Дар Вазорати адлияи Ҷумҳурии Тоҷикистон

аз 7 январи соли 2025 ба қайди давлатӣ гирифта шудааст,

рақами бақайдгирӣ 1320

Замима

ба фармоиши директори

 Агентии инноватсия ва

технологияҳоирақамии

назди Президенти

Ҷумҳурии Тоҷикистон

аз 30 декабри 2024,  №1/56

1.   Тартиби татбиқи лоиҳаи озмоишӣ дар соҳаи хизматрасониҳои давлатӣ (минбаъд – Тартиби мазкур) бо мақсади пешниҳод намудани реҷаи махсуси танзимӣ ҷиҳати амалӣ намудани лоиҳаи озмоишӣ дар соҳаи хизматрасониҳои давлатӣ (минбаъд – лоиҳаи озмоишӣ) таҳия карда шуда, хусусиятҳои амалисозии хизматрасониҳои давлатиро аз ҷониби субъектони реҷаи махсуси танзимӣ дар ҷараёни татбиқи он, ҳуқуқ ва уҳдадориҳои субъектони реҷаи махсуси танзимӣ ва дигар самтҳои фаъолияти хизматрасонандагонро дар доираи реҷаи махсуси танзимӣ муқаррар ва танзим  менамояд.

2.   Лоиҳаи озмоишӣ тибқи талаботи санадҳои меъёрии ҳуқуқии Ҷумҳурии Тоҷикистон ва Тартиби мазкур амалӣ карда мешавад.

3.   Муқаррароти Тартиби мазкур ба мақомоти давлатӣ, шахсони воқеӣ ва ҳуқуқӣ, ки нисбати онҳо реҷаи махсуси танзимӣ  татбиқ карда мешаванд, барои иҷро ҳатмӣ мебошанд.

4.   Дар Тартиби мазкур мафҳумҳои асосии зерин истифода мешаванд:

-  татбиқкунандаи лоиҳаи озмоишӣ (минбаъд - татбиқкунанда) – Ҷамъияти саҳомии кушодаи «Марказҳои тасдиқкунанда, хизматрасониҳои давлатӣ ва таҳияи барномаҳои рақамӣ» - и назди Агентии инноватсия ва технологияҳои рақамии назди Президенти Ҷумҳурии Тоҷикистон;

-   марказҳои хизматрасонӣ ба аҳолӣ (минбаъд - марказҳои хизматрасонӣ) - филиал ва намояндагиҳои татбиқкунанда, шахсони ҳуқуқӣ ва ё филиал ва намояндагиҳои онҳо, ки дар асоси шартнома бо татбиқкунанда барои дастрас намудани хизматрасониҳои давлатӣ тариқи электронӣ ба шахсони воқеӣ ва ҳуқуқӣ мусоидат менамоянд; 

-  танзимгари ягонаи хизматрасониҳои давлатӣ (минбаъд – танзимгари ягона) - Агентии инноватсия ва технологияҳои рақамии назди Президенти Ҷумҳурии Тоҷикистон;

-  хизматрасонанда - мақомоти иҷроияи марказӣ ва маҳаллии ҳокимияти давлатӣ, мақомоти худидоракунии шаҳрак ва деҳот, инчунин шахсони ҳуқуқие, ки мутобиқи қонунгузории   Ҷумҳурии Тоҷикистон хизматрасониҳои давлатиро амалӣ менамоянд;

-  гирандагони хизматрасонӣ - шахсони воқеӣ ва ҳуқуқӣ, ба истиснои мақомоти иҷроияи марказӣ ва маҳаллии ҳокимияти давлатӣ, мақомоти худидоракунии шаҳрак ва деҳот.

5.   Реҷаи махсуси танзимӣ тибқи Тартиби мазкур субъектони зеринро фаро мегирад (минбаъд – субъектони реҷаи махсус):

-  танзимгари ягона;

-  татбиқкунанда;

-  хизматрасонанда;

-  гирандагони хизматрасонӣ.

6.   Субъектони реҷаи махсус муқаррароти Тартиби мазкурро дар асоси шартҳои зерин амалӣ менамоянд:

-  фаъолияти хизматрасонанда тавассути пайвастшавӣ ва ё ҳамгироӣ ба интернет-портали ягонаи хизматрасонии давлатӣ - «khizmat.egov.tj» (минбаъд - портали ягона) бо риояи Тартиби мазкур амалӣ карда мешавад;

-  портали ягона аз ҷониби татбиқкунанда бо мақсади таъмини риояи талаботи Тартиби мазкур дар марказҳои хизматрасонӣ амалӣ карда мешавад;

-  таҳия, насб, ҷорӣ ва ё ҳамгироии низомҳои иттилоотии электронӣ, инчунин нигаҳдории фаъолияти мунтазами портали ягона дар асоси шартномаи хизматрасонӣ байни Татбиқкунанда ва хизматрасонанда амалӣ карда мешавад.

7.   Хизматрасонанда уҳдадор аст, ки тибқи тартиби муқарраргардида вобаста ба фаъолияташ ҳар се моҳ ба танзимгари ягона ҳисоботи дахлдор манзур намояд.

8.   Дар шартномаи хизматрасонӣ ба таври инфиродӣ бо ҳар як хизматрасонанда масъалаҳои маблағгузории таҳия, насб, ҷорӣ ва ё ҳамгироии низомҳои иттилоотии электронӣ, инчунин нигаҳдории фаъолияти мунтазами портали ягона пешбинӣ карда мешаванд.

9.   Ҷиҳати пешниҳоди хизматрасониҳо татбиқкунанда дар мувофиқа бо танзимгари ягона бо истифода аз бино ва техникаю таҷҳизоти ташкилоти дигар дар шаҳру ноҳияҳо нуқтаҳои хизматрасонии давлатиро таъсис медиҳад.

10.   Дар марказҳои хизматрасонӣ тавассути портали ягона расмиёти зерин амалӣ мешавад:

- қабули муроҷиат дар бораи тариқи электронӣ гирифтани хизматрасонии давлатӣ;

 -  баррасии муроҷиат:

-   тафтиши пардохти арзиши хизматрасонии давлатӣ:

-  вақти пешниҳоди хизматрасонии давлатӣ:

-  додани ҳуҷҷати дахлдор аз натиҷаи муроҷиат;

-  дигар маълумоти марбута.

11.   Марказҳои хизматрасонӣ корҳои зеринро амалӣ менамоянд:

- хизматрасониҳои якхела ва ҳамоҳангшудаи масъулини хизматрасонандаҳоро, ки дар марказҳои хизматрасонӣ фаъолият мекунанд, ташкил менамоянд;

- ҷиҳати омода намудани муроҷиатҳо ба шахсони воқеӣ ва ҳуқуқӣ оид ба гирифтани хизматрасониҳои давлатӣ дар шакли электронӣ мусоидат менамоянд;

- барои дастрас намудани ҳуҷҷатҳо, маълумот аз ташкилоти давлатӣ кумак мерасонанд;

- таклифҳои шахсони воқеӣ ва ҳуқуқиро вобаста ба ташкил ва такмил додани хизматрасонии давлатии дар шакли электронӣ ва фаъолияти марказҳои хизматрасонӣ ба танзимгари ягона пешниҳод менамоянд;

-  самаранокии инноватсия ва ислоҳотро ҷиҳати беҳтар намудани хизматрасониҳои давлатӣ тариқи электронӣ таъмин менамоянд;

- ҷиҳати пешниҳоди хизматрасониҳои давлатӣ бо истифодаи васеи технологияҳои муосири иттилоотӣ чораҳои зарурӣ меандешанд;

- иҷрои қонунӣ, босифат ва шаффофи хизматрасониҳои давлатии пешниҳодшавандаро таъмин менамоянд;

- қоидаҳои пардохти хизматрасонии дар марказҳои хизматрасонӣ амалишаванда, аз ҷумла пардохтҳо тавассути шабакаи интернет ва дигар алоқаи электронии[V1]  муосирро назорат мекунанд;

- бо мақсади таъмини шаффофият раванди хизматрасонии давлатии амалишавандаро мунтазам ба навор гирифта, сабт менамоянд;

- фаъолияти шабакаи ягонаи компютерии марказҳои хизматрасонӣ ва низоми электронии иттилоотиро истифода карда, нигоҳдорӣ, бехатарӣ ва фаъолияти муттасили онҳоро таъмин менамоянд;

- тибқи тартиби муқарраргардида ба татбиқкунанда маълумоти омориро пешниҳод менамоянд.

12. Танзимагири ягона оид ба пешниҳод намудани реҷаи махсус дорои ҳуқуқҳои зерин мебошад:

-   пешбурди феҳристи субъектони реҷаи махсус;

-   қатъ намудани вазъи ҳуқуқии реҷаи махсус;     

- таҳия ва қабули санадҳои меъёрии ҳуқуқии дахлдор бо мақсади танзими масъалаҳои алоҳидаи вазъи ҳуқуқии субъекти реҷаи махсус, аз ҷумла масъалаи пешниҳод намудани имтиёзҳо ба субъекти реҷаи махсус;

- ҳуқуқҳои дигаре, ки Тартиби мазкур ва санадҳои меъёрии ҳуқуқии Ҷумҳурии Тоҷикистон муқаррар намудааст.

13. Танзимагири ягона дорои уҳдадориҳои зерин мебошад:

- ҳамкорӣ бо мақомоти давлатӣ, шахсони воқеӣ ва ҳуқуқӣ ҷиҳати ба таври дахлдор иҷро намудани ваколатҳои худ;

- таҳияи лоиҳаи ҳуҷҷатҳо ва шартномаҳо, ки барои истифода ба субъекти реҷаи махсус дар ҷараёни амалисозии лоиҳаи озмоишӣ зарур мебошанд; 

- мусоидат ба субъекти реҷаи махсус дар амалӣ намудани лоиҳаи озмоишӣ, аз ҷумла пешниҳод намудани хизматрасониҳои машваратӣ ва намудҳои дигари хизматрасониҳо дар асоси шартномаҳои байни мақомоти ваколатдори давлатӣ ва субъекти реҷаи махсус басташуда;

- уҳдадориҳои дигаре, ки Тартиби мазкур ва санадҳои меёрии ҳуқуқии Ҷумҳурии Тоҷикистон муқаррар намудааст.

14. Хизматрасонанда дорои ҳуқуқҳои зерин мебошад:

-  Машғул шудан мутобиқи талаботи санадҳои меъёрии ҳуқуқии Ҷумҳурии Тоҷикистон ва Тартиби мазкур ба хизматрасонӣ;

-   пешниҳоди хизматрасониҳо тавассути портали ягона;

-  муроҷиат ба танзимгари ягона ҷиҳати танзими масъалаҳо вобаста ба фаъолияти худ тибқи Тартиби мазкур;

-  ба роҳ мондани фаъолият дар доираи талаботи Конститутсияи Ҷумҳурии Тоҷикистон, дигар санадҳои меъёрии ҳуқуқии Ҷумҳурии Тоҷикистон ва Тартиби мазкур;

-  ҳуқуқҳои дигаре, ки Тартиби мазкур ва санадҳои меъёрии ҳуқуқии Ҷумҳурии Тоҷикистон муқаррар намудааст.

15. Хизматрасонанда дорои уҳдадориҳои зерин мебошад:

-  риояи тартиби пешниҳоди хизматрасонии давлатӣ тавассути портали ягона менамоянд;

-  зимни анҷом додани амалиёт ва аҳдҳо бо маблағҳои электронӣ бо субъектони реҷаи махсус риояи талаботи қонунгузории Ҷумҳурии Тоҷикистон дар соҳаи муқовимат ба қонунигардонӣ (расмикунонӣ)-и даромадҳои бо роҳи ҷиноят бадастоварда, маблағгузории терроризм ва маблағгузории паҳнкунии силоҳи қатли ом ва Тартиби мазкур;

-  хабардор намудан оид ба аҳдҳо ва амалиёти шубҳанок ва ҳатман назоратшаванда мақоми ваколатдор дар соҳаи муқовимат ба қонунигардонӣ (расмикунонӣ)-и даромадҳои бо роҳи ҷиноят бадастоварда, маблағгузории терроризм ва маблағгузории паҳнкунии силоҳи қатли омро мутобиқи қонунгузории Ҷумҳурии Тоҷикистон;

-  пешниҳод намудани иттилооти зарурӣ дар соҳаи хизматрасонии давлатӣ тибқи санадҳои меъёрии ҳуқуқии Ҷумҳурии Тоҷикистон ва Тартиби мазкур ба танзимгари ягона;

-  таъмини ҳифзи маълумоти шахсии субъектҳо тибқи қонунгузории Ҷумҳурии Тоҷикистон;