Бо Қонуни ҶТ аз 16.04.2012 № 799 аз эътибор соқит дониста шуд.

ҚОНУНИ ҶУМҲУРИИ ТОҶИКИСТОН

ДАР БОРАИ ОМОДАГИИ САФАРБАРИ ВА САФАРБАРИ

Ҳамин Қонун асосҳои ҳуқуқи ва ташкилии омодагии сафарбари ва сафарбариро дар Ҷумҳурии Тоҷикистон, инчунин ҳуқуқ, ӯҳдадориҳо ва ҷавобгарии мақомоти давлатӣ, корхонаҳо, ташкилотҳо ва муассисаҳо сарфи назар аз шакли моликият ва шароити хоҷагидорӣ, шахсони мансабдор ва шаҳрвандони Ҷумҳурии Тоҷикистонро дар ин соҳа муайян менамояд.

Моддаи 1. Омодагаи сафарбари ва сафарбари

Омодагии сафарбари дар Ҷумҳурии Тоҷикистон ин маҷмӯи чорабиниҳои дар замони осоишта гузаронидашаванда оид ба омодагии пешакии иқтисоди Ҷумҳурии Тоҷикистон, мақомоти давлатӣ, корхонаҳо, ташкилотҳо ва муассисаҳо сарфи назар аз шакли моликият ва шароити хоҷагидорӣ (минбаъд корхонаҳо), Қувваҳои Мусаллаҳи Ҷумҳурии Тоҷикистон, дигар қӯшунҳо, сохторҳои ҳарбӣ ва сохторҳои махсус, ки дар замони ҷанг ҷиҳати таъмини ҳимояи давлат аз ҳуҷуми мусаллаҳона ва қонеъ гардонидани талаботи давлат ва эҳтиёҷоти аҳоли дар замони ҷанг ташкил дода мешаванд, мебошад.

Сафарбари ин маҷмӯи чорабиниҳо дар бобати ба низоми кор дар шароити замони ҷанг гузаронидани иқтисоди Ҷумҳурии Тоҷикистон, мақомоти давлатӣ, корхонаҳо, ба ташкил ва ҳайати замони ҷанг гузаронидани Қувваҳои Мусаллаҳи Ҷумҳурии Тоҷикистон, дигар қӯшунҳо, сохторҳои ҳарбӣ ва махсус мебошад.

Сафарбари дар Ҷумҳурии Тоҷикистон умумӣ ва қисмӣ буда метавонад. Сафарбарии умумӣ тамоми субъектҳои дар қисми якуми моддаи мазкур номбаршударо дар бар гирифта, дар қаламрави ҷумҳури гузаронида мешавад. Сафарбарии қисмӣ - қисме аз субъектҳои дар қисми якуми моддаи мазкур номбаршударо дар бар гирифта, дар минтақаҳои алоҳидаи ҷумҳурӣ гузаронида мешавад.

Қувваҳои Мусаллаҳи Ҷумҳурии Тоҷикистон, дигар қӯшунҳо, сохторҳои ҳарбӣ ва махсус, инчунин мақомоти ҳокимияти давлатӣ ва худидоракунии маҳаллӣ, корхонаҳо ва шаҳрвандон барои омодагии сафарбари ва сафарбари масъуланд.

Моддаи 2. Принсипҳои асосии омодагии сафарбари ва сафарбари

Принсипҳои асосии омодагии сафарбари ва сафарбари аз инҳо иборатанд:

- қонуният;

- эҳтироми ҳуқуқу озодиҳои инсон ва шаҳрванд;

- роҳбарияти мутамарказ;

- қабл аз вақт, мувофиқи нақша ва таҳти назорат будан;

- маҷмӯи ва мувофиқати тарафайн.

Моддаи 3. Мазмуни омодагии сафарбари ва сафарбари

Мазмуни омодагии сафарбари ва сафарбари аз инҳо иборат аст:

1) танзими меъёрию ҳуқуқи ва таъмини илмию методии омодагии сафарбари ва сафарбари;

2) муайян кардани шароити кор ва омода намудани мақомоти ҳокимияти давлатӣ, корхонаҳо ба кор дар давраи сафарбари ва дар замони ҷанг;

3) татбиқи чорабиниҳо дар бобати ба шароити кор дар замони ҷанг гузаронидани иқтисодиёти Ҷумҳурии Тоҷикистон, мақомоти ҳокимияти давлатӣ, корхонаҳо;

4) омодагии Қувваҳои Мусаллаҳи Ҷумҳурии Тоҷикистон, дигар қӯшунҳо, сохторҳои ҳарбӣ, мақомот ва сохторҳои махсус ба сафарбари;

5) гузаронидани сафарбарии Қувваҳои Мусаллаҳи Ҷумҳурии Тоҷикистон, дигар қӯшунҳо, сохторҳои ҳарбӣ ва махсус;

6) таҳияи нақшаҳои сафарбарии иқтисодиёти давлат, нақшаҳои сафарбарии Қувваҳои Мусаллаҳи Ҷумҳурии Тоҷикистон, дигар қӯшунҳо, сохторҳои ҳарбӣ ва махсус;

7) омодагии иқтисодиёти давлат, омодагии корхонаҳо ба кор дар давраи сафарбари ва дар замони ҷанг;

8) баҳодиҳии ҳолати омодагии сафарбарии давлат;

9) тарҳрези, инкишоф ва нигаҳдошти иқтидорҳои сафарбари ва объектҳо барои истеҳсоли маҳсулоти зарурӣ ҷиҳати қонеъ гардонидани талаботи давлат, Қувваҳои Мусаллаҳи Ҷумҳурии Тоҷикистон, дигар қӯшунҳо, сохторҳоӣ ҳарби ва махсус ва эҳтиёҷоти аҳолӣ дар замони ҷанг;

10) ҳангоми эълони сафарбари таъсис ва омодагии сохторҳои махсус, ки барои супоридан ба Қувваҳои Мусаллаҳи Ҷумҳурии Тоҷикистон ё барои истифода ба манфиатҳои онҳо, ҳамчунин ба манфиатҳои иқтисодиёти давлат истифодашаванда таъин шудаанд;

11) омодагии техникае, ки ҳангоми эълони сафарбари ҷиҳати таҳвили он ба Қувваҳои Муссалаҳи Ҷумҳурии Тоҷикистон, дигар қӯшунҳо, сохторҳои ҳарби ва махсус ё барои истифодабари ба манфиатҳои онҳо таъин шудаанд;

12) тарҳрезӣ, ҷамъоварӣ, нигаҳдорӣ ва азнавкунии захираҳои арзишҳои моддии махзанҳои сафарбари ва давлатӣ, захираҳои камнашавандаи маҳсулоти озуқаворӣ ва нафтӣ;

13) тарҳрезӣ ва нигаҳдошти фонди суғуртаи ҳуҷҷатҳои аслиҳа ва техникаи ҳарбӣ, маҳсулоти таъиноти стратегӣ, объектҳои дорои хатари зиёд, шабакаҳои таъмини зиндагии аҳолӣ ва объектҳое, ки сарвати миллӣ мебошанд;

14) омодагӣ ва ташкили таъминоти меъёрии аҳолӣ бо молу маҳсулоти озуқаворӣ ва ғайриозуқаворӣ, хизматрасонии тиббӣ ва таъмини он бо воситаҳои алоқа ва нақлиёт дар давраи сафарбари ва дар замони ҷанг;

15) ташкил намудани нуқтаҳои эҳтиётии идоракунии мақомоти давлатӣ, корхонаҳо ва омода кардани онҳо ба кор дар шароити замони ҷанг;

16) омодагии воситаҳои ахбори умум ба кор дар давраи сафарбаркуни ва дар замони ҷанг;

17) ташкили бақайдгирии ҳарбӣ дар мақомоти ҳокимияти давлатӣ, дар корхонаҳо;

18) тайёр кардани шаҳрвандон аз рӯи ихтисоси қайди ҳарби ҷиҳати пуррагардонии Қувваҳои Мусаллаҳи Ҷумҳурии Тоҷикистон, дигар қӯшунҳо, сохторҳои ҳарбӣ ва махсус дар давраи сафарбари ва дар замони ҷанг;

19) дар давраи сафарбари ва замони ҷанг брон кардани шаҳрвандони дар эҳтиёти Қувваҳои Мусаллаҳи Ҷумҳурии Тоҷикистон буда, ки дар мақомоти ҳокимияти давлатӣ, корхонаҳо кор мекунанд;

20) гузаронидани машқҳо оид ба густариши сафарбари ва иҷрои нақшаҳои сафарбари;

21) такмили ихтисоси кормандони мақомоти сафарбари;

22) иҷрои дигар чорабиниҳои ба омодагии сафарбари ва сафарбари вобастабуда, ки қонунгузории Ҷумҳурии Тоҷикистон пешбини намудааст.

Моддаи 4. Қонунгузории Ҷумҳурии Тоҷикистон дар бораи омодагии сафарбари ва сафарбари

Қонунгузории Ҷумҳурии Тоҷикистон дар бораи омодагии сафарбари ва сафарбари ба Конститутсияи (Сарқонуни) Ҷумҳурии Тоҷикистон асос ёфта, аз Қонуни Ҷумҳурии Тоҷикистон "Дар бораи мудофиа", ҳамин Қонун, қонунҳои дигари Ҷумҳурии Тоҷикистон ва шартномаҳои байналхалқие, ки Ҷумҳурии Тоҷикистон иштирокчии онҳо мебошад, иборат аст.

Моддаи 5. Ваколатҳои Президенти Ҷумҳурии Тоҷикистон дар соҳаи омодагии сафарбари ва сафарбари

Президенти Ҷумҳурии Тоҷикистон:

1) мақсад ва вазифаҳои омодагии сафарбари ва сафарбариро дар Ҷумҳурии Тоҷикистон муайян мекунад;

2) нақшаҳои сафарбарии Қувваҳои Мусаллаҳи Ҷумҳурии Тоҷикистонро тасдиқ мекунад;

3) низоми кори мақомоти ҳокимияти давлатӣ, корхонаҳоро дар давраи сафарбари ва дар замони ҷанг муқаррар мекунад;

4) ба шаҳрвандон ё гурӯҳи алоҳидаи шаҳрвандон ҳуқуқи ба таъхир андохтани мӯҳлати даъватро ба хизмати ҳарбӣ медиҳад (бозмедорад);

5) ба ғайр аз ин Президенти Ҷумҳурии Тоҷикистон дар соҳаи омодагии сафарбари ва сафарбари дорои дигар ваколатҳоест, ки қонунгузории Ҷумҳурии Тоҷикистон муқаррар намудааст.

Моддаи 6. Ваколатҳои Ҳукумати Ҷумҳурии Тоҷикистон дар соҳаи омодагии сафарбари ва сафарбари

Ҳукумати Ҷумҳурии Тоҷикистон:

1) ба омодагии сафарбари ва сафарбари дар Ҷумҳурии Тоҷикистон роҳбарӣ мекунад;

2) ваколатҳои мақомоти давлатиро дар соҳаи омодагии сафарбари ва сафарбари муайян намуда, фаъолияти мувофиқашуда ва ҳамкории мутақобилаи онҳоро ташкил мекунад;

3) тартиби бастани шартномаҳо (қарордодҳо)-ро дар бораи аз тарафи корхонаҳо иҷро гардидани супоришҳо (фармоишҳо)-и сафарбари ва таъмини супоришҳо (фармоишҳо)-и мазкурро бо захираҳои моддию техники муайян менамояд;

4) тартиб ва манбаъҳои маблағгузории чорабиниҳоро оид ба омодагии сафарбари ва сафарбари ва додани имтиёзот ба корхонаҳо, ки супоришҳо (фармоишҳо)-и сафарбариро доранд, муайян мекунад;

5) омодагии сафарбариро ташкил мекунад ва назоратро ба он анҷом медиҳад;

6) ҳисоботдиҳии омориро муқаррар мекунад;

7) ҳолати омодагии сафарбарии Ҷумҳурии Тоҷикистонро арзёби менамояд ва дар ин бобат ҳар сол ба Президенти Ҷумҳурии Тоҷикистон гузориш медиҳад;

8) чораҳои дар бандҳои 7, 13, 14 ва 20 моддаи 3 ҳамин Қонун пешбинишударо амали мегардонад;

Ҳукумати Ҷумҳурии Тоҷикистон дар соҳаи омодагии сафарбари ва сафарбари дигар ваколатҳое, ки қонунгузории Ҷумҳурии Тоҷикистон муқаррар кардааст, амали менамояд.

Моддаи 7. ӯҳдадориҳои мақомоти маҳаллии ҳокимияти давлатӣ ва худидоракунии маҳаллӣ дар соҳаи омодагии сафарбари ва сафарбари

Мақомоти маҳалии ҳокимияти давлатӣ ва худидоракунии маҳалли ӯҳдадоранд:

1) омодагии сафарбари ва сафарбариро ташкил ва таъмин намоянд;

2) ба омодагии сафарбарии корхонаҳое, ки фаъолияташон дар тобеияти онҳо қарор доранд, роҳбари намоянд;

3) мақомоти сафарбариро таъсис диҳанд;

4) нақшаҳои сафарбариро тасдиқ кунанд ва иҷрои онро таъмин намоянд;

5) ба комиссариатҳои ҳарбӣ кӯмак расонанд ва ба онҳо доир ба бақайдгирии корхонаҳо маълумот пешниҳод намоянд;

6) сари вақт огоҳ кардан ва ҳозир шудани шаҳрвандонеро, ки мувофиқи сафарбари бояд ба хизмати ҳарбӣ даъват карда шаванд, таҳвили техника ба нуқтаҳои ҷамъшавӣ ё қисмҳои ҳарбӣ, додани биноҳо, объектҳо, воситаҳои коммуникатсия, қитъаҳои замин, воситаҳои нақлиёт ва дигар воситаҳои моддиро мутобиқи нақшаҳо ташкил кунанд;

7) бақайдгирии ҳарбӣ, дар давраи сафарбари ва дар замони ҷанг брон кардани шаҳрвандонеро, ки дар эҳтиёт қарор дошта, дар корхонаҳое кор мекунанд, ки фаъолияташон дар тобеияти онҳо қарор доранд, ташкил ва таъмин кунанд, пешниҳод гардидани ҳисоботро оид ба брон кардан бо тартиби муайяннамудаи қонунгузории Ҷумҳурии Тоҷикистон таъмин гардонанд.

Моддаи 8. ӯҳдадориҳои корхонаҳо дар соҳаи омодагии сафарбари ва сафарбари

Корхонаҳо ӯҳдадоранд:

1) дар бобати таъмини омодагии сафарбари чорабиниҳо андешанд ва онҳоро амали намоянд;

2) мақомоти (бахшҳои) сафарбари таъсис диҳанд ё кормандонеро, ки вазифаҳои мақомоти сафарбариро иҷро мекунанд (минбаъд кормандони сафарбари) таъин намоянд;

3) нақшаҳои сафарбариро таҳия намоянд ва иҷрои онро таъмин кунанд;

4) оид ба омодагии истеҳсолот бо мақсади иҷрои супоришҳо (фармоишҳо) дар давраи сафарбари ва дар замони ҷанг чорабиниҳо гузаронанд;

5) ҳангоми эълони сафарбари дар бобати гузаронидани истеҳсолот ба кор дар шароити замони ҷанг чорабиниҳо анҷом диҳанд;

6) ба комиссариатҳои ҳарбӣ дар кори онҳо оид ба сафарбари дар замони осоишта ва ҳангоми эълони сафарбари кӯмак расонанд;

7) сари вақт огоҳ кардан ва ба нуқтаҳои ҷамъшавӣ ё қисми ҳарбӣ ҳозир шудани шаҳрвандонеро, ки бо онҳо муносибати меҳнатӣ доранд ва ҳангоми сафарбари бояд ба хизмати ҳарби даъват карда шаванд, таъмин намоянд;

8) таҳвили техникаро бо нуқтаҳои ҷамъшавӣ ё қисмҳои ҳарбӣ мутобиқи нақшаҳои сафарбари таъмин гардонанд;

9) мутобиқи қонун биноҳо, иншоот, воситаҳои коммуникатсия, қитъаҳои замин, воситаҳои нақлиёт ва дигар воситаҳои моддиро тибқи нақшаҳои сафарбари диҳанд. Товони зарари ба онҳо расонидашуда бо тартибе, ки Ҳукумати Ҷумҳурии Тоҷикистон муқаррар мекунад, аз тарафи давлат ҷуброн карда мешавад;

10) ҷузъу томҳои бақайдгирии ҳарбиро таъсис диҳанд, кори бақайдгирии ҳарбиро дар давраи сафарбари ва дар замони ҷанг, брон кардани шаҳрвандонеро, ки дар эҳтиёт қарор доранд ва дар ин корхонаҳо кор мекунанд, иҷро намоянд, пешниҳоди ҳисоботро оид ба брон кардан таъмин гардонанд.

Корхонаҳо ҳақ надоранд (ҳангоми мавҷуд будани имконият) аз бастани шартномаҳо (қарордодҳо) оид ба иҷрои супоришҳо (фармоишҳо)-и сафарбари саркашӣ кунанд. Товони зарари ба корхонаҳо расонидашуда вобаста ба иҷрои супоришҳои (фармоишҳои) сафарбари бо тартибе, ки Ҳукумати Ҷумҳурии Тоҷикистон муқаррар мекунад, ҷуброн карда мешаванд.

Корхонаҳо ӯҳдадоранд иттилоотеро, ки барои таҳия ва татбиқи чорабиниҳои сафарбари заруранд, бо тартибе, ки Ҳукумати Ҷумҳурии Тоҷикистон муқаррар кардааст, пешниҳод намоянд.

Моддаи 9. ӯҳдадориҳои шаҳрвандон дар соҳаи омодагии сафарбари ва сафарбари

Шаҳрвандон ӯҳдадоранд:

1) мувофиқи даъват ба комиссариатҳои ҳарбӣ барои муайян кардани таъиноти худ дар давраи сафарбари ва дар замони ҷанг ҳозир шаванд;

2) талаботеро, ки дар дастурҳои сафарбарии гирифтаи онҳо, даъватнома ва амрҳои комиссарони ҳарбӣ зикр шудааст, иҷро намоянд;

3) мутобиқи қонун дар замони ҷанг бо мақсади таъмини мудофиаи кишвар ва амнияти давлат биноҳо, иншоот, воситаҳои нақлиёт ва дигар амволеро, ки дар моликияти онҳо қарор доранд, диҳанд. Товони зарари ба онҳо расонидашуда бо тартибе, ки Ҳукумати Ҷумҳурии Тоҷикистон муқаррар мекунад, ҷуброн карда мешавад.

Шаҳрвандон дар давраи сафарбари ва дар замони ҷанг ба иҷрои корҳо бо мақсади таъмини мудофиаи кишвар ва амнияти давлат ҷалб карда мешаванд, ҳамчунин бо тартиби муайяннамудаи қонун ба сохторҳои махсус шомил карда мешаванд.

Моддаи 10. Мақомоти сафарбари

Мақомоти давлати ва корхонаҳое, ки супоришҳо (фармоишҳо)-и сафарбари ё оид ба кори сафарбари вазифаҳо доранд, барои ташкили чорабиниҳо доир ба омодагии сафарбари ва сафарбари ва назорат ба татбиқи онҳо дар ҳудуди шумораи кормандони худ мақомоти сафарбари таъсис медиҳанд.

Сохтор ва штатҳои мақомоти сафарбари бо дар назардошти хусусият ва ҳаҷми супоришҳо (фармоишҳо)-и сафарбари ё супоришҳо оид ба кори сафарбари муайян карда мешаванд. Вобаста ба ҳаҷми супоришҳо (фармоишҳо)- и ё вазифаҳо мумкин аст ба ивази мақоми сафарбари кормандони сафарбари таъин карда шаванд.

Низомномаи намунавии мақомоти сафарбариро Ҳукумати Ҷумҳурии Тоҷикистон тасдиқ мекунад.

Низомномаи мақомоти сафарбарие, ки дар ҳайати мақомоти давлатӣ, корхонаҳо таъсис дода мешаванд, аз тарафи роҳбарони онҳо тасдиқ карда мешаванд.

Маблағгузории мақомоти сафарбари ва кормандони сафарбари дар доираи маблағҳои барои таъминоти онҳо ҷудошуда ё аз ҳисоби мақомоти давлатӣ ва корхонаҳое, ки ба ҳайати он мақоми сафарбари ё корманди сафарбари шомил мешаванд, анҷом дода мешавад.

Моддаи 11. ӯҳдадории ҳарбию нақлиётӣ

Бо мақсади таъмини Қувваҳои Мусаллаҳи Ҷумҳурии Тоҷикистон бо воситаҳои нақлиёт дар замони ҷанг, ҳангоми эълони ҳолати ҷангӣ ё сафарбари, дар замони осоишта - ҳангоми гузаронидани Қувваҳои Мусаллаҳи Ҷумҳурии Тоҷикистон, дигар қӯшунҳо, сохторҳои ҳарбӣ ба ҳолати дараҷаи муайяни тайёрии ҷангӣ, Ҳукумати Ҷумҳурии Тоҷикистон ӯҳдадории ҳарбию нақлиёти муқаррар менамояд, ки он ба мақомоти давлати ва корхонаҳое, ки кори воситаҳои нақлиётро таъмин мекунанд, ҳамчунин ба шаҳрвандоне, ки соҳиби воситаҳои нақлиёт мебошанд, татбиқ мегардад.

Товони зарари ҳангоми амали гардидани ӯҳдадории ҳарбии нақлиёти расонидашуда бо тартиби муқаррарнамудаи Ҳукумати Ҷумҳурии Тоҷикистон ҷуброн карда мешавад.

Моддаи 12. Низоми гузаронидани омодагии сафарбари ва сафарбари

Ташкили корҳо ва ҳифзи иттилоот дар соҳаи омодагии сафарбари ва сафарбари мутобиқи қонун анҷом дода мешаванд.

Моддаи 13. Даъвати шаҳрвандон ба хизмати ҳарбӣ ҳангоми сафарбари

Шаҳрвандоне, ки дар эҳтиёт қарор дошта, барои ба таъхир андохтани даъват ба хизмати ҳарбӣ аз рӯи сафарбари ҳақ надоранд, ҳангоми сафарбари ба хизмати ҳарби даъват карда мешаванд.

Шаҳрвандоне, ки дар эҳтиёт қарор доранд ва ҳангоми сафарбари ба хизмати ҳарби даъват нашудаанд, метавонанд барои кор дар мансабҳои ҳайати ғайриҳарбии Қувваҳои Мусаллаҳи Ҷумҳурии Тоҷикистон ва сохторҳои махсус фиристода шаванд.

Шаҳрвандоне, ки бинобар вазъи саломатиашон ғайри қобили хизмати ҳарбӣ дониста шудаанд, инчунин шаҳрвандоне, ки барои содир кардани ҷинояти вазнин ё махсусан вазнин доғи судии бардоштанашуда ё адонашуда доранд, ҳангоми сафарбари ба хизмати ҳарбӣ даъват карда намешаванд.

Хизматчиёни ҳарбӣ, ба истиснои занон - хизматчиёни ҳарбие, ки фарзандони то 16 сола доранд, ҳангоми эълони сафарбари адои хизмати ҳарбиро идома медиҳанд.

Моддаи 14. Ба таъхир андохтани даъват ба хизмати ҳарби ҳангоми сафарбари

Ба таъхир андохтани даъват ба хизмати ҳарби ҳангоми сафарбари ба шаҳрвандони зерин пешниҳод карда мешавад:

1) онҳое, ки брон карда шудаанд;

2) онҳое, ки бинобар вазъи саломатӣ муваққатан ғайри қобили хизмати ҳарбӣ дониста шудаанд - ба мӯҳлати то шаш моҳ;

3) онҳое, ки ба нигоҳубини доимии падар, модар, зан, шавҳар, бародари худӣ, хоҳари худ, бобо, модаркалон, фарзандхонде, ки бинобар вазъи саломатӣ мувофиқи хулосаи комиссияи тиббию машваратӣ ба нигоҳубин (кӯмак, назорат)-и шахсӣ дигар мӯҳтоҷанд ё маъюби гурӯҳи 1 мебошанд, ҳамчунин ба нигоҳубини аъзои оила, ки ба синни 16 нарасидаанд, ҳангоми набудани дигар шахсоне, ки вазифадоранд мувофиқи қонун шаҳрвандони зикршударо таъмин намоянд машғуланд;

4) онҳое, ки саробонии панҷ ё зиёда фарзандони (шаҳрвандони ҷинси зан - як фарзандӣ) ноболиғро ба ӯҳда доранд.

Моддаи 15. Мӯҳлатҳои ба хизмати ҳарбӣ даъват кардани шаҳрвандон ҳангоми сафарбари

Ба хизмати ҳарбӣ даъват кардани шаҳрвандон ҳангоми сафарбари дар мӯҳлатҳое, ки мувофиқи нақшаҳои сафарбарии Қувваҳои Мусаллаҳи Ҷумҳурии Тоҷикистон, дигар қӯшунҳо, сохторҳои ҳарбӣ ва махсус муқаррар карда мешаванд, сурат мегирад.

Моддаи 16. Ташкили даъвати шаҳрвандон ба хизмати ҳарбӣ ҳангоми сафарбари

Бо мақсади сари вақт ба ташкил ва ҳайати замони ҷанг гузаронидани Қувваҳои Мусаллаҳи Ҷумҳурии Тоҷикистон, дигар қӯшунҳо, сохторҳои ҳарбӣ ва таъсиси сохторҳои махсус шаҳрвандоне, ки дар эҳтиёт қарор доранд, барои адои хизмат дар замони ҷанг дар мансабҳои ҳарбӣ ё барои кор дар мансабҳои ҳайати ғайриҳарбӣ, ки бо штатҳои замони ҷанг пешбини шудаанд, қаблан ба қисмҳои ҳарбӣ мансуб гардонида мешаванд (ба ҳайати сохторҳои махсус таъин карда мешаванд).

Шаҳрвандоне, ки ба қисмҳои ҳарбӣ мансуб гардонида шудаанд (ба ҳайати сохторҳои махсус таъин карда шудаанд), барои адои хизмат дар замони ҷанг ҳангоми татбиқи чорабиниҳо дар бобати ба ташкил ва ҳайати замони ҷанг гузаронидани қисмҳои ҳарбие, ки шаҳрвандони мазкур ба онҳо мансуб гардонида шудаанд, ҳамчунин дар ҳолати таъсиси сохторҳои махсус ба хизмати ҳарбӣ ҳангоми сафарбари даъват карда мешаванд.

Тартиби ҳангоми сафарбари ба хизмати ҳарбӣ даъват кардани шаҳрвандоне, ки ба қисмҳои ҳарбӣ мансуб гардонида шудаанд (ба ҳайати сохторҳои махсус таъин карда шудаанд), барои адои хизмат дар мансабҳои ҳарбии бо штатҳои замони ҷанг пешбинишуда, ҳамчунин тартиби барои кор дар мансабҳои ҳайати ғайриҳарбии Қувваҳои Мусаллаҳи Ҷумҳурии Тоҷикистон, дигар қӯшунҳо, сохторҳои ҳарбӣ ва махсус фиристодани шаҳрвандон аз тарафи Ҳукумати Ҷумҳурии Тоҷикистон муқаррар карда мешавад.

Моддаи 17. ӯҳдадориҳои шаҳрвандоне, ки бояд ба хизмати ҳарбӣ ҳангоми сафарбари даъват карда шаванд

Ҳангоми эълони сафарбари шаҳрвандоне, ки бояд ба хизмати ҳарбӣ даъват карда шаванд, ӯҳдадоранд, ки дар мӯҳлатҳои дар дастурҳои сафарбари, даъватномаҳо ё амрҳои комиссарони ҳарбӣ зикршуда ба нуқтаҳои ҷамъшавӣ ҳозир шаванд.

Ба шаҳрвандоне, ки дар қайди ҳарбӣ мебошанд, аз лаҳзаи эълони сафарбари аз маҳалли зист бе иҷозати комиссарони ҳарбӣ берун рафтан манъ аст.

Моддаи 18. Брон кардани шаҳрвандони дар эҳтиёт қарор дошта дар давраи сафарбари дар замони ҷанг

Брон кардани шаҳрвандоне, ки дар эҳтиёт қарор доранд, бо мақсади таъмини фаъолияти мақомоти давлатӣ ва корхонаҳо дар давраи сафарбари ва дар замони ҷанг анҷом дода мешавад.

Дар давраи сафарбари ва дар замони ҷанг брон кардани шаҳрвандоне, ки дар эҳтиёт қарор доранд, бо тартиби муайянкардаи қонунгузории Ҷумҳурии Тоҷикистон анҷом дода мешавад.

Шаҳрвандони брон кардашуда аз даъват ба хизмати ҳарбӣ ҳангоми сафарбари ва даъватҳои минбаъда дар замони ҷанг озод карда мешаванд.

Моддаи 19. Ҷавобгарӣ барои вайрон кардани ҳамин Қонун

Барои вайрон кардани муқаррароти ҳамин Қонун шахсони гуннаҳгор мувофиқи қонун ба ҷавобгарӣ кашида мешаванд.