Ҳукумати Ҷумҳурии Тоҷикистон

ҚАРОР

Дар бораи масъалаҳои ҷорӣ намудани системаи ягонаи бақайдгирии давлатии молу мулки ғайриманқул ва ҳуқуқҳо ба он

Мутобиқи моддаи 68 Қонуни Ҷумҳурии Тоҷикистон "Дар бораи бақайдгирии давлатии молу мулки ғайриманқул ва ҳуқуққо ба он", моддаҳои 42 ва 51 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" Ҳукумати Ҷумҳурии Тоҷикистон қарор мекунад:

1. Давраи гузариш то амалисозии фаъолияти ташкилотҳои бақайдгирии давлатии молу мулки ғайриманқул ва ҳуқуқҳо ба он дар ҳудуди Ҷумҳурии Тоҷикистон аз 1 июли соли 2015 бо давомнокии 6 моҳ муқаррар карда шавад.

2. Дар давраи гузариш воҳидҳои марзию маъмурии зерини Ҷумҳурии Тоҷикистон шаҳру ноҳияҳои пилотӣ муайян карда шаванд:

- шаҳри Хоруғи Вилояти Мухтори Кӯҳистони Бадахшон;

- шаҳри Хуҷанди вилояти Суғд;

- шаҳри Истаравшани вилояти Суғд;

- шаҳри Кӯлоби вилояти Хатлон;

- ноҳияи Бохтари вилояти Хатлон;

- ноҳияи Ҳисор;

- ноҳияи Рашт.

3. Кумитаи давлатии идораи замин ва геодезии Ҷумҳурии Тоҷикистон:

- то оғози фаъолияти ташкилотҳои бақайдгирии давлатӣ дар шаҳру ноҳияҳои пилотӣ дар доираи салоҳияти худ санадҳои меъёрии ҳуқуқӣ оид ба бақайдгирии давлатии молу мулки ғайриманқул ва ҳуқуққо ба онро таҳия ва тасдиқ намуда, бо тартиби муқарраргардида онҳоро аз қайди давлатӣ гузаронад;

- дар ҳолатҳои зарурӣ ҷиҳати такмили санадҳои меъёрии ҳуқуқии Ҷумҳурии Тоҷикистон ба Ҳукумати Ҷумҳурии Тоҷикистон таклифҳо пешниҳод намояд.

4. Корхонаи воҳиди давлатии "Бақайдгирии молу мулки ғайриманқул":

- нақшаи чорабиниҳо оид ба амалӣ намудани системаи ягонаи бақайдгирии давлатии молу мулки ғайриманқул ва ҳуқуқҳо ба онро дар шаҳру ноҳияҳои пилотӣ таҳия ва тасдиқ намуда, иҷрои онро таъмин намояд;

- то оғози амалисозии бақайдгирии давлатӣ дар шаҳру ноҳияҳои пилотӣ корхонаҳои давлатии фаръии "Бақайдгирии молу мулки ғайриманқул"-ро бо ҳуҷҷатҳои феҳристи ягонаи молу мулки ғайриманқул таъмин намояд;

- дурустии амалиёти анҷомдиҳии бақайдгирии давлатии молу мулки ғайриманқулро назорат барад;

- гузаронидани чорабиниҳои иттилоотиро ҷиҳати фаҳмондадиҳии Қонуни Ҷумҳурии Тоҷикистон "Дар бораи бақайдгирии давлатии молу мулки ғайриманқул ва ҳуқуқҳо ба он" амалӣ намояд.

5. Вазоратҳои адлия ва корҳои дохилии Ҷумҳурии Тоҷикистон, мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳо ва шаҳру ноҳияҳои тобеи ҷумҳурӣ барои ҷорӣ намудани системаи ягонаи давлатии бақайдгирии давлатии молу мулки ғайриманқул дар шаҳру ноҳияҳои пилотӣ ҳамаҷониба мусоидат намоянд.

6. Дар банди 4 Низомномаи Кумитаи давлатии идораи замин ва геодезии Ҷумҳурии Тоҷикистон, ки бо қарори Ҳукумати Ҷумҳурии Тоҷикистон аз 3 майи соли 2010, № 225 тасдиқ шудааст, пас аз сархати сию шашум сархатҳои нав бо мазмуни зайл илова карда шаванд:

"- тасдиқ намудани тартиби додан, иваз намудан ва аз эътибор соқит намудани Сертификати ҳуқуқи истифодаи замин, Шаҳодатнома оид ба бақайдгирии давлатӣ ва Шаҳодатномаи саҳми замин;

- тасдиқ намудани шакли шартномаи иҷораи қитъаи замин.".

7. Аз 1 январи соли 2016 системаи ягонаи бақайдгирии давлатии молу мулки ғайриманқул ва ҳуқуқҳо ба он дар тамоми шаҳру ноҳияҳои Ҷумҳурии Тоҷикистон ҷорӣ карда шавад.

8. Аз 1 январи соли 2016 аз эътибор соқит дониста шаванд:

- қарори Ҳукумати Ҷумҳурии Тоҷикистон аз 27 июли соли 1998, № 244 "Дар бораи тадбирҳои иҷрои Фармони Президенти Ҷумҳурии Тоҷикистон "Дар бораи ба амал баровардани ҳуқуқи истифодаи замин";

- қарори Ҳукумати Ҷумҳурии Тоҷикистон аз 2 июли соли 2009, № 374 "Дар бораи тасдиқи Қоидаҳои тартиби барасмиятдарорӣ, додан, бақайдгирӣ, иваз намудан ва аз эътибор соқит намудани Сертификати ҳуқуқи истифодаи замин ва Шаҳодатномаи саҳми замин";

- банди 3 қарори Ҳукумати Ҷумҳурии Тоҷикистон аз 27 феврали соли 2010, № 105 "Дар бораи ворид намудани тағйирот ба баъзе қарорҳои Ҳукумати Ҷумҳурии Тоҷикистон";

- қарори Ҳукумати Ҷумҳурии Тоҷикистон аз 1 июли соли 2011, № 341 "Дар бораи ворид намудани тағйиру иловаҳо ба қарори Ҳукумати Ҷумҳурии Тоҷикистон аз 2 июли соли 2009, №374".