ҲУКУМАТИ ҶУМҲУРИИ ТОҶИКИСТОН

ҚАРОР

Дар бораи масъалаҳои бақайдгирии огоҳиномаҳои гарави молу мулки манқул ва бақайдгирии уҳдадориҳои таъминшуда

Мутобиқи қисми 6 моддаи 5, қисми 8 моддаи 19 Қонуни Ҷумҳурии Тоҷикистон "Дар бораи гарави молу мулки манқул ва бақайдгирии ухдадориҳои таъминшуда", моддаи 116 Кодекси мурофиавии ҷиноятии Ҷумҳурии Тоҷикистон ва моддаи 57 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" Ҳукумати Ҷумҳурии Тоҷикистон қарор мекунад:

1. Мақоми ваколатдори давлатӣ дар соҳаи бақайдгирии уҳдадориҳои таъминшуда ва пешбурди Феҳристи ягонаи давлатии уҳдадориҳои таъминшуда Вазорати адлияи Ҷумҳурии Тоҷикистон муайян карда шавад.

2. Тартиби бақайдгирии огоҳиномаҳои гарав ва пешбурди Феҳристи ягонаи давлатии ухдадориҳои таъминшуда тасдиқ карда шавад (замимаи 1).

3. Феҳристи объектҳое, ки бинобар арзиши таърихӣ, фарҳангӣ ё барои амнияти давлатӣ аҳамият доштанашон мавзӯи гарав шуда наметавонанд, тасдиқ карда шавад (замимаи 2).

4. Вазорати адлияи Ҷумҳурии Тоҷикистон санадҳои меъёрии ҳуқуқии худро ба қарори мазкур мутобиқ намояд.

5. Қарори Ҳукумати Ҷумҳурии Тоҷикистон аз 25 сентябри соли 2015, № 603 "Дар бораи Тартиби бақайдгирии гаравҳо ва пешбурди Феҳрасти ягонаи давлатии ухдадориҳои гаравӣ" аз эътибор соқит дониста шавад.