Тартиби додани унвонҳои илмӣ

1. МУҚАРРАРОТИ УМУМӢ

1.Тартиби додани унвонҳои илмӣ (минбаъд – Тартиби мазкур) асосҳои ҳуқуқӣ, талабот ва меъёрҳои дарёфти унвони илмии дотсент ё профессор (минбаъд – унвони илмӣ), эътирофи ҳуҷҷатҳои хориҷӣ оид ба додани унвонҳои илмӣ, маҳрум сохтан ва барқарор кардани унвони илмиро муқаррар менамояд.

2.Дар Тартиби мазкур мафҳумҳои зерин истифода мегарданд:

- унвони илмӣ – мақоми расмие, ки барои фаъолияти пайвастаи омӯзгорӣ, илмӣ-методӣ, таҳқиқотӣ, ки бо дастовардҳои таълимию методӣ ва илмӣ дар соҳаи илму маориф саҳмгузор аст, қадрдонӣ карда мешавад;

- довталаби дарёфти унвони илмӣ – (дотсент, профессор) шахсе, ки дорои дараҷаи илмӣ, таҷрибаи фаъолияти омӯзгорӣ, илмӣ-методӣ, ки бо дастовардҳои худ дар рушди илму маориф ва омода намудани мутахассисон, кормандони илмӣ-омӯзгорӣ саҳм гузоштааст, аз ҷониби муассиса барои додани унвони илмӣ ба Комиссияи олии аттестатсионии назди Президенти Ҷумҳурии Тоҷикистон (минбаъд – Комиссия) пешниҳод мегардад;

- парвандаи аттестатсионӣ – маҷмуи ҳуҷҷатҳоест, ки аз ҷониби муассиса пешниҳод гардида, ба раванди аттестатсияи довталаби дарёфти унвони илмӣ алоқаманд мебошад;

- экспертиза – тартиби махсуси арзёбии илмӣ-методӣ ва меъёриву техникӣ мебошад, ки барои санҷиши мукаммали мутобиқати раванди иҷрои талабот, меъёрҳо ва барасмиятдарории парвандаи аттестатсионӣ ба талаботи санадҳои меъёрии ҳуқуқии соҳавӣ пешбинӣ шудааст;

- воситаи таълимӣ – маводди таълимию назариявӣ илова ба китоби дарсӣ буда, қисман ё пурра китоби дарсиро иваз карда метавонад. Васоити таълимӣ дар умум ба барномаи таълимӣ ё боби он мувофиқат мекунад ва асосан маводди нави курсро дар бар мегирад, ки дониши бунёдии ба китоби дарсӣ дохилшударо васеъ менамояд (барои як муаллиф на кам аз 5 ҷузъи чопӣ бошад);

- китоби дарсӣ – маводди таълимию назариявии дорои мундариҷаи мукаммали фанни таълимӣ буда, ба барномаи таҳсилотӣ мутобиқ мебошад, расман ҳамчун китоби дарсӣ аз ҷониби мақоми ваколатдори давлатӣ дар соҳаи маориф ва илм тавсия карда мешавад. Китоби дарсӣ маводди асосии таълим барои як фанни мушаххас буда, системаи донишҳои ибтидоиро муқаррар намуда, мазмуни он бояд ба талаботи стандарти давлатии таълимии таҳсилот ҷавобгӯй бошад. Номи китоб бояд ба номи фанни таълимии дар нақшаи таълим ҷойдошта мувофиқат намояд.

3.Унвони илмӣ ба омӯзгорон ва ходимони илмӣ бо дархости муассисаҳои илмӣ, таҳсилоти миёнаи касбӣ, таҳсилоти олии касбӣ, таҳсилоти касбии баъд аз муассисаи олии таълимӣ ва дигар ташкилоту муассисаҳое, ки фаъолияти таълимӣ-илмӣ доранд (минбаъд – муассиса), тибқи Феҳристи ихтисосҳои илмӣ барои дарёфти унвони илмӣ дар Ҷумҳурии Тоҷикистон аз тарафи Комиссия дода мешавад.