Ҳукумати Ҷумҳурии Тоҷикистон

ҚАРОР

Дар бораи тасдиқи Барномаи мубориза бар зидди малах дар Ҷумҳурии Тоҷикистон барои солҳои 2011-2015

Мутобиқи моддаи 7 Қонуни Ҷумҳурии Тоҷикистон "Дар бораи дурнамоҳои давлатӣ, консепсияҳо, стратегияҳо ва барномаҳои инкишофи иҷтимоию иқтисодии Ҷумҳурии Тоҷикистон" ва бо мақсади роҳ надодан ба паҳншавӣ ва эмин нигоҳ доштани зироатҳои кишоварзӣ, боғу токзор ва чарогоҳҳо аз малахиҳо, баҳри таъмин амнияти озуқавории кишвар Ҳукумати Ҷумҳурии Тоҷикистон қарор мекунад:

1) Барномаи пешниҳодшудаи мубориза бар зидди малах дар Ҷумҳурии Тоҷикистон барои солҳои 2011-2015 ва Номгӯи чорабиниҳои мубориза бар зидди малах дар Ҷумҳурии Тоҷикистон барои солҳои 2011- 2015 тасдиқ карда шаванд (замима мегарданд).

2) Вазорати кишоварзии Ҷумҳурии Тоҷикистон дар якҷоягӣ бо Вазорати молияи Ҷумҳурии Тоҷикистон, Вазорати рушди иқтисод ва савдои Ҷумҳурии Тоҷикистон ҷиҳати таъмини маблағгузории Барномаи мубориза бар зидди малах дар Ҷумҳурии Тоҷикистон барои солҳои 2011-2015 аз ҳисоби маблағҳои буҷетӣ дар доираи Барномаи миёнамӯҳлати хароҷотҳои давлатӣ, ҷалби грантҳои ташкилотҳои байналмилалӣ ва хизматрасонӣ чораҳои зарурӣ андешад.

3) Вазорату идораҳои дахлдор, раисони Вилояти Мухтори Кӯҳистони Бадахшон, вилоятҳо, шаҳру ноҳияҳо, корхонаҳо ва ташкилотҳо, новобаста ба шакли моликияташон барои татбиқи Барномаи мубориза бар зидди малах дар Ҷумҳурии Тоҷикистон барои солҳои 2011-2015 тадбирҳои зарурӣ андешанд.