бо қарори Ҳукумати ҶТ аз 03.03.2007 № 107 аз эътибор соқит дониста шуд

ҲУКУМАТИ ҶУМҲУРИИ ТОҶИКИСТОН

ҚАРОР

Дар бораи Инспексияи нақлиётии назди Вазорати нақлиёти Ҷумҳурии Тоҷикистон

Бо мақсади танзими ҳамлу нақли автомобилӣ, роҳи оҳан, ҳавоӣ ва обӣ, инчунин фаъолияти дигаре, ки бо ҷараёни нақлиётӣ вобастагӣ дорад, назорати риояи асноди ҷории меъёрию ҳуқуқӣ дар соҳаи нақлиёт дар қаламрави Ҷумҳурии Тоҷикистон, Ҳукумати Ҷумҳурии Тоҷикистон қарор мекунад:

1. Тасдиқ карда шаванд:

Низомномаи Инспексияи нақлиётии назди Вазорати нақлиёти Ҷумҳурии Тоҷикистон (замима мегардад).

хориҷ карда шуд (қарори Ҳукумати ҶТ аз 01.09.2005 № 337).

2. Шумораи ниҳоии кормандони Инспексияи нақлиётии назди Вазорати нақлиёти Ҷумҳурии Тоҷикистон ба миқдори 230 воҳид (бе ҳайати хизматрасон), аз он ҷумла дастгоҳи марказӣ ба миқдори 44 воҳид муқаррар карда шавад (қарори Ҳукумати ҶТ аз 03.06.2006 № 258).

Ба Инспексияи нақлиётӣ лимити автомобилҳои хизматӣ ба миқдори 11 воҳид тасдиқ карда шавад, аз ҷумла 4 воҳид барои дастгоҳи марказӣ ва 7 воҳид барои шуъбаҳои тобеи он.

3. Вазорати молияи Ҷумҳурии Тоҷикистон хароҷотҳоро барои нигоҳдории Инспексияи нақлиётии назди Вазорати нақлиёти Ҷумҳурии Тоҷикистон барои соли 2005 аз ҳисоби маблағҳои барои чорабиниҳои аҳамияти умумиҷумҳуриявӣ ва байналхалқӣ дошта ба маблағи 700 ҳазор сомонӣ ҷудо намуда, нигоҳдории онҳоро барои соли 2006 ва солҳои минбаъда дар буҷети ҷумҳуриявӣ пешбинӣ намояд (қарори Ҳукумати ҶТ аз 31.12.2004 № 520).

4. Беэътибор дониста шаванд:

қарори Ҳукумати Ҷумҳурии Тоҷикистон аз 27 июли соли 1998 № 245 "Дар бораи таъсиси Бозрасии нақлиёт дар назди Вазорати нақлиёт ва хоҷагии роҳи Ҷумҳурии Тоҷикистон";

қарори Ҳукумати Ҷумҳурии Тоҷикистон аз 8 декабри соли 1998 № 497 "Дар бораи Низомномаи литсензиякунонии фаъолияти нақлиётӣ ва хизматрасоние, ки ҷараёни нақлиётиро дар Ҷумҳурии Тоҷикистон таъмин менамояд".