ҲУКУМАТИ ҶУМҲУРИИ ТОҶИКИСТОН

ҚАРОР

Дар бораи таъсиси муассисаи давлатии "Маркази идораи лоиҳаи бо оби нӯшокӣ таъмин намудани аҳолии ноҳияи Мир Сайид Алии Ҳамадонӣ"

Бо мақсади таъмини истифодаи самарабахши гранти пешниҳодшудаи Ҳукумати Япония ҷиҳати татбиқи Лоиҳаи бо оби нӯшокӣ таъмин намудани аҳолии ноҳияи Мир Сайид Алии Ҳамадонӣ ва мутобиқи моддаи 52 Кодекси граждании Ҷумҳурии Тоҷикистон Ҳукумати Ҷумҳурии Тоҷикистон қарор мекунад:

1. Муассисаи давлатии "Маркази идораи Лоиҳаи бо оби нӯшокӣ таъмин намудани аҳолии ноҳияи Мир Сайид Алии Ҳамадонӣ" таъсис дода шуда, Оинномаи замимагардидаи он тасдиқ карда шавад.

Масъулияти татбиқи Лоиҳаи бо оби нӯшокӣ таъмин намудани аҳолии ноҳияи Мир Сайид Алии Ҳамадонӣ ба зиммаи Вазорати ҳолатҳои фавқулодда ва мудофиаи граждании Ҷумҳурии Тоҷикистон вогузор карда шуда, Агентии иҷроияи ин лоиҳа мақомоти иҷроияи маҳаллии ҳокимияти давлатии ноҳияи Мир Сайид Алии Ҳамадонӣ муайян карда шавад.

2. Вазорати ҳолатҳои фавқулодда ва мудофиаи граждании Ҷумҳурии Тоҷикистон якҷоя бо Кумитаи давлатии идораи амволи давлатии Ҷумҳурии Тоҷикистон барои ҷойгир намудани Муассисаи давлатии "Маркази идораи Лоиҳаи бо оби нӯшокӣ таъмин намудани аҳолии ноҳияи Мир Сайид Алии Ҳамадонӣ", бинои заруриро ҳамчун саҳми Ҳукумати Ҷумҳурии Тоҷикистон ҷудо намоянд.

3. Муассисаи давлатии "Маркази идораи Лоиҳаи бо оби нӯшокӣ таъмин намудани аҳолии ноҳияи Мир Сайид Алии Ҳамадонӣ" бо мувофиқаи Вазорати ҳолатҳои фавқулодда ва мудофиаи граждании Ҷумҳурии Тоҷикистон ва Вазорати молияи Ҷумҳурии Тоҷикистон сохтор, ҷадвали штатӣ ва сметаи хароҷоти нигаҳдории Дастгоҳи Маркази идораи лоиҳаро таҳия ва тасдиқ намояд.