Ҳукумати Ҷумҳурии Тоҷикистон

ҚАРОР

Дар бораи Тартиб ва Андозаи пардохти хизматрасониҳои иловагии музднок ба шахсони воқеӣ ва ҳуқуқӣ дар мақомоти сабти асноди ҳолати шаҳрвандии Вазорати адлияи Ҷумҳурии Тоҷикистон ва дигар шахсони ваколатдор

Мутобиқи моддаи 12 Қонуни Ҷумҳурии Тоҷикистон "Дар бораи бақайдгирии давлатии асноди ҳолати шаҳрвандӣ" ва моддаи 51 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" Ҳукумати Ҷумҳурии Тоҷикистон қарор мекунад:

1. Тартиб ва Андозаи пардохти хизматрасониҳои иловагии музднок ба шахсони воқеӣ ва ҳуқуқӣ дар мақомоти сабти асноди ҳолати шаҳрвандии Вазорати адлияи Ҷумҳурии Тоҷикистон ва дигар шахсони ваколатдор тасдиқ карда шаванд (замимаҳои 1 ва 2).

2. Қарори Девони Вазирони Ҷумҳурии Тоҷикистон аз 12 ноябри соли 1991, № 346 "Дар бораи ба шароитҳои иқтисодии нави корӣ оид ба расонидани хизматҳои иловагии пулакӣ гузаронидани мақомоти қайди актҳои ҳолати граждании Ҷумҳурии Тоҷикистон" аз эътибор соқит дониста шавад.

3. Вазорати адлияи Ҷумҳурии Тоҷикистон санадҳои худро ба қарори мазкур мутобиқ намояд.