Ҳукумати Ҷумҳурии Тоҷикистон

ҚАРОР

Дар бораи ворид намудани тағйиру иловаҳо ба қарори Ҳукумати Ҷумҳурии Тоҷикистон аз 1 августи соли 2015, № 493

Мутобиқи моддаи 56 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" ва бо мақсади танзими фаъолият дар соҳаи тарбияи ҷисмонӣ ва варзиш, Ҳукумати Ҷумҳурии Тоҷикистон қарор мекунад:

1. Дар банди 2 қарори Ҳукумати Ҷумҳурии Тоҷикистон аз 1 августи соли 2015, № 493 "Дар бораи татбиқи фармони Президенти Ҷумҳурии Тоҷикистон аз 9 январи соли 2015, № 328" калимаҳои "Кумитаи ҷавонон, варзиш ва сайёҳии" ба калимаҳои "Кумитаи кор бо ҷавонон ва варзиши" иваз карда шаванд.

2. Ба Низомномаи Ҷоизаи Президенти Ҷумҳурии Тоҷикистон ба ғолибон ва ҷоизадорони мусобиқаҳои байналмилалии варзишӣ, ки бо қарори Ҳукумати Ҷумҳурии Тоҷикистон аз 1 августи соли 2015, № 493 "Дар бораи татбиқи фармони Президенти Ҷумҳурии Тоҷикистон аз 9 январи соли 2015, № 328" тасдиқ шудааст, тағйиру иловаҳои зерин ворид карда шаванд:

- ба банди 2 пеш аз калимаи "шарт" калима ва аломати "талабот," илова карда шаванд;

- аз банди 4 калимаи "мукофотпулиҳои" хориҷ карда шавад;

- банди 6 дар таҳрири зерин ифода карда шавад:

"6. Андозаи ҷоиза барои як давраи олимпӣ муайян гардида, дар давраи навбатии олимпӣ метавонад тағйир дода шавад.";

- банди 7 дар таҳрири зерин ифода карда шавад:

"7. Ҷоиза ба шаҳрвандони Ҷумҳурии Тоҷикистон, ки шарафи варзишии давлатро ҳимоя намуда, дастовардҳояшон ба меъёр ва талаботи муқарраргардида ҷавобгӯ мебошанд, бо дар назар доштани қарори Комиссия дар асоси амри Президенти Ҷумҳурии Тоҷикистон дода мешавад.";

- банди 8 хориҷ карда шавад;

- банди 10 дар таҳрири зерин ифода карда шавад:

"10. Барои муқаррар намудани ҷоиза ташкилотҳои варзишӣ, варзишгар ё мураббии варзишӣ ба мақоми ваколатдори давлатӣ дар соҳаи тарбияи ҷисмонӣ ва варзиш ҳуҷҷатҳои зеринро пешниҳод менамояд:

- нусхаи шиносномаи довталаб ва акс (3x4);

- нусхаи ҳуҷҷати тасдиқкунандаи мусобиқаи расмии байналмилалии варзишӣ будани мусобиқаи мазкур (нусхаи тақвими солонаи федератсияи байналмилалии варзишӣ, маълумоти тасдиқкунанда аз сомонаи расмии федератсияи байналмилалии варзишӣ, ки мусобиқаи мазкур дар он инъикос гардидааст);

- нусхаи ҳуҷҷати тасдиқкунандаи дастовард дар мусобиқаи байналмилалии варзишӣ (аз ҷумла протоколи мусобиқа, ҷадвали тасдиқкардашудаи ҷойи ишғолнамуда);

- нусхаи ҳуҷҷатҳои тасдиқкунандаи мураббии асосии варзишгар (даста) будани мураббӣ (мураббиён), аз ҷумла шартномаи байни ҷоизадор ва мураббӣ, дар рӯйхати гурӯҳи мураббӣ номнавис шудани варзишгар (даста) ва ҳуҷҷатҳои дигари тасдиқкунанда;

- нусхаи розигии хаттии мақоми ваколатдори давлатӣ дар соҳаи тарбияи ҷисмонӣ ва варзиш барои иштирок дар мусобиқаи байналмилалии варзишӣ;

- нусхаи тасдиқкунандаи унвон ва дараҷаи варзишии варзишгар.";

- банди 11 хориҷ карда шавад;

- аз банди 12 калимаҳои "дар муҳлати даҳ рӯз аз рӯзи ворид шуданашон" хориҷ карда шаванд;

- ба банди 13 ҷумлаи дуюм бо мазмуни зерин илова карда шавад:

"Қарори Комиссия бо протокол ба расмият дароварда мешавад.";

- ба банди 15 ҷумлаи дуюм бо мазмуни зерин илова карда шавад:

- "Дар ҷаласаҳои Комиссия раиси Комиссия ва дар сурати набудани ӯ яке аз муовинонаш раисӣ мекунад.";

- банди 18 дар таҳрири зерин ифода карда шавад:

"18. Ба ғолибон ва ҷоизадорони мусобиқаҳои байналмилалии варзишӣ (инчунин мураббӣ оид ба намудҳои бозиҳои даставии варзиш) байни наврасону ҷавонон 25 фоиз андозаи ҷоиза пардохт карда мешавад. Ба мураббӣ дар намудҳои инфиродӣ ва даставии варзиш 20 фоиз андозаи ҷоиза, ки ба варзишгар муқаррар гардидааст, пардохт карда мешавад.";

- банди 19 хориҷ карда шавад.

3. Замимаи 2 "Ҳайати Комиссияи мукофотпулиҳои ҷоизаи Президенти Ҷумҳурии Тоҷикистон ба ғолибон ва ҷоизадорони мусобиқаҳои байналмилалии варзишӣ", ки бо қарори Ҳукумати Ҷумҳурии Тоҷикистон аз 1 августи соли 2015, № 493 "Дар бораи татбиқи фармони Президенти Ҷумҳурии Тоҷикистон аз 9 январи соли 2015, № 328" тасдиқ шудааст, дар таҳрири нав тасдиқ карда шавад (замима мегардад).

4. Ба замимаи 3 "Меъёрҳои талабот ва андозаи мукофотпулиҳои ҷоизаи Президенти Ҷумҳурии Тоҷикистон ба ғолибон ва ҷоизадорони мусобиқаҳои байналмилалии варзишӣ", ки бо қарори Ҳукумати Ҷумҳурии Тоҷикистон аз 1 августи соли 2015, № 493 "Дар бораи татбиқи

фармони Президенти Ҷумҳурии Тоҷикистон аз 9 январи соли 2015, №328" тасдиқ шудааст, тағйироти зерин ворид карда шаванд:

- аз номи замима калимаи "мукофотпулиҳои" хориҷ карда шавад;

- дар сатри 3 калимаи "ғайриолимпӣ" ба калимаҳои "ғайриолимпие, ки аз ҷониби Кумитаи байналмилалии олимпӣ ва Шӯрои олимпии Осиё эътироф гардидаанд" иваз карда шавад;

- эзоҳ дар таҳрири зерин ифода карда шавад:

"Эзоҳ: Дар намудҳои даставии варзиш андозаи ҷоиза байни ҳайати даста баробар тақсим карда мешавад.

Дар намудҳои бозиҳои даставии варзиш (футбол, футболи хурд, волейбол, баскетбол, тӯби дастӣ, чавгонбозӣ, волейболи соҳилӣ, тӯббозӣ дар об) ба ҳар як узви даста (варзишгарон ва мураббиён) 50 фоизи андозаи ҷоиза дар алоҳидагӣ пардохт карда мешавад.

1 бо иштироки на кам аз 70 кишвар ва на кам аз 3 ғолибият;

2 бо иштироки на кам аз 30 кишвар ва на кам аз 3 ғолибият.".

Ҳайати Комиссияи Ҷоизаи Президенти Ҷумҳурии Тоҷикистон ба ғолибон ва ҷоизадорони мусобиқаҳои байналмилалии варзишӣ

Раиси комиссия муовини Сарвазири Ҷумҳурии Тоҷикистон (сарпарасти соҳа) Муовини раиси комиссия Сардори раёсати илму маърифати Дастгоҳи иҷроияи Президенти Ҷумҳурии Тоҷикистон

Муовини раиси комиссия Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Котиби масъули комиссия Сардори раёсати тарбияи ҷисмонӣ ва инкишофи варзиши Кумитаи кор бо ҷавонон ва варзиши назди Ҳукумати Ҷумҳурии Тоҷикистон

Аъзои комиссия:

Муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар самти варзиш;

Сардори шуъбаи кор бо дастаҳои мунтахаби Ҷумҳурии Тоҷикистон;

Ноиби Президенти Кумитаи миллии олимпии Ҷумҳурии Тоҷикистон;

Ректори Донишкадаи давлатии тарбияи ҷисмонии Тоҷикистон ба номи Саймумин Раҳимов;

Раиси Федератсияи футболи Ҷумҳурии Тоҷикистон;

Раиси Федератсияи бокси Ҷумҳурии Тоҷикистон;

Раиси Федератсиян дзюдои Ҷумҳурии Тоҷикистон;

Раиси Федератсияи гӯштини тарзи озод ва юнонӣ-румии Ҷумҳурии Тоҷикистон;

Раиси Федератсияи миллии таэкван-до ва кикбоксинги Ҷумҳурии Тоҷикистон;

Раиси Ассотсиатсияи олимичиёни Тоҷикистон;

Раиси Федератсияи самбои Ҷумҳурии Тоҷикистон.