Ҳукумати Ҷумҳурии Тоҷикистон

ҚАРОР

Дар бораи ворид намудани тағйирот ва илова ба қарори Ҳукумати Ҷумҳурии Тоҷикистон аз 2 июли соли 2008, № 307

Мутобиқи моддаи 56 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" Ҳукумати Ҷумҳурии Тоҷикистон қарор мекунад:

1. Ба Низомномаи тартиби таҳия ва бастани созишномаҳои генералӣ, соҳавӣ ва минтақавӣ дар Ҷумҳурии Тоҷикистон, ки бо қарори Ҳукумати Ҷумҳурии Тоҷикистон аз 2 июли соли 2008, № 307 "Дар бораи тасдиқи Низомномаи тартиби таҳия ва бастани созишномаҳои генералӣ, соҳавӣ ва минтақавӣ дар Ҷумҳурии Тоҷикистон" тасдиқ шудааст, тағйироти зерин ворид карда шавад:

- дар банди 8 калимаи "комиссия" ба калимаҳои "комиссияи сетарафа оид ба танзими муносибатҳои иҷтимоию меҳнатӣ дар Ҷумҳурии Тоҷикистон" иваз карда шавад;

- бандҳои 15 ва 23 дар таҳрири зерин ифода карда шаванд:

"15. Созишномаи соҳавӣ байни мақомоти дахлдори давлатӣ, иттиҳодияҳои корфармоён ва мақомоти соҳавии намояндагии кормандон баста мешавад. Созишномаи соҳавӣ равандҳои рушди иҷтимоию иқтисодии соҳа, шароити меҳнат, сатҳи шуғлнокӣ, музди меҳнат, кафолатҳои иҷтимоии кормандони соҳаро, ки масъалаҳои тарафайни сатҳи соҳавиро муайян менамоянд, муқаррар месозад.

23. Созишномаи минтақавӣ байни мақомоти иҷроияи маҳаллии ҳокимияти давлатии дахлдор, иттиҳодияҳои корфармоён (соҳибмулкон) ва намояндагони кормандон баста мешавад. Созишномаи минтақавӣ шароити умумии меҳнат, кафолат ва имтиёзҳои меҳнатиро дар минтақаи воҳиди маъмурии ҳудудии дахлдор танзим менамояд, ки ҳангоми бастаии шартнома ба ҳисоб гирифта мешавад ва барои тарафҳо ҳатмӣ мебошад.";

- дар номи боби VI ва банди 38 "сабтиномкунии" ба калимаҳои "бақайдгирии огоҳонии" иваз карда шавад;

- дар бандҳои 35 ва 37 калимаи "сабтиномкунӣ" ба калимаҳои "бақайдгирии огоҳонӣ" иваз карда шавад;

- дар банди 36 калимаҳои "сабти ном мекунад" ба калимаҳои "ба қайд мегирад" иваз карда шаванд;

- банди 39 дар таҳрири зерин ифода карда шавад:

"39. Дастурамали тартиби бақайдгирии огоҳонии созишномаҳои соҳавӣ, минтақавӣ ва шартномаҳои коллективиро Вазорати меҳнат, муҳоҷират ва шуғли аҳолии Ҷумҳурии Тоҷикистон ва Федератсияи иттифоқҳои касабаи мустақили Тоҷикистон таҳия ва тасдиқ менамоянд.".

2. Вазорати меҳнат, муҳоҷират ва шуғли аҳолии Ҷумҳурии Тоҷикистон ва Федератсияи иттифоқҳои касабаи мустақили Тоҷикистон санадҳои меъёрии ҳуқуқии худро ба қарори мазкур мутобиқ намоянд.