Тартиби муқаррар намудани нархи хизмати тиббие, ки аз тарафи муассисаҳои хусусии тиббии Ҷумҳурии Тоҷикистон расонида мешавад

1. Муқаррароти умумӣ

1) Тартиби мазкур муносибати ягонаи методиро ба нархи хизмати тиббие, ки аз ҷониби муассисаҳои хусусии тиббии Ҷумҳурии Тоҷикистон расонида мешаванд, муайян месозад.

2) Объектҳои баҳисобгирии нархномаҳо хизмати тиббие ба ҳисоб мераванд, ки метавонанд бо номгӯи хизмати тиббии бо тартиби муқарраршуда пешниҳод гарданд.

3) Нархномаи хизмати тиббӣ бо тартиби муқаррарнамудаи Низомномаи калкулятсияи арзиши аслии маҳсулот (кору хизматрасонӣ) дар корхонаҳо ва ташкилотҳои Ҷумҳурии Тоҷикистон, ки бо қарори Ҳукумати Ҷумҳурии Тоҷикистон аз 12 майи соли 1999 №210 тасдиқ шудааст, таҳия карда мешавад.

4) Барои баҳисобгирии нархи аслии хизмати тиббӣ воҳидҳои сохтории муассисаҳои тандурустӣ ба асосӣ ва ёридиҳанда, хароҷоти муассиса бошад - ба мустақим ва ғайримустақим тақсим мешаванд.

5) Ба сохторҳои асосии муассисаҳои тандурустӣ шӯъбаҳои (ҳуҷраҳои) статсионарӣ, шӯъбаҳо (утоқҳо), марказҳои саломатӣ, марказҳои ташхисӣ, сохторҳои муолиҷавию ташхисӣ ва дигар сохторҳое, ки ба беморон хизмати тиббӣ мерасонанд, дохил мешаванд.

6) Ба сохторҳои ёридиҳанда хадамоти умумии муассисавӣ, ки фаъолияти сохторҳои асосиро оид ба хизмати тиббӣ таъмин менамоянд (маъмурият, шӯъбаи кадрҳо, муҳосибот, утоқи оморӣ тиббӣ, бақайдгирӣ (регистратура), дорухона, хадамоти бесироятгардонӣ, хадамоти хоҷагӣ ва ғайра), тааллуқ доранд.

7) Арзиши аслии хизматрасониҳои тиббӣ - ин баҳодиҳии нархи маводи дар ҷараёни муолиҷа истифодашаванда, фондҳои асосӣ, сӯзишворӣ, қувваи барқ, захираҳои меҳнатӣ, инчунин дигар хароҷот ба ҳисоб меравад.

8) Аз рӯи мазмуну таъинот хароҷот ба унсурҳои иқтисодӣ ва моддаҳои хароҷот гурӯҳбандӣ карда мешаванд.

9) Ҳангоми муайян кардани арзиши аслии ҳамагуна намуди хизмати тиббӣ гурӯҳбандии зерин истифода бурда мешавад:

- хароҷоти мустақим - хароҷоте, ки бевосита бо хизмати тиббӣ алоқаманд буда, дар ҷараёни расонидани он истифода мешаванд; пардохти музди меҳнат ва ҳисоб кардани музди меҳнати кормандони сохторҳои асосӣ; хароҷоти моддие, ки бевосита дар рафти хизматрасониҳои тиббӣ пурра сарф мешаванд (доруворӣ ва маводи ҷароҳатбандӣ, маҳсулоти озуқа, асбобҳои истифодаи яккаратаи тиббӣ ва ғайра); истеҳлоки (амортизатсияи) таҷҳизоти тиббӣ ва дигар таҷҳизоте, ки бевосита дар ҷараёни муолиҷавию ташхисӣ истифода бурда мешаванд;

- хароҷоти ғайримустақим - хароҷоте, ки барои таъмин намудани фаъолияти соҳибкории муассиса заруранд, вале бевосита дар рафти хизмати тиббӣ истифода намешаванд; пардохти музди меҳнат ва ҳисобкунии пардохти музди меҳнати кормандони сохторҳои ёрирасон, хароҷоти ҷории хоҷагӣ, хароҷот барои нигоҳдорӣ ва таъмири таҷҳизоте, ки бевосита ҳангоми хизмати тиббӣ истифода намешаванд.

2. Ҳисобкунии тарифҳо барои хизматрасониҳои тиббӣ

10) Ҳисобкунии тарифҳо (Z) барои хизматрасониҳои тиббӣ аз рӯи формулаи зерин анҷом дода мешавад:

а) Барои таҳқиқоти ташхисӣ ва лабораторӣ;

                    2 = (Хм + М+ Хғм + См) х Д

б) Барои ташрифи беморон дар шӯъбаҳои статсионарӣ;

                    2 = (Хм + М + Хғм + См+ Хб) х Д + Ут , ки дар ин ҷо,

Хм - хароҷотҳои меҳнатӣ;

М - маблағҷудокунӣ ба фонди ҳифзи иҷтимоии аҳолӣ;

Хгм - хароҷоти ғайримустақим;

См - сарфи мавод (доруворӣ);

Хб - хизматрасониҳои бистаринамоӣ (хароҷот барои 1кат/рӯз);

Д -даромаднокӣ;

Ут - усулҳои зарурии таҳқиқот (тибқи нархномаҳои тасдиқшуда).

3. Хусусиятҳои баҳисобгирии моддаҳои алоҳидаи хароҷот ҳангоми ташаккули нархи хизмати тиббӣ

11) Хароҷоти меҳнатӣ ин баҳисобгирии моддаҳои алоҳидаи хароҷот ҳангоми ташакулли арзиши хизмати тиббӣ ба ҳисоб меравад.

12) Маоши кормандоне, ки бевосита ба рафти хизматрасонии тиббӣ машғуланд, тибқи гурӯҳбандии кормандони тиббӣ ба ду гурӯҳ ҷудо мешаванд:

а) Кормандони асосӣ:

- табибон;

- кормандони миёнаи тиббӣ (пизишкёрон, лаборантҳо, момодояҳо ва дигар мутахассисон);

- кормандони хурди тиббӣ;

б) Кормандони умумимуассисавӣ (кормандони маъмурию хоҷагӣ).

13) Формула барои муайян намудани хароҷоти пардохти музди меҳнат бо нархи як дақиқаи кори табиб (ё корманди миёнаи тиббӣ), ки бевосита хизмат мерасонад (V- дақиқа) чунин аст:

V дақика = Умв : 60 дақиқа, ки дар ин ҷо: V мв - маоши вазифавии якмоҳа;

Б м.я - меъёри якмоҳаи вақти кории корманде, ки бевосита хизмат мерасонад.

14) Фонди пардохти музди меҳнати кормандони асосии тиббӣ, ки ба арзиши аслии хизмати тиббӣ дохил мешавад, аз маоши асосии тибқи рӯйхати тарификатсионӣ ҳисобкардашуда ва иловагӣ иборат аст. Хароҷот барои маоши иловагӣ ба воситаи коэффитсиенти таносуби музди меҳнати иловагӣ ва асосӣ ба ҳисоб гирифта мешавад. Музди меҳнати иловагӣ пардохтҳои зеринро дарбар мегирад:

- пардохти рухсатии меҳнатии асосӣ ва иловагии ҳарсола;

- пардохти иловагӣ барои кор дар рӯзҳои ид ва истироҳат;

- пардохти иловагӣ барои кори шабона;

- дигар пардохтҳои илова ба музди асосии меҳнат.

15) Сарфи вақт барои батартибдарории ҳуҷҷатҳои тиббӣ дар меъёрҳои вақт (сарборӣ) ба назар гирифта шудааст, агар дигар чиз пешбинӣ нашуда бошад, бинобар ин иҷрои ин кор хизмати алоҳида пардохтшаванда ба ҳисоб намеравад.

4. Маблағҷудокунӣ барои фонди ҳифзи иҷтимоии аҳолӣ Ҳисобкунии музди меҳнат

16) Дар арзиши аслии хизматрасониҳои тиббӣ хароҷот барои пардохтҳои зерин ба ҳисоб гирифта мешаванд:

- андози ягонаи иҷтимоӣ, ки мутобиқи Кодекси андози Ҷумҳурии Тоҷикистон ба ҳисоб гирифта мешавад;

- ҳисобкуниҳо барои пардохти музди меҳнати кормандони асосӣ, ки хизмати тиббӣ мерасонанд - ба хароҷоти мустақим, кормандони умумимуассисавӣ бошанд - ба таркиби хароҷоти ғайримустақим дохил карда мешаванд.

5. Хароҷоти ғайримустақим

17) Дар арзиши хизмати тиббӣ хароҷоти ғайримустақим мутаносибан ба хароҷоти музди меҳнати кормандони тиббии асосӣ дохил карда мешавад.

18) Коэффитсиенти хароҷоти ҳисобкунӣ аз рӯи хароҷоти воқеии муассисаҳои табобатию профилактикӣ барои соли заминавӣ ҳисоб карда шуда, бо формулаи зерин ҳисоб карда мешавад:

Мгм Кхҳ =_____, ки дар ин ҷо Фмм

Мгм - маблағи хароҷоти ғайримустақим дар давраи ҳисоботӣ; Фмм -фонди музди меҳнати кормандони асосии тиббӣ.

19) Ҳангоми ҳисобкунии хароҷоти ғайримустақим моддаҳои зерин ба ҳисоб гирифта мешавад;

- маоши кормандони маъмурӣ, хоҷагӣ ва тиббии он шӯьбаҳое, ки хизмати онҳо дар ҳисобкунии музди меҳнат барои хизмати оддӣ ба ҳисоб гирифта нашудааст;

- маблағҷудокуни барои суғуртаи иҷтимоии ин гурӯҳи кормандон;

- хароҷоти хоҷагидорӣ ва инвентар;

- хароҷоти дафтардорӣ (канселярӣ);

- харидани инвентари нарм;

- хароҷоти сафари хизматӣ;

- хароҷот барои таъмири ҷорӣ;

- хизматрасонии алоқа;

- фарсудашавии бинову иншоот, нақлиёт, таҷҳизоти ғайритиббӣ ва тиббӣ, ки хизмати онҳо ба хароҷоти мустақим дохил намешаванд;

- дигар хароҷоти пешбининашуда;

- хизматрасониҳои коммуналӣ;

6. Хароҷоти моддӣ

20) Хароҷот барои харидани дорувории тиббӣ аз рӯи меъёрҳои хароҷоти дорувории тиббӣ мутобиқи протоколҳои клиникии муолиҷа барои бемориҳои (нозологияи) алоҳида ё гурӯҳҳои аз рӯи технологияи муолиҷа ба ҳам монанд (гурӯҳҳои хароҷоти клиникӣ) муайян карда мешаванд.

Барои ҳисобкунии нархи дорувории тиббӣ вобаста ба ҳар як намуди хизматрасонӣ интихоби мустақими хароҷот, ки дорувориҳои тиббии зарурӣ ва меъёрӣ истифодабарии онҳо нишон дода мешавад, гузаронида мешавад. Ин маълумотҳо бо нархи дорувории тиббиӣ харидашуда, меъёрҳои онҳо дар баста муқоиса карда мешаванд.

7. Фарсудашавии таҷҳизот

21) Маблағи хароҷот барои таҷҳизот дар нархи хизматрасонӣ (К.) аз рӯи формулаи зерин муайян карда мешавад:

I R =____, дар ин ҷо N

I - маблағи хӯрдашавии солонаи таҷҳизот;

N - миқдори корҳои гузаронидашуда (барои 1 баст) дар як сол.

8. Хизматрасониҳои бистаринамоӣ

22) Ҳисобкунӣ барои 1 кат дар 1 рӯз:

Мм : Шк : Имк + М + Хғм + Хх дар ин ҷо,

Мм - музди меҳнати кормандони асосӣ, бо назардошти музди меҳнати иловагӣ;

Шк - шумораи катҳо;

Имк - ишғоли миёнаи катҳо;

М - маблағҷудокунӣ ба фонди ҳифзи иҷтимоии аҳолӣ;

Хғм - хароҷоти ғайримустақим;

Хх - хароҷот барои хӯрока

23) Арзиши хизмати бистаринамоӣ ба нархи 1 кат дар 1 рӯз баробар буда, ба шумораи рӯзҳои табобаткардашуда зарб карда мешавад.

9. Маблағи даромаднокии нақшавӣ - Д

24) Тарифҳо барои хизмати тиббӣ бо назардошти даромаднокии нақшавӣ муқаррар карда мешавад, ки сарчашмаи рушди муассиса, харидани таҷҳизоти нав, татбиқи усулҳои нави ташхис ва муолиҷа, ҳавасмандкунии моддии кормандон ба ҳисоб меравад.

10. Мувофиқа ва тасдиқи арзишҳо барои хизматрасониҳои тиббӣ

25) Нархномаи хизматрасонии тиббӣ аз ҷониби роҳбарони муассисаҳои тандурустии хусусӣ бо мувофиқаи Вазорати тандурустии Ҷумҳурии Тоҷикистон ва Хадамоти зиддиинҳисории назди Ҳукумати Ҷумҳурии Тоҷикистон тасдиқ карда мешавад.

Барои мувофиқанамоӣ ва тасдиқи нархномаи хизмати тиббӣ муассисаҳои хусусии тиббӣ ба мақомоти ваколатдор ҳуҷҷатҳои зеринро пешниҳод менамоянд:

- асосноккунии нархҳо (тарифҳо), таҳлили муқоисавии нархҳои (тарифҳои) амалкунанда ва тасдиқгардида, натиҷаи истифодаи нархҳои амалкунанда барои хизматрасонӣ, андозаи фоидаи (зарари) эҳтимолӣ барои давраи минбаъда;

- нусхаи ҳуҷҷатҳои иҷозатдиҳӣ оид ба фаъолияти хизмати тиббӣ (литсензия, сертификат);

- сатҳи даромаднокӣ дар давраи ҷорӣ;

- калкулятсияи арзиши аслии хизмати тиббӣ мутобиқи санадҳои меъёрии ҳуқуқӣ бо рамзкушоии тамоми моддаҳои хароҷот ва даромадҳо аз рӯи номгӯи хизматрасонӣ;

- нусхаи тавозуни муҳосибӣ бо замимаҳояш барои соли ҷорӣ;

26) Лоиҳаҳои арзишҳо барои баррасӣ бо замимаи ҳуҷҷатҳои зарурӣ бо имзои роҳбарони муассисаҳои хусусии тиббӣ пешниҳод карда мешаванд.

27) Роҳбарони муассисаҳои хусусии тиббӣ, ки хизматрасонии тиббӣ мерасонанд, барои дуруст будани ҳуҷҷатҳои пешниҳодкардашуда ҷавобгар мебошанд.