Низомномаи Комиссия оид ба масъалаҳои реструктуризатсияи субъектҳои монополияи табий ва корхонаҳои махсусан калон

I. Муқаррароти умумӣ

1. Комиссия оид ба масъалаҳои реструктуризатсияи субъектҳои монополияи табий ва корхонаҳои махсусан калон (минбаъд Комиссия) бо қарори Ҳукумати Ҷумҳурии Тоҷикистон ташкил гардидааст ва дар фаъолияти худ ба ӯ тобеъ мебошад.

2. Қарорҳои Комиссия, ки мутобиқи қонунҳои Ҷумҳурии Тоҷикистон, дигар санадҳои меёрию ҳуқуқи ва Низомномаи мазкур қабул карда мешаванд, барои иҷро аз тарафи тамоми мақомоти ҳокимияти иҷроия ва субъектҳои хоҷагидори, сарфи назар аз шакли моликият ва таъиноти идоравиашон ҳатми мебошад.

Дар ҳолати норозиги бо қарори Комиссия иҷрокунандагон ҳақ доранд, ки дар мӯҳлати даҳрӯза ба Ҳукумати Ҷумҳурии Тоҷикистон шикоят кунанд, ки хулосаи он дар масъалаи баҳсталаб охирин аст.

II. Мақсад ва вазифаҳои Комиссия

3. Мақсадҳои фаъолияти Комиссия инҳоянд:

- баҳо додан ба ҳолати ташкилию хоҷагидори, молиявию иқтисоди, истеҳсолию хоҷагидории субъектҳои монополияи табий ва корхонаҳои махсусан калон дар асоси ҳуҷҷатҳои таҳлилии вазоратҳо ва корхонаҳо;

- ташкили фаъолияти мақсаднок оид ба тайёр намудани нақшаҳои инфироди бо имконоти реструктуризатсия (додани корхона ба консессия, ба идораи беруна, аз нав ташкилдиҳи) ва ё худ хусусигардони аз рӯи лоиҳаҳои инфироди;

- ташкили таҳияи барномаҳои реструктуризатсия (тайёр намудани бизнес-нақшаҳо, нақшаҳои амали корхонаҳои реструктуризатсияшаванда, маънидод намудани вазифаҳои нав ва бизнес-амалҳо, ташкили системаи нави ҳисобдори, нақшаи кормандон, таҳияи стратегия ва моделҳо);

- ташкили татбиқи барномаҳои реструктуризатсия (баррасии ҷузъ ба ҷузъи нақшаҳо, назорати мӯҳлати иҷро, ташкили ҳавасманди барои иштироки фаъолона дар иҷрои барномаҳо);

- мусоидат ба сармоягузории барномаҳои реструктуризатсия, аз ҷумла аз ҳисоби донорҳо (грантҳо ва кӯмаки техникии ташкилотҳои молиявии байналмилали).

4. Вазифаҳои Комиссия инҳоянд:

- равона намудани фаъолияти вазоратҳо, субъектҳои монополияи табий ва корхонаҳои махсусан калон барои тезонидани ҷараёни реструктуризатсия;

- тайёр намудани лоиҳаи қарорҳои Ҳукумати Ҷумҳурии Тоҷикистон оид ба реструктуризатсияи субъектҳои монополияи табий ва корхонаҳои махсусан калон ва ё хусусигардонии онҳо аз рӯи лоиҳаҳои инфироди.

III. Ташкили фаъолияти Комиссия

5. Фаъолияти Комиссия дар шакли ҷаласаҳои мунтазами машварати баъди ворид гардидани пешниҳодоти вазоратҳо, субъектҳои монополияи табий ва корхонаҳои махсусан калон, лекин на камтар аз як ҷаласа ҳар моҳ гузаронида мешавад. Мӯҳлатҳои гузаронидани ҷаласа ва вақти он аз тарафи Раиси Комиссия муайян карда мешавад. Ҷаласаи Комиссия босалоҳият ҳисобида мешавад, агар дар он аз се ду ҳиссаи аъзоён иштирок дошта бошанд.

6. Рӯзномаи ҷаласа аз рӯи аксарияти оддии овозҳои иштироккунандагони он тасдиқ карда мешавад. Тағйирот ба рӯзномаи ҷаласа аз рӯи пешниҳодоти аъзоёни Комиссия мумкин аст ворид карда шавад.

7. Қарорҳои Комиссия протоколҳои ҷаласаҳои Комиссия мебошанд, ки аз тарафи Раиси Комиссия имзо мегарданд.

8. Хароҷоте, ки бо фаъолияти Комиссия алоқаманд, аз ҳисоби маблағҳое, ки ба ихтиёри Кумитаи давлатии сармоягузори ва идораи амволи давлатии Ҷумҳурии Тоҷикистон гузошта мешаванд, пӯшонида мешаванд.(Қарори Ҳукумати ҶТ аз 28.12.2006с. № 590)

9. Ҳайати Комиссия аз тарафи Ҳукумати Ҷумҳурии Тоҷикистон тасдиқ карда мешавад.