Ҳукумати Ҷумҳурии Тоҷикистон

ҚАРОР

Дар бораи Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон

Мутобиқи моддаи 12 Қонуни конститутсионии Ҷумҳурии Тоҷикистон "Дар бораи Ҳукумати Ҷумҳурии Тоҷикистон" ва ҷиҳати иҷрои Фармони Президенти Ҷумҳурии Тоҷикистон аз 19 ноябри соли 2013, № 12 "Дар бораи такмили сохтори мақомоти иҷроияи ҳокимияти давлатии Ҷумҳурии Тоҷикистон", Ҳукумати Ҷумҳурии Тоҷикистон қарор мекунад:

1. Низомномаи Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон, сохтори дастгоҳи марказӣ ва нақшаи идоракунӣ тасдиқ карда шаванд (замимаҳои 1, 2, 3).

2. Шумораи умумии кормандони Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон 861 воҳид (бе ҳайати хизматрасон), аз ҷумла шумораи кормандони дастгоҳи марказӣ 80 воҳид муқаррар карда шавад (қарори Ҳукумати ҶТ аз 31.10.2014 № 701).

3. Ба Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон иҷозат дода шавад, ки ду муовин, аз ҷумла як муовини якум ва ҳайати мушовара иборат аз 7 нафар дошта бошад.

4. Барои дастгоҳи марказии Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон лимити автомашинаҳои сабукрави хизматӣ ба миқдори 4 адад муқаррар карда шавад.

5. Идоракунии оперативии амволи Агентии давлатии суғуртаи иҷтимоӣ ва нафақаи Вазорати меҳнат ва ҳифзи иҷтимоии аҳолии Ҷумҳурии Тоҷикистон ва маблағҳои суғуртаи давлатии иҷтимоӣ ба Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон вобаста карда шавад.

6. Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон дар мӯҳлати 2 моҳ тамоми санадҳои меъёрии ҳуқуқии худро ба қарори мазкур мутобиқ намояд.

7. Қарори Ҳукумати Ҷумҳурии Тоҷикистон "Дар бораи Агентии давлатии суғуртаи иҷтимоӣ ва нафақа" аз 3 марти соли 2007, № 103 аз эътибор соқит дониста шавад.