Ҳукумати Ҷумҳурии Тоҷикистон

ҚАРОР

Оид ба ворид намудани тағйиру иловаҳо ба баъзе қарорҳои Ҳукумати Ҷумҳурии Тоҷикистон

Мутобиқи моддаи 42 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" Ҳукумати Ҷумҳурии Тоҷикистон қарор мекунад:

1) Ба Муқаррароти умумии иҷозатдиҳӣ ба истифодабарии воситаҳои нақлиёт ва вазифаҳои ашхоси мансабдор дар бобати таъмини бехатарии ҳаракат дар роҳ, ки бо қарори Ҳукумати Ҷумҳурии Тоҷикистон аз 27 декабри соли 1997 № 565 "Дар бораи Қоидаҳои ҳаракат дар роҳҳои Ҷумҳурии Тоҷикистон" тасдиқ шудаанд, тағйиру иловаҳои зерин ворид карда шаванд:

- ба банди 11 сархати дуюм бо мазмуни зерин илова карда шавад:

"воситаҳои нақлиёт бо шишаҳои сиёҳу хираи паҳлӯӣ ва қафо бидуни доштани иҷозат, ки бо Тартиби додани иҷозати истифодаи воситаҳои нақлиёт бо шишаҳои сиёҳу хира барои ҳаракат дар роҳ (замима мегардад), пешбинӣ гардидааст;";

- эзоҳи зербанди 7.3 банди 7 Номгӯи вайрониҳо ва шароите, ки ҳангоми ба вуҷуд омадани онҳо истифодабарии воситаҳои нақлиёт манъ аст, замима ба Муқаррароти умумии иҷозатдиҳӣ ба истифодабарии воситаҳои нақлиёт ва вазифаҳои ашхоси мансабдор дар бобати таъмини бехатарии ҳаракат дар роҳ, дар таҳрири зерин ифода карда шавад:

"Эзоҳ: Дар қисми болоии шишаи пуштрӯи автомобилҳо ва автобусҳо (на зиёда аз 200 мм аз қисми болоии шиша) часпонидани маводҳои ранга ва дар шишаи ақиби автомобилҳо часпондани маводҳои шаффоф мумкин аст. Истифодаи воситаҳои нақлиёт бо шишаҳои сиёҳу хира, ойинагӣ, пардаҳои паҳлӯӣ ва яклухти ақиб, ки дар сохтори воситаи нақлиёт аз тарафи заводи истеҳсолкунанда пешбинӣ нашудаанд ва ба талаботи стандартҳои давлатии Ҷумҳурии Тоҷикистон мутобиқат намекунанд, манъ аст. Истифодаи пардачаҳо дар шишаҳои паҳлӯии автобусҳо (ба ғайр аз шишаҳои паҳлӯии ҷои нишасти ронанда), чиғпарда (жалюзи), пардачаҳо ва пардаҳои шаффоф дар шишаҳои ақиби автомобилҳои сабукрав дар сурати аз ҳарду тараф мавҷуд будани оинаи ақибнамои берунӣ мумкин аст".

2) Ба қарори Ҳукумати.Ҷумҳурии Тоҷикистон аз 2 ноябри соли 2007, № 546 "Дар бораи тасдиқ намудани меъёрҳои хироҷҳо барои анҷом додани амалҳои аз ҷиҳати ҳуқуқӣ муҳим ва пардохтҳо барои додани иҷозат оид ба истифодаи захираҳои табиӣ ё дигар захираҳои мавҷуда" тағйиру иловаҳои зерин ворид карда шаванд:

- дар муқаддима пас аз рақами "62" рақами "63(3)" илова карда шавад;

- замимаи 18 бо мазмуни зерин илова карда шавад:

Меъёри пардохт барои додани иҷозати истифодаи воситаҳои нақлиёт бо шишаҳои сиёҳу хира барои ҳаракат дар роҳ

+-----------------------------------------------+--------------------ҷ
|Намуди амалҳо                                  |Меъёри пардохт барои|
|                                               |як сол              |
|                                               |                    |
+-----------------------------------------------+--------------------+
|                                               |                    |
|Додани иҷозати истифодаи воситаҳои нақлиёт бо  |65 нишондиҳанда     |
|шишаҳои сиёҳу хира барои ҳаракат дар роҳ       |барои ҳисобҳо       |
+-----------------------------------------------+--------------------+

- дар банди 1 рақамҳои "1-17" бо рақамҳои "1-18" иваз карда шавад.

3) Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон дар мувофиқа бо Вазорати корҳои дохилии Ҷумҳурии Тоҷикистон ба стандарти байнидавлатии (ГОСТ) 5727-88 "Шишаҳои бехатар барои нақлиёти роҳи заминӣ, Шартҳои умумии техникӣ", ки дар Ҷумҳурии Тоҷикистон амал мекунад, тағйиру иловаҳои дахлдор ворид намояд.

4) Қарори Ҳукумати Ҷумҳурии Тоҷикистон аз 15 феврали соли 1999 № 46 "Дар бораи тадбирҳои иловагии таъмини қонуният, тартиботи ҳуқуқӣ ва мустаҳкам намудани интизоми хизматӣ" аз эътибор соқит дониста шавад.

5) Қарори мазкур аз 1 январи соли 2010 мавриди амал қарор дода шавад.

Тартиби додани иҷозати истифодаи воситаҳои нақлиёт бо шишаҳои сиёҳу хира барои ҳаракат дар роҳ

1.1. Додани иҷозати истифодаи воситаҳои нақлиёт бо шишаҳои сиёҳу хира барои ҳаракат дар роҳ (минбаъд - иҷозат) пас аз пардохти маблағи муқарраргардида амалӣ карда мешавад.

1.2. Пардохти маблағ ба суратҳисоби махсус, ки барои сохтмони НБО "Роғун" дар Хазинадории марказии Вазорати молияи Ҷумҳурии Тоҷикистон кушода мешавад, аз тарафи молики (соҳиби) воситаи нақлиёт дар шӯъбаҳои Бонки давлатии амонатгузории "Амонатбонк" ба тарзи нақдӣ ва ғайринақдӣ амалӣ карда мешавад.

1.3. Бонки давлатии амонатгузории "Амонатбонк" дар бораи маблағҳои ба суратҳисоби махсус пардохтгардида ва гузаронидашуда ҳар рӯз ба Вазорати молияи Ҷумҳурии Тоҷикистон маълумот пешниҳод менамояд.

1.4. Намунаи иҷозат аз тарафи Вазири корҳои дохилии Ҷумҳурии Тоҷикистон тасдиқ карда мешавад.

1.5. Варақаҳои иҷозат дар асоси дархости Раёсати Бозрасии давлатии автомобилии Вазорати корҳои дохилии Ҷумҳурии Тоҷикистон тайёр карда шуда, ҳуҷҷати қатъии ҳисоботӣ мебошанд. Ҷузъу томҳои Бозрасии давлатии автомобилии Вазорати корҳои дохилии Ҷумҳурии Тоҷикистон бо варақаҳои мазкур дар асоси тақсимбандии аз ҷониби сардори Раёсати Бозрасии давлатии автомобилии Вазорати корҳои дохилии Ҷумҳурии Тоҷикистон тасдиқгардида, таъмин карда мешаванд.

1.6. Иҷозат дар асоси аризаи хаттии намунаи муқарраргардидаи молики (соҳиби) воситаи нақлиёт ва пешниҳоди нусхаи ҳуҷҷати тасдиқкунандаи пардохти маблағи муқарраргардида аз тарафи сардорони ҷузъу томҳои Бозрасии давлатии автомобилии Вазорати корҳои дохилии Ҷумҳурии Тоҷикистон ва ё ашхоси онҳоро ивазкунанда ройгон дода мешавад.

1.7. Аризаи воридгардида дар бораи додани иҷозат аз ҷониби ҷузъу томҳои Бозрасии давлатии автомобилии Вазорати корҳои дохилии Ҷумҳурии Тоҷикистон дар мӯҳлати як рӯз бояд мавриди баррасӣ қарор дода шавад.

1.8. Иҷозат дар дафтари алоҳида, ки аз тарафи мақомоти болоии Бозрасии давлатии автомобилӣ рақамгузорӣ ва мӯҳрбандӣ шудааст, бо маълумоти дар иҷозат омада, инчунин нишонии бонк, сана ва рақами варақаи пардохти маблағи муқарраргардида қайд карда мешавад.

1.9. Баъд аз гирифтани иҷозат молики (соҳиби) воситаи нақлиёт ҳуқуқ дорад шишаҳои воситаи нақлиётро бе маҳдудияти шуъогузаронӣ сиёҳ намояд, ба ғайр аз шишаи пеш, ки дар қисми болоии он (на зиёда аз 200 мм аз қисми болоии шиша) часпондани маводи ранга ҷоиз мебошад.

1.10. Варақаи иҷозат аз дарун дар кунҷи поёнии шишаи пеши автомашина дар паҳлӯи чапи талони муоинаи техникӣ часпонида мешавад.

1.11. Иҷозат аз рӯзи додани он дар давоми як соли тақвимӣ эътибор дорад.

1.12. Барои истифодаи нақлиёти сиёҳшиша бе иҷозат, бо иҷозати мӯҳлати эътибораш гузашта ё дар сана ва мӯҳлати эътибори он ҷой доштани ислоҳот воситаи нақлиёт боздошт ва ронанда тибқи қонунгузории Ҷумҳурии Тоҷикистон ба ҷавобгарӣ кашида мешавад.

1.13. Барқароркунии нусхаи иҷозати гум ё корношоямшуда аз тарафи мақомоти онро дода сурат мегирад.

1.14. Ҳангоми иваз намудани маълумоти бақайдгирӣ (рақами бақайдгирӣ, рақами муҳаррик, рақами бордон, рақами шассӣ, ранг, соҳиб, суроға ва ғайра) молики (соҳиби) воситаи нақлиёт ҳуқуқ дорад иҷозатро дар мақомоти онро дода ба мӯҳлати боқимонда иваз намояд ё ба молики нав ба расмият дарорад.

1.15. Истифодаи воситаҳои нақлиёт бо шишаҳои сиёҳу хира барои ҳаракат дар роҳ, ки аз тарафи заводи истеҳсолкунанда пешбинӣ шуда, нургузарониашон ба меъёрҳои муқаррарнамудаи стандартҳои давлатии Ҷумҳурии Тоҷикистон ҷавобгӯ нестанд, аз ҷониби соҳиби (молики) ин воситаҳои нақлиёт, пас аз гирифтани иҷозат мувофиқи Тартиби мазкур амалӣ мегарданд.