Бо қарори Ҳукумати
Ҷумҳурии Тоҷикистон
аз 14 сентябри соли 2006 № 432
тасдиқ шудааст
Низомнома тартиби адои хизмати ҳайати қаторӣ ва роҳбарикунандаи системаи иҷрои ҷазои ҷиноятӣ
(қарори Ҳукумати ҶТ аз 1.07.2011 № 343, аз 29.08.2015 № 558)
Низомномаи тартиби адои хизмати ҳайати қаторӣ ва роҳбарикунандаи системаи иҷрои ҷазои ҷиноятӣ (минбаъд - Низомнома ) тартиб ва шароити адои хизматро дар системаи иҷрои ҷазои ҷиноятии Ҷумҳурии Тоҷикистон ба танзим дароварда, вазъи ҳуқуқии кормандони ин система, иҷрои вазифаҳоро аз ҷониби онҳо муайян мекунад, кафолати ҳуқуқу озодиҳои ба онҳо додашударо медиҳад, ба баланд бардоштани интизом ва масъулият ҳангоми иҷрои ӯҳдадориҳое, ки ба зиммаи онҳо Қонуни Ҷумҳурии Тоҷикистон "Дар бораи системаи иҷрои ҷазои ҷиноятии Ҷумҳурии Тоҷикистон", фармонҳои Президенти Ҷумҳурии Тоҷикистон, қарорҳои Ҳукумати Ҷумҳурии Тоҷикистон, санадҳои меъёрии ҳуқуқии байналмилалии эътирофкардаи Ҷумҳурии Тоҷикистон гузоштаанд, нигаронида шудааст.
I. Муқаррароти умумӣ
1. Кормандони системаи иҷрои ҷазои ҷиноятӣ шаҳрвандони Ҷумҳурии Тоҷикистон (минбаъд - шаҳрвандон) мебошанд, ки дар вазифаҳои ҳайати қаторӣ ва роҳбарикунандаи мақомот, ҷузъу томҳо, муассисаҳо, сохторҳо ва корхонаҳои системаи иҷрои ҷазои ҷиноятӣ қарор дошта, ба онҳо бо тартиби муайянкардаи ин Низомнома рутбаҳои махсус дода шудааст ё ба ҳисоби кадрҳои Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон дохил карда шудаанд .
Ба хизмат дар системаи иҷрои ҷазои ҷиноятӣ шаҳрвандони Ҷумҳурии Тоҷикистон, ки синнашон аз 20-сола то 40-сола мебошад, сарфи назар аз миллат, вазъи иҷтимоӣ, муносибат ба дин, ки аз рӯи сифатҳои шахсӣ, ахлоқӣ, кордонӣ, таҳсилот, тайёрии ҷисмонӣ ва вазъи саломатӣ аз ӯҳдаи иҷрои вазифаҳои ба зиммаи системаи иҷрои ҷазои ҷиноятӣ вогузоршуда мебароянд, баъди гузаштани хизмати ҳарбӣ аз рӯи даъват ва дар асоси ихтиёрӣ қабул карда мешаванд.
Ба хизмат дар системаи иҷрои ҷазои ҷиноятӣ шаҳрвандоне, ки доғи судӣ доштанд ва ё доранд (ба истиснои шахсони аз тарафи суд сафед карда ё бегуноҳ донисташуда) қабул карда намешаванд.
ӯҳдадорони ҳарбии ба хизмат дар системаи иҷрои ҷазои ҷиноятӣ қабулшуда, аз ҷумла шунавандагон ва курсантҳое, ки муассисаҳои таълимии махсусро, ки барои системаи иҷрои ҷазои ҷиноятӣ кадрҳо тайёр мекунанд, хатм карданд аз қайди ҳарбӣ бароварда шуда ба ҳисоби Сарраёсати иҷрои ҷазои ҷиноятии Вазорати адлияи Ҷумҳурии Тоҷикисгон гузаронида мешаванд .
Кормандони системаи иҷрои ҷазои ҷиноятӣ, инчунин шахсоне, ки рутбаҳои махсус бо иловаи "дар истеъфо" доранд, ҳангоми маҳкум шудан барои содир намудани ҷиноят бо ҳукми суд аз рутбаи махсус маҳрум гардиданашон мумкин аст.
Ҳангоми қабул шудан ба хизмат корманди системаи иҷрои ҷазои ҷиноятӣ савганд ёд мекунад, ки матни онро Қонуни Ҷумҳурии Тоҷикистон "Дар бораи системаи иҷрои ҷазои ҷиноятӣ" муқаррар кардааст.
Кормандони системаи иҷрои ҷазои ҷиноятӣ барои иҷрои вазифаҳои махсус бо гузаронидан ба ихтиёри кадрҳои Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон ба мақомоти ҳокимияти давлатӣ, инҷунин вазорату идораҳо, корхонаҳо, муассисаҳо ва ташкилотҳои тобеи онҳо (дар асоси амри Президенти Ҷумҳурии Тоҷикистон) метавонанд фиристода шаванд. Шахсони дар боло зикршуда аз тамоми ҳуқуқҳо, имтиёзҳо ва кафолатҳои иҷтимоии барои кормандони системаи иҷрои ҷазои ҷиноятӣ пешбинишуда метавонанд истифода баранд .
2. Ба кормандони системаи иҷрои ҷазои ҷиноятӣ барои тасдиқи ваколаташон шаҳодатномаи хизматӣ дода мешавад, ки намунаи онро Вазири адлияи Ҷумҳурии Тоҷикистон тасдиқ менамояд.
3. Ба кормандони системаи иҷрои ҷазои ҷиноятӣ нишонҳои махсус бо рақами шахсӣ, ки бо Вазорати мудофиаи Ҷумҳурии Тоҷикистон мувофиқа шудааст, дода мешавад.
4. Барои кормандони системаи иҷрои ҷазои ҷиноятӣ шакли ягонаи либос ва нишонҳои фарқкунанда муқаррар карда мешавад. Тартиби таъмини кормандони системаи иҷрои ҷазои ҷиноятӣ бо либоси расмӣ ва намунаи онро Ҳукумати Ҷумҳурии Тоҷикистон муайян мекунад.
5. Ба кормандоне, ки дар хизмат дар системаи иҷрои ҷазои ҷиноятӣ қарор доранд рутбаҳои зерин дода мешавад:
Ҳайати қатори
- қаторӣ, қатории хизмати дохилӣ.
Ҳайати хурди роҳбарикунанда
- сержанти хурд, сержанти хурди хизмати дохилӣ;
- сержант, сержанти хизмати дохилӣ;
- сержанти калон, сержанти калони хизмати дохилӣ;
- старшина, старшинаи хизмати дохилӣ;
- прапорщик, прапорщики хизмати дохилӣ;
- прапорщики калон, прапорщики калони хизмати дохилӣ.
Ҳайати миёнаи роҳбарикунанда
- лейтенанти хурд, лейтенанти хурди хизмати дохилӣ;
- лейтенант, лейтенанти хизмати дохилӣ;
- лейтенанти калон, лейтенанти калони хизмати дохилӣ;
- капитан, капитани хизмати дохилӣ.
Ҳайати калони роҳбарикунанда
- майор, майори хизмати дохилӣ;
- подполковник, подполковники хизмати дохилӣ;
- полковник, полковники хизмати дохилӣ.
Ҳайати олии роҳбарикунанда
- генерал-майор, генерал-майори хизмати дохилӣ;
- генерал-лейтенант, генерал-лейтенанти хизмати дохилӣ.
6. Кормандони системаи иҷрои ҷазои ҷиноятӣ баъди гузаштани тайёрии дахлдор, ҳангоми иҷрои вазифаҳои хизматӣ барои доимӣ гирифта гаштан ва нигоҳ доштани яроқи оташфишони табелӣ ва воситаҳои махсус ҳуқуқ доранд. Тартиби додан, гирифта гаштан, нигоҳ доштани яроқ ва воситаҳои махсусро қонунҳои Ҷумҳурии Тоҷикистон "Дар бораи системаи иҷрои ҷазои ҷиноятӣ" ва "Дар бораи яроқ" ба танзим медароранд.
7. Ба кормандони системаи иҷрои ҷазои ҷиноятӣ амали Кодекси меҳнати Ҷумҳурии Тоҷикистон, Қонуни Ҷумҳурии Тоҷикистон "Дар бораи хизмати давлатӣ", Қонуни Ҷумҳурии Тоҷикистон "Дар бораи системаи иҷрои ҷазои ҷиноятй" бо хусусиятҳои дар ҳамин Низомнома пешбинишуда паҳн мешавад.
8. Гузаштани хизмат дар системаи иҷрои ҷазои ҷиноятӣ дар парвандаи шахсии корманд инъикос меёбад, ки онро хадамоти кадрии мақоми дахлдори системаи иҷрои ҷазои ҷиноятӣ мебарад.
Ҳангоми гузаронидани корманд ба сохторҳои дигари қудратӣ ва идораҳои ҳифзи ҳуқуқ парвандаи шахсӣ ба ҷои нави хизмат фиристода мешавад. Бурдани якчанд парвандаи шахсӣ ба як корманди системаи иҷрои ҷазои ҷиноятӣ манъ аст.
Тартиби бурдан ва нигоҳ доштани парвандаҳои шахсии кормандони системаи иҷрои ҷазои ҷиноятиро муовини вазир - сардори Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон муайян мекунад .
9. Ишғоли вазифаҳо дар системаи иҷрои ҷазои ҷиноятӣ бо роҳи бастани қарордодҳои инфиродӣ, инчунин дар асоси озмун сурат мегирад. Вазифаҳои ҳайати қаторӣ ва роҳбарикунандаи системаи иҷрои ҷазои ҷиноятӣ мутобиқи ҳамин Низомнома бо роҳи бастани қарордодҳои инфиродӣ, аз рӯи озмун, инчунин бо тарзи таъин намудан ба мансаб ишғол карда мешаванд.
10. Қарордод оид ба хизмат дар системаи иҷрои ҷазои ҷиноятӣ метавонад байни шаҳрванд, ки ба хизмати ин хадамот дохил мешавад ва Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон, дар шахси сардори муассисаи дахлдор мувофиқи салоҳияташ баста шавад .
Ҳангоми гузаронидани корманди системаи иҷрои ҷазои ҷиноятӣ ба хизмати дигар ё барои хизмат ба минтақаи дигар бо тартиби дар бандҳои 84-89 ҳамин Низомнома пешбинишуда, бо ба ивази қарордоди қаблан басташуда (аз рӯи вазифаи пешина) аз номи сардори дахлдор мумкин аст қарордоди нав баста шавад.
11. Аз рӯи қарордоди хизмат дар системаи иҷрои ҷазои ҷиноятӣ шаҳрванд (корманд) вазифадор аст ӯҳдадориҳои хизматии ба зиммааш гузошташударо иҷро намояд, талаботи ин Низомнома, Савганд ва тартиботи дохилиро риоя кунад. Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон таъмини тамоми намуди таъминот, ҳуқуқҳо, имтиёзҳо ва кафолатҳоро ба ӯҳда мегирад ва шароитҳои барои хизмат дар системаи иҷрои ҷазои ҷиноятӣ пешбинишудаи Низомномаро фароҳам меоварад .
12. Дар қарордод оқибатҳои ҳуқуқӣ, инчунин ҷавобгарии моддие, ки ҳангоми иҷро накардани ӯҳдадориҳои ба худ қабул кардаи тарафҳо сурат мегиранд, пешбинӣ карда мешаванд.
Иҷро накардани ӯҳдадориҳои ба худ қабул кардаи яке аз тарафҳо асос барои қатъи қарордод бо тартиби яктарафа шуда метавонад.
Воқеияти иҷро накардани шартҳои қарордод аз ҷониби тарафҳоро ҳайати аттестатсионӣ бояд тафтиш намояд.
13. Ҳангоми пеш аз мӯҳлат аз системаи иҷрои ҷазои ҷиноятӣ озод кардани кормандоне, ки аз рӯи қарордод хизмат мекунанд, мутобиқи асосҳои дар зербандҳои "д", "и", "к", "л", "м"-и банди 131 ҳамин Низомнома пешбинишуда, маблағҳои гирифтаи онҳо дар шакли пардохтҳои яквақта бояд мутаносибан ба вақти хизмати онҳо, ки то тамом шудани мӯҳлати қарордод мондааст, баргардонида шаванд.
14. Қарордод танҳо дар шакли хаттӣ баста шуда, шартҳои он вазъи хизматӣ ва иҷтимоии дар қонунгузории Ҷумҳурии Тоҷикистон пешбинишудаи корманди системаи иҷрои ҷазои ҷиноятиро набояд бад кунад.
15. Қарордод дар бораи хизмат бо шаҳрвандони (кормандони) ба мансаби ҳайати қаторӣ, хурд ва миёнаи роҳбарикунанда таъиншаванда ба мӯҳлати на камтар аз ду сол баста мешавад.
Ду сол пеш аз фаро расидани синну соли ниҳоии корманд ва баъди расидан ба он, қарордоди инфиродӣ дар бораи хизмат метавонад ба мӯҳлати камтар баста шавад.
16. Қарордод барои таъин шудани шаҳрванд (корманд) ба мансаб ҳамчун асос ба шумор меравад. Агар яке аз тарафҳо дар муддати ду моҳи то ба охир расидани мӯҳлати эътибори қарордод оид ба бекор кардан ё тағйир додани шарти он эълон накунад, қарордод ба мӯҳлати қаблан муқарраргардида дарозшуда ба ҳисоб меравад.
17. Дар ҳолати зарурати хизматӣ, кормандони системаи иҷрои ҷазои ҷиноятӣ барои адои вазифаҳое, ки дар қарордод пешбинӣ нашудааст, ба мӯҳлати то як моҳ бо пардохти маоши муқарраргардидаи вазифаи ишғолкардааш ҷалб карда мешавад. Чунин иқдом барои бартараф ё барҳам додани офатҳои табиӣ, садама, бетартибиҳои оммавӣ, амалиётҳои террористӣ ва дар дигар ҳолатҳои истисноӣ, инчунин барои иваз намудани корманди ҳузурнадошта имкон дорад.
18. Таъин кардани дигар роҳбарон ба вазифа бо тартиби муайянкардаи Вазири адлияи Ҷумҳурии Тоҷикистон сурат мегирад.
19. Қарордод дар бораи хизмат дар асоси бандҳои 131, 132 Низомнома қатъ мегардад.
20. Шакл ва мундариҷаи қарордод аз тарафи Вазири адлияи Ҷумҳурии Тоҷикистон тасдиқ карда мешавад.
21. Қарордод дар бораи хизмат бо шаҳрванде, ки ҳангоми дохил шудан ба кор дар системаи иҷрои ҷазои ҷиноятӣ мӯҳлати санҷишӣ мегузарад, баъд аз гузаштани мӯҳлати санҷишии барои ӯ муқарраркардашуда баста мешавад.
22. Барои шахсони бори аввал ба хизмат дар системаи иҷрои ҷазои ҷиноятӣ дохилшаванда вобаста ба сатҳи омодагӣ ва вазифа мӯҳлати санҷишӣ аз се то шаш моҳ муқаррар карда мешавад.
23. Дар вақти мӯҳлати санҷишӣ коромӯз вазифаашро аз рӯи мансаби ишғолкардааш иҷро намуда, ҳуқуқҳои корманди системаи иҷрои ҷазои ҷиноятиро истифода мебарад.
24. Ҳангоми мӯҳлати санҷишӣ ва дар давраи иҷрои ӯхдадориҳои вазифавӣ дар асоси доимӣ корманд вазифадор аст:
- санадҳои меъёрии ҳуқуқиеро, ки фаъолияти системаи иҷрои ҷазои ҷиноятии Ҷумҳурии Тоҷикистонро ба танзим медароранд, омӯзад;
- таҷриба гирад ва сатҳи касбиашро доимо баланд бардорад;
- хислатҳои маънавии худро ҳамчун корманди системаи иҷрои ҷазои ҷиноятӣ инкишоф диҳад;
- талаботи оинномаро риоя намояд;
- дигар кормандон, коллектив ва ҳамватанонро эҳтиром намояд;
- сирреро, ки ҳангоми кор ба ӯ маълум мегардад пинҳон дорад;
- ӯҳдадориҳои вазифавиашро саривақг иҷро намуда дар доираи фаъолияти худ ташаббускор бошад.
Бо ин мақсад ба корманд, ки мӯҳлати санҷиширо мегузарад (гузаштааст), сардорон кӯмаки ҳаматарафа ва ёрии амалӣ мерасонанд. Дар вақти мӯҳлати санҷишӣ ба корманд ҳатман корманди болаёқат, ки таҷрибаноктар аст ҳамчун роҳбар вобаста карда мешавад.
25. Ба вазифаҳои ҳайати қаторӣ ва роҳбарикунандаи хурди системаи иҷрои ҷазои ҷиноятӣ шаҳрвандоне қабул карда мешаванд, ки маълумоти на камтар аз миёна доранд ва хизмати ҳарбиро адо кардаанд.
26. Шахсоне, ки мансаби ҳайати қаторӣ ва хурди роҳбарикунандаро ишғол мекунанд, баъди тамом шудани мӯҳлати санҷишӣ барои хизмат дар системаи иҷрои ҷазои ҷиноятӣ на камтар аз ду сол ӯҳдадории хаттӣ медиҳанд. Агар ба муддати то ду моҳ пеш аз анҷоми эътибори ӯҳдадорӣ корманди ҳайати қаторӣ ё хурди роҳбарикунанда оид ба қатъ намудани фаъолияти хизматӣ арз нанамояд, ӯҳдадорӣ ба ҳамин мӯҳлат давомдодашуда ба ҳисоб меравад. Барои худсарона корро монда рафтан то анҷоми эътибори ӯҳдадорӣ, корманд чун вайронкунандаи интизом аз кор озод карда мешавад.
27. Дар ҳолати ба анҷом расидани мӯҳлати санҷиш, коромӯз аз санҷиш гузашта ҳисоб шуда, минбаъд сабукдӯш намудани ӯ танҳо бо яке аз асосҳои бандҳои 131, 132 дар ин Низомнома пешбинишуда сурат мегирад. Рутбаи махсуси аввалин ба чунин корманд бо риояи шартҳои умумии додани рутбаҳои махсус, ки дар фасли 3 ин Низомнома пешбинӣ шудааст, дода мешавад.
28. Мӯҳлати санҷишӣ ба собиқаи хизматӣ дар системаи иҷрои ҷазои ҷиноятӣ ҳисоб карда мешавад, ки он барои пардохти фоизи иловагӣ барои собиқаи меҳнатӣ ва дигар пардохтҳои иловагӣ, ки Ҳукумати Ҷумҳурии Тоҷикистон мувофиқи қонунгузории Ҷумҳурии Тоҷикистон муқаррар намудааст, ҳуқуқ медиҳад.
29. Барои шахсоне, ки ба мансабҳои ҳайати роҳбарикунандаи олӣ таъин карда мешаванд, барои хатмкунандагони муассисаҳои таълимии таҳсилоти касбӣ, ки ба хизмат аз рӯи тақсимот меоянд, инчунин аз рӯи озмун ба мансаб таъин мегарданд, мӯҳлати санҷишӣ муқаррар карда намешавад.
30. Ба мансаби ҳайати миёнаи роҳбарикунанда шаҳрвандоне, ки таҳсилоти олӣ, касбии дахлдор ё миёнаи махсус доранд қабул карда мешаванд, ба мансаби ҳайати калони роҳбарикунанда танҳо шахсони дорои таҳсилоти олӣ таъин карда мешаванд.
31. Мансабҳои ҳайати қаторӣ, роҳбарикунандаи хурд аз тарафи шахсони то синни 35-сола, ки таҳсилоти на пасттар аз миёнаи махсус доранд, хизмати ҳарбиро адо кардаанд ва дигар шахсони дар эҳтиёти Қувваҳои Мусаллаҳи Ҷумҳурии Тоҷикистон буда (ғайр аз афсарони эҳтиётӣ), дар мавридҳои зарурӣ аз ҳисоби занҳое, ки дар эҳтиёти Қувваҳои Мусаллаҳи Ҷумҳурии Тоҷикистон намебошанд, пурра карда мешаванд.
32. Қабули шахсоне, ки таҳсилоти миёна доранд, дар мактабҳои олӣ таҳсил менамоянд ва дар системаи иҷрои ҷазои ҷиноятӣ на камтар аз ду сол фаъолият мекунанд ба мансабҳои ҳайати роҳбарикунандаи миёна иҷозат дода мешавад.
33. Мансабҳои ҳайатҳои роҳбарикунандаи олӣ бо шахсони таҳсилоти олидошта пурра карда мешавад. Ба ҳайати роҳбарикунандаи олӣ Сардори Сарраёсати иҷрои ҷазои ҷиноятӣ, муовинони ӯ ва командири бригадаи посбоникунанда дохил мешаванд .
34. Кормандон дар системаи иҷрои ҷазои ҷиноятӣ то расидан ба синни ниҳоии зерин хизмат менамоянд:
34. Синни ниҳоӣ барои адои хизмат дар системаи иҷрои ҷазои ҷиноятӣ:
- барои ҳайати қаторӣ ва хурди роҳбарикунанда - 48 солагӣ;
- барои ҳайати миёнаи роҳбарикунанда - 53 солагӣ;
- барои ҳайати калони роҳбарикунанда - 58 солагӣ;
- барои ҳайати олии роҳбарикунанда - 63 солагӣ;
- барои хизматчиёни ҳарбии системаи иҷрои ҷазои ҷиноятӣ синни ниҳоӣ тибқи Қонуни Ҷумҳурии Тоҷикистон "Дар бораи ӯҳдадории умумии ҳарбӣ ва хизмати ҳарбӣ" муайян карда мешавад" .
35. Кормандони ҳайати миёна, калон ва олии роҳбарикунанда, ки ба синну соли ниҳоии муқарраршуда барои хизмат дар системаи иҷрои ҷазои ҷиноятӣ расидаанд, ба эҳтиёт (бо гузоштан дар қайди ҳарбӣ), ё ба истеъфо бароварда мешаванд. Дар ҳолатҳои махсусан зарур шахсони алоҳида бо назардошти аҳволи саломатӣ, бо хоҳиши худ, ва муносибат ба хизмат барои хизмат дар системаи иҷрои ҷазои ҷиноятӣ ба муддати 5 сол аз тарафи сардороне, ки ба онҳо ҳуқуқи таъин кардани чунин кормандон ба вазифаҳо дода шудааст, баъди гузаштан аз комиссияи тибии ҳарбӣ ва эътирофи коршоямии онҳо барои хизмати минбаъда метавонанд мононда шаванд.
36. Шахсони ҳайати миёна, калон ва олии роҳбарикунанда, ки ба синни ниҳоӣ расидаанд ва дар хизмат мононда шудаанд, метавонанд то гузаштани мӯҳлат ба эҳтиёт (бо гузоштан дар қайди ҳарбӣ), ё истеъфо равона карда шаванд.
II. Ҳуқуқ, вазифаҳо, масъулияти кормандони системаи иҷрои ҷазои ҷиноятӣ
37. Кормандони системаи иҷрои ҷазои ҷиноятӣ ҳамчун шаҳрвандони Ҷумҳурии Тоҷикистон дорои ҳуқуку озодиҳои пурраи иҷтимоӣ, иқтисодӣ ва шахсии кафолатдодаи Конститутсияи (Сарқонуни) Ҷумҳурии Тоҷикистон мебошанд. Ҳуқуқ, вазифаҳо ва масъулияти онҳо, ки ба хусусиятҳои хизмати системаи иҷрои ҷазои ҷиноятӣ вобастааст, инчунин бо қонунҳои Ҷумҳурии Тоҷикистон "Дар бораи системаи иҷрои ҷазои ҷиноятӣ", "Дар бораи хизмати давлатӣ", ҳамин Низомнома ва дигар санадҳои меъёрӣ танзим карда мешаванд.
38. Корманд хуқуқ дорад, дар доираи салоҳияти мансаби ишғолкардааш вазифаҳоро тибқи қонунгузории Ҷумҳурии Тоҷикистон, ҳамин Низомнома ва Савганд иҷро намояд.
39. Корманди системаи иҷрои ҷазои ҷиноятӣ ҳуқуқ дорад:
а) бо ҳуҷҷатҳое, ки ҳуқуқ ва ӯҳдадориҳои ӯро аз рӯи вазифаҳои ишғолкарда муайян менамояд, меъёрҳои арзёбии хизмат ва шароити пешравӣ дар вазифа, инчунин дигар шартҳои барои иҷрои вазифаҳои хизматӣ зарур шинос гардад;
б) аз рӯи тартиби муқарраршуда маълумот ва маводи барои иҷрои вазифаҳои хизматӣ зарур бударо гирад;
в) оид ба такмили хизмат ва қонунгузории Ҷумҳурии Тоҷикистон бо тартиби муқарраршуда таклифҳо пешниҳод намояд;
г) барои таъин шудан ба вазифаи холӣ бо хоҳиши худ дар озмун иштирок намояд;
д) бо назардошти натиҷаҳои фаъолияти хизматӣ ва дараҷаи ихтисос ба вазифаи баландтар таъин шавад;
е) бо маводи парвандаи шахсии худ (як маротиба дар давоми сол), ба истиснои қисми бойгонӣ ва ҳуҷҷатҳои тафтишоти махсус, фикру мулоҳизаҳо оид ба фаъолият ва дигар мавод то дохил намудани онҳо ба парвандаи шахсӣ бо тартиби муқаррарнамудаи Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон, инчунин баёноти худ, ки ба парвандаи шахсӣ дохил карда шудаанд, шинос шавад ;
ж) бо тайёрии ибтидоӣ, бозомӯзӣ ва такмили ихтисос фаро гирифта шавад;
з) аз ҷиҳати молиявӣ, моддӣ ва иҷтимоӣ бо назардошти собиқаи хизматӣ ва ҳолати саломатӣ таъмин гардад;
и) гузаронидани тафтишоти хизматиро барои рад намудани маълумоте, ки шаъну эътибори ӯро доғдор менамояд, талаб кунад;
к) ба ҳифзи меҳнат ва саломатӣ, шароити бехавф ва муносибати кор.
40. Корманд ҳуқуқ дорад барои ҳалли баҳсҳои вобаста ба хизмат дар системаи иҷрои ҷиноятӣ ба мақомоти болоии Вазорати адлияи Ҷумҳурии Тоҷикистон ё суд муроҷиат намояд.
41. Корманд дар мавридҳои зерин иҷрокунандаи вазифаҳои хизматӣ ҳисоб меравад:
а) иҷрои вазифа оид ба ҳимояи сохти конститутсионӣ ва риояи Конститутсияи (Сарқонуни) Ҷумҳурии Тоҷикистон, қонунҳои конститутсионӣ, қонунҳо, дигар санадҳои меъёрии ҳуқуқии Ҷумҳурии Тоҷикистон, аз он ҷумла танзимкунандаи соҳаи фаъолияти он;
б) иҷро кардани талаботи муқарраркардаи оинномаҳои дахлдор, дастурамал ва дигар санадҳои меъёрии ҳуқуқии Вазорати адлияи Ҷумҳурии Тоҷикистон;
в) иҷрои фармонҳо, супоришҳо ва нишондодҳои аз тарафи мақомоти болоӣ ба тартиби тобеияти сардорон дар ҳадди ваколати мансабиашон додашуда, ба истиснои фармонҳои ғайриқонунӣ;
г) нигоҳдории (ҳифзи) сирри давлатӣ, инчунин ошкор накардани маълумотҳое, ки вобаста ба иҷрои вазифаҳои мансабиаш ба ӯ маълум гашта ба ҳаёти шахсӣ, шаъну эътибори шаҳрвандон дахл дорад;
д) иҷрои вазифаҳои мансабӣ дар давоми вақти кории муайяншуда ё аз он зиёд, агар онро зарурати хизматӣ тақозо кунад;
е) иштирок дар ҷамъомадҳо, машқҳо, чорабиниҳои варзишӣ ва дигар чорабиниҳо, ки ба омӯзиши кормандони системаи иҷрои ҷазои ҷиноятӣ вобаста аст;
ж) иштирок дар чорабиниҳои хизматӣ - оперативӣ мувофиқи нақшаҳои тасдиқнамудаи сардорони Сарраёсати иҷрои ҷазои ҷиноятии ва муассисаҳои Вазорати адлияи Ҷумҳурии Тоҷикистон ;
з) рафтан ба ҷои хизмат, сафари хизматӣ, табобат ва бозгашт аз он;
и) дар сафари хизматӣ будан;
к) амал намудан барои ҳимояи ҳаёт, саломатӣ, шаъну эътибори шаҳрвандон, инчунин барои бехатарии шахсӣ вобаста ба иҷрои вазифаҳои хизматӣ;
л) дар асирӣ будан (ғайр аз мавридҳои ихтиёран таслим шудан), дар шароити боздошт шудан ё ба сифати гаравгон гирифтан ҳангоми қатъ шудани вазифаҳои хизматӣ;
м) бедарак ғайбзадан, то бедарак ғайбзада эътироф шудани корманд ё бо тартиби муқарраркардаи қонунгузории Ҷумҳурии Тоҷикистон фавтида эълон кардани ӯ;
н) иҷрои вазифаҳои хизматӣ дар шароити ҷангӣ ва ҳолати фавқулодда, инчунин дар задухӯрди мусаллаҳона;
о) ҳангоми рафтан аз маҳали истиқомат ба ҷои хизмат ва аз ҷои хизмат ба маҳали истиқомат.
Дар асирӣ, дар ҳолати боздошт шудан ё ба сифати гаравгон қарор доштани кормандони системаи иҷрои ҷазои ҷиноятии Ҷумҳурии Тоҷикистонро қонунгузории Ҷумҳурии Тоҷикистон ва санадҳои ҳуқуқии байналмилалии эътирофнамудаи Ҷумҳурии Тоҷикистон, ИНЧунин санадҳои дохилиидоравии Вазорати адлияи Ҷумҳурии Тоҷикистон муайян мекунанд.
42. Кормандони зерин вазифаҳои хизматии худро иҷронамуда ҳисобида намешаванд:
а) кормандоне, ки дар рухсатии меҳнатӣ ё барои дамгирӣ ба хонаҳои истироҳат рафтаанд, ба истиснои ҳолатҳои дар ин Низомнома пешбинишуда;
б) нисбати шахсоне, ки дар рафти тафтиши хизматӣ, аз тарафи мақомоти таҳқиқ, тафтишоти пешакӣ ва суд муқаррар карда шудааст, ки кирдори содирнамудаашон дар ҳолати мастӣ, ки ҳангоми истифодаи нӯшокиҳои спиртдор, маводи нашъадор, ё мадҳушкунанда ба вуҷуд омадааст, ҳамчун ҷиноятҳои бадқасдона, қонунвайронкунии маъмурӣ ба қайд гирифта шудааст, инчунин худкушӣ ҳисобида шудааст (зимнан сабаби он беморӣ ё ба худкушӣ оварда расонидан набошад).
Ҳангоми иҷрои вазифаҳои хизматӣ корманди системаи иҷрои ҷазои ҷиноятӣ таҳти ҳимояи давлат қарор дорад. Ҳеҷ кас, ғайр аз мақомот ва шахсони мансабдори мустақиман аз тарафи қонун ваколатдоршуда ҳуқуқ надорад ба фаъолияти корманди системаи иҷрои ҷазои ҷиноятӣ дахолат кунад.
Корманд дар фаъолияти хизматии худ қонунгузории Ҷумҳурии Тоҷикистонро дастури амал қарор медиҳад ва бо қарорҳои ҳизбҳои сиёсӣ, ташкилотҳои ҷамъиятӣ, ки мақсадҳои сиёсӣ доранд, наметавонад маҳдуд карда шавад.
43. Барои амалҳои ғайриқонунӣ ё беҳаракатӣ ҳангоми иҷрои вазифаҳои хизматӣ корманд мумкин аст мутобиқи қонунгузории Ҷумҳурии Тоҷикистон ба ҷавобгарӣ кашида шавад.
Зараре, ки ба шахсони воқеӣ ё ҳуқуқӣ тавассути амалҳои ғайриқонунӣ ё беҳаракатии корманд расонида шудааст, бояд бо тартиби пешбининамудаи қонунгузории Ҷумҳурии Тоҷикистон талофӣ карда шавад.
44. Ба сардорон (командирон) додани фармонҳо ва амрҳое, ки ба иҷрои вазифаҳои хизматӣ дахл надоранд ё хилофи қонунгузории Ҷумҳурии Тоҷикистон мебошанд, манъ аст.
45. Сардорони (командирони) чунин фармон ва амрҳоро дода, мутобиқи қонунгузории Ҷумҳурии Тоҷикистон ба ҷавобгарӣ кашида мешаванд.
46. Бекор кардан ё тағйир додани қарори қабулкардаи корманд ҳангоми иҷрои вазифаҳои хизматӣ сабаби ба ҷавобгарӣ кашидани ӯ шуда наметавонад, агар онҳо натиҷаи қасдан вайрон кардани қонун набошанд.
47. Маҳдудияти бо хизмат дар системаи иҷрои ҷазои ҷиноятӣ алоқаманд:
Корманди системаи иҷрои ҷазои ҷиноятӣ ҳуқуқ надорад:
а) бо дигар фаъолияти пардохташаванда ба ғайр аз фаъолияти омӯзгорӣ, илмӣ ва эҷодӣ машғул шавад;
б) вакили мақомоти қонунгузорӣ (намояндагӣ), мақомоти ҳокимияти маҳаллии иҷроия бошад;
в) шахсан ба воситаи дигар шахсон ба фаъолияти соҳибкорӣ машғул шавад;
г) аъзои мақоми идоракунии ташкилотҳои тиҷоратӣ бошад, агар ҳолати дигаре дар қонунгузорӣ пешбинӣ нашуда бошад, ё бо тартиби муқаррарнамудаи қонунгузорӣ ба ӯ иштирок намудан дар идоракунии ин ташкилот супориш нашуда бошад;
д) воситаҳои моддӣ - техникӣ, молиявӣ ва таъминоти иттилоотӣ, дигар моликияти системаи иҷрои ҷазои ҷиноятиро бо мақсадҳои ғайрихизматӣ истифода барад;
е) аз шахсони ҳуқуқӣ ё шахсони воқеӣ тӯҳфаҳо, мукофоти пулӣ, подош, пардохтҳои вақтхушкунӣ, харҷи нақлиёт ва дигар мукофотҳо, ки бо иҷрои вазифаҳои хизматӣ алоқаманд аст гирад;
ж) аз мақоми худ дар ҳалли масъалаҳое, ки ба манфиатҳои шахсӣ, гурӯҳӣ ва ғайра дахл мекунанд, истифода намояд;
з) вазифаеро ишғол намояд, ки ба тобеияти бевосита ва ҳисоботдиҳии хешовандонаш алоқаманд бошад;
и) аз ҳисоби шахсони воқеӣ ва ҳуқуқии Ҷумҳурии Тоҷикистон ё шахсони воқеӣ ва ҳуқуқии хориҷӣ ба саёҳат ва сафарҳои дохилиҷумҳуриявӣ ва хориҷии муолиҷавӣ- табобатӣ, саёҳатӣ ва дигар сафарҳо равад, ба истиснои сафарҳо бо даъвати хешовандони наздик аз ҳисоби онҳо ва сафарҳо дар асоси санадҳои ҳуқуқии байналмилалии эътирофнамудаи Ҷумҳурии Тоҷикистон ё бо мувофиқаи байни мақомоти давлатии Ҷумҳурии Тоҷикистон бо мақомоти давлатии кишварҳои хориҷӣ ва ташкилотҳои байналмилалӣ, ки аз ҳисоби мақомоти давлатии дахлдор ё ташкилотҳои байналмилалӣ сурат мегиранд;
к) дар корпартоиҳо иштирок намояд;
л) аз мавқеи хизматии худ ба манфиатҳои ҳизбҳои сиёсӣ, динӣ, ташкилотҳои ҷамъиятӣ барои тарғиботи муносибат бо онҳо истифода намояд, аъзои ин ҳизбҳо ва ташкилотҳо бошад;
м) бе иҷозати сардорони бевоситаи худ аз сафоратхонаҳо ва дигар намояндагиҳои давлатҳои хориҷӣ ки дар қаламрави Ҷумҳурии Тоҷикистон ҷойгир шудаанд, дидан намояд ва бо шаҳрвандони хориҷӣ бе зарурати хизматӣ вохӯрад.
Дар ҳолатҳои истисноӣ кормандон ҳуқуқ доранд ба муассисаҳои махсус ва ёридиҳандаи Созмони Милали Муттаҳид ва ташкилоти хориҷии ваколатдор муроҷиат намоянд, агар ҳуқуқу манфиатҳои қонунӣ ва озодиҳои асосии онҳо ҳам аз тарафи мақомоти ҳокимияти давлатӣ, ҳам аз ҷониби шахсони мансабдор барқарор нашуда бошанд, вақте, ки мақомоти ҳокимияти давлатии дахлдор қарори қонуниро оид ба шикоят ва арзи онҳо барои барқарор намудани ҳуқуқу манфиатҳои қонунии онҳо қабул карда натавониста бошанд.
Корманде, ки ҳуқуқҳои ӯ поймол карда шудаанд, пешакӣ бояд ба суд, ё дигар мақоми ҳокимияти давлатӣ барои ҳалли баҳсҳо муроҷиат намояд.
н) фош намудани маълумоте, ки сирри давлатӣ, ҳарбӣ ва хизматиро ташкил медиҳанд ва ҳангоми хизмат ё кор ба онҳо маълум гаштааст.
48. Ба кормандони системаи иҷрои ҷазои ҷиноятӣ кафолати пешниҳоди ҳуқуқ, имтиёзҳо ва ҷубронпӯлиҳои дар Қонуни Ҷумҳурии Тоҷикистон "Дар бораи системаи иҷрои ҷазои ҷиноятӣ", Қонуни Ҷумҳурии Тоҷикистон "Дар бораи хизмати давлатӣ", ҳамин Низомнома ва дигар санадҳои меъёрии ҳуқуқии Ҷумҳурии Тоҷикистон пешбининамуда дода мешавад.
49. Маҳдудкуниҳои баъзе ҳуқуқ ва озодиҳои умумишаҳрвандии кормандони системаи ичрои ҷазои ҷиноятӣ, ки ба хусусиятҳои хизмат вобаста мебошанд, ҳамин Низомнома муайян менамояд ва бо имтиёзҳои дахлдор ҷуброн карда мешавад.
50. Ба кормандоне, ки дар муассисаҳои таълимии таҳсилоти касбӣ ғоибона таҳсил менамоянд, имтиёзҳои муқаррарнамудаи қонунгузории Ҷумҳурии Тоҷикистон паҳн мешаванд.
51. Ба кормандони системаи иҷрои ҷазои ҷиноятӣ, ки бо мақсадҳои хизматӣ нақлиёти шахсии худро истифода мебаранд, бо андозаҳои муқаррарнамудаи Ҳукумати Ҷумҳурии Тоҷикистон ҷубронпулӣ дода мешавад.
52. Кормандони системаи иҷрои ҷазои ҷиноятӣ ҳуқуқ доранд аз рафтуомади аз ҷониби давлат пардохтшаванда ҳангоми рухсатии навбатӣ (асосӣ) як маротиба дар давоми сол танҳо дар қаламрави Ҷумҳурии Тоҷикистон, ҳангоми рафтан ба ҷои хизмат ба минтақаи дигар, ҳангоми ҳаракат кардан ба мавзеи доимии истиқомат дар вақти озод шудан аз хизмат аз рӯи синну сол, вазъи саломатӣ, ё вобаста ба чорабиниҳои ташкилӣ-штатӣ истифода баранд. Ҳангоми кӯчидан аз макони зисти пешина ба маҳали нави истиқомат бо сабаби гузаштан ба кори дигар кормандони системаи иҷрои ҷазои ҷиноятӣ ҳуқуқ доранд амволи шахсиашонро ба вазни то 20 тонна бо нақлиёти автомобилӣ ё роҳи оҳан кашонида баранд, ки он аз ҳисоби маблағҳои дахлдори муассисаҳои Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон аз ҷои охири хизмат талофӣ карда мешавад. Ба кормандони системаи иҷрои ҷазои ҷиноятӣ хароҷоти сафарҳои хизматӣ, инчунин хароҷоти шабонарӯзӣ ва манзилӣ бо тартиби муқарраркардаи Ҳукумати Ҷумҳурии Тоҷикистон пардохта мешавад. Ғайр аз ин, кормандон аз ҳуқуқи бенавбат чипта гирифтан ба ҳамаи намудҳои нақлиёт ҳангоми рафтан ба сафари хизматӣ, ба ҷои нави хизмат, инчунин ба мавзеи гузаронидани рухсатии меҳнатӣ ва баргаштан аз он ҷо истифода мебаранд .
53. Аъзоёни оилаи кормандони системаи иҷрои ҷазои ҷиноятӣ барои рафтан аз маҳали истиқомат ба мавзеи хизмати кормандон бо сабаби гузаронидани онҳо барои хизмат ба рафтуомади аз ҳисоби маблағҳои муассисаҳои системаи иҷрои ҷазои ҷиноятӣ аз ҷои кори охир пардохтшаванда ҳуқуқ доранд.
54. Ба кормандони ба хизмат дар системаи иҷрои ҷазои ҷиноятӣ қабулшуда ва бе манзилгоҳ мувофиқи меъёрҳои муқарраркардаи қонунгузории Ҷумҳурии Тоҷикисгон утоқҳои манзилии хизматӣ дода мешавад. Ба кормандони системаи иҷрои ҷазои ҷиноятӣ, ки 20 сол ва зиёда аз он дар системаи иҷрои ҷазои ҷиноятӣ (бо ҳисоби тақвимӣ) хизмат кардаанд, қитьаи замин барои сохтмони хонаҳои истиқоматии инфиродӣ аз ҳисоби заминҳои истифоданашуда ё бо тартиби муқарраркардаи қонунгузории Ҷумҳурии Тоҷикистон ҷудошуда ройгон дода мешавад.
55. Ба собиқаи хизматии кормандон вақти дар системаи иҷрои ҷазои ҷиноятӣ ба сифати хизматчӣ кор карданашон барои таъин кардани нафақа ва пардохти фоизи иловапулии хизмати дарозмуддат, ба ҳисоби тақвимӣ ҳисоб карда мешавад, агар вазифаҳои ишғолкардаи онҳо минбаъд бо шахсони ҳайати қаторӣ ва роҳбарикунанда ишғол гарданд ва онҳо ба ин вазифаҳо таъин карда шуда бошанд.
56. Кормандони системаи иҷрои ҷазои ҷиноятӣ, ки аз хизмат бо ҳуқуқи ба нафақаравӣ озод шудаанд ва аъзои оилаи онҳо, ки аз рӯи Низомномаи мазкур ба имтиёзҳо ҳуқуқ доранд, дар баробари ин имтиёзҳо аз имтиёзҳои дигари пешбининамудаи қонунгузории Ҷумҳурии Тоҷикистон истифода мебаранд.
Ба шахсони зикршуда ҳангоми доштани ҳуқуқ барои гирифтани як имтиёз бо якчанд асос аз рӯи интихоби онҳо як имтиёз аз рӯи як асос дода мешавад, ғайр аз ҳолатҳое, ки қонунгузории Ҷумҳурии Тоҷикистон махсус пешбинӣ кардааст.
57. Кормандони системаи иҷрои ҷазои ҷиноятӣ аз рӯи меъёрҳои муқаррарнамудаи Ҳукумати Ҷумҳурии Тоҷикистон бо таъминоти ашёӣ таъмин карда мешаванд. Барои намудҳои нагирифтаи таъминоти ашёӣ мутобиқи меъёрҳои муқарраркарда ҷубронпулӣ пардохта мешавад.
58. Ба кормандони системаи иҷрои ҷазои ҷиноятӣ, ки ба хизмат дар Ҷумҳурии Тоҷикистон аз дигар давлат омадаанд, унвонҳои махсуси мавҷудаи онҳо (мувофиқи вазифаҳои ишғолшуда дода мешаванд) нигоҳ дошта мешаванд, инчунин ба онҳо тартиби ҳисоб кардани собиқаи корӣ, имтиёзҳо ва ҷубронпулиҳои пешбининамудаи қонунгузории Ҷумҳурии Тоҷикистон нигоҳ дошта мешаванд, агар чизи дигареро тарафҳо дар шартнома пешбинӣ нанамоянд.
59. Намуд ва андозаи таъминоти пулии кормандони системаи иҷрои ҷазои ҷиноятиро Ҳукумати Ҷумҳурии Тоҷикистон муқаррар мекунад.
60. Ба кормандони системаи иҷрои ҷазои ҷиноятӣ ба ивази маводи хӯрокворӣ ҷубронпулӣ пардохта мешавад, ки ҳаҷми онро қонунгузории Ҷумҳурии Тоҷикистон дар бораи буҷети давлатии Ҷумҳурии Тоҷикистон барои соли дахлдори молиявӣ муқаррар менамояд.
61. Ба кормандони системаи иҷрои ҷазои ҷиноятӣ, ки 20 сол ва аз он зиёд хизмат кардаанд (ба ҳисоби тақвимӣ), ба нафақа ҳуқуқ доранд, аммо хизматро давом медиҳанд, ҳар моҳ иловапулӣ дар андозаи аз 25 то 50 фоизи нафақае, ки бояд ба онҳо таъин карда мешуд, пардохта мешавад. Андозаи иловапулии мазкур барои ҳар сол ба 3 фоиз барои ҳар соли зиёда аз собиқаи хизматии ҳадди ақали барои гирифтани нафақа ҳуқуқдиҳанда зиёд мешавад, вале на зиёдтар аз 50 фоизи андозаи нафақае, ки имкон дошт ба хизматчии ҳарбӣ таъин карда шавад. Тартиб ва шароити пардохти иловапулии зикршударо Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон муайян мекунад .
62. Нафақаи кормандон аз ҳисоби маблағҳои буҷети ҷумҳуриявӣ пардохта мешавад ва бо Қонуни Ҷумҳурии Тоҷикистон "Дар бораи таъминоти нафақаи хизматчиёни ҳарбӣ" ва санадҳои меъёрии ҳуқуқии Ҷумҳурии Тоҷикистон муайян карда мешавад. Андозаи нафақаи кормандони системаи иҷрои ҷазои ҷиноятӣ, ки баъди расидан ба синну соли муқарраршуда, аз сабаби беморӣ ё пурра шудани мӯҳлати хизмат аз кор озод карда шудаанд, аз рӯи таъминоти пурраи пулӣ ҳисоб карда мешавад. Ҳеҷ як маҳдудият дар пардохти нафақа раво намебошад.
63. Ба кормандоне, ки дар натиҷаи маъюбшавии меҳнатӣ корношоям шудаанд, ё ҳангоми иҷрои вазифаҳои хизматӣ гирифтори касалии касбӣ шудаанд, нафақаи маъюбӣ новобаста аз собиқаи умумии меҳнатӣ таъин карда мешавад.
64. Дар ҳолати вафоти корманди системаи иҷрои ҷазои ҷиноятӣ таъминоти нафақавии аъзои оилаи ӯ мутобиқи Қонуни Ҷумҳурии Тоҷикистон "Дар бораи таъминоти нафақаи хизматчиёни ҳарбӣ" ба амал бароварда мешавад.
65. Ба корманд ва аъзои оилаи ӯ, ки ҳамроҳаш зиндагӣ мекунанд, барои пардохти музди манзил, тамоми хизматрасониҳои коммуналӣ (ба ғайр аз қувваи барқ ва гази табиӣ), абонентпулӣ барои алоқаи телефонӣ (ғайр аз пардохти гуфтугӯи телефонии дақиқавӣ ва байналмилалӣ) 50 фоиз муқаррар карда мешавад.
66. Занони ҳомила ва модароне, ки кормандони системаи иҷрои ҷазои ҷиноятӣ мебошанд, аз ҳамаи ҳуқуқу имтиёзҳои бо санадҳои меъёрии ҳуқуқии Ҷумҳурии Тоҷикистон барои занони ҳомила ва модарон муқарраршуда истифода мебаранд.
67. Кормандон - нафақахӯрон аз ҷумла онҳое, ки бинобар расидан ба синну соли муқарраргардида, собиқаи корӣ, ихтисори ҷойҳои корӣ, аз рӯи маҳдудияти аҳволи саломатӣ аз кор озод шудаанд ва аз сабаби хизмат дар системаи иҷрои ҷазои ҷиноятӣ ҳуқуқи гирифтани нафақа доранд, инчунин барои таъминоти худ ва аъзои оилаашон бо кӯмаки тиббӣ дар муассисаҳои тиббии сохтори Вазорати адлияи Ҷумҳурии Тоҷикистон ва нафароне, ки ба табобати санаториявию курортӣ эҳтиёҷ доранд дар муолиҷахонаҳо (санаторияҳо) ва хонаҳои истироҳатии сохтори ҳамин вазорат барои муолиҷа ҳуқуқ доранд.
68. Агар кормандони системаи иҷрои ҷазои ҷиноятӣ аз рӯи соҳаи зарурӣ дар муассисаҳои тиббии сохтори Вазорати адлияи Ҷумҳурии Тоҷикистон бо муолиҷаи санаторию курортӣ таъмин нагарданд, бо хулосаи комиссияи машваратии тиббии муассисаи тиббӣ ё комиссияи интиҳобии санаторӣ бо тартиби муайяннамудаи Вазири адлияи Ҷумҳурии Тоҷикистон дар ҳудуди маблағи ба ин мақсад аз рӯи хароҷоти (сметаи) муассисаҳои дахлдор ҷудо кардашудае, ки тасдиқ гардидааст, дар асоси розигии байни тарафҳои аҳдкунанда ба дигар муассисаҳои санаторӣ - курортӣ роҳхат ба даст оварда метавонанд.
69. Ба шаҳрвандоне, ки аз системаи иҷрои ҷазои ҷиноятӣ бинобар расидан ба синну соли муқарраргардида дар адои хизмат, беморӣ, маҳдудияти вазъи саломатӣ ё ихтисори ҷойҳои корӣ сабукдӯш шудаанду давомнокии умумии собиқаи кориашон бо ҳисоби имтиёзӣ 20 сол ва аз он зиёда буда, давомнокии умумии собиқаи кориашон 25 сол ва аз ин зиёдро ташкил медиҳад, сарфи назар аз асоси сабукдӯш шуданашон (ба истиснои бадном карда шудан) ба онҳо ва аъзои оилаашон ҳуқуқ ва имтиёзҳои дар Низомнома нишондодашуда боқӣ мемонад.
70. Барои занон (шавҳарон)-и шахсони ҳалокшудаи (фавтидаи) ҳайати роҳбарикунандаи калон ва олӣ то бастани ақди никоҳи нав, имтиёзҳо барои расонидани ёрии тиббӣ ва санаторию курортӣ нигоҳ дошта мешавад. Ҳамин гуна ҳуқуқ барои таъминоти тиббӣ ба аъзои оилаи он ҳайати қаторӣ ва роҳбарикунанда, ки ҳангоми иҷрои вазифаҳои хизматӣ вафот кардаанд ё ҳалок гардидаанд, нигоҳ дошта мешавад.
71. Барои кормандони системаи иҷрои ҷазои ҷиноятӣ давомнокии умумии вақти корӣ на бештар аз 40 соат дар як ҳафта муқаррар карда мешавад. Ҳангоми зарурат кормандони системаи иҷрои ҷазои ҷиноятӣ метавонанд ба хизмати аз вақти муқарраршуда зиёд, инчунин ҳангоми шаб, рӯзҳои истироҳат ва ид бо тартиб ва меъёрҳои пардохт мувофиқи қонунгузории Ҷумҳурии Тоҷикистон ҷалб карда шаванд.
Ҳангоми кори бастӣ (сменагӣ) барои бастҳои рӯзона ва бегоҳӣ давомнокии баробари кор муқаррар карда шуда, басти шабона як соат кӯтоҳ карда мешавад.
Кормандони ҳайати роҳбарикунандаи миёна ва калон вазифадоранд хизматро дар он ҷо гузаронанд, ки онро манфиатҳои хизмат тақозо мекунанд ва бо фармони сардор муайян шудааст.
72. Ҳамаи кормандони системаи иҷрои ҷазои ҷиноятӣ бояд аз ҳисоби маблағҳои дахлдори ҷузъҳои сохтории системаи иҷрои ҷазои ҷиноятӣ бо суғуртаи ҳатмии давлатии шахсӣ фаро гирифта шаванд. Тартиби гузаронидани ин гуна суғурта аз ҷониби Ҳукумати Ҷумҳурии Тоҷикистон муайян карда мешавад.
Зараре, ки ба моликияти корманди системаи иҷрои ҷазои ҷиноятӣ, хешовандони наздикаш, вобаста ба фаъолият ё вазифаи хизматии ӯ расонида шудааст бо тартиби муқаррарнамудаи қонунгузории Ҷумҳурии Тоҷикистон барқарор карда мешавад.
Дар сурати ба корманди системаи иҷрои ҷазои ҷиноятӣ ҳангоми иҷрои вазифа расонидани зарари ҷисмонӣ, ки ба фаъолияти касбӣ машғул шуданро имконнопазир мегардонад ба ӯ аз ҳисоби маблағҳои ҷудошуда ёрдампулии якдафъаина ба андозаҳои зерин пардохта мешавад:
- ҳангоми муқаррар кардани маъюбии гурӯҳи I - ба андозаи таъминоти пулии панҷсола;
- ҳангоми муқаррар кардани маюбии гурӯҳи II - ба андозаи таъминоти пулии чорсола;
- ҳангоми муқаррар кардани маюбии гурӯҳи III - ба андозаи таъминоти пулии сесола.
Дар сурати аз тарафи корманди системаи иҷрои ҷазои ҷиноятӣ бардоштани захми вазнин ҳангоми гузаштани хизмат, ки дар натиҷаи он ӯ маъюб нашудааст ба ӯ мувофиқи хулосаи комиссияи тиббии ҳарбӣ аз ҳисоби маблағҳои ҷудошуда ба андозаи таъминоти пулии дусола ва дар ҳайати бардоштани захми сабук ба андозаи таъминоти яксола ёрдампулии якдафъаина пардохта мешавад.
Ҳангоми ҳалок гардидани корманди системаи иҷрои ҷазои ҷиноятӣ дар вақти иҷрои вазифаҳои хизматӣ ба оилаи ҳалокгардида ё шахсони таҳти саробонии он буда ёрдампулии яқдафъаина дар ҳаҷми таъминоти пулии даҳсола аз ҳисоби маблағҳои ҷудошуда пардохта мешавад.
Ҳифзи ҳаёт, саломатӣ, шаъну шараф ва моликияти кормандон ва аъзои оилаҳои онҳо аз сӯиқасди ҷиноятӣ вобаста ба иҷрои вазифаи хизматии онҳо дар қонунгузории Ҷумҳурии Тоҷикистон пешбинӣ карда мешавад.
73. Кормандоне, ки ғайриқонунӣ аз хизмат озод ё ба мансаби паст гузаронида шудаанд, дар вазифаи пештара ё ба он баробар барқарор карда мешаванд. Барқароркунӣ дар хизмат (мансаб) на дертар аз як моҳи рӯзи муроҷиат намудан амалӣ мегардад, ба шарте, ки он дар давоми се моҳи аз лаҳзаи қабули қарори ғайриқонунӣ оид ба озод намудан ё паст кардан дар мансаб бо огоҳ намудани он шахс ба вуҷуд омада бошад.
Мӯҳлате, ки шахс дар асоси ҳукми суд ё озодкунии ғайриқонунӣ дар хизмати системаи иҷрои ҷазои ҷиноятӣ қарор надошт, ба мӯҳлати хизмати ӯ дар системаи иҷрои ҷазои ҷиноятӣ (бо ҳисоби тақвимӣ) ва собиқаи меҳнатӣ дар рутбаи махсус ба истиснои ҳолатҳое, ки аз вақти ҳукм 10 сол ва зиёд гузашта бошад, ҳисоб карда мешавад.
74. Сардорони бевосита вазифадоранд ба тобеонашон барои истироҳат, пешравӣ дар хизмат, баландшавии сатҳи таҳсилот ва маданият, ҳалли масъалаҳои иҷтимоӣ - маишӣ имкониятҳои воқеӣ ва шароити мусоид фароҳам оваранд. Сардорони мазкур ва дигар шахсони мансабдори системаи иҷрои ҷазои ҷиноятӣ барои дуруст риоя намудани талаботи ин Низомнома ва дигар санадҳои меъёрӣ дар масъалаҳои адои хизмат ва кор бо кадрҳо масъулияти шахсиро ба ӯҳда доранд. Ҳуқуқи вайронкардашудаи корманд бетаъхир барқарор карда шуда, шахсони мансабдоре, ки бо айби онҳо чунин вайронкунӣ ба вуҷуд омадааст, ба ҷавобгарӣ кашида мешаванд, дар мавридҳои муқаррарнамудаи қонунгузории Ҷумҳурии Тоҷикистон зарари моддии расонидашуда низ талофӣ карда мешавад.
75. Кормандон барои вайрон кардани қонуният, сӯиистифода аз ҳокимият, аз ҳадди ваколатҳои хизматӣ баромадан, иҷро накардан ё ба таври бояду шояд иҷро накардани ӯҳдадориҳои ба зиммаи онҳо гузошташуда бо тартиби муқарраршуда ҷавобгар мебошанд.
76. Ҳолатҳое, ки барои дохил шудан ба хизмат дар системаи иҷрои ҷазои ҷиноятӣ ё дар хизмат будан мамониат мекунанд:
а) доштани доғи судӣ (аз ҷумла доғи судии бардошташуда ё адокардашуда);
б) мувофиқат накардан ба шартҳое, ки дар сархати сеюми банди 1 ҳамин Низомнома пешбинӣ шудаанд:
в) мавҷуд будан ва эътибори қонунӣ доштани ҳукми суд оид ба маҳрум кардан аз ҳуқуқи ишғоли мансабҳои давлатии хизмати давлатӣ;
г) вуҷуд доштани беморие, ки барои адои вазифаҳои хизматӣ монеъ шуда метавонад бо хулосаи тасдиқшудаи муассисаи тиббӣ;
д) саркашӣ намудан аз расмиёти гузаштани тафтишоти махсус, ва ба расмият даровардани иҷозат барои кор бурдан бо маълумотҳои дорои сирри давлатӣ ва дигар маълумотхои бо қонун ҳифзшаванда;
е) мавҷудияти хешии наздик ё қудогӣ (волидайн, бародарон, ҳамсарон, хоҳарон, фарзандон, инчунин бародару хоҳарони волидайн ва фарзандони ҳамсарон), бо кормандон, агар хизмати онҳо дар системаи иҷрои ҷазои ҷиноятӣ бо тобеият ё таҳти назорати бевосита будани яке ба дигаре алоқаманд бошад;
ж) мавҷудияти шаҳрвандии давлати хориҷӣ, ба истиснои ҳолатҳое, ки агар иҷозат ба хизмат дар системаи иҷрои ҷазои ҷиноятӣ дар асоси дуҷониба бо созишномаҳои байнидавлатӣ ба танзим дароварда шуда бошад;
з) саркашӣ намудан аз гузаштани қайди ҳатмии давлатии дактилоскопӣ мутобиқи Қонуни Ҷумҳурии Тоҷикистон "Дар бораи бақайдгирии давлатии дактилоскопӣ";
и) дар бораи худ ва хешовандонаш ба дастгоҳи кадрҳо пешниҳод намудани ҳуҷҷатҳо ва маълумотҳои баръало бардурӯғ;
к) бо қарори эътибори қонунӣ пайдонамудаи суд ғайри қобили амал, ё маҳдудан қобили амал дониста шудани шаҳрванд;
л) саркашӣ аз супурдани меъерҳо доир ба тайёрии ҷисмонӣ ё номувофиқии натиҷаҳои супурдан ба меъёрҳои муқарраршуда;
77. Ҳангоми дохил шудан ба хизмат дар системаи иҷрои ҷазои ҷиноятӣ шаҳрвандон ҳуҷҷатҳои зеринро пешниҳод менамоянд:
а) аризаи шахсӣ;
б) ҳуҷҷатҳои тасдиқкунандаи шахсият ва синну сол;
в) дафтарчаи меҳнат;
г) ҳуҷҷати тасдиқкунандаи таҳсилот;
д) ҳуҷҷати муайянкунандаи муносибат ба иҷрои ӯҳдадории ҳарбӣ (барои шаҳрвандоне, ки дар захираи Қувваҳои Мусаллаҳи Ҷумҳурии Тоҷикистон қарор доранд).
Дастгоҳҳои кадрӣ шахсони барои хизмат ба системаи иҷрои ҷазои ҷиноятӣ дохилшавандаро барои муоинаи тиббӣ, ташхиси руҳӣ (психодиагностикӣ) ва супурдани меъёрҳои тайёрии ҷисмонӣ равона мекунанд.
78. Қабули шаҳрвандон барои хизмат ба системаи иҷрои ҷазои ҷиноятӣ бо фармони Вазир, муовини Вазир - сардори Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон, сардори муассисаи дахлдор, мувофиқи салоҳияташон ба расмият дароварда мешавад ва фармон ба корманди системаи иҷрои ҷазои ҷиноятӣ эълон карда мешавад .
79. Дар мавриди муайян намудани ҳолатҳое, ки барои хизмат ба системаи иҷрои ҷазои ҷиноятӣ дохил шудани шаҳрванд монеъа мешаванд, шаҳрванди номбурда бо тартиби муқарраршуда оид ба сабабҳои қабул нашудани ӯ барои хизмат ба системаи иҷрои ҷазои ҷиноятӣ хабардор карда мешавад.
80. Маҳдудиятҳои синнусолӣ барои шаҳрвандоне, ки пештар аз хизмат аз системаи иҷрои ҷазои ҷиноятӣ озод карда шуда буданд ва аз нав ба хизмат қабул карда мешаванд инчунин аз хизмати ҳарбии дигар вазоратҳо ва ташкилотҳое, ки дар онҳо барои ҳайати шахсӣ рутбаҳои махсус муқаррар шудааст, аз рӯи талаботи аз банди 34 ҳамин Низомнома бармеомада муайян карда мешавад.
Таъин кардан ба мансабҳои ҳайати қаторӣ ва роҳбарикунанда ҳангоми мувофиқати шаҳрванди Ҷумҳурии Тоҷикистон (корманди системаи иҷрои ҷазои ҷиноятӣ) ба талаботи тахассусӣ ва ҷисмонии барои дараҷаи мансабҳои муносиб муқарраршуда амалӣ мегардад.
81. Тартиби интихоби шаҳрвандон барои хизмат ба системаи иҷрои ҷазои ҷиноятӣ ва дохил шудан ба муассисаҳои таълимии системаи иҷрои ҷазои ҷиноятии Вазорати адлияро Вазири адлияи Ҷумҳурии Тоҷикистон муайян мекунад.
82. Шаҳрвандони Ҷумҳурии Тоҷикистон, ки муассисаҳои таълимии олии касбиро хатм намудаанд, курсантҳо ва шунавандагони муассисаҳои махсуси таълимӣ, инчунин хатмкунандагони мактабҳои олӣ ва таҳсилоти касбӣ баъди қабул барои хизмат ба системаи иҷрои ҷазои ҷиноятӣ аз қайди ҳарбии комиссариатҳои ҳарбӣ бароварда шуда, ба қайди махсус дар Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон гузошта мешаванд .
83. Ба шаҳрвандони Ҷумҳурии Тоҷикистон, ки дар системаи иҷрои ҷазои ҷиноятӣ хизмат мекунанд (хизмат кардаанд), ихтисосҳои ҳарбии бақайдгириашон аз тарафи Вазири мудофиаи Ҷумҳурии Тоҷикистон бо мувофиқаи Вазири адлияи Ҷумҳурии Тоҷикистон муқаррар карда мешавад.
84. Ба кори дигар гузаронидани корманди системаи иҷрои ҷазои ҷиноятӣ амалӣ мегардад:
а) ба мансаби болоӣ - бо тартиби болоравӣ дар хизмат бо назардошти дараҷаи тайёрии касбӣ бо розигии корманди системаи иҷрои ҷазои ҷиноятӣ;
б) ба мансаби баробараҳамият - ҳангоми зарурати таъин намудан ба мансаби дигар ё барои мақсаднок истифода намудани корманди системаи иҷрои ҷазои ҷиноятӣ бо назардошти хислатҳои кордонӣ, шахсӣ ва тайёрӣ аз рӯи ихтисоси нав ё аҳволи саломатӣ ва синну сол - бо розигии корманди системаи иҷрои ҷазои ҷиноятӣ, инчунин аз рӯи шароити оилавӣ ё бо ташаббуси шахсии корманд;
в) ба мансаби поёнӣ - ҳангоми ихтисори ҷойҳои корӣ ё барҳам додани муассиса дар ҳолати набудани имконияти гузаронидан ба мансаби баробараҳамият бо розигии корманди системаи иҷрои ҷазои ҷиноятӣ; мувофиқи хулосаи комиссияи тиббии ҳарбӣ бо сабаби аҳволи саломатӣ; бо хоҳиши шахсӣ; аз рӯи номувофиқии хизматӣ нисбати мансаби ишғолкарда бо тартиби аттестатсионӣ; бо тартиби ҷазои интизомӣ. Корманде, ки ба мансаби поёнӣ гузаронида шудааст, минбаъд бо назардошти ихтисоси хизматӣ, таҷрибаи корӣ, сифатҳои кордонӣ, шахсӣ ва аҳволи саломатӣ метавонад бо зинаҳои хизматӣ пеш равад.
г) ҳангоми дохил шудан ба таълимгоҳ бо озод намудан аз мансаби штатии ишғолкарда ва гузаронидан ба ихтиёри Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон ;
д) баъди адои таҳсил дар шакли рӯзонаи таълим ҳангоми таъин намудан ба мансаб, он аз мансаби пеш аз таҳсил ишғол кардааш набояд паст бошад;
е) бо розигии корманд бо тартиби махсус равон кардан ба мақомоти ҳокимияти давлатӣ, ташкилот ва муассисаҳо.
85. Ҳангоми ба мансаб гузаронидани корманди системаи иҷрои ҷазои ҷиноятӣ ӯ бо кор аз рӯи ихтисосҳои асосӣ, ба он наздик ё мувофиқи таҷрибаи доштааш таъмин карда мешавад, ҳангоми зарурати истифодаи корманди системаи иҷрои ҷазои ҷиноятӣ дар мансаби ихтисосаш барои ӯ нав, корманд бояд дар курсҳои дахлдор тайёрии пухта гирифта бошад.
86. Дар ҳама ҳолатҳо аз як вазифа ба вазифаи дигар гузаронидани корманд бо фармони муовини Вазир - сардори Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон (муассисаи дахлдор) бо нишон додани сабабҳои гузариш ба расмият дароварда мешавад .
87. Барои кормандони системаи иҷрои ҷазои ҷиноятӣ, ки 15 сол ва аз он зиёд собиқаи корӣ доранд, ҳангоми гузаронидан ба вазифаи дигар бо маоши хурд дар ҳолати барҳам додани муассиса, бо сабаби ихтисори ҷойҳои корӣ ё бо аҳволи саломатӣ андозаи маоши мансабиашон аз рӯи ҷои охири хизмат барои онҳо нигоҳ дошта мешавад.
88. Гузаронидани корманди системаи иҷрои ҷазои ҷиноятӣ барои кор ба дигар минтақа бо ташаббуси сардори муассиса танҳо бо розигии корманд бо шарте, ки ҳолати дигар дар қарордод муайян нашуда бошад, имкон дорад. Ба минтақаи дигар гузаронидани корманди системаи иҷрои ҷазои ҷиноятӣ барои хизмат, аз ҷумла бо сабаби тағйири мавзеи муассисаҳо танҳо бо розигии корманд, агар ҳолати дигареро қарордод муайян накарда бошад, сурат мегирад.
89. Ҳангоми гузаронидани корманди системаи иҷрои ҷазои ҷиноятӣ ба минтақаи дигар барои хизмат ба корманди мазкур ва аъзои оилаи бо ӯ истиқоматкунанда бинои истиқоматии ишғолкардааш дар маҳали зисти доимӣ дар давоми муддати хизматаш бо тартиби муайяншуда нигоҳ дошта мешавад. Дар як вақт дар ҷои кори нав ба корманди системаи иҷрои ҷиноятӣ ва аъзои оилаи ӯ бинои манзилгоҳ пешниҳод карда мешавад ё ҷубронпулии ҳармоҳа барои иҷораи манзилгоҳ дар тамоми мӯҳлати хизмати ӯ дар ҷои нав ба андозаи муқаррарнамудаи Ҳукумати Ҷумҳурии Тоҷикистон пардохта мешавад.
90. Корманди системаи иҷрои ҷазои ҷиноятӣ мумкин аст иҷрокунандаи вазифа аз рӯи мансаб таъин карда шавад. Дар як вақт мӯҳлати бетанаффуси иҷрои вазифаҳои мансаби холибуда аз ҷониби ӯ набояд аз ду моҳ зиёд бошад, иҷрои вазифаи холинабуда чор моҳ аст (ба истиснои ҳолатҳои иҷрои вазифаҳои мансаби холинабуда ҳангоми пешниҳодкунии рухсатиҳо оид ба ҳомиладорӣ ва таваллудкунӣ, инчунин нигоҳубини кӯдак).
91. Корманд мумкин аст аз вазифаи ишғолкардааш озод ва ба ихтиёри Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон ба мӯҳлати на зиёд аз ду моҳ бо нигоҳ доштани пардохти маош аз рӯи рутбаи махсус дар ҳолатҳои зерин гузаронида шавад :
а) гузаронидани чорабиниҳои ташкилию штатӣ. Ҳангоми гузаронидани чорабиниҳои ташкилию штатӣ корманд бояд то гузаштани мӯҳлати мазкур бо кор таъмин карда шавад ё аз рӯи ихтисори ҷойҳои корӣ (штатҳо) дар ҳолати мавҷуд набудани имконияти таъиноти ӯ ба мансаби дигар ё муассисаи дигар аз кор озод карда мешавад.
б) озод шудан аз системаи иҷрои ҷазои ҷиноятӣ бо асосҳои дар зербандҳои "а", "б", "в", "г", "ж" -и банди 131 ҳамин Низомнома нишон додашуда.
Озод намудани корманд аз мансаб мувофиқи моддаи мазкур бо гузаронидани ӯ ба ихтиёри Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон баъд аз гузаштани ду моҳи гирифтани огоҳинома оид ба озод кардан (ҳангоми озод кардани ӯ бо ташаббуси роҳбарияти муассиса) ва бо гузаштани ду ҳафта (ҳангоми аз ҷониби корманд додани аризаи озод намудан) танҳо дар мавриди номумкин будани озодкунии фаврии ӯ баъди мӯҳлати нишондодашуда (рухсатии меҳнатӣ, беморӣ, сафари хизматӣ) амалӣ мегардад .
в) фиристодани корманд аз мақомоти ҳокимияти давлатӣ ва ташкилотҳо ба системаи иҷрои ҷазои ҷиноятӣ.
92. Муддати дар рухсатии меҳнатии навбатӣ ё иловагӣ, дар муолиҷа ё сафари хизматӣ будани корманд ба мӯҳлати қарор доштани ӯ дар ихтиёри Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон ҳисобида намешавад .
93. Корманди системаи иҷрои ҷазои ҷиноятӣ дар ҳолатҳои зерин метавонад муваққатан аз вазифа дур карда шавад:
а) дар давраи тафтишоти хизматӣ маълум гардидани вайронкунии дағали интизоми хизматӣ, ки барои иҷрои вазифаҳои хизматиашон имконият намедиҳад;
б) барои содир намудани ҷиноят ба сифати айбдор, гумонбаршуда ҷалб карда шудан то бо асоси барқароркунӣ қатъ карда шудани парвандаи ҷиноятӣ ё то баромадани қарори суд оид ба парвандаи мазкур.
Дар давраи аз мансаб дур карда шудани корманд таъминоти пулӣ ба ҳаҷми пурра ба ӯ пардохта мешавад.
Дар ҳолати дур карда шудани корманди системаи иҷрои ҷазои ҷиноятӣ аз мансаб дар асоси зербандҳои "а" ва "б" ҳамин банд ё ҳабс шудан ва оғоз кардани парвандаи ҷиноятӣ, пардохти таъминоти пулии ба ӯ муқарраршуда боздошта мешавад. Ҳангоми барқарор кардани корманд ба вазифаи ишғолкардааш дар асоси сафедкунӣ ё қать шудани парвандаи ҷиноятӣ ба корманд барои тамоми муддати аз кор дур буданаш (дар ҳабс буданаш) таъминоти пулӣ пардохта мешавад.
94. Дар ҳолати пешбарӣ шудани кормандони системаи иҷрои ҷазои ҷиноятӣ ба номзадии аъзои Маҷлиси миллӣ ва вакилии Маҷлиси намояндагони Маҷлиси Олии Ҷумҳурии Тоҷикистон онҳо бояд аз системаи иҷрои ҷазои ҷиноятӣ бо қатъ кардани амали мӯҳлати қарордод оид ба хизмат озод карда шаванд.
III. Додани рутбаҳои махсус, паст кардан дар рутбаҳои махсус, маҳрум кардан аз рутбаҳои махсус
95. Рутбаҳои махсуси ҳайати қаторӣ ва роҳбарикунанда (кормандон) ба шахсони дар системаи иҷрои ҷазои ҷиноятӣ ба кор қабулшуда бо дарназардошти мансаби ишғолкардаашон, сифатҳои касбӣ, таҳсилот ва дигар шартҳои пешбининамудаи Қонуни Ҷумҳурии Тоҷикистон "Дар бораи системаи иҷрои ҷазои ҷиноятӣ" ва ин Низомнома, ба афсарони дар захира буда мувофиқи рутбаи ҳарбии доштаашон дода мешавад.
Рутбаҳои ҳайати қаторӣ ва роҳбарикунанда, ғайр аз ҳолатҳои дар ин Низомнома пешбинишуда, якумрӣ мебошанд. Ҳангоми қатъ шудани хизмат дар системаи иҷрои ҷазои ҷиноятӣ ба рутбаи махсуси мавҷудбуда суханони "дар истеъфо" илова мешаванд.
Рутбаҳои махсуси кормандони системаи иҷрои ҷазои ҷиноятӣ дар шароити давраи ҷангӣ ва ҳангоми ба нафақа баромадан ба захира ё истеъфо ба рутбаҳои ҳарбӣ баробар карда мешаванд.
Ба кормандони системаи иҷрои ҷазои ҷиноятӣ, ки аз хизмат озод шуда ба захираи Қувваҳои Мусаллаҳ гузаронида мешаванд, рутбаи ҳарбии захира бо тартиби аттестатсионӣ бо назардошти ихтисоси ҳарбии бақайдгирӣ ва рутбаҳои махсуси доштаи онҳо аз ҷониби Вазири мудофиаи Ҷумҳурии Тоҷикистон дода мешавад.
Кормандони системаи иҷрои ҷазои ҷиноятӣ, ки ба истеъфо рафтаанд ба қайди ҳарбӣ гирифта намешаванд, ва ба онҳо рутбаҳои ҳарбӣ бо тартиби аттестатсионӣ дода намешавад.
96. Дар рутбаҳои махсуси ҳайати қаторӣ ва хурди роҳбарикунанда мӯҳлати собиқаи зерин муқаррар карда мешавад:
дар рутбаи сержанти хурд, сержанти хурди хизмати дохилӣ -1 сол;
дар рутбаи сержант, сержанти хизмати дохилӣ -2 сол;
дар рутбаи сержанти калон, сержанти калони хизмати дохилӣ - 3 сол;
дар рутбаи старшина, старшинаи хизмати дохилӣ -3 сол;
дар рутбаи прапоршик, прапоршики хизмати дохилӣ - 4 сол;
Мӯҳлати собиқа дар рутбаҳои қаторӣ, қатории хизмати дохилӣ, прапоршики калон, прапоршики калони хизмати дохилӣ муқаррар карда намешавад.
97. Дар рутбаҳои махсуси ҳайати миёна ва калони роҳбарикунанда мӯҳлати собиқаи зерин муайян карда мешавад:
дар рутбаи лейтенанти хурд, лейтенанти хурди хизмати дохилӣ -1 сол;
дар рутбаи лейтенант, лейтенанти хизмати дохилӣ - 2 сол;
дар рутбаи лейтенанти калон, лейтенанти калони хизмати дохилӣ - 3 сол;.
дар рутбаи капитан, капитани хизмати дохилӣ - 3 сол;
дар рутбаи майор, майори хизмати дохилӣ - 4 сол;
дар рутбаи подполковник, подполковники хизмати дохилӣ-5сол;
Дар рутбаи полковник, полковники хизмати дохилӣ мӯҳлати собиқа муқаррар карда намешавад.
Барои кормандони ҳайати роҳбарикунанда, ки мактабҳои олии махсус ва дигар мактабҳои олиро хатм намудаанд, мӯҳлати собиқа дар рутбаи лейтенант, лейтенанти хизмати дохилӣ -1 сол муқаррар карда мешавад.
98. Барои бо муваффақият иҷро намудани супоришҳо, инчунин барои ноил гаштан ба натиҷаҳои баланд дар фаъолияти хизматӣ, аммо на зиёда аз як маротиба дар тамоми мӯҳлати хизмат дар системаи иҷрои ҷазои ҷиноятӣ рутбаҳои махсуси навбатии зерин дода мешаванд:
- пеш аз мӯҳлат:
барои мардонагӣ ва фидокорие, ки ҳангоми иҷрои вазифаи хизматӣ зоҳир намудаанд, сарфи назар аз мӯҳлати собиқаи дар рутбаи махсус муқарраршуда;
барои ноил шудан ба натиҷаҳои баланд дар фаъолияти хизматӣ, иҷрои нақшаҳои истеҳсолӣ - баъди гузаштани на камтар аз нисфи мӯҳлати собиқаи дар рутбаи махсус муқарраршуда.
- ба як зина боло аз рутбаи махсус, ки аз рӯи вазифаи ишғолкардашуда пешбинӣ шудааст:
ба кормандони ҳайати роҳбарикунандаи унвони илмӣ дошта ҳангоми гузаштани мӯҳлати муқарраршудаи собиқа дар рутбаи махсус;
ҳангоми гузаштани на камтар аз якуним мӯҳлати собиқа дар унвони пешина.
Додани рутбаҳои махсус пеш аз мӯҳлат ва як зина боло дар як вақт роҳ дода намешавад.
Рутбаи махсуси аввал ва навбатӣ ба кормандони ҳайати роҳбарикунандаи миёна ва калон (аз ҷумла пеш аз мӯҳлат ва як зина баланд) то рутбаи "майор" аз ҷониби муовини вазир - сардори Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон дода мешавад. Мӯҳлати собиқа дар рутбаи махсус аз рӯзи имзо шудани фармон дар бораи додани рутба ҳисоб карда мешавад .
Рутбаҳои подполковник, подполковники хизмати дохилӣ, полковник, полковники хизмати дохилӣ аз ҷониби Вазири адлияи Ҷумҳурии Тоҷикистон дода мешавад.
Шахсе, ки беасос пешниҳоди кормандро оид ба додани рутбаи махсуси навбатӣ боздоштааст ба ҷавобгарии интизомӣ кашида мешавад.
99. Ба кормандоне, ки рутбаи махсуси "капитан", "капитани хизмати дохилӣ" доранд, дар як вақт ҳангоми озод шудан аз хизмат ба истеъфо ё захира аз рӯи синну сол, собиқаи хизматӣ, беморӣ, маҳдуднокии аҳволи саломатӣ, ихтисори ҷойҳои корӣ ба шарте, ки онҳо собиқаи кории 20-сола доранд (ба ҳисоби имтиёзӣ) ва он ҳангоми таъин намудани нафақа ба эътибор гирифта мешавад, мӯҳлати муқарраршудаи хизматро дар рутбаи додашуда адо кардаанд, мансаберо ишғол мекунанд, ки дар онҳо рутбаи махсуси "капитан", "капитани хизмати дохилӣ" муқаррар карда шудааст ва ба таври мусбӣ аттестатсия шудаанд, мумкин аст ба онҳо бо фармони муовини вазир - сардори Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон рутбаи махсуси навбатии "майор", "майори хизмати дохилӣ" дода шавад .
100. Рутбаи махсуси якуми ҳайати роҳбарикунандаи хурд дода мешавад:
а) ба шахсони барои хизмат ба системаи иҷрои ҷазои ҷиноятӣ ба мансабҳои ҳайати қаторӣ ва роҳбарикунанда қабулшуда.
Дар як вақт ба онҳо рутбаҳои махсуси якуми ҳайати роҳбарикунандаи хурде, ки ба рутбаи ҳарбии захираи доштаи онҳо баробар аст дода мешавад.
б) ба шахсоне, ки ҳангоми адои хизмати ҳарбӣ ба онҳо рутбаи сержантӣ ё пропоршикӣ дода шудааст дар мавриди таъинкунии онҳо ба мансаби хурди ҳайати роҳбарикунанда, рутбаи махсуси ба рутбаи ҳарбии онҳо мувофиқ дода мешавад.
Шахсоне, ки пештар дар системаи иҷрои ҷазои ҷиноятӣ дар рутбаҳои махсуси ҳайати қаторӣ ва роҳбарикунанда адои хизмат намудаанд, ҳангоми аз нав қабул шудан ба мансабҳои ҳайати қаторӣ ё роҳбарикунандаи хурд бо рутбаҳои махсуси доштаи онҳо таъин карда мешаванд.
101. Рутбаи махсуси лейтенанти хурд ё лейтенанти хурди хизмати дохилӣ ба кормандони ҳайати хурди роҳбарикунанда ва дигар кормандони таҳсилоти миёнаи касбӣ ва таҳсилоти нопурраи олӣ дошта, ки ба мансабҳои ҳайати миёнаи роҳбарикунанда таъин шудаанд, дода мешавад.
102. Рутбаи махсуси лейтенант ё лейтенанти хизмати дохилӣ дода мешавад:
а) ба шахсоне, ки таҳсилоти олӣ доранд ва ба вазифаи ҳайати миёнаи роҳбарикунанда таъин шудаанд;
б) ба шахсоне, ки таҳсилоти олӣ доранд ва лейтенантони хурди захира.
103. Ба афсарони захира ҳангоми гузаронидани онҳо ба ҳайати кадрҳои Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон рутбаҳои махсуси мувофиқи рутбаҳои ҳарбии доштаи онҳо дода мешавад, ба истиснои зербанди "б" банди 102 ҳамин Низомнома .
104. Ба афсарони алоҳидаи захира, ки тайёрии баланд ва таҷрибаи бойи корӣ доранд ҳангоми қабули онҳо ба системаи иҷрои ҷазои ҷиноятӣ ва гузаронидан ба ҳайати кадрҳои Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон мумкин аст ба таври истисно рутбаи махсус ба як зина боло нисбати рутбаи доштаашон, вале на болотар аз рутбаи барои мансаби пешбинишаванда муқарраршуда, ки онҳо таъин мешаванд, дода шавад .
105. Ба шахсоне, ки ба мансаби ҳайати калони роҳбарикунанда қабул шудаанд, рутбаи махсуси якум на баландтар аз майор ё майори хизмати дохилӣ дода мешавад, ба истиснои шахсоне, ки аз рӯи захира рутбаи нисбатан баландтари мувофиқи афсарӣ доранд.
Рутбаҳои махсуси навбатии "майор", "майори хизмати дохилӣ" ба кормандоне дода мешаванд, ки маълумоти олӣ доранд.
106. Рутбаҳои махсуси навбатии ҳайати роҳбарикунанда бо тарзи пайваста ҳангоми мувофиқии рутбаи нав ба рутбаи пешбинишудаи вазифаи ишғолнамуда баъди гузаштани мӯҳлати муқарраршудаи собиқаи хизмат дар рутбаи пешина бо мавҷудияти натиҷаи мусбии аттестатсия дода мешавад.
107. Кормандони ҳайати роҳбарикунанда барои гирифтани рутбаи махсус аз ҷониби сардорони бевоситаи худ пешниҳод карда мешаванд.
Пешниҳоди кормандони ҳайати роҳбарикунанда ба рутбаҳои навбатӣ, ки дар адои хизмат, рафтори шахсӣ камбудиҳои ҷиддӣ доранд ва ҳарчанд ба шартҳои дигари додани рутбаи навбатӣ ҷавобгӯ бошанд ҳам, то ислоҳи он норасогиҳо додани рутбаи навбатӣ мавқуф гузошта мешавад. Қарор дар бораи мавқуф гузоштани пешниҳодот аз ҷониби сардори бевоситаи муассиса қабул карда мешавад. Сабабҳое, ки барои қабули чунин қарор асос шудаанд, ба маълумоти корманд расонида мешавад.
108. Ба кормандони ҳайати қаторӣ, хурд, миёна ва калони роҳбарикунанда, ки аз як хадамот (воҳидҳои сохторӣ) ба хадамоти дигар гузаронида шудаанд ва дар он ҷо барои ҳайати шахсӣ рутбаҳои махсуси дигар муқаррар карда шудаанд, чунин рутбаҳо бо тартиби аз нав аттестатсия кардан дода мешаванд ҳамзамон рутбаҳои махсуси додашуда аз рутбаҳои то аз нав аттестатсиякунӣ доштаашон набояд паст бошанд.
Тартиби аз нав аттестатсиякунии рутбаҳои махсус аз тарафи муовини Вазир -сардори Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон муқаррар карда мешавад .
IV. Ба мансаб таъин кардан ва ҷойивазкунӣ дар хизмат
109. Мансабҳои аз ҷониби шахсони ҳайати қаторӣ, роҳбарикунандаи хурд, миёна ва калон, то подполковник ишғол кардашаванда ва рутбаҳои махсуси ба ин мансабҳо мувофиқ бо феҳрастҳое муайян карда мешаванд, ки онҳоро Вазири адлияи Ҷумҳурии Тоҷикистон тасдиқ кардааст.
110. Феҳрасти вазифаҳои аз ҷониби кормандони системаи иҷрои ҷазои ҷиноятӣ дар рутбаи "полковник" ишғолшавандаро Ҳукумати Ҷумҳурии Тоҷикистон тасдиқ мекунад.
111. Мутобиқи Конститутсияи (Сарқонуни) Ҷумҳурии Тоҷикистон феҳрасти мансабҳои ҳайати роҳбарикунандаи олӣ ва рутбаҳои махсуси ба онҳо мувофиқро Президенти Ҷумҳурии Тоҷикистон тасдиқ менамояд.
Талаботи тахассусӣ ба кормандоне, ки дар системаи иҷрои ҷазои ҷиноятӣ мансаб ишғол кардаанд аз тарафи Вазири адлияи Ҷумҳурии Тоҷикистон, муовини вазир - сардори Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон муайян карда мешаванд Сарраёсати иҷрои ҷазои ҷиноятии.
112. Таъин намудан ба мансабҳои штатии ҳайати роҳбарикунандаи хурд, миёна ва калон ва ҷойивазкунии онҳо дар хизмат аз ҷониби сардорони бевосита мутобиқи Қонуни Ҷумҳурии Тоҷикистон "Дар бораи системаи иҷрои ҷазои ҷиноятӣ" сурат мегирад. Дар як вақт шартҳои зерин риоя карда мешаванд:
а) кормандон бояд аз рӯи ихтисоси асосии онҳо, ба он наздик ё мувофиқи таҷрибаи доштаашон истифода бурда шаванд, ҳангоми зарурат дар вазифаҳои барои онҳо нав истифода бурда мешаванд;
б) пешбарии кормандон дар хизмат ба вазифаҳои болотар дар асоси интихобӣ (алтернативӣ) вобаста ба сатҳи тахассус, собиқаи хизматӣ, натиҷаҳои ба дастоварда дар қитъаҳои супоридашудаи хизматӣ, хулосаҳои аттестатсия сурат мегирад;
в) ҳангоми гузаронидани чорабиниҳои ташкилӣ - штатӣ шахсони ҳайати роҳбарикунанда мумкин аст ба мӯҳлати на зиёд аз 15 рӯз ба ихтиёри Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон гирифта шаванд .
Дар ҳолатҳои истисно, ки онро вазъияти махсус талаб менамояд, истодан дар ихтиёр аз 15 рӯз зиёд, аммо на зиёдтар аз ду моҳ бо розигии муовини Вазир - сардори Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон иҷозат дода мешавад. Ба мӯҳлати истодан дар ихтиёр давраи бо Низомномаи мазкур муқарраршудаи рухсатии меҳнатӣ (ғайр аз рухсатии нигоҳубини кӯдак), дар муолиҷа (муоина) будан дар муассисаҳои тиббӣ, инчунин вақти беморӣ ҳисобида намешавад ;
г) иҷозат додан ба кормандони системаи иҷрои ҷазои ҷиноятӣ барои кор бо ҳуҷҷатҳои махсусан муҳим, комилан махфӣ ва махфӣ баъди таъин намудани онҳо ба вазифа ба воситаи Вазорати амнияти Ҷумҳурии Тоҷикистон сурат мегирад.
113. Ба вазифаи дигар (ҷойивазкунӣ) гузаштани кормандон ба тартиби муқарраршуда амалӣ карда мешавад:
а) ба мансабҳои болоӣ бо тартиби пешбарӣ намудан дар хизмат;
б) ба мансабҳои баробар - ҳангоми зарурати пурра намудани дигар мансабҳо, аз рӯи нақша гузаронидани ивазкунӣ дар маҳалҳо бо мӯҳлати маҳдуди хизмат, инчунин барои нисбатан мақсаднок истифода бурдани шахсони ҳайати роҳбарикунанда бо дарназардошти сифатҳои шахсӣ ва хизмат, вазъи саломатӣ, синну сол ва аз рӯи тайёрии гирифтаашон оид ба ихтисоси нав;
в) дохил шудан ба муассисаҳои таълимӣ ва бо ин сабаб озод кардан аз вазифаи ишғолкардаашон, инчунин таъин намудан ба вазифа баъди хатми таҳсил;
г) ба мансабҳои хурд дар асосҳои пешбининамудаи банди 117 ҳамин Низомнома.
114. Болоравии кормандон дар хизмат мувофиқи сифатҳои ахлоқӣ ва кордонӣ, ки дар фаъолияти амалии онҳо аён гардидааст, сурат мегирад.
115. Рутбаи махсуси корманде, ки дорои сифатҳои зарурӣ барои болоравӣ дар хизмат мебошад, барои таъин шудани ӯ ба вазифае, ки бояд шахси рутбаи махсуси аз ӯ баландтар дошта ишғол намояд, монеъ шуда наметавонад.
Кормандони ҳайати миёна, калон ва олии роҳбарикунанда, ки худро дар кори амалӣ сазовори болоравӣ дар вазифа нишон додаанд, ба захираи кадрҳои пешбаришаванда дохил карда мешаванд.
116. Кормандони ҳайати миёна, калон ва олии роҳбарикунанда, ки аз сабаби вазъи саломатӣ ё саломатии аъзои оилаашон мувофиқи хулосаи комиссияи тиббии ҳарбӣ барои иваз намудани ҷои кор (истиқомат) эҳтиёҷ доранд, аз рӯи хизмат бо тартиби муайяннамудаи Вазири адлияи Ҷумҳурии Тоҷикистон, муовини вазир - сардори Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон ба минтақаи дигар ба кор фиристода мешаванд .
117. Иваз намудани ҳайати роҳбарикунанда аз мансабҳои болоӣ ба мансаби поёнтар дар ҳолатҳои зерин мумкин аст:
а) ҳангоми ихтисори штатҳо;
б) бо сабаби вазъи саломатӣ, мувофиқи хулосаи комиссияи ҳарбии тиббӣ;
в) бо тартиби аттестатсионӣ;
г) бо тартиби ҷазои интизомӣ мувофиқи Оинномаи интизомии системаи иҷрои ҷазои ҷиноятии Ҷумҳурии Тоҷикистон.
Дар фармони ҳайати шахсӣ оид ба ҷойивазкунии ҳайати роҳбарикунанда аз мансабҳои болоӣ ба поёнӣ сабаби он нишон дода мешаванд.
Шахсони ҳайати олии роҳбарикунанда, ки ба мансабҳои поёнӣ гузаронида шудаанд, дар оянда метавонанд бо тартиби аттестатсионӣ ба вазифаи болотар пешбарӣ шаванд.
V. Аттестатсия
118. Баҳо додан ба кордонӣ ва хислатҳои шахсии кормандон бо мақсадҳои муайян намудани мувофиқати онҳо ба вазифаи ишғолкардаашон, имкониятҳои болоравӣ дар хизмат, инчунин ҳалли масъалаҳои дигари вобаста ба гузаштани хизмат дар системаи иҷрои ҷазои ҷиноятӣ ба тарзи аттестатсионӣ сурат мегирад.
119. Аттестатсияи кормандони ҳайати миёна ва калони роҳбарикунанда дар чор соли хизмат як маротиба, шахсони ҳайати қаторӣ ва хурди роҳбарикунанда дар се соли хизмат як маротиба дар системаи иҷрои ҷазои ҷиноятӣ гузаронида мешавад.
Кормандон, инчунин ҳангоми пешниҳод шудан ба мансаби болоӣ, гузаронидан ба вазифаи поёнӣ ва аз кор озод шудан дар системаи иҷрои ҷазои ҷиноятӣ ба истиснои озод намудан аз кор вобаста ба синну сол, собиқаи меҳнатӣ ва вазъи саломатӣ аз аттестатсия гузаронида мешаванд.
Кормандоне, ки дар вазифаи ишғолкардаашон камтар аз як сол кор кардаанд, инчунин кормандон - занҳо, ки дар вақти ҳомиладорӣ ва нигоҳубини фарзандон дар рухсатии меҳнатӣ қарор доранд, аз атестатсия гузаронида намешаванд.
120. Кормандон аз тарафи сардорони бевоситаи худ дар доираи салоҳияти онҳо, бо назардошти хулосаҳои комиссияи аттестатсионӣ дар асоси ба ҳама ошкоро аз аттестатсия гузаронида мешаванд.
121. Тартиби таҳия ва тасдиқи аттестатсияҳо ба кормандон, инчунин амалӣ намудани хулосаҳо оид ба аттестатсияро муовини вазир - сардори Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон муайян мекунад .
VI. Рухсатиҳо
122. Ба кормандони системаи иҷрои ҷазои ҷиноятӣ рухсатии меҳнатӣ мутобиқи Кодекси меҳнати Ҷумҳурии Тоҷикистон ва дигар қонунҳо дода мешавад:
Давомнокии рухсатӣ бо шабонарӯз ҳисоб карда мешавад. Рӯзҳои идҳои давлатӣ, ки мувофиқи қонунгузории Ҷумҳурии Тоҷикистон рӯзи корӣ ҳисоб намешаванд, ҳангоми муайян кардани давомнокии рухсатии меҳнатӣ ба ҳисоб гирифта намешаванд.
Ҳангоми ба корманд додани рухсатии навбатӣ, рухсатиҳои кӯтоҳмуддат, рухсатиҳои меҳнатӣ бо сабаби хатм намудани муассисаҳои таълимӣ, инчунин рухсатӣ аз сабаби беморӣ бо давомнокии аз мӯҳлати муқаррарӣ зиёд, вақт дода мешавад, ки он барои рафтан ба маҳали гузаронидани рухсатӣ ва бозгашт аз он ҷо зарур аст.
Ҳангоми гузаронидани рӯзи истироҳат аз сабаби рост омадан ба рӯзҳои ид ин рӯзҳо ба рухсатии навбатӣ зам карда мешаванд.
123. Ба корманди системаи иҷрои ҷазои ҷиноятӣ рухсатии меҳнатии асосии пардохтшавандаи ҳарсола ба муддати 30 рӯзи тақвимӣ бе ҳисоб намудани вақти рафтан ба ҷои истироҳат ва бозгашт бо пардохти арзиши роҳкиро дар ҳудуди Ҷумҳурии Тоҷикистон дода мешавад.
Ба кормандони системаи иҷрои ҷазои ҷиноятие, ки дар маҳалҳои шароити иқлимашон душвор ва номусоид адои хизмат менамоянд, новобаста аз собиқаи хизматӣ рухсатии меҳнатии асосии пардохтшавандаи солона ба муддати 45 рӯзи тақвимӣ дода мешавад.
Ба кормандони системаи иҷрои ҷазои ҷиноятӣ рухсатии меҳнатии пардохтшавандаи солонаи иловагӣ ба муддати зерин дода мешавад:
-баъди 10 соли хизмат - 5 рӯзи тақвимӣ:
-баъди 15 соли хизмат - 10 рӯзи тақвимӣ:
-баъди 20 соли хизмат - 15 рӯзи тақвимӣ:
124. Ба кормандоне, ки дар вақти рухсатии меҳнатӣ бемор шудаанд, рухсатӣ барои табобат ба мӯҳлати рӯзҳои рухсатии истифоданашуда дароз карда мешавад. Дароз кардани рухсатӣ дар ин ҳолат аз ҷониби сардоре, ки рухсатиро додааст дар асоси ҳуҷчати дахлдор бо тасдиқи духтури муолиҷакунанда ва сардори (сардухтури) муассисаи табобатӣ амалӣ мешавад.
125. Бозхондани кормандон аз рухсатии навбатӣ роҳ дода намешавад. Дар ҳолати зарурати ниҳоии хизматӣ, бозхост аз рухсатии навбатӣ танҳо бо иҷозати хаттии сардоре, ки ин ҳуқуқро ба ӯ Муовини вазир - сардори Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон муайян намудааст, мумкин аст. Ҳангоми бозхост аз рухсатии меҳнатӣ, агар қисми истифоданашудаи он 10 шабонарӯз ё аз он зиёдро ташкил диҳад, ба кормандон ҳуҷҷатҳои ҳамлу нақлӣ барои рафту омад ба ҷои гузаронидани рухсатии меҳнатӣ ва барои сафар зиёда аз рухсатӣ вақти иловагӣ дода мешавад. Бо хоҳиши кормандон қисми истифоданашудаи рухсатии меҳнатӣ мумкин аст ба рухсатии навбатии соли оянда ҳамроҳ карда мешавад .
Барои кормандоне, ки ба онҳо бо кадом сабабҳое дар давоми соли тақвимии ҷорӣ имконияти додани рухсатии меҳнатӣ ба миён наомадааст, дар охири сол фармони сардори дахлдор оид ба гузаронидани рухсатии онҳо ба соли оянда бо асосноксозии сабабҳои дода нашудани рухсатии меҳнатӣ дар соли ҷорӣ бароварда мешавад.
Ба як аъзои оилаи корманди системаи иҷрои ҷазои ҷиноятӣ ҳуҷҷатҳои ҳамлу нақлӣ барои рафтуомад ба маҳали гузаронидани рухсатии навбатии солона ва бозгашт, агар онҳоро корманд дар соли ҷорӣ истифода набурда бошад, дода мешаванд.
126. Ба кормандони системаи иҷрои ҷазои ҷиноятие, ки аз хизмати системаи иҷрои ҷазои ҷиноятӣ бо сабаби расидани синну сол, собиқаи хизматӣ, беморӣ, маҳдудияти вазъи саломатӣ ё ихтисори штатҳо сабукдӯш карда мешаванд, бо хоҳиши онҳо рухсатии навбатии бо банди 123 ҳамин Низомнома муқарраршуда дода мешавад, дар як вақт санаи сабукдӯш намудан рӯзи охирини рухсатӣ ҳисобида мешавад.
Ба кормандон (ба ғайр аз шахсони дар сархати аввали банди мазкур нишондодашуда), ки аз системаи иҷрои ҷазои ҷиноятӣ сабукдӯш мешаванд, барои рухсатии истифоданашудаи онҳо дар ҳамон соли аз кор рафтаашон ҷубронпулӣ мутаносибан ба вақти хизмати ҳамонсола, аммо на зиёдтар аз 45 шабонарӯз пардохта мешавад.
127. Рухсатии кӯтоҳмуддат ба кормандон барои ҳалли масъалаҳои ногузири иҷтимоӣ - маишӣ, пеш аз ҳама ба ҳифзи саломатӣ, иҷрои қарзи хешовандӣ, инчунин бо дигар сабабҳои узрнок алоқаманд буда, ба мӯҳлати то 10 шабонарӯз дода мешавад (бе назардошти вақти рафту омад ба ҷои гузаронидани рухсатӣ ва бозгашт).
Рухсатии кӯтоҳмуддат ба ҳисоби рухсатии навбатӣ дохил намешавад.
128. Рухсатии иловагӣ барои иҷрои вазифаҳо дар шароити зараровар мутаносибан ба давомнокии рухсатии шабеҳи барои гурӯҳи коргарон ва хизматчиён муқаррарнамудаи қонунгузорӣ муайян карда мешавад.
Барои хизмати хислати махсус дошта ба корманд, ки хизмати ӯ бо кори зиёди ҷисмонӣ ва шиддати асабонӣ алоқаманд аст барои барқарорсозии коршоямии касбӣ рухсатии иловагии 15 рӯза дода мешавад.
Рухсатиҳои иловагӣ бо рухсатии навбатӣ якҷоя карда мешаванд ва мумкин аст дар як вақт бо онҳо ё алоҳида дода шаванд.
Ба кормандон барои иҷрои вазифаҳо дар шароити зараровар ва барои хизмати хислати махсусдошта рухсатии иловагӣ бо интихоби онҳо танҳо ба як асос дода мешавад.
VII. Қатъ намудани хизмат дар системаи иҷрои ҷазои ҷиноятӣ
129. Асосҳо барои қатъ кардани хизмат дар системаи иҷрои ҷазои ҷиноятӣ:
а) озодкунӣ аз хизмати системаи иҷрои ҷазои ҷиноятӣ;
б) қатъ гардидани шаҳрвандии Ҷумҳурии Тоҷикистон;
в) бо тартиби муқарраршуда бедарак ғайбзада эътироф шудани корманд;
г) вафоти (марги) корманди системаи иҷрои ҷазои ҷиноятӣ;
д) пайдо шудани ҳолатҳои дигар, ки бо зербандҳои "б", "в", "е", "ж", "з", "к" банди 76 ҳамин Низомнома пешбинӣ шудаанд.
130. Аз хизмат озод намудани кормандон амалӣ мегардад:
а) ба эҳтиёт рухсат додан (бо гузоштан дар қайди ҳарбӣ), агар сабукдӯшшудагон ба ҳадди синну соли муқарраркардаи Қонуни Ҷумҳурии Тоҷикистон "Дар бораи ӯҳдадории умумии ҳарбӣ ва хизмати ҳарбӣ" барои дар қайди эҳтиётӣ истодани шахсоне, ки рутбаи дахлдори ҳарбӣ дошта аз рӯи вазъи саломатӣ барои хизмати ҳарбӣ коршоям ҳастанд, нарасидаанд;
б) ба истеъфо (бо баровардан аз қайди ҳарбӣ) - агар сабукдӯшшудагон ба ҳадди синну соли муқарраркардаи Қонуни Ҷумҳурии Тоҷикистон "Дар бораи ӯҳдадории умумии ҳарбӣ ва хизмати ҳарбӣ" барои шахсоне, ки рутбаи дахлдори ҳарбӣ доранд, расидаанд, ё аз тарафи комиссияи ҳарбӣ-тиббӣ аз рӯи вазъи саломатӣ барои хизмати ҳарбӣ корношоям ҳисобида шудаанд.
131. Кормандон (бо гузоштан дар қайди ҳарбӣ) аз хизмат ба эҳтиёт озод карда мешаванд:
а) бо хоҳиши худ;
б) бо расидан ба синну соли ниҳоие, ки ин Низомнома муқаррар кардааст;
в) бо расидани мӯҳлати собиқаи хизматӣ, ки ба нафақа баромадан ҳуқуқ медиҳад (бо ташаббус ё розигии корманди системаи иҷрои ҷазои ҷиноятӣ);
г) баъди тамом шудани мӯҳлати хизмат мутобиқи қарордод;
д) бо сабаби иҷро нанамудани шартҳои қарордод;
е) бо ихтисори штатҳо - ҳангоми номумкинии истифода дар хизмат вобаста ба ихтисори штатҳо ё чорабиниҳои ташкилӣ;
ж) бо сабаби беморӣ - дар асоси хулосаи комиссияи тиббии ҳарбӣ дар бораи корношоямӣ барои хизмат дар системаи иҷрои ҷазои ҷиноятӣ;
з) бо сабаби маҳдудияти вазъи саломатӣ - дар асоси хулосаи комиссияи ҳарбии тиббӣ оид ба корношоямӣ дар хизмат ва иҷро карда натавонистани вазифаҳои хизматӣ аз рӯи вазъи саломатӣ мувофиқи мансаби ишғолкарда, ҳангоми номумкинии гузаронидани ӯ ба кори дигар;
и) мувофиқат накардан ба мансаби ишғолкарда аз рӯи натиҷаҳои аттестатсия;
к) ҳангоми мунтазам ва дағалона вайрон намудани интизом;
л) барои рафторе, ки ба шаъну эътибори корманди системаи иҷрои ҷазои ҷиноятӣ доғ меорад;
м) ҳангоми эътибори қонунӣ пайдо намудани ҳукми айбдоркунандаи суд.
Ҳангоми озод кардани кормандон аз рӯи асосҳои зербандҳои "д", "к", "л" банди 131 ҳамин Низомнома пешбинишуда арзиши либоси ба ӯ додашуда бо назардошти мӯҳлати истифодааш ситонида мешавад.
132. Кормандоне, ки барои содир кардани ҷиноят суд шудаанд, баъди эътибори қонунӣ пайдо намудани ҳукми суд оид ба маҳкум шуданашон барои содир кардани ҷиноят аз хизмат озод карда мешаванд.
133. Кормандон оид ба озодкунии дарпешистода, ба истиснои озодкунии бо банди 132 ҳамин Низомнома пешбинишуда, аз тарафи сардорони дахлдор на дертар аз ду моҳ пеш аз пешниҳод ба озодшавӣ огоҳ карда мешаванд.
Кормандоне, ки бо хоҳиши шахсӣ аз хизмат озод мешаванд, сардори бевоситаи худро дар бораи қарори қабулкардаашон оид ба озодшавии ба нақшагирифта на камтар аз ду моҳ пештар огоҳ менамояд.
134. Аз хизмат озод кардани шахсони ҳайати қаторӣ ва роҳбарикунандаи хурд аз тарафи сардороне амалӣ мегардад, ки ин ҳуқуқро ба онҳо қонун пешбинӣ намудааст.
135. Озод кардани кормандони ҳайати миёна, калон ва олии роҳбарикунанда ба эҳтиёт ва истеъфо амалӣ мегардад:
а) то муовинони командири қисми ҳарбӣ, сармуҳосиб, сардорони муассисаҳо, сардори раёсати иҷрои ҷазои ҷиноятии вилояти Суғд ва муовинони сардори саррайсатро муовини Вазир - сардори Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон муайян мекунад ;
б) муовинони командири қисми ҳарбӣ, сармуҳосиб, сардорони муассисаҳо, сардори шӯъбаи корҳои ислоҳии вилояти Суғд ва муовинони раёсатро бо пешниҳоди муовини вазир - сардори Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон - Вазири адлияи Ҷумҳурии Тоҷикистон .
136. Ба шахсони ҳайати роҳбарикунандаи калон (ба ғайр аз шахсони ҳайати роҳбарикунандаи миёна), ки дар системаи иҷрои ҷазои ҷиноятӣ ва дар хизмати ҳарбӣ 20 сол ва аз ин зиёд хизмати бенуқсон кардаанд (ба ҳисоби имтиёзӣ), ҳангоми озод кардан ба эҳтиёт ё истеъфо бо фармони сардороне, ки озодкуниро амалӣ менамоянд, мумкин аст ҳуқуқи пушидани либоси муқарраршуда дода шавад.
137. Аз тарафи ҳамин сардорон шахсоне, ки барои содир кардани ҷиноятҳо маҳкум шудаанд ё барои рафтор ё амали ба обрӯи системаи иҷрои ҷазои ҷиноятӣ доғоваранда метавонанд аз ҳуқуқи пӯшидани либоси муқарраршуда маҳрум карда шаванд.
138. Кормандони фавтида, ҳалокшуда, бедарак ғайбзада эътирофшуда, инчунин бо тартиби муқарраршуда аз рутбаи махсус маҳрумшуда аз рӯйхати ҳайати шахсии системаи иҷрои ҷазои ҷиноятӣ бароварда мешаванд.
139. Кормандони аз хизмат ба эҳтиёри Қувваҳои Мусаллаҳи Ҷумҳурии Тоҷикистон озодкардашуда, аз тарафи комиссариатҳои ҳарбӣ бо тартиби муқаррарнамудаи қонунгузории амалкунанда ба қайди ҳарбӣ гирифта мешаванд.
140. Тартиби адои хизмат аз ҷониби шахсони ҳайати қаторӣ ва роҳбарикунандаи системаи иҷрои ҷазои ҷиноятӣ дар давраи ҷангӣ бо қонунгузории амалкунанда муайян карда мешавад.
VIII. Интизоми хизматӣ
141. Интизоми хизматӣ, тартиб ва қоидаҳои иҷрои ӯҳдадориҳои ба зиммаи кормандон гузошташуда ва амалӣ намудани ваколатҳои онҳо бо қонунгузории Ҷумҳурии Тоҷикистон, ҳамин Низомнома, қарордод дар бораи хизмат, инчунин бо дигар санадҳои меъёрии дохилиидоравӣ ба танзим дароварда мешавад.
Барои намунавор иҷро намудани вазифаҳо ва ба даст овардани натиҷаҳои баланд дар хизмат барои кормандон намудҳои зерини ҳавасмандкунӣ пешбинӣ шудаанд:
- сарфароз намудан бо унвонҳои фахрии Ҷумҳурии Тоҷикистон;
- мукофотонидан бо яроқи хосаи инъомӣ;
- мукофотонидан бо грамотаи фахрӣ;
- дохил намудани ба "Китоби (ё лавҳаи) фахрӣ";
- пеш аз мӯҳлат додани рутбаи махсуси навбатӣ;
- додани рутбаи махсус ба як зина боло нисбати рутбаи пешбинишуда аз рӯи мансаби ишғолкардашуда;
- мукофотонидан бо нишонҳои сарисинагӣ;
- мукофотонидан бо тӯҳфаи қиматбаҳо;
- додани мукофоти пулӣ;
- пешниҳоди рухсатии иловагӣ;
- эълон кардани раҳматнома.
Ба сифати ҳавасмандкунӣ мумкин аст пеш аз мӯҳлат бекор намудани ҷазои интизомии пештар додашуда истифода шавад.
142. Барои нишон додани мардонагӣ ва шуҷоат ҳангоми иҷрои қарзи хизматӣ ва дигар хизматҳои шоён кормандони системаи иҷрои ҷазои ҷиноятӣ метавонанд ба мукофотҳои Ҷумҳурии Тоҷикистон пешбарӣ шаванд.
143. Ҷазоҳо барои вайрон кардани интизоми хизматӣ:
- барои вайрон кардани интизоми хизматӣ ба кормандони системаи иҷрои ҷазои ҷиноятӣ ҷазоҳои пешбининамудаи Ойиномаи интизомии системаи иҷрои ҷазои ҷиноятӣ дода мешаванд.
Тартиби истифода ва додани ҷазоҳои интизомиро Оинномаи интизомии системаи иҷрои ҷазои ҷиноятии Ҷумҳурии Тоҷикистон муқаррар менамояд.
144. Пастфарорӣ дар рутбаи махсус ба як зина мутобиқи Ойиномаи интизомии системаи иҷрои ҷазои ҷиноятӣ ҳамчун чораи танбеҳи интизомӣ амалӣ карда мешавад.
Шахсони ҳайати хурд, миёна ва калони роҳбарикунанда, ки дар рутбаи махсус паст карда шудаанд, ба рутбаи пешинаашон бо фармони сардорони ин қарорро қабулкарда ва ба ин ҳуқуқдошта, сарфи назар аз вазифаи хизматии ишғолкардаашон на пештар баъд аз як соли паст шуданашон бо натиҷаи мусбии аттестатсия барқарор карда мешаванд.
Вақти будани шахсони ҳайати роҳбарикунанда дар рутбаи махсуси пасткардашуда ба мӯҳлати собиқаи хизматӣ дар рутбаи барқароршуда ҳисоб карда намешавад.
Кормандони системаи иҷрои ҷазои ҷиноятӣ метавонанд аз рутбаҳои махсус маҳрум карда шаванд:
а) ҳайати роҳбарикунандаи хурд - бо ҳукми суд, инчунин бо тартиби муқаррарнамудаи Вазири адлияи Ҷумҳурии Тоҷикистон;
б) ҳайати миёна ва калони роҳбарикунанда - мувофиқи ҳукми суд;
в) ҳайати олии роҳбарикунанда - мутобиқи қонунгузории Ҷумҳурии Тоҷикистон.
145. Тартиботи дохилӣ дар системаи иҷрои ҷазои ҷиноятӣ мутобиқи қонунгузории Ҷумҳурии Тоҷикистон вобаста ба хусусиятҳои фаъолияти ин муассисаҳо муқаррар мешавад.
146. Назорати иҷрои қонунҳоеро, ки тартиб ва шароити адои хизматро дар системаи иҷрои ҷазои ҷиноятӣ ба танзим медароранд, Прокурори генералии Ҷумҳурии Тоҷикистон ва прокуратураҳои тобеи он амалӣ менамоянд.
147. Дар ҳолати вайрон кардани ин Низомнома, риоя накардани кафолатҳо ва ҳифзи иҷтимоии кормандони системаи иҷрои ҷазои ҷиноятӣ, шахсони гунаҳкор масъулияти бо қонунгузории Ҷумҳурии Тоҷикистон муқарраршударо ба ӯҳда доранд.
