Ҳукумати Ҷумҳурии Тоҷикистон

ҚАРОР

Оид ба ворид намудани тағйиру иловаҳо ба баъзе қарорҳои Ҳукумати Ҷумҳурии Тоҷикистон

Мутобиқи моддаи 42 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" Ҳукумати Ҷумҳурии Тоҷикистон қарор мекунад:

1) Ба Тартиби бақайдгирии давлатии воситаҳои механикии нақлиёт ва ядакҳо, ки бо қарори Ҳукумати Ҷумҳурии Тоҷикистон аз 23 октябри соли 1999 №441 "Дар бораи тасдиқи Тартиби бақайдгирии давлатии воситаҳои механикии нақлиёт ва ядакҳо" тасдиқ карда шудааст, тағйиру иловаҳои зерин ворид карда шаванд:

а) ба банди 2 сархати нав бо мазмуни зайл илова карда шавад:

"- "маълумоти бақайдгирӣ" - рақами бақайдгирӣ, вин код, тамға, навъ, соли барориш, рақамӣ муҳаррик, рақами бордон, рақами шассӣ, ранг, қувваи муҳаррик, миқдори борбардорӣ, вазни холис, соҳиб, суроға, асоси бақайдгирӣ, маҳали бақайдгирӣ, қайдҳои махсус";

б) ба сархати дуюми банди 5 ҷумлаи нав бо мазмуни зайл илова карда шавад:

"Соҳибони воситаҳои нақлиёт ё намояндагони онҳо ҳамчунин вазифадоранд, дар мавриди боварӣ намудани воситаи нақлиёт ба шахси дигар, ки боиси тағйир ёфтани маълумоти бақайдгирӣ оид ба маҳали нигоҳ доштани воситаи нақлиёт мегардад, ваколатномаро дар давоми даҳ шабонарӯз дар шӯъбаи (зершӯъбаи) Бозрасии давлатии автомобилии маҳали қайди воситаи нақлиёт бо тартиби муайяннамудаи Вазорати корҳои дохилии Ҷумҳурии Тоҷикистон аз қайд гузаронанд.";

в) дар сархати сеюми зербанди в) банди 23 баъд аз калимаи "шудаанд" калимаҳои "аз ҷумла, шартномаи хариду фурӯши бо тариқи нотариалӣ тасдиқшуда" илова карда шаванд;

г) банди 34 ҳамчун сархати дуюм ва сеюми банди 33 ҳисобида шуда, банди 34 дар таҳрири зайл илова карда шавад:

"34. Барои нақлиёти автомобилии мусофирбари истифодаи умум рақамҳои қайди давлатии силсилаи "ТТ" дода мешаванд. Барои додани рақамҳои силсилаи "ТТ" илова ба банди 23 Тартиби мазкур асноди зерин пешниҳод карда мешаванд:

- нусхаи иҷозатномаи шахси ҳуқуқӣ оид ба амалӣ намудани фаъолияти мусофирбарӣ бо нақлиёти автомобилӣ;

- санади муоинаи техникии воситаи нақлиёт, ки аз ҷониби Бозрасии давлатии автомобилӣ дода шудааст.

Барои додани рақамҳои силсилаи "ТТ" барои воситаҳои нақлиёти автомобилӣ, ки тибқи шартнома дар бораи иҷора аз ҷониби шахси ҳуқуқӣ истифода мегарданд, асноди зерин асос шуда метавонанд:

- мактуби шахси ҳуқуқӣ;

- иҷозатномаи шахси ҳуқуқӣ оид ба амалӣ намудани фаъолияти мусофирбарӣ бо нақлиёти автомобилӣ;

- санади муоинаи техникии воситаи нақлиёт, ки аз ҷониби Бозрасии давлатии автомобилӣ дода шудааст;

- рӯйхати воситаҳои нақлиёти автомобилӣ.".

д) дар банди 50:

- баъд аз калимаҳои "бонкҳо ва ширкатҳои хориҷӣ" калимаҳои "ба истиснои ташкилот, муассисаҳо ва ширкатҳои нақлиёти автомобилии хориҷӣ" илова карда шаванд;

- сархати нав бо мазмуни зайл илова карда шавад:

"Бақайдгирии воситаҳои нақлиёти боркаш ва мусофирбари муассисаҳо ва ширкатҳои нақлиёти автомобилии хориҷӣ дар қаламрави Ҷумҳурии Тоҷикистон тибқи қарори Ҳукумати Ҷумҳурии Тоҷикистон сурат мегирад.";

е) банди 52 дар таҳрири зайл ифода карда шавад:

"52. Барои воситаҳои нақлиёти механикӣ ва ядакҳои ба қайд гирифташуда дода мешаванд:

- шаҳодатномаҳои бақайдгирӣ;

- аломатҳои бақайдгирии навъҳои дахлдор, ки тибқи стандарти Ҷумҳурии Тоҷикистон пешбинӣ шудаанд.

Шаҳодатномаи бақайдгирии воситаҳои нақлиёт бо тартиби афзоиши кодҳои рақамии онҳо дода мешаванд.";

ж) Банди 53 дар таҳрири зайл ифода карда шавад:

"53. Аломатҳои алоҳидаи бақайдгирӣ мумкин аст, дар асоси натиҷаҳои гузаронидани музояда, баъди аз тарафи шахси ғолибомада пардохт гардидани арзиши онҳо, ки дар рафти гузаронидани музояда муқаррар карда шудааст, дода шаванд. Тартиби гузаронидани музояда аз ҷониби Вазорати корҳои дохилии Ҷумҳурии Тоҷикистон бо мувофиқаи Кумитаи давлатии сармоягузорӣ ва идораи амволи давлатии Ҷумҳурии Тоҷикистон, Вазорати рушди иқтисод ва савдои Ҷумҳурии Тоҷикистон ва Вазорати молияи Ҷумҳурии Тоҷикистон муқаррар карда мешавад.

Барои автомобилҳо ва автобусҳо ду рақам ва барои мототсиклҳо ва ядакҳо яктогӣ аломати қайди давлатӣ дода мешавад.";

з) ба банди 74 сархати дуюм бо мазмуни зайл илова карда шавад:

"Аломатҳои бақайдгирии супоридашуда ва мусодирашуда, инчунин дарёфтшуда дар асоси санад нобуд сохта мешаванд.";

и) ба банди 75 сархати сеюм бо мазмуни зайл илова карда шавад:

"Қатъ гардидани истифодабарии воситаҳои нақлиёти автомобилӣ аз ҷониби шахси ҳуқуқӣ, ки тибқи шартнома дар бораи иҷора истифода мегарданд, дар асоси мактуби расмии шахси ҳуқуқӣ, ки бо имзои роҳбар ва мӯҳри шахси ҳуқуқӣ тасдиқ карда шудааст, сурат мегирад.";

к) банди 90 дар таҳрири зайл ифода карда шавад:

"90. Нусхаҳои дуюми асноди бақайдгирии гумшудаи воситаҳои нақлиёте, ки бинобар тагйир ёфтани маҳали истиқомати соҳиб, қатъи ҳуқуқи моликият ба воситаҳои нақлиёт (ҳангоми бақайдгирии чунин нақлиёт ба номи каси дигар) аз ҳисоб хориҷ карда шудаанд, дар ҷои бақайдгирии воситаи нақлиёт баъди гирифтани тасдиқнома дар бораи маълумоти бақайдгирӣ аз ҷои бақайдгирии пешина дода мешаванд.

Нусхаҳои дуюми асноди бақайдгирӣ бо қайди "Нусхаи дуюм" дода мешаванд.";

л) банди 91 дар таҳрири зайл ифода карда шавад:

"91. Додани нусхаҳои дуюми аломатҳои бақайдгирӣ, ба истиснои ҳолатҳои дуздидани онҳо, ки бо мактуби мақомоти корҳои дохилӣ аз рӯи ҷойи бақайдгирии ҷиноят тасдиқ карда шудааст, манъ аст. Аломатҳои бақайдгирӣ ба ивази рақамҳои гумшуда аз рӯи ҷойи бақайдгирии воситаи нақлиёт бо тартиби муқарраргардида дода мешавад".

2) Муқаррар карда шавад, ки додани рақамҳои қайди давлатии силсилаи "ТТ" марҳила ба марҳила дар давоми як соли баъд аз ба имзо расидани қарори мазкур амалӣ карда мешавад.

3) Дар боби 38 Низомнома дар бораи хусусиятҳои иҷозатномадиҳӣ ба баъзе намудҳои фаъолият, ки бо қарори Ҳукумати Ҷумҳурии Тоҷикистон аз 3 апрели соли 2007 №172 "Оид ба тасдиқи Низомнома дар бораи хусусиятҳои иҷозатномадиҳӣ ба баъзе намудҳои фаъолият" тасдиқ шудааст, тағйиру иловаҳои зерин ворид карда шаванд:

а) дар банди 9 баъд аз калимаҳои "мебошанд" калимаҳои "ё тибқи дигар асосҳои қонунӣ (тибқи шартнома) ихтиёрдорӣ менамоянд" илова карда шаванд;

б) дар банди 10:

- аз ҷумлаи якум калимаҳои "ҳамзамон бо иҷозатнома" хориҷ карда шаванд;

- дар ҷумлаи дуюм калимаҳои "намуд ва ҳудуди фаъолият" ба калимаҳои "намуди фаъолият" иваз карда шуда, калимаҳои "дар ҳудуди муайяни фаъолият" хориҷ карда шаванд;

- дар чумлаи сеюм калимаҳои "дар ҳудуди муайяни фаъолият" хориҷ карда шуда, калимаҳои "шаш моҳ" ба калимаҳои "як сол" иваз карда шаванд;

- ҷумлаи сеюм бо мазмуни зайл илова карда шавад:

"Ҳудуди фаъолият бо роҳхати аз тарафи шахси ҳуқуқӣ додашуда муайян мегардад.".