Ҳукумати Ҷумҳурии Тоҷикистон

ҚАРОР

Дар бораи ворид намудани тағйиру илова ба қарори Ҳукумати Ҷумҳурии Тоҷикистон аз 2 ноябри соли 2007 №544

Мутобиқи моддаи 43 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" Ҳукумати Ҷумҳурии Тоҷикистон қарор мекунад:

Ба қарори Ҳукумати Ҷумҳурии Тоҷикистон аз 2 ноябри соли 2007 №544 "Дар бораи тасдиқи Қоидаҳои интиқоли молҳо аз ҷониби шахсони воқеӣ тавассути сарҳади гумрукии Ҷумҳурии Тоҷикистон бо тартиби имтиёзнок ва соддагардонидашуда" тағйиру иловаҳои зерин ворид карда шаванд:

Ба Қоидаҳои интиқоли молҳо аз ҷониби шахсони воқеӣ тавассути сарҳади гумрукии Ҷумҳурии Тоҷикистон бо тартиби имтиёзнок ва соддагардонидашуда:

- ба банди 9 сархати панҷум бо мазмуни зайл илова карда шавад:

"Тартиби соддагардонидашудаи барасмиятдарории гумрукӣ бо истифодаи мизони ягонаи боҷҳои гумрукӣ ва андозҳо ҳангоми аз ҷониби шахси воқеӣ ворид намудани молҳо ба маблағи зиёда аз 5000 доллари ШМА татбиқ карда намешавад. Нисбат ба чунин зиёдшавӣ тартиби умумии барасмиятдарории гумрукӣ ва пардохти боҷҳои гумрукӣ ва андоз, ки қонунгузории Ҷумҳурии Тоҷикистон пешбинӣ менамояд, татбиқ карда мешавад.";

- дар сархатҳои якум ва дуюми банди 13 мизонҳои "0,20" ва "0,40" мутаносибан ба мизонҳои "0,40" ва "0,60" иваз карда шаванд.

Ба Руйхати молҳое, ки шахсони воқеӣ метавонанд бе пардохти боҷҳои гумрукӣ ва андозҳо ба микдори маҳдуд ворид намоянд:

- дар банди 1 калимаҳои "як литр" ба калимаҳои "ду литр" иваз карда шаванд;

- дар банди 2 калимаҳои "200 дона (1 блок) ба калимаҳои "ду баста (400 дона) иваз карда шаванд.