Ҳукумати Ҷумҳурии Тоҷикистон

Тартиби намунавии ташкил ва истифодабарии маблағҳои фонди захиравии мақомоти иҷроияи маҳаллии ҳокимияти давлатӣ

1) Мутобики моддаи 48 Қонуни Ҷумҳурии Тоҷикистон "Дар бораи молияи давлатии Ҷумҳурии Тоҷикистон" фонди захиравии мақомоти иҷроияи маҳаллии ҳокимияти давлатӣ ба андозаи 0,5 фоиз аз ҳаҷми даромади буҷети маҳаллии дахлдор ташкил шуда, ба таркиби хароҷоти он дохил карда мешавад.

2) Маблағи фонди захиравии мақомоти иҷроияи маҳаллии ҳокимияти давлатӣ бо қарори раисони Вилояти Мухтори Кӯҳистони Бадахшон, вилоятҳо, шаҳри Душанбе, шаҳру ноҳияҳо хароҷот карда шуда, аз тарафи Маҷлиси вакилони халқи дахлдор тасдиқ карда мешавад.

3) Маблағи фонди захиравии мақомоти иҷроияи маҳаллии ҳокимияти давлатй метавонад ба мақсадҳои зерин равона гардад:

- хароҷот барои тараққиёт ва ободонии вилоятҳо, шаҳру ноҳияҳо, ҷамоатҳо ва дигар марказҳои деҳот;

- барои таъмири асосӣ, хариди таҷҳизот, инвентар ва таъмин намудани муассисаҳои фарҳангию иҷтимоии вилоятҳо, шаҳру ноҳияҳо ва ҷамоатҳо бо таҷҳизоти техникӣ;

- расонидани кӯмаки яквақта ба маъюбони Ҷанги Бузурги Ватанӣ ва шахсони ба онҳо баробаркардашуда, ба собиқадорони меҳнат ва оилаҳои камбизоат;

- барои гузаронидани чорабиниҳои фарҳангию оммавӣ, варзишӣ ва конференсияҳо;

- барои хароҷоти қабули меҳмонон, ҷойгиркунии онҳо ва дигар хароҷоти ба онҳо алоқаманд;

- барои таъмири асосии биноҳо ва хариди таҷҳизот барои мақомоти идораи давлатӣ, судҳо, прокуратура ва мақомоти ҳифзи ҳуқуқи вилоятҳо, шаҳру ноҳияҳо;

- барои пардохти хароҷот ҷиҳати бартараф намудани оқибатҳои офатҳои табиӣ ва дигар ҳодисаҳои ғайричашмдошт.

4) Маблағи фонди захиравии мақомоти иҷроияи маҳаллии ҳокимияти давлатӣ ҳамчун захираҳои қарзӣ, инчунин барои дастгирии соҳаҳои хусусӣ ва ташкилотҳои бо ҳисоби хоҷаги амалкунанда истифода бурда намешаванд.

5) Маблағи фонди захиравии мақомоти иҷроияи маҳаллии ҳокимияти давлатӣ дар ҳисоби ҷории буҷетҳои маҳаллӣ нигоҳ дошта мешавад ва дар Гурӯҳбандии буҷетӣ қисми 14.3. хароҷоти "Фонди захиравии мақомоти иҷроияи маҳаллии ҳокимияти давлатӣ", моддаи 2.1.17. "Молу хизматҳои ба дигар моддаҳо дохилнашуда" ба ҳисоб гирифта, ба ташкилоту муассисаҳои тобеияти маҳаллӣ дар асоси қарори раисони Вилояти Мухтори Кӯҳистони Бадахшон, вилоятҳо, шаҳри Душанбе, шаҳру ноҳияҳо маблағгузорӣ карда мешавад. 6) Дар ҳисобот оид ба иҷрои буҷетҳои маҳаллӣ маблағи равонагардидаи фонди захиравии мақомоти иҷроияи маҳаллии ҳокимияти давлатӣ аз Гурӯҳбандии буҷетӣ қисми 14.3. хароҷоти "Фонди захиравии мақомоти иҷроияи маҳаллии ҳокимияти давлатӣ", моддаи 2.1.17. "Молу хизматҳои ба дигар моддаҳо дохилнашуда" кам карда шуда, дар хароҷоти ташкилотҳо ва муассисаҳои дахлдор мувофиқи гурӯҳбандии буҷетӣ нишон дода мешавад.