ" ташкил карда шавад (қарори Ҳукумати ҶТ аз 3.04.2012 № 168).

7) Вориси ҳуқуқии корхонаҳои воҳиди давлатии "Экспедитсияи нақлиётии минтақаи Ҳисор", "Экспедитсияи нақлиётии минтақаи Рашт", "Экспедитсияи нақлиётии минтақаи Суғд", "Экспедитсияи нақлиётии минтақаи Кӯлоб", "Экспедитсияи нақлиётии минтақаи Қӯрғонтеппа" ва "Экспедитсияи нақлиётии минтақаи ВМКБ" пас аз ба имзо расидани санади супоридану қабул намудани амвол Корхонаи воҳиди давлатии "Нақлиёти автомобилӣ ва хизматрасонии логистикӣ" дониста шавад (қарори Ҳукумати ҶТ аз 3.04.2012 № 168).

8) Вазорати нақлиёти Ҷумҳурии Тоҷикистон бо тартиби муқарраргардида масъалаҳои ташкилию ҳуқуқии Корхонаи воҳиди давлатии "Нақлиёти автомобилӣ ва хизматрасонии логистикӣ"-ро ҳал намояд (қарори Ҳукумати ҶТ аз 3.04.2012 № 168).

9) Қарорҳои зерини Ҳукумати Ҷумҳурии Тоҷикистон аз эътибор соқит дониста шаванд:

-қарори Ҳукумати Ҷумҳурии Тоҷикистон аз 28 декабри соли 2006, № 602 "Дар бораи Вазорати нақлиёт ва коммуникатсияи Ҷумҳурии Тоҷикистон";

-қарори Ҳукумати Ҷумҳурии Тоҷикистон аз 2 феврали соли 2009, № 83 "Масъалаҳои Вазорати нақлиёт ва коммуникатсияи Ҷумҳурии Тоҷикистон".