Ҳукумати Ҷумҳурии Тоҷикистон

ҚАРОР

Дар бораи ворид намудани тағйиру иловаҳо ба қарори Ҳукумати Ҷумҳурии Тоҷикистон аз 31 январи соли 2006, № 62

Мутобиқи моддаи 42 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" Ҳукумати Ҷумҳурии Тоҷикистон қарор мекунад:

1. Дар ном ва банди 1 қарори Ҳукумати Ҷумҳурии Тоҷикистон аз 31 январи соли 2006, №62 "Дар бораи тасдиқи Қоидаҳои аз ҷониби Агентии давлатии ҳифзи иҷтимоӣ, шуғли аҳолӣ ва муҳоҷират расонидани хизматҳои машваратӣ ва кӯмаки молиявӣ ба шаҳрвандони бекоре, ки хоҳиши фаъолияти соҳибкорӣ доранд" калимаҳои "Агентии давлатии ҳифзи иҷтимоӣ, шуғли аҳолӣ ва муҳоҷират"ба калимаҳои "мақомоти давлатии шуғли аҳолӣ"ва калимаи "бекоре"ба калимаҳои "бекор ва муҳоҷирони меҳнатии ба ватан баргашта"иваз карда шаванд.

2. Ба Қоидаҳои аз ҷониби Агентии давлатии ҳифзи иҷтимоӣ, шуғли аҳолӣ ва муҳоҷират расонидани хизматҳои машваратӣ ва кӯмаки молиявӣ ба шаҳрвандони бекоре, ки хоҳиши фаъолияти соҳибкорӣ доранд, ки бо қарори Ҳукумати Ҷумҳурии Тоҷикистон аз 31 январи соли 2006, №62 тасдиқ шудааст, тағйиру иловаҳои зерин ворид карда шавад:

- дар ном ва бандҳои 1, 2, 3, 4, 5, 6, 7, 9, 10, 11, 17 ва 21 калимаҳои "Агентии давлатии ҳифзи иҷтимоӣ, шуғли аҳолӣ ва муҳоҷират"ба калимаҳои "мақомоти давлатии шуғли аҳолӣ"ва дар бандҳои 12, 13, 14, 15, 18, 23 ва 24 калимаҳои "мақомоти Агентии давлатии ҳифзи иҷтимоӣ, шуғли аҳолӣ ва муҳоҷират"ба калимаҳои "мақомоти давлатии шуғли аҳолӣ"иваз карда шаванд;

- дар бандҳои 19 ва 20 калимаҳои "мақомоти маҳаллии Агентии давлатии ҳифзи иҷтимоӣ, шуғли аҳолӣ ва муҳоҷират" ба калимаҳои "мақомоти давлатии шуғли аҳолӣ дар маҳал"иваз карда шаванд.

- дар номи Қоидаҳо калимаи "бекоре"ба калимаҳои "бекор ва муҳоҷирони меҳнатии ба ватан баргашта" иваз карда шаванд;

- дар банди 1 калимаи "бекоре" ба калимаҳои "бекор ва муҳоҷирони меҳнатии ба ватан баргашта (минбаъд - шаҳрвандони бекор)"иваз карда шаванд;

- ба банди 2 сархати нав бо мазмуни зайл илова карда шавад:

"Маблағҳои бозгаштшудаи кӯмаки молиявӣ, ки аз ҳисоби Барномаи мусоидат ба шуғли аҳолӣ барои рушди фаъолияти соҳибкории шаҳрвандони бекор дода шудаанд, дар суратҳисоби мақомоти давлатии шуғли аҳолӣ дар гардиш боқӣ монда, барои расонидани кӯмаки молиявӣ ба дигар шаҳрвандони бекор тибқи Қоидаҳои мазкур истифода бурда мешаванд";

- банди 3 дар таҳрири нав ифода карда шавад:

"Мақомоти давлатии шуғли аҳолӣ дар мувофиқа бо мақомоти ваколатдори давлатии суғуртаи иҷтимоӣ ва нафақа барои расонидани хизматҳои машваратӣ ва кӯмаки молиявӣ ба шаҳрвандони бекор дар доираи хароҷоте, ки барои татбиқи сиёсати давлатии мусоидат ба шуғли аҳолӣ равона мегарданд, маблағ пешбинӣ ва истифода менамоянд.

Вазорати меҳнат ва ҳифзи иҷтимоии аҳолии Ҷумҳурии Тоҷикистон метавонад барои амалӣ намудани чорабиниҳо ҷиҳати таъмини худиштиғолии аҳолӣ, ташкили сиёсати фаъол дар бозори меҳнат ва эҳёи фаъолияти соҳибкорӣ дар байни шаҳрвандони бекор аз ҳисоби дигар сарчашмаҳо, аз ҷумла грантҳо, барномаҳои сармоявӣ, сармоягузорони ватанӣ ва хориҷӣ ба ин самти фаъолият воситаҳои молиявиро ҷалб намояд";

- дар банди 19 калимаҳои "фавти шаҳрванди кӯмаки молиявӣ гирифта" хориҷ карда шаванд;

- бандҳои 23, 24, 25, 26 ва 27 бо мазмуни зайл илова карда шаванд:

"23. Дар сурати фавти шаҳрванде, ки аз мақомоти давлатии шуғли аҳолӣ бо мақсади рушди фаъолияти соҳибкорӣ кӯмаки молиявӣ гирифтааст, баргардонидани қарз тибқи муқаррароти Кодекси граждании Ҷумҳурии Тоҷикистон ба вориси ҳуқуқии ӯ вогузор карда мешавад.

24. Мақомоти давлатии шуғли аҳолӣ мӯҳлати бозгашти маблағи дар банди 23 пешбинишударо ба 3 сол бе таъин намудани ҷарима ва пушаймона (пеня) тамдид менамояд.

25. Ҷиҳати тамдид намудани мӯҳлати бозгашти кӯмаки молиявӣ вориси шаҳрванди фавтида бояд ба мақомоти давлатии шуғли аҳолӣ дар маҳал бо пешниҳоди ариза ва хатти вафоти шахси фавтида муроҷиат намояд.

26. Мақомоти давлатии шуғли аҳолӣ дар маҳал ҷиҳати тамдид намудани мӯҳлати бозгашти кӯмаки молиявӣ ҳуҷҷатҳои дар банди 25 зикргардида ва ҳуҷҷатҳоеро, ки дар асоси он ба шаҳрванди бекор кӯмаки молиявӣ расонида шуда буд, ба дастгоҳи марказии мақомоти давлатии шуғли аҳолӣ барои баррасӣ ирсол менамояд. Мақомоти давлатии шуғли аҳолӣ ҷиҳати тамдид намудани мӯҳлати бозгашти кӯмаки молиявии ба шаҳрванди фавтида додашуда, дар мувофиқа бо Вазорати меҳнат ва ҳифзи иҷтимоии аҳолӣ қарор қабул менамояд".

- бандҳои 23 ва 24 мутобиқан бандҳои 27 ва 28 ҳисобида шаванд.

3. Муқаррароти бандҳои 23-26 нисбати вориси ҳуқуқии шаҳрванди фавтидае низ татбиқ мегардад, ки то қабули қарори мазкур аз мақомоти давлатии шуғли аҳолӣ кӯмаки молиявӣ гирифтааст.