Ҳукумати Ҷумҳурии Тоҷикистон

ҚАРОР

Дар бораи Барномаи кафолатҳои давлатӣ оид ба таъмини аҳолӣ бо кумаки тиббию санитарӣ дар шаҳру ноҳияҳои таҷрибавии Ҷумҳурии Тоҷикистон барои солҳои 2020-2022

Мутобиқи моддаи 11 Қонуни Ҷумҳурии Тоҷикистон "Дар бораи дурнамоҳои давлатӣ, консепсияҳо, стратегияҳо ва барномаҳои рушди иҷтимоию иқтисодии Ҷумҳурии Тоҷикистон" Ҳукумати Ҷумҳурии Тоҷикистон қарор мекунад:

1. Барномаи кафолатҳои давлатӣ оид ба таъмини аҳолӣ бо кумаки тиббию санитарӣ дар шаҳру ноҳияҳои таҷрибавии Ҷумҳурии Тоҷикистон барои солҳои 2020-2022 тасдиқ карда шавад (замима мегардад).

2. Вазорати тандурустӣ ва ҳифзи иҷтимоии аҳолии Ҷумҳурии Тоҷикистон якҷо бо вазоратҳои рушди иқтисод ва савдо, молия дастурамал ва қоидаҳоро доир ба амалишавии Барномаи кафолатҳои давлатӣ оид ба таъмини аҳолӣ бо кумаки тиббию санитарӣ дар шаҳру ноҳияҳои таҷрибавии Ҷумҳурии Тоҷикистон барои солҳои 2020-2022 таҳия ва тасдиқ намояд.

3. Вазоратҳои тандурустӣ ва ҳифзи иҷтимоии аҳолӣ, молия, мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳои Хатлону Суғд ва шаҳру ноҳияҳои тобеи ҷумҳурӣ бо ҷалби шарикон оид ба рушд амалӣ намудани барномаи мазкурро дар шаҳрҳои Левакант, Норак, Турсунзода, Истаравшан, Истиқлол ва ноҳияҳои Мир Сайид Алии Ҳамадонӣ, Спитамен, Шамсиддин Шоҳин, Данғара, Панҷ, Ашт, Шуғнон, Рӯшон, Рашт, Шаҳринав, Варзоб, Файзобод, Кӯҳистони Мастчоҳ, Ховалинг идома дода, аз 1 январи соли 2020 амалисозии барномаро дар шаҳри Роғун ва ноҳияҳои Деваштич, Сангвор, Лахш, Зафаробод, Восеъ, Фархор, Нуробод, Тоҷикобод, Роштқалъа, Ванҷ ва Шаҳристон таъмин намоянд.

4. Мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳои Хатлону Суғд, шаҳрҳои Турсунзода, Роғун ва ноҳияҳои Варзоб, Шаҳринав, Рашт, Файзобод, Нуробод, Тоҷикобод, Сангвор ва Лахш дар доираи маблағҳои барои соҳаи тандурустӣ пешбинигардида, инчунин дигар манбаъҳое, ки қонунгузории Ҷумҳурии Тоҷикистон манъ накардааст, амалӣ намудани барномаи мазкурро таъмин намоянд.

5. Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ҳамоҳангсозӣ ва дастгирии техникии амалӣ намудани барномаро таъмин намуда, аз натиҷаи амалӣ намудани он ҳар сол то 20 декабр ба Ҳукумати Ҷумҳурии Тоҷикистон маълумот пешниҳод намояд.