Ҳукумати Ҷумҳурии Тоҷикистон

ҚАРОР

Дар хусуси лоиҳаи Ёддошти тафоҳум байни Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин оид ба таҳкими минбаъдаи ҳамкории зиддитеррористӣ дар мавриди мубодилаи иттилоот бо истифода аз маълумоти моҳворавии таҳқиқоти фосилавӣ тавассути зонди баландпарвоз

Мутобиқи моддаи 7 Қонуни Ҷумҳурии Тоҷикистон "Дар бораи шартномаҳои байналмилалии Ҷумҳурии Тоҷикистон" Ҳукумати Ҷумҳурии Тоҷикистон қарор мекунад:

1. Лоиҳаи Ёддошти тафоҳум байни Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин оид ба таҳкими минбаъдаи ҳамкории зиддитеррористӣ дар мавриди мубодилаи иттилоот бо истифода аз маълумоти моҳворавии тадқиқоти фосилавӣ тавассути зонди баландпарвоз маъқул дониста шавад.

2. Вазири корҳои хориҷии Ҷумҳурии Тоҷикистон Ёддошти тафоҳуми мазкурро аз номи Ҳукумати Ҷумҳурии Тоҷикистон ба имзо расонад ва ҳангоми зарурат ба матни он тағйиру иловаҳои хусусияти муҳимнадоштаро ворид намояд.

3. Вазорати корҳои хориҷии Ҷумҳурии Тоҷикистон мувофиқи тартиби муқарраргардида сана ва маҳалли имзои Ёддошти тафоҳуми мазкурро бо ҷониби Чин мувофиқа намояд.

Ёддошти тафоҳум байни Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин оид ба таҳкими минбаъдаи ҳамкории зиддитеррористӣ дар мавриди мубодилаи иттилоот бо истифода аз маълумоти моҳворавии таҳқиқоти фосилавӣ тавассути зонди баландпарвоз

Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин, ки (минбаъд "Тарафҳо" номида мешаванд),

Баланд бардоштани сатҳи ҳамкориҳои мутақобиларо дар соҳаи амният ва мубориза бо терроризм зарур шуморида,

бо мақсади минбаъд таҳким бахшидани ҳамкорӣ оид ба мубодилаи иттилоот бо истифода аз маълумоти моҳворавии таҳқиқоти фосилавӣ тавассути зонди баландпарвоз,

дар асоси муқаррароти Созишнома байни Ҷумҳурии Тоҷикистон ва Ҷумҳурии Мардумии Чин оид ба ҳамкорӣ дар мубориза бар зидди терроризм, сепаратизм ва ифротгароӣ аз 2 сентябри соли 2003,

ба мувофиқаи зайл расиданд:

Моддаи 1

1. Идораҳои салоҳиятдори масъули ҳамоҳангсозии иҷрои муқаррароти Ёддошти тафоҳуми мазкур Вазорати корҳои хориҷии Ҷумҳурии Тоҷикистон ва Вазорати корҳои хориҷии Ҷумҳурии Мардумии Чин мебошанд.

2. Мақомоти ваколатдори масъули амалисозии Ёддошти тафоҳуми мазкур Кумитаи давлатии амнияти миллии Ҷумҳурии Тоҷикистон ва Маъмурияти миллии кайҳонии Чин мебошанд.

Моддаи 2

1. Ҷониби Чин дар асоси дархости ҷониби Тоҷикистон ва кординатҳои пешниҳоднамудаи он дар ҳудуди Ҷумҳурии Тоҷикистон аксгирии моҳворавии фосилавиро амалӣ менамояд. Ин аксҳо баъд аз муайянкунӣ ба ҷониби Тоҷикистон пешкаш мегарданд.

2. Баъд аз ба имзо расонидани Ёддошти тафоҳуми мазкур, Тарафҳо ба ҳамкорӣ шурўъ менамоянд. Кумитаи давлатии амнияти миллии Ҷумҳурии Тоҷикистон ва Маркази назорати рўи замин ва коркарди маълумоти назди Маъмурияти миллии кайҳонии Чин мутобиқи Ёддошти тафоҳуми мазкур Созишномаи ҳамкориро ба имзо расонида, қисмҳои алоҳидаи онро мувофиқа менамоянд.

3. Мутобиқи муқаррароти Ёддошти тафоҳуми мазкур Тарафҳо бо мусоидати мақомоти ваколатдори худ мубодилаи координатҳои ҷойгиршавӣ ва аксҳоро бо роҳҳои барои Тарафҳо мақбул, бо низоми махфият ва дар шакли бехатар амалӣ менамоянд.

Моддаи 3

Координатҳои ҷойгиршавӣ ва аксҳое, ки аз ҷониби як Тараф пешниҳод мегарданд, аз Тарафи дигар бояд махфӣ нигоҳ дошта шуда, ба тарафи сеюм супорида нашаванд.

Моддаи 4

Баҳсу ихтилофоте, ки вобаста ба тавсифи Ёддошти тафоҳуми мазкур ба миён меоянд, Тарафҳо бо роҳи машварат танзим менамоянд.

Моддаи 5

1. Ёддошти тафоҳуми мазкур пас аз гузаронидани расмиёти дохилидавлатӣ эътибор пайдо мекунад ва ба муҳлати як сол амал менамояд.

2. Бо розигии мутақобила Тарафҳо метавонанд ба Ёддошти тафоҳуми мазкур тағйиру иловаҳо ворид намоянд, ки бо протоколҳои алоҳида ба расмият дароварда мешаванд ва қисми ҷудонашавандаи Ёддошти тафоҳуми мазкур ба ҳисоб мераванд.

3. Муҳлати амали Ёддошти тафоҳуми мазкур худ ба худ ба як соли минбаъда тамдид мегардад, агар ҳеҷ яке аз Тарафҳо на камтар аз се моҳ ба охир расидани муҳлати амал, Тарафи дигарро оид ба нияти қатъ намудани амали он дар шакли хаттй огоҳ насозад.

Ёддошти тафоҳуми мазкур дар шаҳри Душанбе "____"___________ соли 2019 дар ду нусхаи асл, ҳар кадом бо забонҳои тоҷикӣ, чинӣ ва русӣ ба имзо расонида шуд, зимнан ҳамаи матнҳо эътибори якхела доранд.