Ҳукумати Ҷумҳурии Тоҷикистон
ҚАРОР
Дар бораи Номгӯи намудҳои хизмати бамузди байторӣ дар Ҷумҳурии Тоҷикистон ва Тартиби расонидани хизмати бамузди байторӣ дар Ҷумҳурии Тоҷикистон
Мутобиқи моддаи 37 Қонуни Ҷумҳурии Тоҷикистон "Дар бораи байторӣ" ва моддаи 51 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" Ҳукумати Ҷумҳурии Тоҷикистон қарор мекунад:
1. Номгӯи намудҳои хизмати бамузди байторӣ дар Ҷумҳурии Тоҷикистон тасдиқ карда шавад (замимаи 1).
2. Тартиби хизматрасонии бамузди байторӣ дар Ҷумҳурии Тоҷикистон тасдиқ карда шавад (замимаи 2).
3. Қарори Ҳукумати Ҷумҳурии Тоҷикистон аз 30 марти соли 2010, № 180 "Дар бораи тасдиқи Номгӯи намудҳои хизмати пулакии байторӣ ва тартиби расонидани хизмати пулакии байторӣ дар Ҷумҳурии Тоҷикистон" аз эътибор соқит дониста шавад.
Раиси
Ҳукумати Ҷумҳурии Тоҷикистон Эмомалӣ Раҳмон
аз 26 феврали соли 2015 № 66
ш. Душанбе
Замимаи 1
Бо қарори Ҳукумати
Ҷумхурии Тоҷикистон
аз 26 феврали соли 2015, № 66
тасдиқ шудааст
Номгӯи намудҳои хизмати бамузди байторӣ дар Ҷумҳурии Тоҷикистон
1. Дар озмоишгоҳҳои байторию санитарии бозорҳои истеъмолии ҷумҳурӣ ва нуқтаҳои фурӯши маҳсулоти кишоварзӣ:
а) ташхиси озмоишии:
- гӯшт;
- шир ва маҳсулотҳои ширӣ;
- равғани растанӣ;
- моҳӣ, тухм, асал;
- маҳсулоти намаккарда;
- мева ва буттамеваҳои тару тоза, хушконида ва консерва кардашуда;
- полезиҳо.
2. Стансияҳои мубориза алайҳи бемориҳои ҳайвоноти дар вилоятҳо, шаҳр ва ноҳияҳои ҷумҳурӣ:
а) бақайдгирии (нишонагузории) чорво ва муоинаи клиникӣ;
б) додани шаҳодатномаи байторӣ ва маълумотномаи пеш аз забҳи чорво, ба истиснои субъектҳои соҳибкорӣ;
в) бурида партофтани дум, суфраи гӯши сагҳо, чоки қайсар ва Ҷарроҳии ҳайвонот;
г) ахтакунии чорво;
ғ) ваксинатсияи чорво (эмгузаронӣ);
д) терапия (муолиҷаи бемориҳои дарунӣ):
- заъф ва тимпанияи ҳазорхона, бемориҳои тӯрхалта ва ширдон;
- бемориҳои роҳҳои нафас ва қафаси сина;
- эндометритҳо;
- пистондарди чорвои кишоварзӣ (маститҳо);
- гастроэнтеритҳо, заҳролудшавӣ;
- дегелминтизатсия бар зидди бемориҳои ангалӣ ва ғайра.
е) чорабиниҳои байторию санитарӣ:
- дезинфексия;
- дезинсексия;
- дерратизатсия;
- дезинвазия;
- санатсия;
- оббозидоронии ҳайвонот.
ё) аттестатсияи байторию саштарии шароити истеҳсолии шахсони воқеӣ ва ҳуқуқӣ, ки ба забҳи ҳайвонот, истеҳсол, коркард, нигоҳдорӣ, фурӯши маҳсулот ва ашёи хоми аз ҳайвонот истеҳсолшаванда машғул мебошанд, ба истиснои субъектҳои соҳибкорӣ.
3. Маркази назорати давлатии маводи байторӣ:
а) санҷиши маводи байторӣ, биологӣ ва воситаҳои табобатии истеҳсоли ватанӣ ва хориҷӣ, ки дар Ҷумҳурии Тоҷикистон ба қайди давлатӣ гирифта мешаванд.
б) аттестатсияи муассиса, корхона ва шахсони воқеӣ, ки ба фаъолияти дорусозӣ, таъминоти доруворӣ, фурӯши дорувории байторӣ дар Ҷумҳурии Тоҷикистон машғул мебошанд.
4. Маркази миллии ташхиси байторӣ:
а) ташхиси маводи ғизоӣ;
б) гузаронидани аттестатсияи марказҳои ташхиси байтории вилоятӣ, байни ноҳиявӣ, ноҳиявӣ, озмоишгоҳҳои ташхиси байторию санитарӣ дар бозорҳо, озмоишгоҳҳои корхонаҳои коркарди маҳсулоти чорво, хӯрокаи чорво ва мутахассисони онҳо;
в) ташхис ва сертификатсияи хӯроки чорво ва хӯрокиҳои ба онҳо иловашаванда;
г) тибқи талаботи Созмони Умумиҷаҳонии Савдо ва Бюрои Байналмилалии Эпизоотӣ ташхиси бехатарии борҳои таҳти назорати байторӣ қарордоштае, ки ба қаламрави Ҷумҳурии Тоҷикистон ворид карда мешаванд.
д) ташхиси бактериологӣ;
е) ташхиси бемориҳои вирусии ҳайвонот;
ж) ташхиси серологӣ;
з) ташхиси ангалӣ (паразитологӣ):
и) ташхиси биокимиёвӣ, микологӣ ва кимиёвию заҳрнокӣ;
к) муоинаи озмоишии сабаби заҳролудшавии ҳайвонот;
л) ташхиси хромотографӣ;
м) ташхисҳои радиобиологӣ;
н) ташхиси хок оиди барангезандаҳои бемориҳои сироятӣ ва сифати дезинфексия;
о) нобудсозии (сӯзонидани) маводи амрозӣ.
5. Раёсати назорати давлатии байторӣ дар сарҳади давлатӣ ва нақлиёт:
- назорати байторию санитарии воридот ва содироти борҳои таҳти назорати байторӣ қарор дошта;
назорати байторӣ дар вақти азназаргузаронии борҳо (контейнерҳо, вагонҳо, автомобилҳо ва ғайра);
- машваратдиҳӣ оид ба риояи талаботи байторӣ аз ҷониби шахсони ҳуқуқӣ ва воқеӣ, ки ба воридот ва содироти борҳои таҳти назорати байторӣ қарордошта машғуланд;
гирифтани намунаҳои борҳои таҳти назорати байторӣ қарордошта барои ташхиси озмоишгоҳӣ;
муоинаи клиникии ҳайвоноти ба Ҷумҳурии Тоҷикистон воридшаванда ё аз он хориҷшаванда;
- барасмиятдарории ҳуҷҷатҳои байторӣ ҳангоми воридоти (содироти) борҳои таҳти назорати байтории Ҷумҳурии Тоҷикистон қарордошта;
- коркарди байторию санитарии воситаҳои нақлиёт ва чорабиниҳои дезинфексионӣ;
6. Маркази ҷумҳуриявии зиддиэпизоотӣ:
а) солимгардонии хоҷагиҳо аз бемориҳои сироятӣ:
- дезинфексия;
- дезинсексия;
- дерратизатсия;
- дезинвазия;
- санатсия;
б) гузаронидани машварат ва додани дастур дуруст ба роҳ мондани фаъолияти корӣ ва коргузории ветеринарӣ дар стансияҳои мубориза алайҳи бемориҳои ҳайвоноти шаҳру ноҳияҳо ва раёсатҳои назорати давлатии байтории Вилояти Мухтори Кӯҳистони Бадахшон, вилоятҳо ва шаҳру ноҳияҳои ҷумҳурӣ.
7. Взводи махсуси назорати карантинӣ:
- гузаронидани дезинфексияи биноҳои чорводорӣ, ҳудуди фермаҳо ва нақлиёт дар минтақаҳои карантинӣ;
- гузаронидани дезинфексия ва дезинсексияи биноҳо, ҳудуд, таҷҳизот ва нақлиёти корхонаҳои коркард ва нигохдории маҳсулоти чорводорӣ;
8. Хадамоти назорати давлатии байторӣ:
а) хизматҳои бамузди байторӣ ҳангоми бақайдгирии давлатии доруҳои байтории биологӣ ва воситаҳои табобатии истеҳсоли ватанӣ ва хориҷӣ дар Ҷумҳурии Тоҷикистон;
б) аккредитатсияи корхонаҳои ватанию хориҷӣ, шахсони воқеӣ ва ҳуқуқӣ, ки ба қаламрави Ҷумҳурии Тоҷикистон борҳои таҳти назорати байторӣ қарордоштаро ворид (содир) менамоянд;
в) гузаронидани аттестатсияи байторию санитарии шароити истеҳсолии шахсони воқеӣ ва ҳуқуқӣ, ки ба Ҷумҳурии Тоҷикистон борҳои таҳти назорати байторӣ қарордоштаро ворид (содир) менамоянд;
г) бақайдгирии давлатии хӯроки чорво ва хӯрокиҳои ба он иловашавандаи истеҳсоли ватанӣ ва хориҷӣ дар Ҷумҳурии Тоҷикистон.
Замимаи 2
Бо қарори Ҳукумати
Ҷумҳурии Тоҷикистон
аз 26 феврали соли 2015, № 66
тасдиқ шудааст
Тартиби хизматрасонии бамузди байторӣ дар Ҷумҳурии Тоҷикистон
1. Муқаррароти умумӣ
1. Тартиби мазкур мутобиқи қонунҳои Ҷумҳурии Тоҷикистон "Дар бораи байторӣ" ва "Дар бораи ҳимояи ҳуқуқи истеъмолкунандагон" таҳия гардида, қоида ва шартҳои пешниҳоди хизматрасонии муздноки байториро ба шаҳрвандон ва субъектҳои фаъолияти хоҷагидорӣ, новобаста аз шакли моликияташон - соҳибони ҳайвонот муайян мекунад.
2. Ба хизматрасонии бамузди байторӣ мансубанд:
- чорабиниҳои клиникӣ, ташхисӣ, табобатию профилактикӣ, байторию санитарӣ, терапевтӣ, ҷарроҳӣ, акушерию гинекологӣ, зиддиэпизоотӣ, санитарию гигиенӣ, эмкунӣ (фаъол ва мафъул), дезинфексия, дезинсексия, дератизатсия, дегелминтизатсия (ба истиснои 8 номгӯи бемориҳои сироятии ҳайвонот, ки ташхис ва пешгирии онҳо, ки тибқи қарори Ҳукумати Ҷумҳурии Тоҷикистон аз 3 апрели соли 2007, № 182 барои ҳамаи категорияҳо ва шаҳрвандон аз ҳисоби Буҷети давлатӣ сурат мегирад);
- муайян кардани бордорӣ ва ҳомилаи ҳамаи намудҳои чорво, гирифтан ва гузаронидани эмбрионҳо ва дигар чорабиниҳои вобаста ба зиёдшавии чорво, парранда, моҳӣ, занбӯри асал ва ҳамлу нақли онҳо;
- барасмиятдарорӣ ва додани ҳуҷҷатҳои байторӣ (шаҳодатномаи байтории гузариш, сертификатҳо, маълумотномаҳо, шиносномаҳо, шаҳодатномаи бақайдгирӣ ва ғайраҳо);
- маслиҳатҳо (машваратҳо, тавсияҳо) оид ба масъалаҳои ташхис, табобат, пешгирии ҳамаи намудҳои касалиҳо ва технологияи нигаҳдории чорво;
- додани шаҳодатномаи мутобиқати байторию санитарии шароити истеҳсолии шахсони воқеӣ ва ҳуқуқие, ки ба забҳи ҳайвонот, истеҳсол, коркард, нигоҳдорӣ, интиқол, фурӯши гӯшт, маҳсулоти гӯштӣ, ашёи хоми ҳайвонот, инчунин ба воридоту содироти чунин маҳсулот дар Ҷумҳурии Тоҷикистон машғуланд;
- аккредитатсияи корхонаҳои истеҳсоли ватанию хориҷӣ, шахсони воқеӣ ва ҳуқуқӣ, ки ба қаламрави Ҷумҳурии Тоҷикистон борҳои таҳти назорати байторӣ қарордоштаро ворид (содир) менамоянд;
- барасмиятдарории хулосаҳои байторӣ оид ба сохтмони иншооти таъиноти байторӣ; - сӯзонидан, эвтонизатсия (забҳи маҷбур) ва дигар хизматҳои байторӣ.
2. Маълумот дар бораи хизматҳои бамузди байторӣ, тартиби пур кардани шартномаҳо ва пардохти хизматрасонӣ
3. Корхонаҳо, муассиса ва ташкилотҳое, ки ҳуқуқи хизматрасонии муздноки байториро доранд, вазифадор мебошанд, ки лавҳаи дорои навиштаҷот дар бораи касб ва шакли ташкилии фаъолият, номгӯи фирмавӣ, суроға ва реҷаи кор дошта бошанд.
4. Иҷрокунанда (субъекте, ки хизмати муздноки байториро мерасонад) бояд ба истеъмолгар дар шакли аёнӣ ва дастрас оид ба хизмати байторӣ (корҳои иҷрошаванда) маълумот пешниҳод намояд. Ин маълумот бояд дар ҷои намоён гузошта шуда, хатман маълумоти зеринро дар бар гирад:
- номгӯи намудҳои асосии хизматрасониҳои муздноки байторӣ ва шаклҳои пешниҳоди онҳо;
- нархномаи хизматрасониҳои байторӣ, ки аз ҷониби мақоми ваколатдори байтории Вазорати кишоварзии Ҷумҳурии Тоҷикистон тасдиқ ва бо Хадамоти зиддиинҳисории назди Ҳукумати Ҷумҳурии Тоҷикистон мувофиқа гардидааст, бо зикри рақам ва санаи тасдиқи он;
- намунаю воситаҳои доруворӣ ва ғайра;
- воситаҳои таъиноти байторӣ, ки ҳангоми хизматрасонии муздноки байторӣ истифода мешаванд;
- намунаҳои шартномаҳо, квитансияҳо, тамғаҳо, забонхат, талонҳо ва дигар ҳуҷҷатҳои тасдиқкунандаи иҷро ва пардохти ҳаққи хизмат;
- маълумот дар бораи имтиёзҳое, ки мутобиқи қонунгузории Ҷумҳурии Тоҷикистон ба категорияи алоҳидаи истеъмолгарон (маъюбон, иштирокчиёни Ҷанги Бузурги Ватанӣ ва монанди инҳо) пешбинӣ гардидаанд;
- маълумот дар бораи маҳалли ҷойгиршавии (суроғаи ҳуқуқии) иҷрокунанда ва маҳалли ҷойгиршавии ташкилоти ваколатдор оид ба қабули арзу шикоятҳои истеъмолгарон.
3. Тартиби пешниҳоди хизматиҳои бамузди байторӣ
5. Иҷрокунанда бехатарии чорабиниҳои байториро барои саломатӣ, маҳсулнокии ҳайвонот, ҳаёт ва саломатии истеъмолкунанда ва инчунин муҳити атроф кафолат медиҳад.
б) Истеъмолкунанда вазифадор аст:
- ба иҷрокунанда бо талаби ӯ чорворо барои азназаргузаронӣ пешниҳод намояд, бетаъхир дар бораи ҳама гуна ҳодисаҳои вобаста бо фавти ногаҳонӣ ва ё касалшавии оммавии яквақтаи чорво ва ё дар бораи рафтори ғайримуқаррарии ҳайвонот хабар диҳад; - барои ҷудо нигоҳ доштани ҳайвоноти ба касалӣ гумонбар то омадани иҷрокунанда чораҳо андешад;
- фурӯши гӯшт, шир, маҳсулоти гӯштӣ ва ширӣ, тухм ва дигар маҳсулоти чорворо қатъиян баъди гузаронидани ташхиси байторию санитарӣ ва гирифтани хулосаи иҷрокунанда дар бораи хӯрданибоб будани онҳо ба роҳ монад;
- тӯшаҳои ҳайвоноти фавтида, инчунин маҳсули хӯроки забҳи хонагии ҳайвоноту паррандаро, ки барои истифода дар инсон ва ҳайвонот номусоид (маводи мусодиршаванда) барои нобудсозӣ ба гӯристони ҳайвонот расонанд;
- нигоҳдории дахлдори чорво ва хӯрокдиҳии онро мутобиқи талаботи зоогигиенӣ, инчунин гузаронидани чорабиниҳои табобатию профилактикии ҳатмиро дар мӯҳлатҳои муайяннамудаи дастурҳо, нишондодҳо, тавсияномаҳои нигаҳдории чорво таъмин намояд.
4. Қабул ва ба расмиятдарории дархостҳо барои хизматҳои бамузди байторӣ
7. Иҷрокунанда дархостҳоро барои хизматҳои бамузди байторӣ мутобиқи самти фаъолияташ қабул менамояд.
8. Хизматҳои бамузди байторӣ аз ҷониби иҷрокунанда дар асоси бастани шартнома, барасмиятдарории хизматрасонии мизоҷӣ ё додани жетон, купон, чеки хазинавӣ, квитансия ё дигар ҳуҷҷатҳои намунаашон муқарраршуда анҷом дода мешавад.
9. Иҷрокунанда вазифадор аст, ки сари вақт истеъмолкунандаро дар бораи эҳтимолан мураккабшавӣ ва тартиби чораҳои пешгирикунанда, инчунин дар бораи дигар ҳолатҳои ба иҷрокунанда вобастанабуда, ки ба сифати хизматрасонӣ таҳдид мекунанд, огоҳ намояд.
10. Агар истеъмолкунанда ба огоҳсозии саривақт ва асосноки иҷрокунанда нигоҳ накарда, чораҳои пешгирикунанда наандешад ё ҳолатро, ки ба сифати хизматрасонӣ таҳдид менамояд, бартараф насозад, иҷрокунанда ҳуқуқ дорад шартномаро бекор созад ва талофи зарари ба ӯ расонидашударо тибқи шартнома талаб намояд.
11. Агар иҷрокунанда сари вақт иатеъмолкунандаро дар бораи ҳолатҳои мураккабшавии хизматрасонӣ огоҳ ва дар ин бора дар ҳуҷҷати намунаи муқарраршуда қайд накарда бошад, вай барои хизматрасонии номуносиб мутобиқи қонунгузории Ҷумҳурии Тоҷикистон ба ҷавобгарӣ кашида мешавад.
5. Тартиб ва шакли пардохти хизматрасонӣ
12. Шакли пардохти хизматрасонӣ бо созишномаи байни истеъмолкунанда иҷрокунанда мутобиқи нархномаи хизматрасониҳои байторӣ, ки аз ҷониби мақоми ваколатдори байтории Вазорати кишоварзии Ҷумҳурии Тоҷикистон тасдиқ гардида, бо Хадамоти зиддиинҳисории назди Ҳукумати Ҷумҳурии Тоҷикистон мувофиқа шудааст муайян карда мешавад.
13. Маблағҳое, ки аз фаъолияти марбут ба хизматрасонии бамузди байторӣ ба даст оварда мешаванд, ба мақсадҳои рушди сохторҳои мақоми ваколатдори давлатии байторӣ ва ҳавасмандгардонии мутахассисон, 15% маблағ барои рушди Хадамоти назорати давлатии байторӣ тавассути системаи фондҳои рушди Хадамоти давлатии байторӣ, инҷунин 15% маблағҳои махсус бо тартиби муқарраркардаи қонунугзории Ҷумҳурии Тоҷикистон ба Буҷети давлатӣ равона карда мешаванд.
14. Аз ҳисоби маблағҳое, ки аз фаъолияти марбут ба хизматрасонии ба бамузди байтории стансияҳои мубориза алайҳи бемориҳои ҳайвоноти шаҳру ноҳияҳо ба даст оварда мешаванд, бо тартиби муқарраркардаи қонунугузории Ҷумҳурии Тоҷикистон 10% барои рушди раёсатҳои назорати давлатии байтории Вилояти Мухтори Кӯҳистони Бадахшон, вилоятҳо ва ноҳияҳои тобеи ҷумҳурӣ тавассути системаи фондҳои рушди Хадамоти давлатии байторӣ равона карда мешаванд.
15. Назорати истифодаи мақсадноки ин маблағҳо ба зиммаи Вазорати кишоварзии Ҷумҳурии Тоҷикистон гузошта мешавад.
6. Муқаррароти хотимавӣ
16. Ташкилотҳои давлатии байторӣ ӯҳдадоранд, ки баҳисобгирии оморӣ ва муҳосибавии хизматрасонии бамузди байториро пеш бурда тибқи санадҳои меъёрии ҳуқуқии амалкунанда дар мӯҳлатҳои муқарраршуда ба мақомоти дахлдор ва болоӣ ҳисобот пешниҳод намоянд.
17. Барои вайрон кардани Тартиби мазкур шахсони воқеӣ ва ҳуқуқӣ мутобиқи қонунгузории Ҷумҳурии Тоҷикистон ба ҷавобгарӣ кашида мешаванд.
