Тартиби индексатсияи нафақаҳо ва сармояи шартии нафақавӣ

1. МУҚАРРАРОТИ УМУМӢ

1. Тартиби мазкур мутобиқи қисми 3 моддаи 51 Қонуни Ҷумҳурии Тоҷикистон "Дар бораи нафақаҳои суғуртавӣ ва давлатӣ" таҳия гардида, тартиби индексатсияи қисми суғуртавии нафақаҳои суғуртавӣ, нафақаҳои меҳнатӣ (бе назардошти иловапулию пардохтҳои иловагӣ) ва сармояи шартии нафақавии шахсони суғурташударо муайян менамояд,

2. Барои индексатсияҳои нафақаҳо ва сармояи шартии нафақавӣ нишондиҳандаҳои мақоми ваколатдори давлатӣ оид ба омор, ки дар нашрияҳои расмӣ интишор мегарданд, истифода карда мешаванд.

3. Индексатсияи нафақаҳо ва сармояи шартии нафақавӣ аз ҷониби сохтори дахлдори мақоми ваколатдори давлатӣ дар соҳаи таъминоти нафақа амалӣ карда мешавад.

4. Маблағгузории хароҷот барои гузаронидани индексатсияи қисми суғуртавии нафақаҳои суғуртавӣ, нафақаҳои меҳнатӣ ва сармояи шартии нафақавӣ аз ҳисоби маблағҳои мақоми ваколатдори давлатӣ дар соҳаи таъминоти нафақа анҷом дода мешавад.

5. Индексатсияи нафақаҳо, сармояи шартии нафақавӣ ва муайян намудани фоизи индексатсия дар асоси Фармони Президенти Ҷумҳурии Тоҷикистон амалӣ карда мешавад.

2. ТАРТИБИ ИНДЕКСАТСИЯИ НАФАҚАҲО

6. Индексатсияи қисми суғуртавии нафақаҳои суғуртавӣ ва нафақаҳои меҳнатӣ ҳар сол як маротиба мутобиқи сатҳи индекси нархҳои истеъмолӣ дар ҷумҳурӣ дар соли молиявии гузашта амалӣ карда мешавад.

7. Индексатсияи нафақаҳои меҳнатӣ аз соли 2018 шурӯъ карда мешавад.

8. Индексатсияи қисми суғуртавии нафақаҳои суғуртавӣ ва нафақаҳои меҳнатӣ нисбати он нафақаҳое татбиқ карда мешавад, ки андозаи онҳо камтар аз 15 карати андозаи нафақаи заминавии муқарраршударо ташкил менамояд.

3. ТАРТИБИ ИНДЕКСАТСИЯИ САРМОЯИ ШАРТИИ НАФАҚАВӢ

9. Сармояи шартии нафақавии шахсони суғурташуда, ки дар суратҳисоби инфиродии онҳо инъикос ёфтааст, ҳар сол як маротиба индексатсия карда мешавад.

10. Индексатсияи сармояи шартии нафақавии дар давраи аз 1 январи соли 1999 то 1 январи соли 2013 ташаккулёфта мувофиқи нишондиҳандаи сатҳи афзоиши солонаи музди миёнаи меҳнат дар ҷумҳурӣ, ки аз рӯи маълумоти мақоми ваколатдори давлатӣ оид ба омор дар ҷадвали зерин оварда шудааст, амалӣ карда мешавад:

Ниг.ба Ҷадвал

11. Индексатсияи сармояи шартии нафақавии дар давраи аз 1 январи соли 1999 то 1 январи соли 2013 ташаккулёфта аз оғози соли 2014 мутобиқи сатҳи солонаи индекси нархҳои истеъмолӣ амалӣ карда мешавад.

12. Сармояи шартии нафақавие, ки дар натиҷаи конвертатсияи (бадалкунии) ҳуқуқҳои нафақавии шахсони суғурташуда барои давраи то 1 январи соли 1999 муайян карда шудааст, ба ҳолати 1 январи соли 2013 дар суратҳисоби инфиродии онҳо инъикос карда мешавад.

13. Саҳмҳои нафақавие, ки дар давоми соли муроҷиат барои таъини нафақаи суғуртавӣ ба суратҳисоби инфиродии шахсони суғурташуда ворид гардидаанд, индексатсия карда намешаванд ва дар вақти ҳисоби нафақа маблағи воқеӣ ба инобат гирифта мешавад.

14. Индексатсияи сармояи шартии нафақавие, ки баъди 1 январи соли 2013 ба суратҳисоби инфиродии шахсони суғурташуда ворид гардидааст, инчунин сармояи шартии нафақавии дар натиҷаи конвертатсияи (бадалкунии) ҳуқуқҳои нафақавии онҳо бадастомада аз соли 2014 сар карда, ҳар сол дар асоси сатҳи солонаи индекси нархҳои истеъмолӣ дар ҷумҳурӣ амалӣ карда мешавад.

15. Сармояи шартии нафақавии дар натиҷаи конвертатсияи (бадалкунии) ҳуқуқҳои нафақавии шахси суғурташуда муайяншуда аз соли 2014 сар карда, ҳар сол бо тартиби пешбининамудаи мисоли шартии индексатсияи сармояи шартии нафақавии шахси суғурташудаи Тартиби мазкур индексатсия карда мешавад (қарори Ҳукумати ҶТ аз 29.08.2017 № 421).

16. Мисоли шартии индексатсияи сармояи шартии нафақавии шахси суғурташуда ба Тартиби мазкур замима карда мешавад.

4. МАСЪУЛИЯТ ВА НАЗОРАТ АЗ РӯИ ДУРУСТ АМАЛӢ НАМУДАНИ ИНДЕКСАТСИЯИ САРМОЯИ ШАРТИИ НАФАҚАВӢ ВА НАФАҚАҲО

17. Барои амалӣ намудани индексатсияи нафақаҳо ва сармояи шартии нафақавӣ ва риояи талаботи Тартиби мазкур мақоми ваколатдори давлатӣ дар соҳаи таъминоти нафақа ва сохторҳои дахлдори он дар маҳалҳо масъул мебошанд.

18. Назорат аз рӯи дуруст амалӣ намудани индексатсияи нафақаҳо ва сармояи шартии нафақавии шахсони суғурташуда аз ҷониби воҳидҳои сохтории дахлдори мақоми ваколатдори давлатӣ дар соҳаи таъминоти нафақа ва дигар мақомоти давлатӣ, ки тибқи қонунгузории Ҷумҳурии Тоҷикистон ваколатдор мебошанд, амалӣ карда мешавад.

Замима