Ҳукумати Ҷумҳурии Тоҷикистон

ҚАРОР

Дар бораи муқаррар намудани рақами кӯтоҳи ягонаи фаврии алоқаи "112" Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ба сифати рақами даъвати хадамоти таъҷилии огоҳисозӣ ва эътино ба ҳолатҳои фавқулодда

Мутобиқи моддаҳои 32, 33 ва 35 Қонуни Ҷумҳурии Тоҷикистон "Дар бораи алоқаи барқӣ", моддаи 51 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" ва бо мақсади пешгирӣ намудани ҳолатҳои фавқулодда ва эътинои саривақтӣ ба вазъиятҳои ногаҳонӣ ва ҳолатҳои фавқулодда, Ҳукумати Ҷумҳурии Тоҷикистон қарор мекунад:

1. Рақами кӯтоҳи ягонаи фаврии алоқаи "112" Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ҳамчун рақами даъвати хадамоти таъҷилии огоҳисозӣ ва эътино ба ҳолатҳои фавқулодда муқаррар карда шавад.

2. Низомнома дар бораи низоми таъмини даъвати хадамотҳои таъҷилӣ ва эътино ба ҳолатҳои фавқулодда бо рақами кӯтоҳи яюнаи фаврии алоқаи "112" Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон тасдиқ карда шавад (замима мегардад).

3. Операторони хизматрасонии алоқаи барқӣ (маҳаллӣ ва мобилӣ) баромадро ба рақами даъвати хадамоти таъҷилии огоҳсозӣ ва эътино ба ҳолатҳои фавқулодда "112" ройгон таъмин намоянд.

4. Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон тавассути воситаҳои ахбори омма дар бораи рақами кӯтоҳи ягонаи фаврии алоқаи "112" ба аҳолии Тоҷикистон маълумот диҳад ва қабули муроҷиатҳои шахсони воқеиро тариқи занги телефолӣ ба рақами кӯтоҳи ягонаи фаврии алоқаи "112" таъмин намуда, сари вақт чораҳои дахлдорро ҷиҳати огоҳсозӣ ва эътино ба ҳолатҳои фавқулодда андешад.

5. Хадамоти алоқаи назди Ҳукумати Ҷумҳурии Тоҷикистон иҷрои банди 3 қарори мазкурро таъмин намояд.

6. Қарори Ҳукумати Ҷумҳурии Тоҷикистон аз 30 августи соли 2011, № 434 "Дар бораи муқаррар намудани рақами кӯтоҳи фаврии алоқаи "111"-и Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ба сифати рақами даъвати хадамоти таъҷилии пешгирӣ ва эътино ба ҳолатҳои фавқулодда ва баромади ройгон ба он" аз эътибор соқит дониста шавад.