Ҳукумати Ҷумҳурии Тоҷикистон

ҚАРОР

Дар бораи лоиҳаи Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Молдова оид ба сафари бераводиди шаҳрвандон

Мутобиқи моддаи 7 Қонуни Ҷумҳурии Тоҷикистон "Дар бораи шартномаҳои байналмилалии Ҷумҳурии Тоҷикистон" Ҳукумати Ҷумҳурии Тоҷикистон қарор мекунад:

1. Лоиҳаи Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Молдова оид ба сафари бераводиди шаҳрвандон маъқул дониста шавад.

2. Вазири корҳои хориҷии Ҷумҳурии Тоҷикистон Созишномаи мазкурро аз номи Ҳукумати Ҷумҳурии Тоҷикистон ба имзо расонад ва ҳангоми зарурат ба матни он тағйиру иловаҳои хусусияти муҳимнадоштаро ворид намояд.

3. Вазорати корҳои хориҷии Ҷумҳурии Тоҷикистон тибқи тартиби муқарраргардида бо ҷониби Молдова сана ва маҳалли имзои Созишномаи мазкурро мувофиқа намояд.

СОЗИШНОМА БАЙНИ ҲУКУМАТИ ҶУМҲУРИИ ТОҶИКИСТОН ВА ҲУКУМАТИ ҶУМҲУРИИ МОЛДОВА ДАР БОРАИ РАФТУОМАДИ БЕРАВОДИДИ ШАҲРВАНДОН

Ҳукумати Ҷумҳурии Тоҷикистон ва Ҳукумати Ҷумҳурии Молдова, ки минбаъд Тарафҳо номида мешаванд,

бо хоҳиши мусоидат намудан ба инкишофи минбаъдаи муносибатҳо байни ду кишвар,

бо мақсади ба тартиб даровардани низоми рафтуомади мутақобилаи шаҳрвандони хар ду давлат,

ба мувофиқаи зерин расиданд:

Моддаи 1

1. Шаҳрвандони давлатҳои Тарафҳо метавонанд дар асоси ҳуҷҷатҳои амалкунанда бе раводид барои будубоши бефосила ва якчанд маротиба будубош намудан, ки ба ҳудуди давлати Тарафи дигар ворид, хориҷ, убури транзитӣ ва ё будубош намоянд, муҳлати он дар ҳама давра набояд аз 90 рӯз дар давоми 180 рӯзи тақвимӣ гузарад ва он ба ҳисоб гирифтани охирин давраи 180 - рӯзаро пас аз ҳар як рӯзи будубош дар назар дорад.

2. Ҳангоми ворид шудан ба ҳудуди як Тараф шаҳрванди Тарафи дигар бояд бо худ ҳуҷҷати сафари муҳлати амалаш на кам аз 3 моҳ эътибордошта то санаи эътимолии хориҷ шудан аз ҳудуди давлати қабулкунандаро дошта бошад.

Моддаи 2

1. Ҳуҷҷатҳое, ки барои сафар ба хориҷа дар доираи Созишномаи мазкур эътиборнок шуморида мешаванд, инҳоянд: Барои шаҳрвандони Ҷумҳурии Тоҷикистон:

а) шиносномаи дипломатӣ;

б) шиносномаи хизматӣ;

в) шиносномаи шаҳрвандии Ҷумҳурии Тоҷикистон

г) шаҳодатномаи бозгашт (танҳо барои бозгашт ба Ҷумҳурии Тоҷикистон); Барои шаҳрвандони Ҷумҳурии Молдова:

а) шиносномаи дипломатӣ;

б) шиносномаи хизматӣ;

в) шиносномаи шаҳрванди Ҷумҳурии Молдова;

г) шаҳодатномаи бозгашт (танҳо барои бозгашт ба Ҷумҳурии Молдова);

д) шиносномаи баҳрнавард.

2. Тарафҳо ба воситаи роҳҳои дипломатӣ оид ба ворид намудани тағйиру иловаҳо ба ҳуҷҷатҳои амалкунанда мубодилаи иттилоот менамоянд. Тарафҳо на дертар аз 30 рӯз қабл аз ба муомилот ҷорӣ намудани ҳуҷҷатҳои зикршуда намунаҳон онҳоро мубодила менамоянд.

Моддаи 3

Шаҳрвандони давлати яке аз Тарафҳо метавонанд тариқи гузаргоҳҳои сарҳадии барои рафтуомади байналмилалӣ пешбинигардида, ба ҳудуди давлати Тарафи дигар ворид, аз он хориҷ ва убури транзитӣ намоянд.

Моддаи 4

Шаҳрвандони давлати яке аз Тарафҳо, ҳангоми будубош дар ҳудуди давлати Тарафи дигар бояд қонунҳои давлати қабул кунандаро риоя намоянд.

Моддаи 5

Созишномаи мазкур ҳуқуқи Тарафҳоро барои рад кардани вуруд, ихтисор намудани муҳлати иқомат ё баргардонидани шаҳрвандони давлати Тарафи дигар, ки ҳузурашон дар ҳудуди он номатлуб дониста мешавад, маҳдуд намесозад.

Моддаи 6

1. Шаҳрвандони давлати яке аз Тарафҳо дар ҳолати гум кардани ҳуҷҷатҳои дар моддаи 2 Созишномаи мазкур зикршударо дар ҳудуди давлати Тарафи дигар, уҳдадоранд дар ин бора ба мақомоти салоҳиятдори давлати иқоматро, ки гувоҳномаи муроҷиатро дар мавриди гум шудани ҳуҷҷатҳо медиҳанд, хабар диҳанд.

2. Намояндагиҳои дипломатӣ ё муассисаҳои консулии Тарафҳо ба шаҳрвандони дар банди 1 моддаи мазкур зикргардида ҳуҷҷати сафарро барои бозгашт ба кишвар дар асоси қонунгузории миллии Давлатҳои аҳдкунанда медиҳанд.

Моддаи 7

Тарафҳо якдигарро дар бораи тағйир ёфтани шароити вуруд, иқомат ва хуруҷ дар муҳлати на дертар аз 30 рӯз то эътибор пайдо намудани ин тағйирот, бо роҳҳои дипломатӣ хабардор менамоянд.

Моддаи 8

Тарафҳо бо розигии мутақобила метавонанд ба Созишномаи мазкур тағйиру иловаҳо ворид намоянд, ки дар шакли протоколҳои алоҳида ба расмият дароварда шуда, қисми ҷудонашавандаи Созишнома мебошанд ва мутобиқи моддаи 11 Созишномаи мазкур эътибор пайдо мекунанд.

Моддаи 9

Масъалаҳои баҳсталаби марбут ба тафсир ва татбиқи муқаррароти Созишномаи мазкур, бо роҳи машварат ва гуфтушуниди байни Тарафҳо ҳал карда мешаванд.

Моддаи 10

1. Ҳар яке аз Тарафҳо ҳуқуқ дорад амали Созишномаи мазкурро пурра ё қисман боздорад, агар ин барои таъмини амнияти давлат, тартиботи ҷамъиятӣ ва ҳифзи саломатии аҳолии давлати худ зарур бошад.

2. Тарафҳо оид ба қабул ё бекор намудани тадбирҳои дар банди 1 моддаи мазкур пешбинишуда, якдигарро дар муҳлати на дертар аз 30 рӯз то қабули чунин қарор огоҳ месозанд.

Моддаи 11

1. Созишномаи мазкур ба муҳлати номуайян баста мешавад ва дар рӯзи 30-юм (сиюм) аз санаи гирифтани охирин огоҳиномаи хаттӣ бо роҳҳои дипломатӣ дар бораи иҷро гардидани расмиёти дохилидавлатӣ аз ҷониби Тарафҳо эътибор пайдо мекунад.

2. Ҳар яке аз Тарафҳо метавонад Тарафи дигарро оид ба қатъ намудани амали Созишномаи мазкур бо таври хаттӣ тавассути роҳҳои дипломатӣ огоҳ созад. Дар ин ҳолат эътибори Созишнома баъд аз 90 (навад) рӯз аз санаи гирифтани чунин огоҳинома қатъ мегардад.

Созишномаи мазкур дар __________ "___" ___________ 201_ дар ду нусхаи асл, ҳар кадоме бо забонҳои тоҷикӣ, руминӣ ва русӣ ба имзо расидааст ва ҳамаи матнҳо эътибори якхела доранд. Дар ҳолати ба миён омадани ихтилоф дар тафсири муқаррароти Созишномаи мазкур, матн бо забони русӣ ба асос гирифта мешавад.