ҲУКУМАТИ ҶУМҲУРИИ ТОҶИКИСТОН

ҚАРОР

Дар бораи Барномаи тайёр намудани кадрҳои тибби барои давраи то соли 2030

Мутобиқи моддаи 11 Қонуни Ҷумҳурии Тоҷикистон "Дар бораи дурнамоҳои давлатӣ, консепсияҳо, стратегияҳо ва барномаҳои рушди иҷтимоию иқтисодии Ҷумҳурии Тоҷикистон" Ҳукумати Ҷумҳурии Тоҷикистон қарор мекунад:

1. Барномаи тайёр намудани кадрҳои тиббӣ барои давраи то соли 2030 ва нақшаи амалисозии Барномаи тайёр намудани кадрҳои тиббӣ барои давраи то соли 2030 тасдиқ карда шаванд (замимаҳои 1 ва 2).

2. Комиссияи ҷумҳуриявӣ оид ба интихоб ва тайёр намудани кадрҳо дар муассисаҳои таҳсилоти олӣ ва илмии давлатҳои хориҷӣ ҳамасола тибқи тартиби муқарраргардида мутахассисони ҷавони соҳаи тандурустиро аз рӯи ихтисосҳои афзалиятноки тиббӣ барои таҳсил кардан ба хориҷи кишвар сафарбар намояд,

3. Вазорати рушди иқтисод ва савдои Ҷумҳурии Тоҷикистон ҳамасола тибқи тартиби муқарраргардида бо дарназардошти таъмин кардани вилоятҳо, шаҳру ноҳияҳои ҷумҳурӣ бо кадрҳои тиббӣ нақшаи умумии қабули донишҷӯёнро ба муассисаҳои таълимии тиббии ҷумҳурӣ, нақшаи қабули духтарон ва писаронро ба муассисаҳои таҳсилоти олии касбии ҷумҳурӣ тибқи квотаи Президенти Ҷумҳурии Тоҷикистон аз ҳисоби маблағҳои буҷети давлатӣ ва номгӯи ихтисосҳои тиббӣ, ки аз рӯи онҳо дар муассисаҳои таҳсилоти олии давлатҳои хориҷӣ аз ҳисоби маблағҳои буҷети давлатӣ кадрҳо тайёр карда мешаванд, таҳия ва барои баррасӣ ба Ҳукумати Ҷумҳурии Тоҷикистон пешниҳод намояд,

4. Вазорати тандурустӣ ва ҳифзи иҷтимоии аҳолии Ҷумҳурии Тоҷикистон:

- якҷо бо вазорату идораҳои дахлдор ва мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳои Суғду Хатлон, шаҳри Душанбе ва шаҳру ноҳияҳои тобеи ҷумҳурӣ дар доираи маблағҳои пешбининамудаи буҷети давлатӣ, маблағҳои ғайрибуҷетӣ ва ҷалби сармояҳои дохилию хориҷӣ оид ба амалисозии барномаи мазкур тадбирҳои зарурӣ андешад;

- тайёр кардани кадрҳои соҳаи тандурустиро дар зинаҳои дахлдори таҳсилоти баъдидипломӣ ва курсҳои бозомӯзӣ бо дарназардошти ихтисосҳои афзалиятдошта амалӣ намояд.