Ҳукумати Ҷумҳурии Тоҷикистон

ҚАРОР

Дар бораи тасдиқи Барномаи давлатии рушди маорифи Ҷумҳурии Тоҷикистон барои солҳои 2010-2015

Мутобиқи моддаи 8 Қонуни Ҷумҳурии Тоҷикистон "Дар бораи дурнамоҳои давлатӣ, консепсияҳо, стратегияҳо ва барномаҳои инкишофи иҷтимоию иқтисодии Ҷумҳурии Тоҷикистон" ва бо мақсади татбиқи сиёсати давлатӣ дар соҳаи маориф Ҳукумати Ҷумҳурии Тоҷикистон қарор мекунад:

1. Барномаи давлатии рушди маорифи Ҷумҳурии Тоҷикистон барои солҳои 2010-2015 тасдиқ карда шавад (замима мегардад).

2. Вазорати рушди иқтисод ва савдои Ҷумҳурии Тоҷикистон, Вазорати молияи Ҷумҳурии Тоҷикистон, Вазорати маорифи Ҷумҳурии Тоҷикистон ҳангоми тарҳрезии Дурнамои рушди иҷтимоию иқтисодии Ҷумҳурии Тоҷикистон ва Буҷети давлатии Ҷумҳурии Тоҷикистон барои солҳои минбаъда, вобаста аз имкониятҳои воқеъии молиявӣ ва ҳаҷми сармоягузории ҷалбшаванда барои татбиқи Барномаи мазкур маблағҳои заруриро пешбинӣ намоянд.

3. Вазорати маорифи Ҷумҳурии Тоҷикистон, вазорату идораҳои дахлдор, мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳои Суғд ва Хатлон, шаҳри Душанбе ва шаҳру ноҳияҳои тобеи ҷумҳурӣ:

- рафти татбиқи Барномаи давлатии рушди маорифи Ҷумҳурии Тоҷикистон барои солҳои 2010-2015-ро зери назорат гирифта, оид ба иҷрои саривақтии он тадбирҳои мушаххас андешанд;

- ҷиҳати гузаштан аз соли 2014 ба низоми таҳсилоти миёнаи умумӣ бо мақсади зиёд намудани ҷойҳои нишаст барои бунёди синфхонаҳои иловагӣ, таъмир ва таҳкими заминаҳои моддию техникӣ онҳо чораҷӯӣ намоянд.