Ҳукумати Ҷумҳурии Тоҷикистон

ҚАРОР

Дар бораи масъалаҳои Ҷамъияти саҳомии кушодаи "Сементи Тоҷик"

Мутобиқи моддаи 14 Қонуни конститутсионии Ҷумҳурии Тоҷикистон "Дар бораи Ҳукумати Ҷумҳурии Тоҷикистон", моддаҳои 63 ва 64 Қонуни Ҷумҳурии Тоҷикистон "Дар бораи ҷамъиятҳои саҳомӣ", моддаҳои 21 ва 42 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" Ҳукумати Ҷумҳурии Тоҷикистон қарор мекунад:

1. Шӯрои нозирони Ҷамъияти саҳомии кушодаи "Сементи Тоҷик" таъсис дода шуда, Низомнома ва Ҳайати Шӯрои нозирони он тасдиқ карда шаванд (замимаҳои 1 ва 2).

2. Ба қарори Ҳукумати Ҷумҳурии Тоҷикистон аз 2 декабри соли 2008, № 603 "Дар бораи тасдиқи Оинномаи Ҷамъияти саҳомии кушодаи Тоҷиксемент" тағйиру иловаҳои зерин ворид карда шаванд:

- дар ном ва матни қарор ва Оиннома калимаи "Тоҷиксемент" ба калимаҳои "Сементи Тоҷик" иваз карда шаванд;

- дар матни Оиннома калимаҳои "Шӯрои директорон" ба калимаҳои "Шӯрои нозирон" иваз карда шаванд; ба боби 7 Оиннома бандҳои зерин илова карда шаванд:

"7.2. Фонди захиравии Ҷамъият ҳангоми мавҷуд набудани дигар маблағҳо барои пӯшонидани зарари молиявии он, пардохти вомбаргҳои (облигатсияҳои) Ҷамъият ва харидории саҳмияҳои Ҷамъият истифода мегардад.

7.3. Истифодабарии Фонди захиравии Ҷамъият ба мақсадҳои дигар манъ аст.

7.4. Ҷамъият метавонад бо тартиби муқаррарнамудаи қонунгузории Ҷумҳурии Тоҷикистон фондҳои дигарро, ки фаъолияти молиявию хоҷагидории онро таъмин менамоянд, таъсис диҳад.

7.5. Манбаъҳои ташаккулёбии молу мулки Ҷамъият инҳо мебошанд:

- молу мулки аз Муассис гирифташуда;

- молу мулки аз ҳисоби маблағҳои Ҷамъият харидоригардида;

- кӯмакҳои молиявии бебозгашт ва хайриявии ташкилотҳои гуногун;

- дигар сарчашмаҳое, ки қонунгузории Ҷумҳурии Тоҷикистон иҷозат додааст.";

- ба банди 9.2. Оиннома сархати нав бо мазмуни зайл илова карда шавад:

"- ба вазифа таъин ва аз вазифа озод намудани Директори генералии Ҷамъият;";

- пас аз сархати дуюми банди 11.1. Оиннома сархатҳои зерин илова карда шаванд:

"- таъин ва озод намудани котиби иттиҳодиявии Ҷамъият;

- тасдиқи Низомнома дар бораи котиби иттиҳодиявии Ҷамъият, ки фаъолияти котиби иттиҳодиявиро муайян менамояд;

- тасдиқи сохтори идоракунии мақоми иҷроияи Ҷамъият;

- баррасии ҳисоботҳои Директори генералӣ дар бораи фаъолияти Ҷамъият (аз ҷумла дар бораи аз ҷониби ӯ иҷро намудани ӯҳдадориҳои вазифавӣ), дар бораи иҷрои қарорҳои Маҷлиси умумии саҳмдорон ва Шӯрои нозирони Ҷамъият;

- тасдиқ намудани тартиби ҳамкории Ҷамъият бо ташкилотҳое, ки дар онҳо Ҷамъият иштирок менамояд;

- таъсиси мақомоти идоракунии Ҷамъият, тасдиқи низомномаҳои онҳо, пеш аз мӯҳлат қатъ намудани ваколатҳои онҳо";

- ба боби 11 Оинномаи Ҷамъият бандҳои зерин илова карда шаванд:

"11.2. Масъалаҳои марбут ба салоҳияти Шӯрои нозирони Ҷамъиятро ба зиммаи мақоми иҷроияи Ҷамъият гузоштан мумкин нест.

11.3. Аъзои Шӯрои нозирони Ҷамъият ҳангоми амалӣ намудани ҳуқуқу ӯҳдадорӣ ва иҷрои вазифаҳо бояд ба манфиати Ҷамъият фаъолият намуда, амалигардонии ҳуқуқ, вазифа ва ӯҳдадориҳои худро нисбат ба Ҷамъият содиқонаву софдилона ва оқилона анҷом диҳанд.

11.4. Аъзои Шӯрои нозирони Ҷамъият барои фаъолияти самараноки Ҷамъият ҷавобгар мебошанд.

11.5. Аъзои Шӯрои нозирон барои қарори ба Ҷамъият зарароварда, ки зидди он овоз додаанд, ҷавобгар нестанд.";

- дар банди 12.1. пеш аз рақам ва калимаи "7 (ҳафт)" калимаҳои "на камтар аз" илова карда шаванд.