Ҳукумати Ҷумҳурии Тоҷикистон

ҚАРОР

Дар бораи тартиби таъсис ва ташкили фаъолияти кумитаҳои ҳамоҳангсозии мусоидат ба шуғли аҳолӣ

Мутобиқи моддаи 11 Қонуни Ҷумҳурии Тоҷикистон "Дар бораи мусоидат ба шуғли аҳолӣ" ва бо мақсади таҳияи қарорҳои мувофиқашуда ва ба роҳ мондани муколамаи иҷтимоӣ ҷиҳати муайянсозӣ ва татбиқи сиёсати шуғли аҳолӣ Ҳукумати Ҷумҳурии Тоҷикистон қарор мекунад:

1. Низомнома, ҳайати Кумитаи ҷумҳуриявии ҳамоҳангсозии мусоидат ба шуғли аҳолӣ ва Қоидаҳои таъсис ва ташкили фаъолияти кумитаҳои маҳаллии ҳамоҳангсозии мусоидат ба шуғли аҳолӣ тасдиқ карда шаванд (замимаи 1, 2, 3).

2. Раисони Вилояти Мухтори Кӯҳистони Бадахшон, вилоятҳо, шаҳри Душанбе, шаҳрҳо ва ноҳияҳо дар асоси Қоидаҳои мазкур дар мӯҳлати ду моҳ Низомномаи кумитаҳои ҳамоҳангсозии мусоидат ба шуғли аҳолии маҳаллиро тасдиқ намуда, ҳайати кумитаҳоро муайян ва фаъолияти амалии онҳоро ташкил намоянд.

3. Вазорати меҳнат, муҳоҷират ва шуғли аҳолии Ҷумҳурии Тоҷикистон роҳбарии методии фаъолияти кумитаҳои ҳамоҳангсозии мусоидат ба шуғли аҳолиро дар сатҳи минтақавӣ таъмин намояд (қарори Ҳукумати ҶТ аз 5.11.2014 № 707).

4. Қарори Ҳукумати Ҷумҳурии Тоҷикистон аз 31 марти соли 2004 № 133 "Дар бораи тартиби ташкили фаъолияти кумитаҳои ҳамоҳангсозии мусоидат ба шуғли аҳолӣ" аз эътибор соқит дониста шавад.