Ҳукумати Ҷумҳурии Тоҷикистон

ҚАРОР

Дар бораи тадбирҳои татбиқи Фармони Президенти Ҷумҳурии Тоҷикистон аз 25 октябри соли 2002 № 930

Ҷиҳати иҷрои Фармони Президенти Ҷумҳурии Тоҷикистон аз 25 октябри соли 2002 № 930 "Дар бораи зиёд намудани музди меҳнати ҳадди ақал, маоши кормандони муассисаю ташкилотҳои буҷетӣ, нафақа ва стипендия", Ҳукумати Ҷумҳурии Тоҷикистон қарор мекунад:

1. Вазоратҳо, кумитаҳои давлатӣ, идораҳои Ҷумҳурии Тоҷикистон, мақомоти ҳокимияти иҷроия дар маҳалҳо (ҳукуматҳо), ассотсиатсияҳо, иттиҳодияҳо, корхонаҳо, ташкилотҳо ва муассисаҳо сарфи назар аз шакли моликият ва намуди фаъолият аз 1 апрели соли 2003:

- сархат бо қарори Ҳукумати ҶТ аз 02.12.2003 с. № 525 беэътибор дониста шуд;

- маошҳои вазифавии (меъёрҳои тарифӣ) амалкунандаи коркунони Дастгоҳи иҷроияи Президенти Ҷумҳурии Тоҷикистон, мақомоти идораи давлатӣ ва мақомоти ҳокимияти иҷроия дар маҳалҳо (ҳукуматҳо), мақомоти давлатие, ки ба Президенти Ҷумҳурии Тоҷикистон тобеъ мебошанд ва ҳисобот медиҳанд, дастгоҳҳои Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон, кумитаҳои Маҷлиси намояндагони Маҷлиси Олии Ҷумҳурии Тоҷикистон, Суди Конститутсионии Ҷумҳурии Тоҷикистон, Суди Олии Ҷумҳурии Тоҷикистон, Суди Олии иқтисодии Ҷумҳурии Тоҷикистон, судҳои вилоятӣ, шаҳрӣ ва ноҳиявӣ Шӯрои адлияи Ҷумҳурии Тоҷикистон, мақомоти Прокуратураи Ҷумҳурии Тоҷикистон, ташкилотҳои тобеи вазоратҳо, кумитаҳои давлатӣ, кумитаҳо ва сохторҳои дигар, ки аз тарафи Ҳукумати Ҷумҳурии Тоҷикистон таъсис дода шудаанд, идораҳои давлатии нотариалӣ, хизматчиёни ҳарби ва шахсони ҳайати қаторӣ ва роҳбарикунандаи мақомоти корҳои дохилӣ ва дигар қисмҳое, ки аз рӯи пардохти музди меҳнат ба идораҳои қудратӣ баробар карда шудаанд аз ҷумла маош барои рутбаҳои ҳарбӣ (махсус), коркунони ташкилотҳо ва муассисаҳои тандурустӣ, маориф, фарҳанг, илм ва ғайра, ки аз буҷети давлатӣ маблағгузорӣ мешаванд, 20 фоиз зиёд намоянд; (Қарори Ҳукумати ҶТ аз 31.03.2003 № 128);

- андозаи стипендияҳои амалкунандаи донишҷӯёни донишгоҳҳои олӣ, хонандагони коллеҷҳо, мактабҳои миёнаи махсус ва дигар гурӯҳҳои хонандагоне, ки дар ҳисоби маблағгузории буҷетӣ мебошанд, 20 фоиз зиёд намоянд;

2. Вазорати меҳнат ва ҳифзи иҷтимоии аҳолии Ҷумҳурии Тоҷикистон, Фонди ҳифзи иҷтимоии аҳолии Ҷумҳурии Тоҷикистон:

- аз 1 апрели соли 2003 мувофиқи тартиби муқарраргардида андозаи нафақаҳои амалкунандаро бе тағйир додани андозаҳои ҳадди ақали нафақа аз рӯи синну сол ва ҳадди ниҳоии нафақа 20 фоиз зиёд намуда, пардохти онро таъмин намоянд.

3. Роҳбарони мақомоту идораи давлатӣ, ташкилоту муассисаҳои давлатӣ, раисони Вилояти Мухтори Кӯҳистони Бадахшон, вилояҳо, шаҳри Душанбе, шаҳрҳо ва ноҳияҳо:

- аз 1 январи соли 2003 шумораи кормандони мақомоти идораи давлатӣ ва ҳамаи муассисаю ташкилотҳоро, ки аз ҳисоби Буҷети давлатӣ маблағгузорӣ карда мешаванд, 5 фоиз ихтисор намоянд.

4. Тартиби замимагардидаи муайян намудани музди миёнаи меҳнат барои пардохти корношоямии муваққатӣ, пардохти рухсатиҳо ва дар дигар ҳолатҳое, ки ҳисоб кардани музди миёнаи меҳнатро талаб мекунанд ва андозаи музди меҳнат, ки ба он коэффисиентҳои муқарраргардидаи ноҳиявӣ (барои кор дар биёбон ва ҷойҳои беоб), коэффисиент барои баландкӯҳӣ ҳисоб карда мешаванд, тасдиқ ва аз 1 апрели соли 2003 ҷорӣ карда шавад.

5. Вазорати молияи Ҷумҳурии Тоҷикистон, Вазорати меҳнат ва ҳифзи иҷтимоии аҳолии Ҷумҳурии Тоҷикистон ва Фонди ҳифзи иҷтимоии аҳолии Ҷумҳурии Тоҷикистон иҷрои қарори мазкурро таъмин намоянд.

6. Қарорҳои Ҳукумати Ҷумҳурии Тоҷикистон аз 30 июли соли 1998 № 281 "Дар бораи тартиби ҳисоб карда додани музди миёнаи меҳнати кормандон дар ҳамаи ҳолатҳо, ба ғайр аз музди миёнаи меҳнат ҳангоми таъин намудани нафақа", аз 27 ноябри соли 2002 № 476 "Дар бораи дохил намудани тағйирот ба тартиби ҳисоб карда додани музди миёнаи меҳнати кормандон дар ҳамаи ҳолатҳо, ба ғайр аз музди миёнаи меҳнат ҳангоми таъин намудани нафақа" беэътибор дониста шаванд.

Тартиби муайян намудани музди миёнаи меҳнат барои пардохти корношоямии муваққатӣ, пардохти рухсатиҳо ва дар дигар ҳолатҳое, ки ҳисоб кардани музди миёнаи меҳнатро талаб мекунанд ва андозаи музди меҳнат, ки ба он коэффисиентҳои муқарраргардидаи ноҳиявӣ (барои кор дар биёбон ва ҷойҳои беоб), коэффисиент барои баландкӯҳӣ ҳисоб карда мешаванд.

Ҳамин Тартиб қоидаҳои ҳисоб кардани музди миёнаи меҳнати кормандонеро, ки дар муассисаҳо, ташкилотҳо ва корхонаҳо сарфи назар аз шакли моликият ва намуди фаъолият машғули кор ҳастанд (дар муносиботи меҳнатӣ қарор доранд), дар ҳама ҳолатҳо, ғайр аз ҳолатҳое, ки мувофиқи қонунгузории Ҷумҳурии Тоҷикистон тартиби махсуси ҳисоби он муқаррар шудааст, муайян мекунад.

1. Барои пардохти корношоямии муваққати, пардохти рухсатиҳо ва дар дигар ҳолатҳое (пардохтҳои кафолатнок ҳангоми иҷрои вазифаҳои давлатӣ ё ҷамъиятӣ, ҳангоми пардохти музди меҳнат дар мавриди гузарондан ба кори дигар, дар ҳолати ҷуброни зарар, дар сурати бо сабабҳои асоснок ба кор ҳозир нашудан), ки ҳисоб намудани андозаи миёнаи музди меҳнатро талаб менамоянд, ҳисоб кардани музди миёнаи меҳнат аз рӯзи охирин баландшавии маошҳои вазифавии амалкунанда (меъёрҳои тарифӣ) анҷом дода мешавад. Барои ҳисоб кардани музди миёнаи меҳнат шумораи моҳҳои баъди зиёдшавии навбатии маошҳои вазифавии амалкунанда (меъёрҳои тарифӣ) ба ҳисоб гирифта мешавад.

2. Барои муайян намудани музди миёнаи моҳонаи меҳнат музди миёнаи меҳнати рӯзона истифода мешавад. Музди меҳнати миёнаи рӯзона (ғайр аз пардохти рухсатиҳо ва ҳисоб кардани нафақа) бо роҳи тақсим кардани маблағҳои воқеии ҳисобшудаи давраи ҳисоботӣ ба миқдори рӯзҳои корӣ, бо дарназардошти давомнокии мӯътадил ё кӯтоҳи вақти кории тибқи қонунгузориҳои Ҷумҳурии Тоҷикистон муқарраршуда, муайян карда мешавад.

Дар сурати баҳисобгирии ҷамъбастии вақти корӣ, музди миёнаи меҳнат дар асоси музди соатбайъ ҳисоб карда мешавад. Азнавҳисобкунии меъёрҳои тарифии (маошҳо) соатбайъ ҳангоми ҳафтаи кории 35 соата, ба таври тақсим намудани меъёрҳои тарифии марбута ба коэффисиентҳои 1,14 (40:35) ва ҳамчунин барои дигар низомҳо (ҳафтаҳои кории 18, 16 ва 24 соата), ки мувофиқи қонунгузорҳои Ҷумҳурии Тоҷикистон муқаррар шудаанд, анҷом дода мешавад.

3. Музди миёнаи меҳнати рӯзона барои пардохти маблағи рухсатӣ бо роҳи тақсими ҳамаи маблағҳои воқеии ҳисобкардашуда барои давраи аз лаҳзаи баландшавии охирини маошҳои вазифавии амалкунанда (меъёрҳои тарифӣ) ба миқдори пурраи моҳҳои то пешниҳоди рухсатӣ ва ба коэффисиенти 29,4 -миқдори миёнаи рӯзҳои тақвимӣ ҳангоми пардохти рухсатипулии бо рузҳои тақвимӣ муқарраршуда, муайян карда мешавад. (Қарори Ҳукумати ҶТ аз 03.07.2003 № 308)

4. Ҳангоми ҳисоб кардани музди миёнаи меҳнат дар ҳолати додани рухсатӣ то давраи зиёдшавии маошҳои вазифавии (меъёрҳои тарифӣ) амалкунанда, маошҳои вазифавӣ (меъёрҳои тарифӣ), инчунин мукофотҳо ва дигар пардохтҳо ба андозаи афзоиш тасҳеҳ карда намешаванд.

Агар рухсатӣ барои давраи аз лаҳзаи баланд бардоштани маошҳои вазифавии амалкунанда ва минбаъд дода шавад, ҳангоми ҳисоб кардани музди миёнаи меҳнат ҳамаи пардохтҳои баъди баландшавӣ суратгирифта, инчунин мукофотҳо ва дигар пардохтҳо (ба ғайр аз маошҳои вазифавӣ) то баландшавӣ анҷомдодашуда ва ба давраи ҳисобӣ воридшаванда, ба ҳисоб гирифта мешаванд. Ҳамин мукофотҳо ва пардохтҳои давраи то зиёдшавӣ ва шомили давраи ҳисобӣ ба андозаи зиёдкунӣ тасҳеҳ карда мешавад.

5. Мукофотҳо ва дигар пардохтҳои ҳавасмандкунӣ, ки мувофиқи системаи музди меҳнат пешбинӣ шудаанд, ҳангоми ҳисоби музди миёнаи меҳнат аз рӯи ҳисоби воқеӣ ва мукофотҳою подошҳои солона бошанд ба андозаи 1/12 барои ҳар як моҳи давраи ҳисобӣ дохил карда мешаванд.

6. Дар сурате, ки агар давраи ҳисобӣ пурра адо нашуда бошад, рухсатӣ аз рӯи музди миёнаи меҳнати рӯзона, ки бо тарзи тақсим намудани музди меҳнати барои вақти ба таври воқеӣ коркардашуда муайяншаванда - ба миқдори рӯзҳои тақвимӣ пардохт карда мешаванд.

7. Ҳангоми ҳисоб кардани давомнокии рухсатии ҳарсола бо рӯзҳои тақвимӣ, рӯзҳои ҷашнии ғайрикорӣ, ки ба давраи рухсатӣ рост меоянд онҳо ба миқдори рӯзҳои тақвимии рухсатӣ дохил намешаванд, лекин пардохт карда намешаванд.

8. Ҳангоми бо корманд қатъ намуданимуносибатҳои меҳнатӣ:

-ҳисоб кардани ҷубронпулӣ барои рухсатии истифоданашуда, ҳисоби кӯмакпулии аз корравӣ ва дигар пардохтҳои минбаъда, ки қонунгузории Ҷумҳурии Тоҷикистон муқаррар намудааст, аз рӯи музди меҳнати миёнаи рӯзона бо дарназардошти маошҳои вазифавие (меъёрҳои тарифӣ), ки то лаҳзаи қатъи муносибатҳои меҳнатӣ амал карданд, анҷом дода мешавад;

-дар сурати аз тарафи корманд бо пешпардохт истифода шудани рухсатӣ, мувофиқи тартиби муқаррарнамудаи қонунгузории Ҷумҳурии Тоҷикистон маблағҳои барои рӯзҳои рухсати аз музди миёнаи меҳнати рӯзона пардохтшудаи ба корманд дар лаҳзаи пешниҳоди рухсатӣ ҳисобишуда, ситонида мешаванд ;

9. Дар ҳолати дар давраи ҳисобӣ набудани, аз ҷумла ҳангоми пардохти маҷбуран ба кор набаромадан, музди меҳнати миёнаи рӯзона аз рӯи маблағҳои ба таври воқеӣ дар давраи се моҳи тақвимии охири адои кор бо тасҳеҳи маошҳои вазифавӣ (меъёрҳои тарифӣ), инчунин мукофотҳо ва дигар пардохтҳо ба андозаи зиёдкунии маошҳои вазифавӣ (меъёрҳои тарифӣ) муайян карда мешавад.

10. Маоши миёна дар рӯзи пардохти он ба коргар, ки дар давраи ҳисобӣ меъёри муайяни вақти кориро пурра иҷро кардааст, наметавонад аз сатҳи музди меҳнати ҳадди ақали муқарраршуда паст бошад.

11. Ҳангоми ҳисоби музди миёнаи меҳнат пардохтҳои зерин, ки андозбандӣ мешаванд, ба ҳисоб гирифта мешавад:

- музди меҳнати асосӣ, ки бо шартнома (қарордоди) дастасҷамъӣ, инфиродӣ, меъёрҳои тарифӣ, коэффитсиенти тарифӣ, маоши вазифавӣ ё тарифҳои корбайъ муайян гардидааст;

- изофапулӣ ва иловапулиҳо барои: тахассус, гурӯҳ рутбаҳои тахассусӣ, унвони илмӣ, донистани забони хориҷӣ, собиқаи кор, иҷрои корҳои фавқулодда муҳим, шахсӣ ва ғайра;

- барои баланд бардоштани самараи меҳнат, барои иҷрои вазифаҳои коргари ғайриҳозир, барои хизматрасонии якчанд дастгоҳ, барои иҷро намудани ду вазифа;

- барои кор ҳангоми риоя накардани низоми муътадили вақти кор (пардохти иловагӣ барои кори зиёда аз вақти муқаррарӣ ва кори шабона, барои кор дар рӯзҳои ҷашн ва истироҳат);

- барои кор ҳангоми риоя накардани шароити мӯътадили меҳнат (барои шароити зарарнок ва вазнин, алалхусус дар шароити бениҳоят зарарнок ва бениҳоят вазнини меҳнат);

- пардохти иловагӣ аз рӯи коэффитсиенти ноҳиявӣ, коэффисиент барои кор дар ноҳияҳои саҳроиву беоб ва баландкӯҳи Тоҷикистон;

- тамоми навъҳои мукофот, ки тибқи низомномаи музди меҳнат ва низомнома дар бораи мукофотонӣ пешбинигардида, ки дар ҳамин корхона, муассиса, ташкилот тасдиқшуда ё мувофиқи шартномаи дастаҷамъӣ (созишнома) тасдиқ гардидаанд;

- падохтҳои кафолатнок ҳангоми ба кори дигар гузаронидан, рухсатиҳо, сафарҳои хизматӣ, иҷрои вазифаҳои давлатӣ ё ҷамъиятӣ;

- пардохти музди меҳнат ҳангоми истеҳсоли маҳсулоти ноқис ва бекор истодан - бидуни гуноҳи коргар, вақти бекористии маҷбурӣ, инчунин кӯмакпулии тавассути суғуртаи иҷтимоӣ барои корношоямии муваққатӣ пардохташуда.

12. Ҳангоми ҳисоби музди миёнаи меҳнат инҳо ба инобат гирифта намешаванд:

- пардохтҳое, ки аз манбаъҳои фонди музди меҳнат набошанд масалан, барои мусоидат дар ҷорӣ намудани ихтироот ва пешниҳодҳои навоварӣ, стипендияҳое, ки корхона барои донишҷӯён ва аспирантҳои ба таҳсил ҷудо аз истеҳсолот фиристодашуда, кӯмакпулиҳои иловагӣ барои хӯроки нисфирӯзӣ, арзиши роҳхатҳо барои табобат дар осоишгоҳу истироҳатгоҳҳо аз ҳисоби фонди рушди иҷтимоӣ (фонди истеъмолот);

- ҳамаи намудҳои подошҳои иловагии яквақтаина (иҷрои супоришҳои алоҳидае, ки ба доираи вазифаҳои муқаррарии коргар дохил намешаванд; мукофотпулиҳо; подошҳои яквақтаинаи ҳавасмандсозӣ; ба муносибати ҷашнҳои шахсӣ, кӯмакпулии азкорравӣ, кӯмакпулии моддӣ, мукофотҳои пулӣ бирои ишғоли мақоми аввал дар озмунҳо ва ғайра):

- ҷубронпулиҳо: дар мавриди сафарҳои хизматӣ ва гузаштан ба кори дигар, инчунин ба ҷои хароҷоти шабонарӯзӣ, кирояи манзил ва масрафи роҳ (маблағҳои масрафӣ барои интиқол, пардохти кирояи меҳмонхона, роҳкиро, пардохт барои кашондани амвол ва кирояи бино ҳангоми ба кори дигар гузарондан ё гузаштан ба кори дар маҳалли дигар воқеъбуда);

- арзиши манзилҳои ба таври бепул додашуда, хизматрасонии коммуналӣ ва сӯзишворӣ;

- барои рухсатии истифоданашуда, барои фарсудашавии асбоб, барои либоси махсус ва ғайра;

- кӯмакпулиҳои суғуртаи иҷтимоӣ ба ғайр аз кӯмакпулии корношоямии муваққатӣ;

- музди меҳнати дар рӯзҳои кории беподоши меҳнат, ки ба буҷети дахлдор ё фондҳои хайрия гузаронида мешавад.

13. Беэътибор дониста шуд. (Қарори Ҳукумати ҶТ аз 03.07.2003с. № 302)