Ҳукумати Ҷумҳурии Тоҷикистон

ҚАРОР

Дар бораи тасдиқи Барномаи компютеркунонии муассисаҳои таҳсилоти умумии Ҷумҳурии Тоҷикистон барои солҳои 2008-2010

Бо мақсади таъмин намудани муассисаҳои таҳсилоти умумии Ҷумҳурии Тоҷикистон бо техникаи компютерӣ ва омӯзиши амиқи технологияи иттилоотию коммуникатсионӣ Ҳукумати Ҷумҳурии Тоҷикистон қарор мекунад:

1. Барномаи компютеркунонии муассисаҳои таҳсилоти умумии Ҷумҳурии Тоҷикистон барои солҳои 2008-2010 тасдиқ карда шавад.

2. Вазорати рушди иқтисод ва савдои Ҷумҳурии Тоҷикистон ва Вазорати молияи Ҷумҳурии Тоҷикистон ҷиҳати амалӣ гардонидани Барномаи мазкур барои солҳои 2008-2010 дар дурнамои рушди иҷтимоию иқтисодӣ ва Буҷети давлатӣ маблағи заруриро пешбинӣ намоянд.

3. Вазорати рушди иқтисод ва савдои Ҷумҳурии Тоҷикистон ва Кумитаи давлатии сармоягузорӣ ва идораи амволи давлатии Ҷумҳурии Тоҷикистон ҳангоми баррасии лоиҳаҳои инвеститсионӣ маблағгузории Барномаи мазкурро аз ҳисоби ташкилотҳо ва институтҳои молиявии хориҷӣ ба инобат гиранд.

4. Раиси Вилояти Мухтори Кӯҳистони Бадахшон, раисони вилоятҳо, шаҳри Душанбе, шаҳру ноҳияҳои тобеи ҷумҳурӣ якҷоя бо Вазорати маорифи Ҷумҳурии Тоҷикистон, Вазорати саноат ва энергетикаи Ҷумҳурии Тоҷикистон ва Ширкати саҳомии холдингии кушодаи "Барқи тоҷик" масъалаи бо хатти озоди барқ ва генераторҳои дизелӣ таъмин кардани муассисаҳои таҳсилоти умумиро давра ба давра то соли 2010 ҳал намуда, баҳри иҷрои Барномаи мазкур корхонаҳои давлатию ғайридавлатӣ, ташкилотҳо ва шахсони ҳуқуқиро ҷалб намоянд.