Ҳукумати Ҷумҳурии Тоҷикистон

ҚАРОР

Дар бораи таъсиси Маркази татбиқи лоиҳаҳои таҷдиди роҳҳо

Бо мақсади таъмини истифодаи мақсадноки кредити Бонки Осиёгии Рушд ва Хазинаи ОПЕК оид ба рушди байналмилалӣ, ки барои татбиқи лоиҳаҳои таҷдиди роҳҳо пешниҳод шудааст, Ҳукумати Ҷумҳурии Тоҷикистон қарор мекунад:

1. Маркази татбиқи лоиҳаҳои таҷдиди роҳҳо таъсис дода шуда, Оинномаи замимашудаи он тасдиқ карда шавад (қарори Ҳукумати ҶТ аз 26.02.2022 № 74).

2. Вазорати молия ҳангоми таҳияи лоиҳаи буҷети давлатӣ ҷиҳати таъмини саҳми Ҳукумати Ҷумҳурии Тоҷикистон дар лоиҳаҳои муштараки сармоягузорӣ, ки аз ҳисоби маблағҳои шарикони рушд маблағгузорӣ карда мешаванд ва ба зиммаи Маркази татбиқи лоиҳаҳои таҷдиди роҳҳо вогузор мегарданд, чораҳои зарурӣ андешад (қарори Ҳукумати ҶТ аз 26.02.2022 № 74).

3. Вазорати иқтисод ва савдои Ҷумҳурии Тоҷикистон дар соли 2002 ва солҳои минбаъда лимити маблағгузории асосии мутамарказро барои таҷдиди роҳи автомобилгарди Душанбе - Қӯрғонтеппа - Кӯлоб дар ҳаҷмҳои мутобиқи Созишномаҳои кредитӣ аз ҳисоби лимитҳои умумии маблағгузории асосии Вазорати нақлиёти Ҷумҳурии Тоҷикистон пешбинӣ намояд.

4. Вазорати нақлиёти Ҷумҳурии Тоҷикистон аз ҳисоби ҳиссаи Ҳукумати Ҷумҳурии Тоҷикистон дар татбиқи лоиҳаҳо барои ҷойгиронии ҳамин Маркази бинои заруриро ҷудо намояд.

5. Маркази татбиқи лоиҳаҳои таҷдид роҳҳо

- дар мувофиқа бо вазоратҳои нақлиёт ва молия сметаи хароҷот барои нигоҳдории Марказро таҳия намуда, басти вазифаҳо ва музди меҳнати кормандони онро тибқи муқаррароти қарори Ҳукумати Ҷумҳурии Тоҷикистон аз 31 марти соли 2003, №119 "Оид ба муқаррар намудани меъёри ягонаи ниҳоии музди меҳнати кормандони Марказҳои (гурӯҳҳои) татбиқи лоиҳаҳои инвеститсионӣ, ки аз ҷониби Ҳукумати Ҷумҳурии Тоҷикистон дар якҷоягӣ бо ташкилотҳои байналмилалии молиявӣ амалӣ шуда истодаанд" тасдиқ намояд (қарори Ҳукумати ҶТ аз 26.02.2022 № 74).

- ба тартиби муқарраршуда хулосаи экпертизаи давлатӣ оид ба ҳуҷҷатҳои лоиҳавию сметавӣ ва литсензияро (иҷозатномаро) барои фаъолияти сохтмонӣ гирад ва маблағҳои сарфшударо ба ҳисоби саҳми Ҳукумати Ҷумҳурии Тоҷикистон дохил намояд.

6. Муқаррар карда шавад, ки мутобиқи Созишномаҳои кредитии байни Ҳукумати Ҷумҳурии Тоҷикистон ва Бонки Осиёгии Рушд ва ҳамчунин байни Ҳукумати Ҷумҳурии Тоҷикистон ва Хазинаи ОПЕК оид ба рушди байналмилалӣ, ки Маҷлиси намояндагони Маҷлиси Олии Ҷумҳурии Тоҷикистон 29 июни соли 2001 тасдиқ намудааст:

- агар қонунгузорӣ тартиби дигареро муқаррар накарда бошад маблағҳои ба Маркази татбиқи лоиҳаҳои таҷдиди роҳҳо барои иҷрои вазифаҳои он воридшуда, ба истиснои андози иҷтимоӣ ва андоз аз даромади музди меҳнати моҳонаи шаҳрвандони Ҷумҳурии Тоҷикистон, ки дар ҳамин Маркази кор мекунанд, андозбандӣ намешавад (қарори Ҳукумати ҶТ аз 30.12.2014 № 784);

- хориҷ карда шуд (қарори Ҳукумати ҶТ аз 30.12.2014 № 784);

- таҷҳизот ва молҳое, ки барои татбиқи вазифаҳои Марказ ворид мегарданд ва аз ҳисоби кредитҳои дар боло зикргардида маблағгузорӣ мешаванд, тибқи тартиби муқарраргардида аз андоз аз арзиши иловашуда ва боҷҳои гумрукӣ озод карда мешаванд (қарори Ҳукумати ҶТ аз 30.12.2014 № 784).