Ҳукумати Ҷумҳурии Тоҷикистон

ҚАРОР

Дар бораи масъалаҳои Ҷамъияти саҳомии кушодаи "Тоҷиктрансгаз"

Мутобиқи моддаҳои 44 ва 45 Қонуни Ҷумҳурии Тоҷикистон "Дар бораи ҷамъиятҳои саҳомӣ" ва моддаи 42 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" Ҳукумати Ҷумҳурии Тоҷикистон қарормекунад:

1. Низомномаи Шӯрои нозирони Ҷамъияти саҳомии кушодаи "Тоҷиктрансгаз" ва ҳайати Шӯрои нозирони Ҷамъияти саҳомии кушодаи "Тоҷиктрансгаз" тасдиқ карда шаванд (замимаҳои 1 ва 2).

2. Ба Оинномаи Ҷамъияти саҳомии кушодаи "Тоҷиктрансгаз", ки бо қарори Ҳукумати Ҷумҳурии Тоҷикистон аз 29 апрели соли 2009, № 256 тасдиқ шудааст, тағйиру иловаҳои зерин ворид карда шаванд:

- дар тамоми матни Оиннома калимаҳои "Шӯрои директорони", "Шӯрои директорон" мувофиқан ба калимаҳои "Шӯрои нозирони", "Шӯрои нозирон" иваз карда шаванд;

ба банди 9.2. Оиннома сархати шашум бо мазмуни зайл илова карда шавад:

"- ба вазифа таъин ва аз вазифа озод намудани Директори генералии Ҷамъият;";

- пас аз сархати дуюми банди 11.1. Оиннома сархатҳои зерин илова карда шаванд:

"- таъин ва озод намудани Котиби корпоративии Ҷамъият;

- тасдиқи Низомнома дар бораи Котиби корпоративии Ҷамъият, ки фаъолияти Котиби корпоративиро муайян менамояд;

- тасдиқи сохтори идоракунии мақоми иҷроияи Ҷамъият;

- баррасии ҳисоботҳои Директори генералӣ оид ба фаъолияти Ҷамъият, дар бораи иҷрои қарорҳои Маҷлиси умумии саҳмдорон ва Шӯрои нозирони Ҷамъият;

- тасдиқ намудани тартиби ҳамкории Ҷамъият бо ташкилотҳое, ки дар фаъолияти онҳо Ҷамъият иштирок менамояд;

- таъсиси мақомоти идоракунии Ҷамъият, тасдиқи низомномаҳои онҳо, пеш аз мӯҳлат қатъ намудани ваколатҳои онҳо;";

- ба боби 11 Оиннома бандҳои зерин илова карда шаванд:

"11.2. Масъалаҳои марбут ба салоҳияти Шӯрои нозирони Ҷамъиятро ба зиммаи мақоми иҷроияи Ҷамъият гузоштан манъ аст.

11.3. Аъзои Шӯрои нозирони Ҷамъият ҳангоми амалӣ намудани ҳуқуқу ӯҳдадорӣ ва иҷрои вазифаҳо бояд ба манфиати Ҷамъият амал намуда, ҳуқуқ, вазифа ва ӯҳдадориҳои худро дар муносибат ба Ҷамъият содиқонаву софдилона ва оқилона анҷом диҳад.";

- дар банди 12.1. пеш аз калимаҳои "7 (ҳафт)" калимаҳои "на камтар аз" илова карда шаванд.