Бо қарори Ҳукумати ҶТ аз 25.01.2017 № 32 аз эътибор соқит дониста шуд.

Ҳукумати Ҷумҳурии Тоҷикистон

ҚАРОР

Дар бораи тадбирҳои ташкили истеҳсоли ҳуҷҷатҳо ва варақаҳои баҳисобгириву ҳисоботи қатъӣ

Бо мақсади амали гардонидани Қонуни Ҷумҳурии Тоҷикистон аз 2 декабри соли 2002 "Оид ба ворид намудани тағйирот ба Қонуни Ҷумҳурии Тоҷикистон "Дар бораи табъу нашр" Ҳукумати Ҷумҳурии Тоҷикистон қарор мекунад:

1. Номгӯи замимагардидаи ҳуҷҷатҳо ва варақаҳои баҳисобгириву ҳисоботи қатъӣ, ки дар Ҷумҳурии Тоҷикистон истеҳсол ва истифода мешаванд (замимаи 1), Талаботи низомӣ ба корхонаҳои истеҳсолкунандаи ҳуҷҷатҳо ва варақаҳои баҳисобгириву ҳисоботи қатъӣ (замимаи 2), Талаботи асосӣ оид ба таъмини баҳисобгирӣ ва ҳифзи маҳсулоти махсуси полиграфии баҳисобгириву ҳнсоботи қатъӣ (замимаи 3), Талаботи техникӣ ба маҳсулоти махсуси полиграфии баҳисобгириву ҳисоботи қатъӣ ва реквизитҳои онҳо (замимаи 4) ва Номгӯи корхонаҳои табъу нашри махсусгардонидаи Ҷумҳурии Тоҷикистон, ки ҳуҷҷатҳо ва варақаҳои баҳисобгириву ҳисоботи қатъиро истеҳсол мекунанд (замимаи 5) тасдиқ карда шаванд (қарори Ҳукумати ҶТ аз 1.08.2015 № 503).

2. Назорати рафти истеҳсолу истифодабарии ҳуҷҷатҳо ва варақаҳои баҳисобгириву ҳисоботи қатъӣ дар Ҷумҳурии Тоҷикистон ба зиммаи Вазорати амнияти Ҷумҳурии Тоҷикистон вогузор карда шавад.

3. Вазоратҳо, идораҳо, инчунин муассисаҳо, корхонаҳо ва ташкилотҳои тамоми шаклҳои моликияти Ҷумҳурии Тоҷикистон эҳтиёҷоти солонаи худро ба ҳуҷҷатҳову варақаҳои баҳисобгириву ҳисоботи қатъӣ ба Вазорати фарҳанги Ҷумҳурии Тоҷикистон то 1 октябри соли каблӣ пешниҳод намоянд (қарори Ҳукумати ҶТ аз 1.08.2015 № 503).

4. Вазоратҳо, идораҳо, инчунин муассисаҳо, корхонаҳо ва ташкилотҳои тамоми шаклҳои моликияти Ҷумҳурии Тоҷикистон то 1 июни соли 2003 тамоми намудҳои маҳсулоти полиграфии баҳисобгириву ҳисоботи қатъии қаблан истеҳсолшуда ва дар Ҷумҳурии Тоҷикистон истифодашавандаро барои бақайдгирӣ ва баҳисобгирӣ ба вазоратҳову идораҳои ҷумҳурӣ, ҳи барои нашри ҳуҷҷатҳо ва варақаҳои баҳисобгириву ҳисоботи қатъии дахлдор масъуланд, пешниҳод намоянд.

Ҳуҷҷатҳову варақаҳои баҳисобгириву ҳисоботи қатъие, ки бо тартиби муқарраргардида дар вазорату идораҳои Ҷумҳурии Тоҷикистон аз қайд ва баҳисобгирӣ нагузаштаанд, беэътибор дониста шаванд.

5. Вазорати адлияи Ҷумҳурии Тоҷикистон ва Кумитаи давлатии амнияти миллии Ҷумҳурии Тоҷикистон дар муддати се моҳ оид ба такмили қонунгузории маъмурӣ ва ҷиноятӣ дар қисми муайян намудани ҷавобгарӣ барои вайрон кардани тартиботи муқарраршудаи истеҳсол ва истифодаи маҳсулоти полиграфии баҳисобгириву ҳисоботи қатъӣ дар Ҷумҳурии Тоҷикистон таклифҳо пешниҳод намоянд (қарори Ҳукумати ҶТ аз 1.08.2015 № 503).

Номгӯи ҳуҷҷатҳо ва варақаҳои баҳисобгириву ҳисоботи қатъие, ки дар Ҷумҳурии Тоҷикистон истеҳсол ва истифода мешаванд

1. Шаҳодатномаи таваллуд

2. Шиносномаи шаҳрванди Ҷумҳурии Тоҷикистон

3. Шиносномаи шаҳрванди Ҷумҳурии Тоҷикистон барои берун рафтан аз қаламрави Тоҷикистон

4. Шиносномаи хизматии шаҳрванди Ҷумҳурии Тоҷикистон барои берун рафтан аз қаламрави Тоҷикистон

5. Шиносномаи дипломатии шаҳрванди Ҷумҳурии Тоҷикистон барои берун рафтан аз қаламрави Тоҷикистон

6. Тасдиқномаи (муваққатии) шаҳрвандӣ ва ҷои истиқомати шаҳрванди Тоҷикистон

7. Шаҳодатнома дар бораи бақайдгирии ҷои истиқомати муваққатии шаҳрванди Ҷумҳурии Тоҷикистон

8. Шаҳодатнома оид ба сукунати доимии шахсони бешаҳрванди Ҷумҳурии Тоҷикистон дар Ҷумҳурии Тоҷикистон

9. Шаҳодатнома барои бозгашт ба Ҷумҳурии Тоҷикистон, ки аз ҷониби намояндагии дипломатӣ ва идораҳои консулии Ҷумҳурии Тоҷикистон дар хориҷа ба шаҳрванди Ҷумҳурии Тоҷикистон дар ҳолати гум кардани ҳуҷҷатҳо дар хориҷа ба расмият дароварда мешавад

10. Корти хизматии аккредитатсионии корманди намояндагиҳову сафоратҳои дипломатӣ, идораҳои консулии давлатҳои хориҷӣ, инчунин ташкилотҳои байналмилалии дорои хусусияти универсиалӣ

11. Корти дипломатии аккредитатсионии намояндагиҳову сафоратҳои дипломатӣ, идораҳои консулии давлатҳои хориҷӣ, инчунин ташкилотҳои байнамилалии дорои хусусияти универсиалӣ

12. Стикери визавӣ, ки ба шиносномаи шаҳрванди хориҷӣ часпонда мешаванд

13. Варақаи экзекватура дар бораи шинохта шудани шахс ба сифати сардори идораи консулӣ дар мамлакат

14. Варақаи номаи шахсии Президенти Ҷумҳурии Тоҷикистон

15. Варақаи нотаи лафзии Вазорати корҳои хориҷии Ҷумҳурии Тоҷикистон

16. Варақаи номаи шахсии Вазири корҳои хориҷии Ҷумҳурии Тоҷикистон

17. Варақаи шаҳодатномаи тасдиқи шартномаи байналмилалии Ҷумҳурии Тоҷикистон

18. Варақаи ваколатномаи Сафири Фавқулодда ва Мухтори Ҷумҳурии Тоҷикистон

19. Варақаи шаҳодатномаи бозхости Сафири Фавқулодда ва Мухтори Ҷумҳурии Тоҷикистон

20. Варақаи патенти консулии Консули Ҷумҳурии Тоҷикистон

21. Варақаи ваколатнома барои имзои шартномаи байналмилалӣ ва иштироки намояндагони Ҷумҳурии Тоҷикистон дар кори конфронсҳои байналмилалӣ ва иштирок дар музокираҳо

22. Варақаи коғази муоҳидавии қарордотҳои байналмилалӣ

23. Корти аккредитатсионии намояндагони воситаҳои ахбори оммаи хориҷӣ

24. Шаҳодатномаи бақайдгирӣ

25. Билети ҳарбӣ

26. Гувоҳномаи шахсии генерал

27. Гувоҳномаи шахсии афсар

28. Гувоҳномаи шахсии прапорщик

29. Билети ҳарбии афсари эҳтиётӣ

30. Гувоҳномаи хизматии кормандони масъули мақомоти ҳокимияти давлатӣ

31. Шаҳодатномаи ақди никоҳ

32. Шаҳодатномаи бекор кардани никоҳ

33. Шаҳодатномаи вафот

34. Шаҳодатномаи фарзандхонӣ

35. Шаҳодатномаи барқароркунии падарӣ

36. Шаҳодатномаи ивази ном, насаб ва номи падар

37. Шаҳодатнома дар бораи маълумоти асосии ҳамагонӣ

38. Шаҳодатнома дар бораи маълумоти асосии ҳамагонӣ (аъло)

39. Шаҳодатнома дар бораи маълумоти миёнаи ҳамагонӣ

40. Шаҳодатнома дар бораи маълумоти миёнаи ҳамагонӣ (бо медали тилло)

41. Шаҳодатнома дар бораи маълумоти миёнаи ҳамагонӣ (бо медали нуқра)

42. Табели ҷамъбасти баҳоҳои азхудкунӣ (замима ба Шаҳодатнома дар бораи маълумоти асосии ҳамагонӣ ва Шаҳодатномаи маълумоти миёнаи ҳамагонӣ)

43. Дипломи маълумоти ибтидоии касбӣ

44. Дипломи аълои маълумоти ибтидоии касбӣ

45. Дипломи маълумоти миёнаи касбӣ

46. Дипломи аълои маълумоти миёнаи касбӣ

47. Дипломи маълумоти олии касбӣ

48. Дипломи аълои маълумоти олии касбӣ

49. Дипломи бакалавр

50. Дипломи магистр

51. Диплом барои донишҷӯёни хориҷӣ

52. Замима ба дипломҳо

53. Дипломи номзади илм

54. Дипломи доктори илм

55. Дипломи дорандаи ҷоизаи давлатии Ҷумҳурии Тоҷикистон ба номи Абӯали ибни Сино дар соҳаи илм ва техника

56. Дипломи барандаи ҷоизаи ба номи Абӯабдулло Рӯдакӣ дар соҳаи адабиёт, санъат ва меъморӣ

57. Дафтарчаи меҳнатӣ

58. Шаҳодатномаи гирандаи нафақа барои хизматҳои махсус дар назди Ҷумҳурии Тоҷикистон

59. Дафтарчаи нафақагирӣ

60. Шиносномаи нафақагир

61. Дафтарчаи маъюбӣ

62. Шиносномаи маъюб

63. Варақаи беморӣ

64. Варақаи дорухат барои доруҳои мадҳушӣ ва пуртаъсир

65. Ҳамаи намудҳои литсензияҳо, ки мувофиқи қонунгузории амалкунандаи Ҷумҳурии Тоҷикситон дода мешаванд

66. Гувоҳнома дар бораи додани рақами мушаххаси андозсупоранда

67. Сертификати бақайдгирии супорандаи андоз аз арзиши иловагӣ

68. Шаҳодатнома, патент барои фаъолияти соҳибкорӣ

69. Эломияи борҳои гумрукӣ

70. Шаҳодатномаи ронандагӣ

71. Шаҳодатномаи тракторчигӣ

72. Шиносномаи техникии воситаи нақлиёт

73. Баргаи техникии воситаи нақлиёти хизматӣ

74. Шаҳодатномаи иштирокчии алоқаҳои иқтисодии хориҷии Ҷумҳурии Тоҷикистон

75. Корти бақайдгирии иштирокчии алоқаҳои иқтисодии хориҷии Ҷумҳурии Тоҷикистон

76. Сертификати истеҳсоли маҳсулоти воридотӣ ё содиротии Ҷумҳурии Тоҷикистон

77. Сертификати ҳуқуқии истифодаи замин

78. Шаҳодатнома ба саҳми замин

79. Сертификати мувофиқати маҳсулот

80. Шаҳодатномаи омодагии корхона, ташкилот ба истеҳсоли маҳсулот

81. Шаҳодатномаи узви Палатаи савдою саноати Ҷумҳурии Тоҷикистон

82. Сертификати сифати моли воридотӣ ва содиротии Ҷумҳурии Тоҷикистон

83. Сертификати фитосанитарии сифати маҳсулоти воридотӣ ё содиротӣ

84. Чиптаи лотереяҳои бурдҳо

85. Полиси суғуртавӣ аз рӯи тамоми намудҳои суғурта

86. Ҳамаи намудҳои аксизҳо

87. Ҳамаи намудҳои варақаҳои дорои ҳисоботи қатъӣ, ки аз ҷониби нотариусҳои давлатии Ҷумҳурии Тоҷикистон ба расмият дароварда мешаванд

88. Чиптаи мусофир ва бағоҷ барои парвоз бо нақлиёти ҳавоии Ширкати ҳавопаймоии давлатии "Тоҷикистон"

89. Чиптаҳои роҳи оҳан барои сафар бо нақлиёти Роҳи оҳани Тоҷикистон

90. Дафтари барот (чек) барои гирифтани пули нақд ва дигар коғазҳои қиматнок, ки аз ҷониби бонкҳои тиҷоратӣ ва сохторҳои ваколатдори Ҷумҳурии Тоҷикистон ба расмият дароварда мешаванд

91. Саҳмҳо ва дигар коғазҳои қимматноке, ки аз ҷониби ҷамъиятҳои тиҷоратии Ҷумҳурии Тоҷикистон ба гардиш бароварда мешаванд

92. Кортҳои бақайдгирии шахсони ҳуқуқӣ аз ҷониби мақомоти омор

93. Шартномаи хариду фурӯши моликияти давлатӣ

94. Шартномаи иҷораи байни Кумитаи давлатии идораи амволи давлатии Ҷумҳурии Тоҷикистон ва мақомоти ҳокимияти иҷроия дар маҳалҳо бо шахсони воқеиву ҳуқуқӣ

95. Шаҳодатнома оид ба сафарозгардонии дараҷаи олии корнамоӣ Қаҳрамони Тоҷикистон

96. Дафтарчаи орденҳо

97. Шаҳодатномаи медалҳо

98. Шаҳодатномаи унвонҳои фахрӣ

99. Ифтихорномаи Ҷумҳурии Тоҷикистон

100. Ҳамаи намудҳои буллетенҳо оид ба интихобот ва раъйпурсӣ дар Ҷумҳурии Тоҷикистон

101. Гувоҳномаи иқомат барои шаҳрванди хориҷӣ (қарори Ҳукумати ҶТ аз 27.02.2010 № 91)

102. Гувоҳномаи иқомат барои шахси бешаҳрванд (қарори Ҳукумати ҶТ аз 27.02.2010 № 91)

103. Шаҳодатномаи шахси бешаҳрванд (қарори Ҳукумати ҶТ аз 27.02.2010 № 91).

104. Роҳхат ва борхати нақлиётӣ (қарори Ҳукумати ҶТ аз 13.03.2012 № 121).

105. Шаҳодатномаҳои хизматӣ (қарори Ҳукумати ҶТ аз 02.11.2013, № 511)

Талаботи низомӣ ба корхонаҳои истеҳсолкунандаи ҳуҷҷатҳо ва варақаҳои баҳисобгириву ҳисоботи қатъӣ

Даромадан ба манзилҳои истеҳсолӣ ва ҳавлиҳои хоҷагидории муассисаҳои полиграфӣ аз постгоҳи дидбонӣ бо рухсатномаҳо ё бо иҷозати роҳбарияти корхонаи полиграфӣ ва ё ташкилоте, ки тобеи он мебошанд, сурат мегирад.

Қаламрави корхонаҳои амалкунанда ё сохташавандаи полиграфие, ки аллакай дорои дастгоҳҳои полиграфӣ, техникаи нусхазиёдкунанда, ҳуруфҳо, матритсаҳо мебошанд, бо девор иҳота ва бо посбонҳо таъмин карда мешаванд.

Манзилҳои корхонаҳои полиграфӣ, бахшҳои нусхазиёдкунанда бо воситаҳои хабардиҳандаи муҳофизатию зиддисӯхторӣ - датчикҳо (муҳофизатӣ) дар дару тирезаҳо, сигнализатсия (зиддисӯхторӣ) дар шифти хона муҷаҳҳаз гардида, бо пости дидбонӣ ё пулти дидбонии мутамарказонидашудаи мақомоти корҳои дохилӣ пайваст карда мешаванд.

Ба тирезаҳои қабати якуми бино панҷараҳои дуқабатаи аз дарун кушодашаванда шинонида мешаванд. Дар сурати мавҷуд будани нардбонҳои зиддисӯхторӣ, овезаҳо ё бомҳои биноҳои ҳамшафат, тирезаҳои ба онҳо наздик панҷара гирифта мешаванд (панҷараҳои тирезаҳо аз симҳои фӯлодии диаметрашон на камтар аз 12 мм сохта мешаванд, ки ба тариқи салибшакл байни ҳам кафшер гардида, чашмаки на зиёдтар аз 150 х 150 мм ташкил медиҳанд).

Дар баъзе мавридҳо сохта шудани панҷараҳои "нақшӣ" иҷозат дода мешавад, ба шарте, ки онҳо биноҳои истеҳсолиро аз воридшавӣ эмин нигоҳ доранд.

Дарҳои даромади корхонаҳои полиграфӣ, инчунин дарҳои сехҳои ҳуруфчинӣ бояд якқабатаи чӯбин (ғафсии тахтаҳояш на камтар аз 40 мм) буда, бо ғалақаҳои мустаҳкам (на камтар аз ду куфли дарунӣ) ё қуфлҳои шифрдор муҷаҳҳаз ва аз беруну дохил бо тунукаи оҳании руҳандуди лабашон ба қираи дар баробар гардонида рӯйкаш шуда бошанд. Дар дарҳо қолибҳои махсусе, ки воридшавии ашхоси бегонаро маҳдуд месозанд, мустаҳкам карда мешаванд.

Сехҳои (участкаҳои) ҳуруфчинӣ, чопкунӣ, инчунин ҷои кор оид ба қабули супориш ба чоп (нусхазиёдкунӣ) ва додани маҳсулоти таёр бояд дар биноҳое ҷойгир гарданд, ки дорои муқовимати сӯхтории на камтар аз дараҷаи 2 -юм буда, аз дигар утоқҳои ёрирасону хизматӣ бо деворҳову болорҳои зиддисӯхторие, ки дастнорасии онҳоро аз оташ таъмин менамоянд, ҷудо карда шуда бошанд.

Баъди ба охир расидани кор манзилҳо қуфл, пломба (мӯҳр) шуда, калидҳояшон ба шахси барои посбонии онҳо масъул, бо қайд гардидани таъриху вақт ва гирфтани имзои ӯ дар дафтари махсус, супорида мешаванд. Дар мавриди додани калидҳо вақт, насаб ва имзои шахсе, ки онҳоро мегирад қайд карда мешавад.

Биноҳои маъмурии корхонаи полиграфӣ ва нашриёт, шӯъбаи таҳририю нашрӣ (ШТН) бояд аз биноҳои истеҳсолӣ ва анборҷойҳо ҷудо шуда бошанд.

Аз дохили биноҳои истеҳсолӣ ва анборҷойҳо ба назди маъмурият, ба идора ва ШТН гузаштани мизоҷон манъ аст.

Бе иштироки шахси масъули аз ҷониби сардори сех (участка) ё роҳбари ташкилот таъйиншуда дар биноҳои истеҳсолӣ, сехҳо (участкаҳои) қолабрезӣ, ҳуруфчинӣ, ҳуруфрезӣ кор кардани коргарони алоҳида иҷозат дода намешавад.

Дар қаламрави корхонаҳои навташкилшаванда ё амалкунандаи полиграфӣ ҷойгиршавии манзилҳои истиқоматӣ ва хадамоти гуногуне, ки ба ин истеҳсолот ягон робитае надоранд, инчунин бидуни иҷозатномаи махсуси роҳбари он аз қаламрави корхонаи полиграфӣ гузаштани воситаҳои нақлиёти дигар ташкилотҳо иҷозат дода намешавад.

Рӯбучини биноҳои истеҳсолие, ки бо дастгоҳҳои полиграфӣ муҷаҳҳаз шудаанд, дар вақти корӣ ва дар ҳузури кормандони дар он меҳнаткунанда иҷро мешавад.

Талаботҳои асосӣ оид ба таъмини баҳисобгирӣ ва ҳифзи маҳсулоти махсуси полиграфии баҳисобгириву ҳисоботи қатъӣ

1. Бо мақсади таъмини нигахдории маҳсулоти махсуси полиграфии баҳисобгириву ҳисоботи қатъӣ дар корхонаҳои полиграфӣ тартиби ягонаи истеҳсол, қабул, нигаҳдорӣ, коркард, супоридан, ҷудо карда додан, интиқол ва баҳисобгирии коғаз, маҳсулоти нимтайёр, чоп ва қолабрезӣ ба роҳ монда мешавад.

2. Барои ташкили фаврии баҳисобгирии коғаз, маҳсулоти нимтайёр, маҳсулоти чопию қолабии маҳсулоти махсуси полиграфии баҳисобгириву ҳисоботи қатъӣ, барои роҳбарӣ ва назорати ин баҳисобгирӣ дар тамоми участкаҳои истеҳсолот ва ҷойҳои нигаҳдории онҳо сармуҳосиби корхона ҷавобгар мебошад.

3. Ташкили баҳисобгирии коғаз, маҳсулоти нимтайёр, маҳсулоти тайёри чопию қолабии маҳсулоти махсуси полиграфии баҳисобгириву ҳисоботи қатъӣ ва назорати ин баҳисобгирӣ дар тамоми участкаҳои истеҳсолот ва ҷойҳои нигаҳдории онҳо ба зиммаи сармуҳосиби муассиса вогузор карда мешавад.

4. Ҳосибдории корхона иҷрои дуруст ва саривақти баҳисобгирии маҳсулоти истеҳсолшавандаро дар сехҳо, анборҳо ва мадонҳо ҳамарӯза назорат мекунад.

5. Тамоми китобҳо, кортҳои баҳисобгирии коғаз, маҳсулоти нимтайёр, маҳсулоти тайёри чопию қолабии маҳсулоти махсуси полиграфии баҳисобгириву ҳисоботи қатъӣ саҳифагузориву дӯхта ва мӯҳри сурбӣ шуда, аз ҷониби сармуҳосиб (муовини ӯ) имзо мешаванд ва пас аз бақайдгирӣ дар китоби махсус бо забонхат дода мешаванд.

6. Додани коғаз, маҳсулоти нимтайёр ва маҳсулоти тайёр барои истеҳсолот ва қабули онҳо баъд аз коркард танҳо бо шумурдани саҳифа ба саҳифа зери назорати иҷрокунанда сурат гирифта, мувофиқи забонхат дар китоби баҳисобгирӣ ба расмият дароварда мешавад.

Таҳвили коғаз, маҳсулоти нимтайёр, маҳсулоти махсуси полиграфии баҳисобгириву ҳисоботи қатъӣ аз як намуди кор ба дигар намуди кор дар дохили сех (ва ё аз як сех ба сехи дигар), ки ба ивазшавии иҷрокунанда, масъули нигаҳдошти маҳсулот марбут аст, танҳо ба воситаи мадонҳои дахлдор амалӣ мегардад.

7. Шахсони аз ҷиҳати моддӣ ҷавобгаре, ки бо истеҳсол, қабул, нигаҳдорӣ ва додани маҳсулоти махсуси полиграфии баҳисобгириву ҳисоботи қатъӣ алоқаманданд, бо амри директори корхона, бо бастани қарордоди ҳатмӣ оид ба ҷавобгарии модди тибқи қонунгузории мавҷуда, таъйин карда мешаванд.

8. Маҳсулоти нимтайёр, ва тайёр бояд дар анборҳо, мадонҳо ва рафҳои барои ин мақсад махсусгардонидашуда ва риояи қоидаҳое, ки онҳоро аз дуздӣ, гумшавӣ ва вайроншавӣ ҳифз меамоянд, нигоҳ дошта шаванд.

Якҷоя бо маҳсулоти дигар дар як мадон, ҷевон нигоҳ доштани маҳсулоти махсуси полиграфии баҳисобгириву ҳисоботи қатъӣ манъ аст.

9. Дар вақти танаффус ва ба анҷом расидани басти корӣ коғаз, маҳсулоти нимтайёр ва тайёр, мувофиқи забонхати мадончӣ дар китоби баҳисобгирӣ, барои нигаҳдорӣ ба мадон супорида мешаванд.

Дар вақти танаффус дар ҷои кор монда шудани коғаз, маҳсулоти нимтайёр ва тайёр танҳо дар мавридҳои зерин иҷозат дода мешавад:

- агар нафаре аз кормандони бригадае, ки қарордоди коллективиро оид ба ҷавобгарии моддӣ имзо кардаанд, дар ҷои кории худ барои назорати коғазҳои қиматнок монда бошад;

- мавриди дар участкаҳои ҷудогона маҳфуз будани маҳсулот ва бо шарти якҷоя аз коргоҳ баромадану якҷоя ба он ворид шудани ичрокунандагон ва дар баробари ин қуфлу мӯҳри сурбӣ шудани дари ин участка.

10. Дар мавриди ифшо гардидани норасоии маҳсулоти махсуси полиграфии баҳисобгириву ҳисоботи қатъӣ таъйиднома тартиб дода мешавад, ки онро барои чораҷӯиҳои зарурӣ ба директори корхона ирсол менамоянд ва барои кофтукови маҳсулоти гумшуда чораҳо андешида мешаванд.

Талаботи техникӣ ба маҳсулоти махсуси полиграфии баҳисобгириву ҳисоботи қатъӣ ва реквизитҳои онҳо

Ҳадафи талаботи мазкур аз муқаррар намудани тартиботи ягонаи истеҳсоли ҳамаи намудҳои коғазҳои қиматнок, аз ҷумла интихоби форматҳои ҳуҷҷатҳо ва бо тамоми ҷузъиёт кор карда баромадани усули чопи коғазҳои қиматнок иборат аст.

I. Талаботи техникӣ

Талаботи техникӣ оид ба истеҳсоли маҳсулоти махсуси полиграфии баҳисобгириву ҳисоботи қатъӣ бо назардошти навъи ҳуҷҷатҳо муқаррар карда мешавад.

1. Талаботи умумӣ ба маҳсулоти махсуси полиграфии баҳисобгириву ҳисоботи қатъӣ

Маҳсулоти махсуси полиграфии баҳисобгириву ҳисоботи қатъӣ бояд аз истеҳсоли қалбакӣ ҳифозати боэътимод дошта бошад, бинобар ин мусавараҳои чопӣ, коғаз, ранг дар таркиби худ ҷузъиётҳои ҳифозатро доро буданашон шарт аст.

Реквизитҳои чопӣ (мусавараҳои асосии сужетдор, портретҳо, тӯри рангаи ҳифозатӣ, рақами сериявӣ) бояд равшан, ҳамранг ва бидуни олудагии қисматҳои сафед бо ранг бошанд. Лавни ранг, андозаи ҳошияҳо дар тамоми нусхаҳои марбути як тираж, бояд якхела бошанд. Роҳ додан ба каҷии ҳошияҳо, фосилаҳо байни тасвирҳо ҳангоми чоп ғайри мақбул аст. Нақшу нигори ҳифозатӣ (гелоширӣ) дар тамоми сужет бояд як хел нигоҳ дошта шаванд. Хатҳои якдигарро буррандаи ҷузъиётҳои ҳифозатии нақшунигор ва тӯрҳо набояд ҷойҳои ғафс (гиреҳ) дошта бошанд.

Барои коғазҳои қиматноки хоса истифода намудани коғази савсанӣ писандидатар буда, барои коғазҳои тақдимкунандаву ордерӣ заруру ҳатмист.

2. Коғаз

Маҳсулоти махсуси полиграфӣ бояд бо истифодаи коғази массааш 60-120 г/м.кв истеҳсол карда шавад.

Коғаз бояд аз сафедкунандаҳои оптикӣ (бланкофорҳо) орӣ бошад, яъне бояд дар зери таъсири шуоҳои ултрабунафш аз худ ягон нурпошие (люминессенсияи дидашаванда) зоҳир накунад.

Дар таркиби коғаз, вобаста ба навъи он ва мӯҳлати қувват доштанаш, бояд миқдори муайяни нахи пахтаву загир мавҷуд бошад.

Коғазҳои қиматноки мӯҳлати амалашон то як сол бояд аз коғазе истеҳсол карда шаванд, ки дар таркибашон 10 - 25% нахи пахта ва загирдоранд.

Коғазҳои қиматноки мӯҳлати амалашон зиёда аз як сол бояд аз коғазе истеҳсол карда шаванд, ки дар таркибашон 25 - 50% нахи пахта ва зағир доранд.

Коғаз бояд на кам аз ду навъи нахро, ки дар қисматҳои дидашаванда ё дигар ҷиҳатҳои спектр назорат карда мешаванд дар таркиби худ дошта бошад. Иваз намудани як навъи нах ба навъи дигари он - конфетти, риштаҳои полимерӣ, люминофори копсулишуда мумкин аст. Истифода намудани нахҳои махсуси дорои ранги кабудчаи дар зери шуои ултрабунафш дидашаванда манъ аст.

Коғаз бояд нишони обии бо чашми оддӣ равшан дидаву назоратшавандаро доро бошад.

Барои истеҳсоли коғазҳои қиматнок истифода шудани коғази дорои нишони обии таъйиноти истеъмоли муқаррарӣ манъ аст.

Барои коғазҳои қиматноки тақдимкунандаву ордерӣ бояд коғази дурангаи нишони обидори ё истеҳсолкунандаи коғазҳои қиматнок ва ё эмитент истифода бурда шавад.

3. Рангҳо

Барои истеҳсоли маҳсулоти махсуси полиграфии баҳисобгириву ҳисоботи қатъӣ, ғайр аз рангҳои аз ҷиҳати технологӣ баҳисобгирфташуда бояд рангҳои махсуси дорои люминессенсияи (ғайр аз ранги кабуд) зери шуои ултрабунафш дидашаванда истифода бурда шаванд.

Истифодаи рангҳои дорои хусусиятҳои магнитию электроноқилӣ ва ё дар қисмати спектр тасвиршаванда низ имконпазир аст.

Чоп бояд бо чунин рангҳои полиграфӣ сурат гирад, ки хусусиятҳои колористии онҳо истеҳсоли қалбакиашонро бо истифода аз усулҳои маълуми аксбардориву репрографӣ душвор гардонад.

Иловаҳо ба рангҳо бояд рангҷудокуниҳоро ғайриимкон созанд.

4. Усулҳои чоп

Дар истеҳсоли маҳсулоти махсуси полиграфии баҳисобгириву ҳисоботи қатъӣ (аз ҷумла то ба охир расонидани чопи маҳсулоти нимтаёр) усулҳои зерини чоп истифода шуданашон мумкин аст: металлографӣ, офсетӣ (тамоми намудҳояшон), баланд, орловӣ. Ҳар як варақаи маҳсулот бояд бо истифодаи на камтар аз ду усули чоп нашр карда шавад.

Маҳсулоти махсуси полиграфии баҳисобгириву ҳисоботи қатъӣ бояд бо усули офсетӣ ва баланд (серия ва рақам) чоп шуда бошанд.

Варақаҳои тақдимиву ордерии коғазҳои қиматнок бояд бо усули металлографӣ ва баланд (серия ва рақам) чоп шуда бошанд. Истеҳсоли чунин коғазҳо бо усули офсетӣ низ иҷозат дода мешавад.

Коғазҳои қиматноки бо усули офсетӣ чопшаванда бояд дорои ҳифозати баланде бошанд, ки истеҳсоли ба нусхаи асл наздики онҳоро бо роҳи қалбакӣ ғайриимкон созанд.

5. Ҳифозати маҳсулоти махсуси полиграфӣ аз истеҳсоли қалбакӣ

Ғайр аз унсурҳои ҳифозатии дар бандҳои 1-4 номбурдашуда (масалан, сифати баланди чоп, чопи савсанӣ, нишонҳои обӣ, рангҳои феромагнитӣ) истифодаи кинеграммаҳо, голограммаҳо, портретҳо имконпазир аст.

Маҳсулоти махсуси полиграфии баҳисобгириву ҳисоботи қатъӣ бояд на камтар аз 3 унсурҳои гилоширии аз ҷиҳати шаклу тасвир гуногунро дошта бошад, ки хатҳои иҷрои якеашон негативӣ буда, дигарашон позитивӣ мебошанд.

Таҳранги варақа бояд аз ду тӯри рангаи болои ҳам омада истеҳсол шуда, яке аз ин тӯрҳо дорои сохтори унсурҳои графикии ғайримунтазам бошад.

Маҷмӯи рангаи тӯрҳои таҳрангӣ бояд онҳоро аз ҷудошавии аксӣ ҳифз намояд.

Бо тӯрҳои таҳрангӣ чоп шудани пешу қафои маҳсулоти махсуси полиграфии баҳисобгириву ҳисобот қатъӣ, новобаста аз он ки онҳо аз ҷониби корхонаи истеҳсолкунанда пурра ё дар ҷараёни то ба анҷом расонидани маҳсулоти нимтаёр сурат мегиранд, шарт ва зарур аст. Танҳо пешу қафои варақаҳои маҳсулоти нимтаёре, ки дорои тӯри таҳрангӣ мебошанд, аз ин талабот истисноянд.

Тӯрҳои таҳрангӣ аз ҷиҳати махсусиятҳои андозаву рангӣ бояд ба нусхабардориву сканеркунӣ дастнорас бошанд.

Ғавсии хатҳои гилоширҳо, чорчӯбаҳо ва тӯрҳо бояд аз нигоҳи позитивӣ 40-70 ва аз нигоҳи негативӣ 50-90 микрон зиёд набошад.

Дар сурати мавҷудияти микроматни бо усули металлография истеҳсолшуда, ғавсии хатҳо бояд на зиёдтар аз 20 микрон ва бо баландии 250-300 микрон истеҳсол шаванд.

Маҳсулоти махсуси полиграфии баҳисобгириву ҳисоботи қатъӣ барои ҳар як супоришдиҳандаи эмитент бояд услуби ороиши (дизайни) худро дошта бошад. Дар сурати истифода кардан аз маҳсулоти якрангаи нимтайёр чунин мушаххасият дар натиҷаи корбурди мазмунии матн, рақамгузорӣ, унсурҳои ҳифозати кимиёвӣ ва истифодаи унсурҳои гилоширии индивидуалӣ ба даст меояд.

Ба сифати усулҳову воситаҳои иловагии қифозати коғазҳои қиматнок аз:

тасвири ниҳонӣ (дар дохили чаҳорчӯбаҳо ва розеткаҳо) дар чопи металлографӣ;

чопи серияву рақамҳо бо истифодаи рангҳои флуоренсентӣ, барқгузаронӣ ва магнитӣ дар чопи баланд;

чопи ниҳонӣ (дар чаҳорчӯбаҳо ва розеткаҳо) дар чопи офсет;

рангҳои металликии флуорессенсияшуда ("нуқрагин");

унсурҳои ба назар нонамоёне, ки дар зери шуои ИС арзи вуҷуд мекунанд истифода бурдан мумкин аст.

Коғазҳои қиматноки тақдимкунандаву ордерӣ бояд дорои чунин нишонҳои иловагии ҳифозати баланде бошанд, ки такрори айнани онҳоро ғайриимкон гардонанд ва малумот дар бораи онҳо бояд сирри тиҷоратӣ бошад.

Вобаста ба ин чунин маълумот ба Вазорати амнияти Ҷумҳурии Тоҷикистон барои баҳодиҳӣ ба дараҷаи ҳифозати ин нишонҳо ҳамчун иттилооти қатъиян пинҳонӣ ба воситаҳои шабакаҳои пӯшидаи алоқа ирсол карда мешавад.

II. Ревизитҳои варақаҳои маҳсулоти махсуси полиграфӣ

Варақаҳои маҳсулоти махсуси полиграфии баҳисобгириву ҳисоботи қатъӣ бояд реквизитҳои фарқкунандае дошта бошанд, ки тибқи қонунҳои амалкунандаи Ҷумҳурии Тоҷикистон ва санадҳои дигари меъёрии Ҳукумати Ҷумҳурии Тоҷикистон муқаррар гардидаанд.

Номгӯи корхонаҳои табъу нашри махсусгардонидаи Ҷумҳурии Тоҷикистон, ки ҳуҷҷатҳо ва варақаҳои баҳисобгириву ҳисоботи қатъиро истеҳсол мекунанд

1. Корхонаи воҳиди давлатии Комплекси табъу нашри "Шарқи озод".

2. Ҷамъияти дорои масъулияти маҳдуди "Ганҷ - Нашриёт".