Стратегияи таҳсилоти фарогир дар Ҷумҳурии Тоҷикистон барои давраи то соли 2045

1.МУҚАРРАРОТИ УМУМӢ

1. Стратегияи таҳсилоти фарогир дар Ҷумҳурии Тоҷикистон барои давраи то соли 2045 (минбаъд – Стратегия) дар асоси Конститутсияи Ҷумҳурии Тоҷикистон, қонунҳои Ҷумҳурии Тоҷикистон «Дар бораи маориф», «Дар бораи ҳифзи ҳуқуқҳои кӯдак» ва Консепсияи таҳсилоти фарогир дар Ҷумҳурии Тоҷикистон барои давраи то соли 2045 таҳия гардида, барои муайян кардани маҷмуи чорабиниҳо, ки ба динамикаи тағйироти иҷтимоӣ, иқтисодӣ ва сиёсӣ дар ҳаёти кишвар мувофиқанд, бо дарназардошти хусусияту эҳтиёҷоти хонандагони муассисаҳои таҳсилоти умумӣ, воқеияти иҷтимоию психологии инкишофи онҳо пешбинӣ шудааст.

2. Конститутсияи Ҷумҳурии Тоҷикистон ҳуқуқи ҳар як шахсро ба таҳсил таъмин намуда, дастрасии таҳсилоти ройгонро дар муассисаҳои давлатии таълимии таҳсилоти умумӣ кафолат медиҳад.

3. Қонуни Ҷумҳурии Тоҷикистон «Дар бораи маориф» фароҳам овардани шароити заруриро барои кӯдакони имконияташон маҳдуд ҷиҳати гирифтани таҳсилоти босифат бидуни табъиз, ислоҳи нуқсонҳои инкишоф ва мутобиқшавии иҷтимоӣ, расонидани кумакҳои барвақтии иҷтимоӣ дар асоси равишҳои махсуси педагогӣ ва воситаҳои муошират ва шароит барои таълимгирандагонро танзим менамояд.

4. Стратегия ҷиҳати беҳбуд бахшидан ба вазъи иҷтимоии кӯдакони имконияташон маҳдуд, аз ҷумла рафъи монеа ва маҳдудиятҳо дар гирифтани таҳсилот, фароҳам овардани шароит барои таъмини ҳаёти муътадили онҳо пешбинӣ шудааст.

5. Амалисозии Стратегия дастрасӣ ва сифати баланди таҳсилро барои ҳар як хонандаи имконияташ маҳдуд ҷиҳати мутобиқшавӣ ва ҳамгироии иҷтимоӣ, рушди шахсият, худшиносии бомуваффақият дар ҳаёти инфиродӣ, ҷомеа, дар соҳаи меҳнат ва шуғли аҳолӣ таъмин менамояд.

6. Стратегия ба рушди касбии омӯзгорону мурраббиён ва такмили фаъолияти таълимию методӣ (дастгирии методӣ, такмили ихтисос) мусоидат мекунад.

2.ТАҲЛИЛИ ҲОЛАТИ ҶОРӢ ВА МУШКИЛОТИ МАВҶУДА

7. Тибқи маълумоти оморӣ дар Ҷумҳурии Тоҷикистон 47158 нафар кӯдаки имконияташ маҳдуд мавҷуд буда, аз инҳо 34034 нафарро кӯдакони маъюб (кӯдакони дорои иллатҳои шунавоӣ, биноӣ, нутқ, ақлан ќафомонда, узвҳои ҳаракаткунандаашон осебдор, инкишофи равониашон суст) ташкил медиҳад. Таҳлили вазъи омории соҳаи маориф дар ин самт нишон медиҳад:

- тамоюли ба таълиму тарбия фаро гирифтани кӯдакони имконияташон маҳдуд беҳтар гардидааст;