Бо қарори Ҳукумати ҶТ аз 28.12.2006с. № 602 беэътибор дониста шуд

ҲУКУМАТИ ҶУМҲУРИИ ТОҶИКИСТОН

ҚАРОР

Дар бораи Вазорати нақлиёти Ҷумҳурии Тоҷикистон

Мутобиқи Қонуни Ҷумҳурии Тоҷикистон "Дар бораи нақлиёт" ва Фармони Президенти Ҷумҳурии Тоҷикистон аз 25 октябри соли 2000 № 421 "Дар бораи ташкили Вазорати нақлиёти Ҷумҳурии Тоҷикистон", Ҳукумати Ҷумҳурии Тоҷикистон қарор мекунад:

1. Низомномаи Вазорати нақлиёти Ҷумҳурии Тоҷикистон, Сохтори дастгоҳи марказии он, Нақшаи идораи Вазорат ва Номгӯи корхонаҳои давлатии нақлиётӣ, ки фаъолияти худро бо роҳи бастани созишнома бо Вазорат анҷом медиҳанд, тасдиқ карда шаванд (замима шудаанд).

2. Шумораи кормандони дастгоҳи марказии Вазорати нақлиёти Ҷумҳурии Тоҷикистон 115 нафар (бидуни ҳайати хизматрасон) муқаррар карда шавад.

Ба Вазорати нақлиёти Ҷумҳурии Тоҷикистон иҷозат дода шавад, ки чор муовини Вазир, аз ҷумла як муовини аввал ва ҳайати мушовара иборат аз 7 нафар дошта бошад.

Барои Вазорати нақлиёти Ҷумҳурии Тоҷикистон лимити автомобилҳои хидматӣ ба миқдори 7 воҳид тасдиқ карда шавад.

3. Маблағгузории Вазорати нақлиёти Ҷумҳурии Тоҷикистон аз ҳисоби маблағҳои буҷети ҷумҳурӣ анҷом дода мешавад.

4. Муқаррар гардад, ки дар соли 2001 маблағгузории Вазорати нақлиёти Ҷумҳурии Тоҷикистон бо тартиби мустасно аз ҳисоби пулҷудокуниҳои корхонаҳои давлатии нақлиётӣ дар ҳаҷми зарурӣ анҷом дода мешавад.

5. Вазорати молияи Ҷумҳурии Тоҷикистон якҷоя бо Вазорати нақлиёти Ҷумҳурии Тоҷикистон ва корхонаҳои давлатии нақлиётӣ дар мӯҳлати даҳ рӯз сметаи хароҷотро мувофиқа карда, андозаи пулҷудокуниҳо ва тартиби маблағгузории Вазорати нақлиёти Ҷумҳурии Тоҷикистонро дар соли 2001 муайян намоянд.

6. Муқаррар гардад, ки Вазорати нақлиёти Ҷумҳурии Тоҷикистон дар бинои собиқ Вазорати нақлиёт ва хоҷагии роҳи Ҷумҳурии Тоҷикистон ҷойгир мешавад.

7. Вазорати нақлиёти Ҷумҳурии Тоҷикистон:

дар мӯҳлати се моҳ ба Ҳукумати Ҷумҳурии Тоҷикистон оид ба корпоратизатсия ва тиҷоратикунонии корхонаҳои давлатии нақлиёти манзур намояд;

то 1 апрели соли 2001 ,Барномаи рушд ва ислоҳоти комплекси нақлиётӣ то соли 2005,-ро вобаста ба соҳаҳо бо дарназардошти эҳтиёҷот ба сармоягузорӣ таҳия карда, ба Ҳукумати Ҷумҳурии Тоҷикистон пешниҳод намояд;

дар мӯҳлати ду моҳ ба Ҳукумати Ҷумҳурии Тоҷикистон лоиҳаи Низомнома, пешниҳодҳо оид ба шумораи штатӣ, сохтор, нақшаи идора ва маблағгузории Инспексияи нақлиётии назди Вазорати нақлиёти Ҷумҳурии Тоҷикистонро манзур намояд;

дар мӯҳлати ду моҳ ба Ҳукумати Ҷумҳурии Тоҷикистон оид ба тартиб додани литсензия барои анҷом додани фаъолияти нақлиётӣ пешниҳодҳо манзур намояд;

дар мӯҳлати як моҳ доир ба ҳайати Комиссияи байниидоравии машваратӣ оид ба нақлиёт пешниҳодҳо манзур карда, лоиҳаи Низомномаи онро пешниҳод намояд;

то 1 апрели соли 2001 бинобар ташкил ёфтани Вазорати нақлиёт Ҷумҳурии Тоҷикистон оид ба ворид намудани тағйирот ба санадҳои меъёрию ҳуқуқии пештар қабулгардида пешниҳодҳо манзур намояд.

8. Корхонаҳои давлатии нақлиётӣ, ки фаъолияти худро бо роҳи бастани созишнома бо Вазорати нақлиёти Ҷумҳурии Тоҷикистон медиҳанд:

дар мӯҳлати ду моҳ оинномаҳои худро бо Низомномаи Вазорати нақлиёти Ҷумҳурии Тоҷикистон мутобиқ гардонанд;

бо тартиби муқарраргардида иҷрои банди 4 ҳамин Қарорро дар қисми маблағгузории хароҷоти Вазорати нақлиёти Ҷумҳурии Тоҷикистон дар соли 2001 таъмин намояд;

ҳар сол бо Вазорати нақлиёти Ҷумҳурии Тоҷикистон созишномаҳо имзо намоянд.

9. Санадҳои зерин беэътибор дониста шаванд:

фармоиши Девони Вазирони Ҷумҳурии Тоҷикистон аз 21 октябри соли 1992 № 250 ф;

қарори Девони Вазирони Ҷумҳурии Тоҷикистон аз 20 октябри соли 1992 № 385 "Дар бораи бевосита ба Девони Вазирони Ҷумҳурии Тоҷикистон тобеъ кардани Ширкати давлатии ҳавоии ,Тоҷикистон,-и Ҷумҳурии Тоҷикистон ва шӯъбаи душанбегии Роҳи оҳани Осиёи Миёна,;

банди 3 Қарори Шӯрои Вазирони Ҷумҳурии Тоҷикистон аз 17 августи соли 1994 № 403 "Дар бораи ташкили Роҳи оҳани Тоҷикистон" ва дар банди 2 ҳамин Қарор калимаҳои ,ва дар фаъолияти худ мустақиман ба Шӯрои Вазирони Ҷумҳурии Тоҷикистон тобеъ мебошад, хориҷ карда шаванд;

қарори Ҳукумати Ҷумҳурии Тоҷикистон аз 4 марти соли 1995 № 178 "Дар бораи масъалаҳои Вазорати нақлиёт ва хоҷагии роҳи Ҷумҳурии Тоҷикистон";

қарори Ҳукумати Ҷумҳурии Тоҷикистон аз 23 марти соли 1995 № 224 "Дар бораи тасдиқи Низомномаи Роҳи оҳани Тоҷикистон";

қарори Ҳукумати Ҷумҳурии Тоҷикистон аз 12 июли соли 1995 № 459 "Дар бораи тасдиқи Низомномаи Вазорати нақлиёт ва хоҷагии роҳи Ҷумҳурии Тоҷикистон".