(Бо Қонуни ҶТ аз 12.05.2007 №254 аз эътибор соқит дониста шуд)

Қонуни Ҷумҳурии Тоҷикистон

"Дар бораи тасдиқи Низомномаи Парчами давлатии Ҷумҳурии Тоҷикистон"

Шӯрои Олии Ҷумҳурии Тоҷикистон қарор мекунад:

1. Низомномаи Парчами давлатии Ҷумҳурии Тоҷикистон тасдиқ карда шавад (низомнома замима мегардад).

2. Санадҳои зайл беэътибор дониста шаванд:

Фармони Раёсати Шӯрои Олии Ҷумҳурии Тоҷикистон аз 29 феврали соли 1956 (дар таҳрири Фармони Раёсати Шӯрои Олии Ҷумҳурии Тоҷикистон аз 29 октябри соли 1981, ки бо Қонуни Ҷумҳурии Тоҷикистон аз 11 декабри соли 1981 тасдиқ шудааст) (Ведомостҳои Совети Олии РСС Тоҷикистон, с.1981, № 21, моддаи 190; № 24, моддаи 221);

Фармони Раёсати Шӯрои Олии Ҷумҳурии Тоҷикистон аз 22 ноябри соли 1984 "Дар бораи даровардани илова ба Низомномаи Байрақи давлатии Ҷумҳурии Тоҷикистон (Ведомостҳои Совети Олии РСС Тоҷикистон, с.1984, № 23, моддаи 221);

Қонуни Ҷумҳурии Тоҷикистон аз 13 декабри соли 1984 "Дар хусуси тасдиқ кардани Указҳои Президиуми Совети Олии РСС Тоҷикистон дар бораи даровардани тағйироту иловаҳо ба баъзе актҳои қонунии РСС Тоҷикистон" дар қисми тасдиқи Укази Президиуми Совети Олии РСС Тоҷикистон аз 22 ноябри соли 1984 "Дар бораи даровардани илова ба Низомномаи Байрақи давлатии РСС Тоҷикистон (Ведомостҳои Совети Олии РСС Тоҷикистон, с.1984, № 24, моддаи 238);

НИЗОМНОМАИ ПАРЧАМИ ДАВЛАТИИ ҶУМҲУРИИ ТОҶИКИСТОН

1. Парчами давлатии Ҷумҳурии Тоҷикистон рамзи истиқлолияти давлатии Ҷумҳурии Тоҷикистон, иттиҳоди вайроннашавандаи коргару деҳқон ва зиёиён, дӯстиву бародарии ҳамаи миллатҳои сокини ҷумҳурӣ мебошад.

2. Парчами давлатии Ҷумҳурии Тоҷикистон матои росткунҷаест, ки аз се рахи рангаи уфуқӣ иборат аст: рахи боло ранги сурх дошта, паҳнои он ба рахи поёни сабз баробар мебошад, рахи сафеди мобайнӣ якуним баробари паҳнои ҳар яке аз рахҳои ранга аст. Рӯи рахи сафед, дар мобайни парчам бо зарҳал рамзи тоҷи тансиқшуда ва болои он ҳафт ситора дар шакли нимдоира кашида шудааст. Мутобиқи бару дарозии умумии парчам 1:2 аст.

Тоҷ ва ситораҳои парчам дар шакли росткунҷа ҷой дода шудаанд, ки паҳлӯи амудиаш 0,8 ва паҳлӯи уфуқиаш 1,0-и паҳнои рахи сафед аст. Ситораҳои панҷгӯша ба доираҳои қутрашон 0,15 ва ба қавси радиусаш 0,5-и паҳнои рахи сафед кашида мешавад.

Тоҷ, ки баландиаш баробари 0,55 паҳнои рахи сафед аст, дар пояаш ба қавси радиусаш 1,2 бари рахи сафед қат мешавад. Чор унсури камоншакл, ки тоҷро зеб медиҳанд, дар мобайн бо як қисми доира оро меёбад, ки қутри он баробари 0,2 бари рахи сафед мебошад.

3. Парчами давлатии Ҷумҳурии Тоҷикистон дар ҷойҳои зайл афрохта мешавад:

дар болои биноҳое, ки иҷлосияҳои Шӯрои Олии Ҷумҳурии Тоҷикистон ё иҷлосияҳои Шӯрои депутатҳои халқи Вилояти Мухтори Бадахшони Кӯҳӣ, Шӯроҳои депутатҳои халқи вилоятҳо, ноҳияҳо, шаҳру шаҳракҳо ва деҳаҳо гузаронида мешаванд, дар тамоми давраи гузаштани иҷлосия;

дар болои биноҳои Шӯрои Олии Ҷумҳурии Тоҷикистон, Шӯрои Вазирони Ҷумҳурии Тоҷикистон, кумитаҳои иҷроияи Шӯроҳои маҳаллии депутатҳои халқи Ҷумҳурии Тоҷикистон - доимӣ;

дар болои биноҳои вазоратҳо, кумитаю идораҳои давлатӣ, дигар мақомоти давлатӣ ва иттиҳодияҳои ҷамъиятии Ҷумҳурии Тоҷикистон, корхонаю муассиса ва ташкилотҳо, дар болои биноҳои истиқоматӣ - дар рӯзҳои ид ва рӯзҳои фаромӯшнашудание, ки Қонуни Ҷумҳурии Тоҷикистон муайян намудааст;

дар болои биноҳо ва воситаҳои нақлиёти намояндагиҳои дипломатӣ ва консулӣ, ҳамчунин дар болои иморатҳои муассисаҳои савдои Ҷумҳурии Тоҷикистон, ки дар хориҷа воқеанд, дар болои васоили нақлиёте, ки дар дохили онҳо ба ҳайси ашхоси расмӣ Раиси Шӯрои Олии Ҷумҳурии Тоҷикистон, Раиси Шӯрои Вазирони Ҷумҳурии Тоҷикистон ё шахсони дигар нишастаанд, - мувофиқи тартиби муқаррарнамудаи Шӯрои Вазирони Ҷумҳурии Тоҷикистон;

дар биноҳои райъдиҳӣ - дар рӯзҳои интихобот ва ҳамапурсӣ;

дар қисмҳои артиши Ҷумҳурии Тоҷикистон - мутобиқи оинномаи артиш;

дар посгоҳҳои марзӣ (заставаҳо) ва маҳалҳои рухсатдиҳии (гумрукии) Ҷумҳурии Тоҷикистон;

тибқи амри Шӯрои Вазирони Ҷумҳурии Тоҷикистон Парчами давлатии Ҷумҳурии Тоҷикистонро ҳамчунин ҳангоми гузаронидани ҷамъомаду ҷашнҳо ва тадбирҳои дигар, ки мақомоти давлатӣ ва иттиҳодияҳои ҷамъиятӣ, корхонаю муассисаҳо ва ташкилотҳо созмон медиҳанд, афрохтан мумкин аст.

4. Парчами давлатии Ҷумҳурии Тоҷикистон дар толорҳои маҷлиси Шӯрои Олии Ҷумҳурии Тоҷикистон, Раёсати Шӯрои Олии Ҷумҳурии Тоҷикистон, Шӯрои Вазирони Ҷумҳурии Тоҷикистон, Шӯрои маҳаллии депутатҳои халқи Ҷумҳурии Тоҷикистон ва мақомоти иҷроияю амрдиҳандаи онҳо, ҳамчунин дар дафтари (кабинети) кории Раиси Шӯрои Олии Ҷумҳурии Тоҷикистон, Раиси Шӯрои Вазирони Ҷумҳурии Тоҷикистон, раисони кумитаҳои иҷроияи Шӯроҳои маҳаллии депутатҳои халқи Ҷумҳурии Тоҷикистон ва утоқҳое, ки депутатҳои халқи Ҷумҳурии Тоҷикистон ҳама вақт интихобкунандагонро қабул менамоянд, ҷойгир карда мешавад.

5. Ҳангоми мотам бо қарори Раёсати Шӯрои Олии Ҷумҳурии Тоҷикистон ё Шӯрои Вазирони Ҷумҳурии Тоҷикистон Парчами давлатии Ҷумҳурии Тоҷикистон метавонад ба шакли мотамӣ дароварда афрохта шавад. Дар ин ҳол ба чӯбдастаи (мили) парчам матои тасмашакли сиёҳ баста мешавад, ду нӯги он бояд то қисмати поёнии парчам овезон бошад.

Дар сурати афрохтани парчам ҳангоми мотам парчам ба андозаи 1/3-и дарозии чӯбдаста поин карда мешавад.

6. Тасвири Парчами давлатии Ҷумҳурии Тоҷикистон дар киштиҳои ҳавоие, ки дар қайди Ҷумҳурии Тоҷикистон мебошанд, кашида мешавад.

7. Тасвири Парчами давлатии Ҷумҳурии Тоҷикистон метавонад ба мақсади ороишӣ ба сифати рамзи давлатӣ ва миллӣ тавре истифода гардад, ки дар ин сурат нисбат ба Парчами давлатии Ҷумҳурии Тоҷикистон беҳурматӣ зоҳир нашавад.

8. Парчами давлатии Ҷумҳурии Тоҷикистон ва тасвири он, қатъи назар аз андозаи парчаму тасвири он, бояд доимо ҳам дар тасвири ранга ва ҳам дар тасвири нақшагӣ ба асли худ, ки ба ҳамин Низомнома замима мегардад, мувофиқат дошта бошад.

9. Шахсоне, ки дар касифу таҳқир кардани Парчами давлатии Ҷумҳурии Тоҷикистон гунаҳкоранд, мутобиқи қонунгузории Ҷумҳурии Тоҷикистон ба ҷавобгарӣ кашида мешаванд.

10. Қоидаҳои татбиқи ҳамин Низомнома ба тартиби таҳияи Парчами давлатии Ҷумҳурии Тоҷикистонро Шӯрои Вазирони Ҷумҳурии Тоҷикистон ба табъ мерасонад.

Замима 1

Замимаи 2