Ҳукумати Ҷумҳурии Тоҷикистон

ҚАРОР

Дар бораи ворид намудани тағйиру иловаҳо ба қарори Ҳукумати Ҷумҳурии Тоҷикистон аз 28 декабри соли 2006 № 587

Мутобиқи моддаи 43 Қонуни Ҷумҳурии Тоҷикистон "Дар бораи санадҳои меъёрии ҳуқуқӣ" Ҳукумати Ҷумҳурии Тоҷикистон қарор мекунад:

Ба қарори Ҳукумати Ҷумҳурии Тоҷикистон аз 28 декабри соли 2006 № 587 "Дар бораи Вазорати адлияи Ҷумҳурии Тоҷикистон" тағйиру иловаҳои зерин ворид карда шаванд:

1. Дар банди 2 қарор рақами "91" ба рақами "103" иваз карда шавад.

2. Дар Сохтори дастгоҳи марказии Вазорати адлияи Ҷумҳурии Тоҷикистон:

- сархати сеюм дар таҳрири зайл ифода карда шавад:

"Сарраёсати равобити байналмилалии ҳуқуқӣ";

- сархати шашум хориҷ карда шавад.

3. Зербанди 7 банди 6 Низомномаи Вазорати адлияи Ҷумҳурии Тоҷикистон дар таҳрири зайл ифода карда шавад:

"7) дар соҳаи таъмини самаранокии ҳифзи ҳуқуқии манфиатҳои Ҷумҳурии Тоҷикистон дар муносибатҳои байналмилалии ҳуқуқӣ:

- дар таҳияи санадҳои байналмилалии ҳуқуқии Ҷумҳурии Тоҷикистон ширкат меварзад;

- санҷиши ҳуқуқии лоиҳаҳои санадҳои байналмилалии ҳуқуқиро мегузаронад;

- иштироки ҳуқуқии Ҷумҳурии Тоҷикистонро дар ташкилотҳои байналмилалӣ таъмин менамояд;

- нисбат ба лоиҳаҳои байналмилалии сармоягузорӣ, ки яке аз тарафҳои он Ҷумҳурии Тоҷикистон баромад мекунад, санҷиши ҳуқуқӣ мегузаронад;

- нисбат ба шартномаҳои қарзие, ки аз номи Ҷумҳурии Тоҷикистои баста мешаванд, хулосаи ҳуқуқӣ пешниҳод менамояд;

- дар доираи ваколатҳои худ дар таъмини иҷрои ваколатҳои байналмилалие, ки Ҷумҳурии Тоҷикистон оид ба ҳуқуқи инсон қабул кардааст, ширкат меварзад;

- нисбат ба гузаронидани расмиёти дохилидавлатӣ, ки барои эътибор пайдо намудани шартномаҳои байналмилалӣ зарур аст, хулосаи ҳуқуқӣ пешниҳод менамояд;

- вобаста ба пешниҳоди мақомоти давлатӣ оид ба мутобиқсозии меъёрҳои санадҳои байналмилалии ҳуқуқӣ ба қонунгузории Ҷумҳурии Тоҷикистон санҷиши ҳуқуқӣ мегузаронад;

- дар доираи ваколатҳои худ бо мақомоти адлияи давлатҳои иштирокчии Иттиҳоди Давлатҳои Мустақил, Иттиҳоди иқтисодии Евразия, Созмони ҳамкории Шанхай ва дигар ташкилотҳои байналмилалии минтақавӣ, аз ҷумла мақомоти адлияи дигар давлатҳои хориҷӣ ҳамкорӣ мекунад;

- дар доираи ваколатҳои худ оид ба ҳамоҳангсозии корбарӣ, ёрии ҳуқуқӣ ва ҳамкорӣ бо мақомоти ҳуқуқии давлатҳои хориҷии дахлдор, инчунин бо мақомоти байналмилалии ҳуқуйӣ шартномаҳо ё созишномаҳо мебандад".