Бо қарори Ҳукумати ҶТ аз 14.05.2020 № 271 аз эътибор соқит дониста шуд.

Қоидаҳои муайянкунии оилаҳои камбизоат, таъин ва пардохти ҷубронпулиҳо барои истифодаи қувваи барқ ва гази табиӣ

1. Муқаррароти умумӣ

1. Қоидаҳои муайян кардани оилаҳои камбизоат, таъин ва пардохти ҷубронпулиҳо барои истифодаи қувваи барқ ва гази табиӣ (минбаъд-Қоидаҳо) шарт ва усулҳои таъсис додани комиссияҳои вилоятӣ, ноҳиявӣ (шаҳрӣ) оид ба таъин ва пардохти ҷубронпулӣ ба оилаҳо ва шаҳрвандони яккаву танҳои камбизоат барои истифодаи қувваи барқ ва гази табиӣ, инчунин шартҳои таъин ва тартиби аз рӯи меъёрҳо пардохтани ҷубронпулиро ба ин категорияи аҳолӣ барои истифодаи қувваи барқ ва гази табиӣ муайян мекунад.

2. Ҳуқуқи гирифтани ҷубронпулӣ барои истифодаи қувваи барқ, ва гази табиӣ (минбаъд - ҷубронпулӣ) ба оилаҳо ё шаҳрвандони яккаву танҳое дода мешавад, ки аз ҷониби комиссияҳои пешбининамудаи ҳамин Қоидаҳо камбизоат эътироф шудаанд.

II. Тартиби таъин намудани ҷубронпулӣ

3. Ҷубронпулӣ дар маҳалли зист ба оилаҳо ва шаҳрвандони яккаву танҳои камбизоате, ки даромади миёнаи моҳонаи ҳар як аъзои оила (ё шаҳрванд) аз 50 фоизи андозаи ҳадди ақали музди меҳнати муқараргардида паст ва ё ба он баробар мебошад, таъин карда мешавад.

4. Далели тасдиқкунандаи зист дар ҳайати оила (хоҷагӣ) сабти маълумоти марбута дар дафтари ҳавлӣ (хоҷагӣ) ва ё ордер аст.

5. Таъин намудани ҷубронпулӣ ба оилаҳои (шаҳрвандони) камбизоат дар асоси аризаи шахсии сарвари оила (хоҷагӣ) ва ё шаҳрванди яккаву танҳо (замимаи 1) ва тавсияи комиссияи мақомоти худидораи ҷамоат, шаҳрак ва ё комиссияи идораи манзилию коммуналӣ ва шӯрои маҳалла (замимаи 2), инчунин қарори комиссияи ноҳиявӣ (шаҳрӣ) сурат мегирад.

6. Оилаҳои бесаробонмондаи серфарзанд, ки фарзандони ноболиғ доранд, оилаҳое, ки ду ва ё зиёда аъзои маъюб доранд, аз ҷумла оилаҳое, ки сарварашон маъюби ғайри қобили кор аст, ҳамчунин пиронсолон ва маъюбони яккаву танҳо, ки даромади миёнаи моҳонаи ҳар як аъзои оила (шаҳрванд) аз 50 фоизи андозаи музди меҳнати миёнаи маҳалли зисташон кам ё ба он баробар мебошад, ба гирифтани ҷубронпулӣ ҳукуқи афзалиятнок доранд (қарори Ҳукумати аз 28.05.2009 № 306).

Зимнан, шумораи оилаҳо ва шаҳрвандони камбизоате, ки чубронпулӣ мегиранд, набояд аз 20 фоизи шумораи умумии оилаҳое, ки расман дар миқёси воҳиди маъмурии ҳуқуқӣ ба қайд гирифта шудаанд, зиёд бошад. Ҷадвали нншондиҳандаҳои камбизоатӣ дар миқёси ҷумҳурӣ дар асоси маълумоти расмии мақомоти омор аз ҷониби Вазорати меҳнат ва ҳифзи иҷтимоии аҳолии Ҷумҳурии Тоҷикистон ба Вазорати молияи Ҷумҳурии Тоҷикистон ва комиссияҳои ноҳиявӣ (шаҳрӣ) манзур мегардад.

Шумораи миёнаи аъзои як оила 6 нафар муайян карда шавад. Вазорати меҳнат ва ҳифзи иҷтимоии аҳолии Ҷумҳурии Тоҷикистон, Вазорати молияи Ҷумҳурии Тоҷикистон аз рӯи ин нишондиҳанда шумораи оилаҳо ва шаҳрвандони камбизоатро дар ҳамбастагӣ бо дигар рақаму маълумотҳо муайян намуда, дар мавриди пеш омадани зарурат ҳаҷми маблағгузориро тибқи меъёрҳои муқарарнамудаи бандҳои 25 ва 26 Қоидаҳои мазкур амалӣ менамоянд (қарори Ҳукумати аз 28.05.2009 № 306).

Аз маблағи барои хизматрасонии воқеии Бонки давлатии амонатгузории Ҷумҳурии Тоҷикистон "Амонатбонк" пешбинишуда, дар холати бозгардонии маблағҳое, ки барои пардохти ҷубронпулиҳо пешбинӣ шудаанд, дар моҳи ҳисоботии оянда 0,8 фоиз аз ҳаҷми маблағи баргардонидашуда кам карда шавад (қарори Ҳукумати аз 28.05.2009 № 306).

7. Ҷубронпулӣ ба оилаҳо ва шаҳрвандони яккаву танҳои камбизоат новобаста аз мавҷуд будани ҳисобкунакҳои газӣ таъин карда мешавад.

Барои истифодаи гази табиӣ, ҳангоми набудани ҳисобкунаки газӣ, ҷубронпулӣ алоҳида ба ҳар як аъзои оила (хоҷагӣ), аммо на зиёдтар аз 6 нафар муқаррар карда мешавад.

8. Ҷубронпулӣ ба мӯҳлати як сол таъин карда шуда, ба таври нақдӣ ва ё ғайрмнақдӣ (бо интихоби худи шаҳрванд) ҳар ду моҳ дода мешавад, Баъди гузаштани мӯҳлати таъини ҷубронпулӣ сарвари оила ё шаҳрванди яккаву танҳо барои минбаъд гирифтани ҷубронпулӣ тибқи муқаррароти банди 5 Қоидаҳо бояд ба комиссияи марбута муроҷиат намояд.

Шумора ва рӯйхати оилаҳо ва шаҳрвандони яккаву танҳои камбизоат аз ҷониби комиссияҳои ноҳиявӣ (шаҳрӣ) ҳар ду моҳ, то санаи 10 моҳи сеюм муайян, тасдиқ ва барои маблағгузорӣ пешниҳод карда мешаванд.

Тартиби пардохти нақдии ҷубронпулиро Вазорати меҳнат ва ҳифзи иҷтимоии аҳолии Ҷумҳурии Тоҷикистон ва Вазорати молияи Ҷумҳурии Тоҷикистон дар мувофиқа бо Бонки давлатии амонатгузории Ҷумҳурии Тоҷикистои "Амонатбонк" (минбаъд "Амонатбонк") муайян менамоянд.

III. Тартиби ташкил додан, ҳуқуқ ва вазифаҳои комиссияҳо

9. Муайян кардани оилаҳо ва ё шаҳрвандони камбизоат, таъин намудани ҷубронпулӣ ва назорати истифодаи мақсадноки маблағҳо ба ӯҳдаи Комиссияҳои вилоятӣ, ноҳиявӣ (шаҳрӣ) ва Комиссияҳои мақомоти худидораи шаҳрак ва деҳа, ё Комиссияҳои идораи манзилию коммуналӣ ва шӯрои маҳаллаҳо вогузор карда мешаванд.

10. Комиссияи мақомоти худидораи шаҳрак ва деҳа, идораи манзилию коммуналӣ ва шӯрои маҳаллаҳо (минбаъд комиссияи маҳаллӣ) аз ҳисоби кормандони (фаъолон ва аъзои) ин мақомот таъсис дода мешавад. Комиссияи мазкурро дар сатҳи ҷамоат ё шӯрои маҳалла раисони онҳо ва дар сатҳи идораҳои манзилию коммуналӣ бошад, сардор роҳбарӣ мекунад. Ҳайати комиссияи маҳаллӣ набояд аз 7 нафар зиёд бошад. Таъсисёбӣ ва ҳайати комиссияи мазкур бо қарори Раиси ноҳия (шаҳр) тасдиқ карда мешавад.

Комиссияи маҳаллӣ ба комиссияи ноҳиявӣ (шаҳрӣ) дар самти таъиноти ҷубронпулӣ ба оилаҳои (шаҳрвандони яккаву танҳои) камбизоат ва назорати иҷрои муқаррароти Қоидаҳо мусоидат менамояд.

11. Вазифаҳои комиссияи маҳаллӣ аз инҳо иборат мебошанд:

- қабул ва баррасии муроҷиати шаҳрвандон ва аризаҳои сарварони оилаҳо (хоҷагиҳо), ё шаҳрвандони яккаву танҳо дар хусуси таъин намудани ҷубронпулӣ;

- гузаронидани таҳқиқи вазъи моддиву маишии оилаҳо ва шаҳрвандони муроҷиаткунанда;

- тартиб додани хулосаҳо (тавсияҳо) дар бораи зарурати таъини ҷубронпулӣ ва пешниҳод намудани онҳо ба комиссияи ноҳиявӣ (шаҳрӣ);

- огоҳ намудани оилаҳое (шаҳрвандоне), ки аз ҷониби комиссияи ноҳиявӣ (шаҳрӣ) ба онҳо ҳамчун оилаи ё шаҳрванди камбизоат ҷубронпулӣ таъин шудааст;

- ба роҳ мондани корҳои фаҳмондадиҳӣ оид ба таъиноти ҷубронпулӣ.

12. Комиссияи маҳаллӣ дар ҳама мавридҳо вазифадор аст, ки маълумотномаҳои дар ариза дарҷнамудаи аризадиҳандагонро санҷида барояд. Ба мақомоти дахлдор, аз ҷумла комиссияи ноҳиявӣ (шаҳрӣ) ҷиҳати такмили низоми ҷубронпулиҳои унвонӣ таклифҳо пешниҳод намояд.

Комиссияи маҳаллӣ метавонад тавассути пурсиши ҳамсояҳо ва хешу ақрабои шахси муроҷиаткарда (аризадиҳанда) ва бо тартиб додани санади дахлдор воқеияти даромади оила ва шаҳрвандро санҷад ва муайян намояд.

13. Тавсияҳои комиссияи маҳаллӣ (замимаи 2) ва рӯйхати оилаҳо ва шаҳрвандони яккаву танҳои камбизоат бо қарори дахлдори раиси ҷамоат ё шӯрои маҳалла ва дар сатҳи идораҳои манзилию коммуналӣ бошад, бо фармони сардори идора тасдиқ қарда мешаванд.

14. Комиссияи вилоятӣ ва ноҳиявӣ (шаҳрӣ) аз ҳисоби кормандони раёсатҳои (шӯъбаҳои) ҳифзи иҷтимоии аҳолӣ, молия, меҳнат, шуғли аҳолӣ, омор, муассисаҳои таъминкунандаи барқ ва гази табиӣ, мақомоти иттифоқҳои касаба ва дигар идораҳои дахлдор таъсис дода мешавад. Комиссияро мутобиқан муовини Раиси вилоят, ноҳия (шаҳр), роҳбарӣ менамояд. Таъсисёбӣ ва ҳайати комиссия бо қарори Раиси вилоят, ноҳия (шаҳр) тасдиқ карда мешавад.

15. Ҳалли масъалаҳои ташкили фаъолияти комиссияи ноҳиявӣ (шаҳрӣ) ба ӯҳдаи котиби озоди комиссия, ки ӯро раиси Комиссияи ноҳиявӣ (шаҳрӣ) таъин мекунад, вогузор карда мешавад.

Музди меҳнати котиби озоди комиссия ба музди меҳнати моҳонаи вазифавии сармутахассиси дастгоҳи Раиси ноҳия (шаҳр) (бе дарназардошти кӯмакпӯлиҳою иловапулиҳо) баробар аст. Андозаи музди меҳнати котиби озоди комиссия дар таносуб ба шумораи оилаҳо ва шаҳрвандони яккаву танҳои камбизоат вобаста буда, дар доираи маблағҳои ба ин мақсадҳо пешбинишуда, амалӣ мегардад.

Тартиби ташкил ва фаъолияти котиби озоди комиссияро Вазорати меҳнат ва ҳифзи иҷтимоии аҳолии Ҷумҳурии Тоҷикистон ва Вазорати молияи Ҷумҳурии Тоҷикистон муайян мекунанд.

16. Вазифа ва ҳуқуқҳои комиссияи ноҳиявӣ (шаҳрӣ):

- хулоса, қарорҳои комиссияҳои маҳаллӣ ва рӯйхати тавсияшудагонро баррасӣ намуда, дар сурати ба талаботи Қоидаҳо ҷавобгӯ буданашон, онҳоро бо қарори худ тасдиқ менамояд;

- нусхаи аслии қарор ва рӯйхати оилаҳо ва шаҳрвандони камбизоатро дар доираи 20 фоизи шумораи умумии оилаҳои расман ба қайд гирифташудаи ноҳия (шаҳр) бо нишон додани истифодабарандагони барқ ва гази табиӣ дар алоҳидагӣ ба Вазорати молияи Ҷумҳурии Тоҷикистон ҷиҳати ҳисобу китоб ва интиқоли маблағи ҷубронпулӣ пешниҳод менамояд;

- арзу шикоятҳои шаҳрвандонро аз хусуси фаъолияти комиссияҳои маҳаллӣ оид ба таъини ҷубронпулӣ баррасӣ менамояд;

- назорати истифодаи мақсадноки ҷубронпулиҳоро таъмин мекунад;

- барои беҳдошти низоми ҷубронпулиҳо ва фаъолияти комиссияҳои маҳаллӣ ба нишонии комиссияи вилоятӣ ва ба мақомоти дахлдор, таклифҳо пешниҳод менамояд;

- фаъолияти комиссияҳои маҳаллӣ ва котиби озоди комиссияҳоро таъмин ва мавриди санҷиш қарор дода, барои бартараф намудани камбудиҳои ошкоргардида дар доираи ваколатҳояш тадбирҳо меандешад;

- мунтазам тавассути воситаҳои ахбори омма ва роҳҳои дигари иттилоотӣ оид ба муқаррароти қарори дахлдори Ҳукумати Ҷумҳурии Тоҷикистон чорабиниҳои зарурӣ анҷом медиҳад;

- ҳар нимсола ба Вазорати меҳнат ва ҳифзи иҷтимоии аҳолии Ҷумҳурии Тоҷикистон ахбор пешниҳод менамояд;

- нусхаи рӯйхати оилаҳо ва шаҳрвандони камбизоатро пас аз ҳар ду моҳ то рӯзи 10 моҳи сеюм ба таври расмӣ ба муассисаҳои таъминкунандаи барқу гази табиӣ ва шӯъбаҳои БДА "Амонатбонк" ҷиҳати пардохти ҷубронпулӣ ва муайян намудани қарздории оилаҳои камбизоат мутобиқан аз истифодаи қувваи барқ ва гази табиӣ пешниҳод менамояд (қарори Ҳукумати аз 28.05.2009 № 306);

- таъминоти комиссияҳои маҳаллӣ ва фаъолияти худро бо маводи ҳуҷҷатгузорӣ дар доираи маблағҳои пешбинишуда таъмин менамояд.

17. Бо мақсади дастрас намудани иттилооти аниқ комиссияи ноҳиявӣ (шаҳрӣ) ҳуқуқ дорад аз корхонаву муассисаҳое, ки муроҷиаткунандагон ё тавсияшудагон дар онҳо кор (таҳсил) мекунанд, муассисаҳои табобативу профилактикӣ, мақомоти андоз, идораи манзилию коммуналӣ ва ғайраҳо маълумоти заруриро талаб намояд.

IV. Тартиби баҳисобгирии даромадҳо ва ҳисобу китоби даромади ҳар як аъзои оила (шаҳрванд) барои эътироф намудани камбизоатии онҳо ва таъин кардани ҷубронпулӣ ба онҳо

18. Ҳисобу китоби даромади ҳар як аъзои оила (шаҳрвандони яккаву танҳо) аз рӯи аризаи пешниҳоднамудаи шаҳрвандон (сарвари оила), ки дар он тамоми сарчашмаи даромади оила, нусхаи ҳуҷҷатҳои тасдиқкунандаи имтиёзҳо ва дигар ҳолатҳои иҷтимоии он дарҷ карда мешаванд, ба амал бароварда мешавад.

Маълумотҳои дар ариза пешниҳодшуда бо имзо ва муҳри раиси комиссияи маҳаллӣ тасдиқ мегардад.

19. Комиссияхои маҳаллӣ ҳақ доранд, ки дурустии маълумотҳои дар ариза дарҷ кардашударо санҷида бароянд.

Ҳисобу китоби даромади ҳар як аъзои оила (шаҳрвандони яккаву танҳо) бо дарназардошти ҳаҷми даромадҳои аъзои оила ва ё шаҳрванд барои 12 моҳи тақвимии охири пеш аз додани ариза ба амал бароварда мешавад. Дар ин сурат ҳаҷми даромадҳои ҳар як узви оила ё шаҳрванд, ки дар шакли пули ва шайъӣ гирифтаанд, ба ҳисоб гирифта мешаванд.

20. Ба ҳаҷми даромадҳо маблағҳои зерин ба ҳисоб гирифта мешаванд:

- маблағи музди меҳнат, аз ҷумла пардотҳои ҷанбаи ҷубронпулӣ ё ҳавасмандкунӣ дошта, ки дар низоми музди меҳнат пешбинӣ шуда ва аз рӯи натиҷаҳои кори моҳона пардохт карда мешаванд;

- маблағи пардохти корҳои мавсимию муваққатӣ ва дигар намудҳои корҳо, ки дар асоси шартномаҳои меҳнатии мӯҳлатнок иҷро карда мешаванд, даромадҳо аз иҷрои шартномаҳои дорои хусусияти шаҳрвандию ҳуқуқӣ, ҳамчунин даромадҳо аз фаъолияти соҳибкорӣ, инфиродии меҳнатӣ ва худиштиғол. Даромади мазкур дар асоси маълумоти мақомоти андоз муайян карда мешавад;

- даромадҳои аъзои хоҷагии деҳқонӣ (фермерӣ) бо дарпазардошти андозаҳои дар созишнома ё шартномаҳои дахлдори хоҷагӣ басташуда, ки дар натиҷаи истифодаи маҳсулоти хоҷагиҳо ба даст омадаанд;

- даромадҳои софе, ки аз фурӯши маҳсулот ё ҳосили хоҷагии шахсии ёрирасон ва наздиҳавлигӣ ба даст омадаанд;

- маблағи даромадҳо аз додани иҷораи (кирояи) амволи ғайриманқул ва дигар моликияти шахсӣ;

- маблағи стипендияҳо, нафақаҳо, кӯмакпулиҳо (ба ғайр аз кӯмакпулии яквақта), инчунин маблағи алиментҳо ва подош барои кашфиёту ихтироот;

- маблағҳои интиқолнамудаи аъзои оилае, ки дар муҳоҷирати меҳнатӣ мебошанд.

21. Даромади ҳар як аъзои оила ҳангоми муайян кардани камбизоатӣ барои оилаҳо бо роҳи тақсим кардани ҳаҷми умумии даромади ҳамаи аъзои оила барои давраи ҳисоботӣ ба шумораи аъзои оила ва барои шаҳрванди яккаву танҳо - ҳаҷми умумии даромади ӯ ҳисоб карда мешавад.

22. Ба даромади умумии оила (шаҳрванд) инҳо дохил намешаванд;

- алиментҳое, ки узви оила пардохт менамояд;

- субсидияҳо барои пӯшонидани хароҷоти пардохти хизматрасонии манзилию коммуналӣ;

- кӯмакпулиҳои унвонии яквақта.

23. Ҳангоми ҳисоб намудани даромади умумии оила даромади шахсони зерин, ки бо вуҷуди мӯҳлати тӯлонии дар оила набуданашон ва аз қайди зист набаромаданашон мувофиқи муқаррароти қонунгузорӣ ҳуқуқ ба манзили истиқоматиро гум накардаанд, ба назар гирифта намешавад:

- хизматчиёни ҳарбие, ки хизмати ҳарбии мӯҳлатнокро аз рӯи даъват адо мекунанд;

- шахсоне, ки дар ҷойҳои маҳрумӣ аз озодӣ қарор доранд;

- шахсоне, ки дар муҳоҷирати меҳнатӣ буда, барои нигаҳдории (буҷети) оила саҳмгузор нестанд.

- шахсоне, ки дар муассисаҳои статсионарии давлатӣ (хонаинтернатҳо, интернатҳо ва монанди инҳо) нигоҳубин карда мешаванд.

24. Дар сурати дар якҷоягӣ истиқомат кардани якчанд (ду ва ё зиёда) оила, ки хоҷагидориашон алоҳида аст ва ҳисоби алоҳидаи пардохти ҳаққи хизматрасонии коммуналиро доранд, даромади умумии онҳо алоҳида ҳисоб карда мешавад ва ариза низ алоҳида пешниҳод мегардад.

V. Меъёрҳо ва тартиби пардохти ҷубронпулӣ

25. Андозаи ҷубронпулӣ ҳангоми мавҷуд набудани ҳисобкунакҳои газӣ мувофиқи меъёрҳои мавсимии истифодаи қувваи барқ ва гази табиӣ ба таври зерин ҳисоб карда мешавад:

- дар давраи моҳҳои апрел - сентябр:

а) аз рӯи меъёри то 100 кВт/с истифодаи воқеии қувваи барқ, дар як моҳ ба як оила (хоҷагӣ) ва ё шаҳрванд;

б) истифодаи газ - то 10 метри мукааб дар як моҳ барои як нафар.

- дар давраи моҳҳои октябр - март:

а) аз рӯи меъёри то 200 кВт/с истифодаи воқеии қувваи барқ, дар як моҳ ба як оила (хоҷагӣ) ва ё шаҳрванд;

б) истифодаи газ - то 12 метри мукааб дар як моҳ барои як нафар.

26. Ҷубронпулӣ барои истифодаи гази табиӣ ҳангоми мавҷуд будани ҳисобкунаки газӣ аз рӯи истифодаи меъёрҳои зерини моҳона барои як оила (хоҷагӣ) ва ё шаҳрванд дода мешавад:

- дар давраи моҳҳои апрел - сентябр то 20 метри мукааб;

- дар давраи моҳҳои октябр - март то 30 метри мукааб.

Меъёри ҷубронпулӣ ба он оилаҳо ё шаҳрвандони камбизоате, ки танҳо аз истифодаи қувваи барқ бархӯрдоранд, чунин муқаррар шудааст:

- дар давраи моҳҳои апрел - сентябр то 150 кВт/с барои истифодаи қувваи барқ дар як моҳ ба як оила;

- дар давраи моҳҳои октябр - март то 250 кВт/с барои истифодаи қувваи барқ дар як моҳ ба як оила.

Ҷубронпулӣ барои истифодаи қувваи барқ ба аҳолии Вилояти Мухтори Кӯҳистони Бадахшон мувофиқи меъёрҳои зикргардида, инчунин нархномаҳои амалкунандаи фурӯши қувваи барқ, ки барои муштариёни Ширкати саҳомии холдингии кушодаи "Барқи Тоҷик" муқаррар карда шудааст, ҳисоб карда мешавад.

27. Сохторҳои фурӯши барқ ва ташкилотҳои таъминкунандаи гази табиӣ барои истифодаи воқеии қувваи барқ ва гази табиӣ аз ҷониби оилаҳо ва шаҳрвандони камбизоат масъул буда, барои муайян намудани қарздории оилаҳо ва шаҳрвандони камбизоат аз ҳаққи истифодаи қувваи барқ ва гази табиӣ бояд ба комиссияи шаҳрӣ (ноҳиявӣ) мусоидат намоянд (қарори Ҳукумати аз 28.05.2009 № 306).

28. Пардохти ҷубронпулӣ дар ҳолатҳои зерин қатъ мегардад;

- ҳангоми тағйири ҷойи зисти оила ва ё шаҳрванд;

- дар сурати аз ҷониби шаҳрвандон дар ариза пешниҳод намудани маълумоти нодуруст, ки сабаби ғайриқонунӣ таъин намудани ҷубронпулӣ гардидааст;

- ҳангоми аз тарафи оилаҳо ё шаҳрвандон пас аз гирифтани маблағи ҷубронпулӣ ба таври нақдӣ дар муддати як моҳ ба муассисаҳои фурӯши барқ ва гази табиӣ напардохтани ҳаққи истифодаи қувваи барқ ва гази табиӣ;

- дар сурати аз ҷониби муассисаҳои таъминкунандаи барқ ва гази табиӣ қатъ гардидани интиқоли барқ ва гази табиӣ.

29. Масъулият ва ҷавобгарӣ оид ба истифодаи ҳаҷми воқеии қувваи барқ ва гази табиӣ, пардохт ва дастрас намудани ҷубронпулӣ ба зиммаи комиссияҳои ноҳиявӣ (шаҳрӣ) ва мақомоти "Амонатбонк" гузошта мешавад.

VI. Манбаъҳо ва тартиби маблағгузории ҷубронпулӣ

30. Манбаи маблағҳое, ки барои ҷубронпулӣ равона мешаванд, буҷети ҷумҳуриявӣ мебошад. Истифодаи маблағҳои мазкур барои пардохти дигар имтиёзҳо манъ аст.

31. Маблағгузории пардохти ҷубронпулӣ аз ҷониби Вазорати молияи Ҷумҳурии Тоҷикистон дар асоси пешниҳоди комиссияҳои ноҳиявӣ (шаҳрӣ) ба амал бароварда мешавад. Дар сурати сари вақт манзур нагардидани пешниҳоди комиссияҳои ноҳиявӣ (шаҳрӣ) ҳисоби маблағи ҷубронпулӣ дар асоси рақаму нишондиҳандаҳои моҳҳои гузашта амалӣ мегардад.

Ҳангоми дар моҳи ҳисоботӣ дар мӯҳлатҳои муқарраргардида аз ҷониби комиссияҳои ноҳиявӣ (шаҳрӣ) пешниҳод нагардидани маълумотнома, ҳисоби маблағи ҷубронпулӣ дар асоси рақамҳои нишондиҳандаҳои моҳҳои гузашта ва ё худ тибқи меъёрҳои муқаррарнамудаи бандҳои 25 ва 26 ҳамин Қоидаҳо амалӣ карда шавад (қарори Ҳукумати аз 28.05.2009 № 306);

Шумораи оилаҳо ва шаҳрвандони камбизоат, барои ҳисоби маблағи ҷубронпулии истифодаи гази табиӣ аз рӯи нишондиҳандаи 25 фоиз, аз он ҷумла барои дорандагони ҳисобкунаки газӣ 20 фоиз ва барои онҳое, ки ҳисобкунаки газӣ надоранд 5 фоиз, аз шумораи умумии оилаҳо ва шаҳрвандони камбизоат, ки аз хизматрасонии қувваи барқ бархӯрдоранд муқаррар карда шаванд (қарори Ҳукумати аз 28.05.2009 № 306).

Гузаронидани маблағҳои ҷубронпулӣ ба ҳисоби транзитии хазинадории раёсат (шӯъба)-ҳои молияи мақомоти иҷроияи маҳаллии ҳокимияти давлатӣ ҳар ду моҳ, пас аз рӯзи 10-уми моҳи минбаъда ва то 30 ноябри соли ҳисоботӣ бо ҳисоб гирифтани пардохти моҳи декабри ҳамин сол аз рӯи нишондиҳандаҳои моҳи ноябр дар доираи маблағҳои буҷетие, ки барои ин мақсадҳо пешбинӣ шудаанд, анҷом дода мешавад.

32. Гузаронидани маблағҳо аз ҳисоби транзитии буҷети ҷумҳуриявии дар мақомоти молияи маҳаллибуда дар асоси қарори дахлдори комиссияи ноҳиявӣ (шаҳрӣ) бо истифода аз шумораи оилаҳо ва шаҳрвандони камбизоат, меъёрҳои муайяншудаи қувваи барқ ва гази табиӣ ва бо дарназардошти тағйирёбии тарифҳои онҳо сурат мегирад. Дар ҳолатҳои ба вуҷуд омадани норасоии маблағҳои пешбинишуда дар асоси нишондиҳандаҳои сатҳи камбизоатӣ ба дархости пешниҳодшудаи комиссияи ноҳиявӣ (шаҳрӣ) тағйирот ворид карда мешавад.

33. Мақомоти "Амонатбонк" пардохти ҷубронпулиро дар асоси рӯйхатҳои пешниҳодгардидаи комиссияи ноҳиявӣ (шаҳрӣ) ба оилаҳо ва шаҳрвандони камбизоат бо пуррагӣ сари вақт таъмин менамоянд. Бо ин мақсад дар муассисаҳои марбута "равзана" ва ё ҷои муносиби дигаре ташкил дода, ҷиҳати шаффофияти пардохти ҷубронпулиҳо ведомостҳои пулдиҳии ном ба ном ба роҳ монда мешавад.

Ҳангоми зарурат маблағи ҷубронпулӣ ба шаҳрвандони барҷомонда ва бемор дар ҷои будубоши онҳо ва ё ба шахси бовариноки онҳо пардохта мешавад.

Ҳангоми ба вуҷуд омадани маблағҳои истифоданашудаи ҷубронпулӣ ин маблағҳо бе боздошти фоизаш ба Сарраёсати хазинадории марказии Вазорати молияи Ҷумҳурии Тоҷикистон баргардонида мешаванд.

34. Дар давоми соли ҳисоботӣ, то моҳи ноябр истифодаи маблағҳои баргардонидашуда ва сарфашуда аз ҷониби Вазорати молияи Ҷумҳурии Тоҷикистон дар асоси пешниҳодоти иловагии комиссияи ноҳиявӣ (шаҳрӣ) бо дарназардошти муроҷиати шаҳрвандон ва дигар ҳолатҳои зарурӣ ҷиҳати таъмини ҷубронпулиҳои пардохтнашуда маблағгузорӣ карда мешаванд.

35. Бо мақсади фароҳам овардани шароити муносиби кору фаъолияти комиссияҳо аз ҳисоби маблағҳои дар буҷети ҷумҳуриявӣ пешбинишуда, барои харидории маводи ҳуҷҷатгузорӣ ва таҷҳизоти компютерӣ - то 0.5 фоиз ва барои маоши котибони озоди комиссияҳои ноҳиявӣ (шаҳрӣ) - 0.5 фоиз истифода мешавад. Истифодаи мақсадноки маблағҳои мазкурро Вазорати молияи Ҷумҳурии Тоҷикистон ва Вазорати меҳнат ва ҳифзи иҷтимоии аҳолии Ҷумҳурии Тоҷикистон анҷом медиҳанд.

Ба комиссияи маҳаллӣ оид ба муайян кардани оилаҳои (шаҳрвандони) камбизоат, барои таъин намуданн ҷубронпулии истифодаи қувваи барқ ва гази табиӣ ___________________________________

Ариза (маълумот) дар бораи вазъи иҷтимоӣ ва даромадҳои оила (шаҳрванди яккаву танҳо) барои муайян кардани камбизоатӣ

Ному насаб ______________________________________________________

Рақами шиноснома, таърих ва аз тарафи кӣ дода шудааст ___________

_________________________________________________________________

Бинобар сабаби вазъи ногувори моддию иҷтимоӣ хоҳиш менамоям, ки оилаи манро ҳамчун оилаи камбизоат эътироф намуда, ҷубронпулӣ барои пардохти фарқияти истифодаи ____________________________ таъин намоед. (қувваи барқ ё гази табиӣ)

Дар асоси аризаи пешниҳодшаванда маълум менамоям, ки ҳайати оилаам аз ______ нафар иборат буда, даромади умумии мо дар 12 моҳи охир ба таври зайл аст:

+---+------------------------------------------------+-------+-------ҷ
|№  |                                                |Андозаи|Ҳаҷми  |
|т/т| Номгӯи даромадҳо ва манбаи он                  |даромад|солонаи|
|   |                                                |дар як |даромад|
|   |                                                |моҳ    |       |
+---+------------------------------------------------+-------+-------+
|1  |- маблағи музди меҳнат, аз ҷумла пардохтҳои     |       |       |
|   |ҷанбаи ҷубронпулӣ ё ҳавасмандкунӣ дошта, ки дар |       |       |
|   |низоми музди меҳнат пешбинӣ шуда ва аз рӯи      |       |       |
|   |натиҷаҳои кори моҳона пардохт карда мешаванд.   |       |       |
|   |                                                |       |       |
+---+------------------------------------------------+-------+-------+
|   |                                                |       |       |
|2  |- маблағи пардохти корҳои мавсимию муваққатӣ ва |       |       |
|   |дигар намудҳои корҳо, ки дар асоси шартномаҳои  |       |       |
|   |меҳнатии мӯҳлатнок иҷро карда мешаванд,         |       |       |
|   |даромадҳо аз иҷрои шартномаҳои дорои хислати    |       |       |
|   |шаҳрвандию ҳуқуқӣ, ҳамчунин даромадҳо аз        |       |       |
|   |фаъолияти соҳибкорӣ, аз худиштиғол ва фаъолияти |       |       |
|   |инфиродии меҳнатӣ.                              |       |       |
|   |                                                |       |       |
+---+------------------------------------------------+-------+-------+
|   |                                                |       |       |
|3  |- даромадҳои аъзои хоҷагии дехқонӣ (фермерӣ), бо|       |       |
|   |дарназардошти андозаҳои дар созишнома ё         |       |       |
|   |шартномаҳои дахлдори хоҷагӣ басташуда, ки дар   |       |       |
|   |натиҷаи истифодаи маҳсулоти хоҷагиҳо            |       |       |
|   |(фурӯши ҳосил) ба даст омадаанд.                |       |       |
|   |                                                |       |       |
+---+------------------------------------------------+-------+-------+
|   |                                                |       |       |
|4  |- даромадҳои софе, ки аз фурӯши маҳсулот ё      |       |       |
|   Жҳосили хоҷагии шахсии ёрирасон ва               |       |       |
|   |наздиҳавлигӣ ба даст омадаанд.                  |       |       |                   
|   |                                                |       |       |
+---+------------------------------------------------+-------+-------+
|   |                                                |       |       |
|5  |- маблағи даромадҳо аз додани иҷораи (кирояи)   |       |       |
|   |амволи ғайри манқул (хона, ҳавлӣ, автомашина ва |       |       |
|   |монанди инҳо) ва дигар моликияти шахсӣ.         |       |       |
|   |                                                |       |       |
+---+------------------------------------------------+-------+-------+
|   |                                                |       |       |
|6  |- стипендияҳо, нафақаҳо, кӯмакпулиҳо (ба ғайр аз|       |       |
|   |кӯмакпулии яквақта), маблағи алиментҳо ва подош |       |       |
|   |барои кашфиёту ихтироот.                        |       |       |
|   |                                                |       |       |
+---+------------------------------------------------+-------+-------+
|   |                                                |       |       |
|7  |- маблағҳои интиқолнамудаи аъзои оилае, ки дар  |       |       |
|   |муҳоҷирати меҳнатӣ мебошанд.                    |       |       |
|   |                                                |       |       |
+---+------------------------------------------------+-------+-------+
|   |                                                |       |       |
|8  |- дигар намудҳои даромад                        |       |       |
|   |                                                |       |       |
+---+------------------------------------------------+-------+-------+
|   |                                                |       |       |
|   |                           Ҷамъ:                |       |       |
|   |                                                |       |       |
+---+------------------------------------------------+-------+-------+

Эзоҳ: Ҳайати оилаи аризадиҳанда бо маълумотномаи дахлдори ҷамоат, шӯрои маҳалла ё мақомоти манзилию коммуналӣ тасдиқ кардашуда ва ба ариза замима мегардад.

Агар дар як хоҷагӣ ду ва ё зиёда оила зиндагӣ дошта бошанд, ҳар яке дар алоҳидагӣ ариза пешниҳод менамояд.

Сарвари оила (шаҳрванд)__________________________________________

                                               ному насаб / имзо

Суроғаи ҷои истиқомат:___________________________________________

_________________________________________________________________

"_____" __________ соли 200__

_________________________

Барои дурустии маълумоти дар ариза овардашуда аризадиҳанда шахсан ҷавобгар мебошад.

Хулосаи (тавсияи) комиссияи мақомоти худидораи шаҳрак ва деҳа, ё комиссияҳои идораи манзилию коммуналӣ ва шӯрои маҳаллаҳо

Комиссияи маҳалии _______________________________________________

_________________________________________________________________

аризаи шаҳрвандро _______________________________________________

дар хусуси муайян намудани вазъи моддию иҷтимоии ӯ ва оилааш ҷиҳати таъин кардани ҷубронпулӣ барои пӯшонидани фарқияти ҳаҷми истифодаи кувваи барқ ва гази табиӣ ҳаматарафа дар асоси талаботи Низомномаи дахлдор баррасӣ ва мавриди таҳқиқ қарор дода, чунин тавсия медиҳад:

Дар асоси аризаи пешниҳодгардида оилаи (шаҳрванд)________________ _________________________________________ ба рӯйхати оилаҳои камбизоат

(ному насаби аризадиҳанда)

дохил карда шавад.

Раиси комиссияи маҳаллӣ ___________________________

                           (ному насаб / имзо)

Аъзои комиссияи маҳаллӣ ___________________________

                           (ному насаб / имзо)

                        ___________________________

                           (ному насаб / имзо)

                        ___________________________

                           (ному насаб / имзо)

                        ___________________________

                           (ному насаб / имзо)

Ҷ.М

__________________________________

Раиси комиссияи маҳаллӣ ва аъзои он оид ба дурусти ва дақиқии маълумоти дарҷнамудаи аризадиҳанда масъул буда, оид ба иҷрои муқаррароти Низомномаи дахлдор ҷавобгарии шахсӣ доранд.