1. Тартиби татбиқи лоиҳаи озмоишӣ дар соҳаи хизматрасониҳои давлатӣ (минбаъд – Тартиби мазкур) бо
мақсади пешниҳод намудани реҷаи махсуси танзимӣ ҷиҳати амалӣ намудани лоиҳаи озмоишӣ дар соҳаи хизматрасониҳои давлатӣ
(минбаъд – лоиҳаи озмоишӣ) таҳия карда шуда, хусусиятҳои амалисозии хизматрасониҳои давлатиро аз ҷониби субъектони реҷаи махсуси танзимӣ дар ҷараёни татбиқи он, ҳуқуқ ва уҳдадориҳои субъектони реҷаи махсуси танзимӣ ва дигар самтҳои фаъолияти хизматрасонандагонро дар доираи реҷаи махсуси танзимӣ муқаррар ва танзим менамояд.
2. Лоиҳаи озмоишӣ тибқи талаботи санадҳои меъёрии ҳуқуқии Ҷумҳурии Тоҷикистон ва Тартиби мазкур амалӣ карда мешавад.
2(1). Ҳангоми амалисозии лоиҳаи озмоишӣ баъзе меъёрҳои қонунгузорӣ, ки ба муҳтавои лоиҳаи озмоишӣ алоқаманд мебошанд, моддаи (279 Кодекси мадании Ҷумҳурии Тоҷикистон, банди 3) қисми 2 моддаи 7 Қонуни Ҷумҳурии Тоҷикистон «Дар бораи танзими ҷашну маросим дар Ҷумҳурии Тоҷикистон», банди 10) қисми 1 моддаи 33, моддаҳои 78 ва 79 Кодекси андози Ҷумҳурии Тоҷикистон, моддаҳои 4, 9 ва 19 Қонуни Ҷумҳурии Тоҷикистон «Дар бораи бақайдгирии давлатии шахсони ҳуқуқӣ ва соҳибкорони инфиродӣ») ва дигар санадҳои меъёрии ҳуқуқие, ки ба самти хизматрасониҳои давлатӣ алоқаманданд, аз ҷониби мақомоти дахлдори ваколатдор қисман маҳдуд карда мешаванд.
2(2). Хизматрасониҳои давлатие, ки тариқи лоиҳаи озмоишӣ пурра ба таври худкор дар портали ягонаи хизматрасониҳои давлатӣ «khizmat.ehukumat.tj» пешниҳод мешаванд, бидуни ҳузури намояндаи ваколатдори хизматрасонанда дар марказҳои хизматрасонӣ ба аҳолӣ сурат мегиранд. Номгӯйи хизматрасониҳои давлатие, ки тариқи лоиҳаи озмоишӣ пурра ба таври худкор дар портали ягонаи хизматрасониҳои давлатӣ «khizmat.ehukumat.tj» пешниҳод мешаванд, аз ҷониби танзимгари ягонаи хизматрасониҳои давлатӣ бо пешниҳоди татбиқкунандаи лоиҳаи озмоишӣ муайян карда мешавад.
2(3). Дар ҳолати тариқи анъанавӣ муроҷиат намудани гирандагони хизматрасонӣ ба хизматрасонанда, хизматрасониҳои давлатӣ тибқи муқаррароти умумии пешбининамудаи қонунгузории Ҷумҳурии Тоҷикистон пешниҳод карда мешаванд (№1/15)
3. Муқаррароти Тартиби мазкур ба мақомоти давлатӣ, шахсони воқеӣ ва ҳуқуқӣ, ки нисбати онҳо реҷаи махсуси танзимӣ татбиқ карда мешаванд, барои иҷро ҳатмӣ мебошанд.
