Дар Вазорати адлияи Ҷумҳурии Тоҷикистон

3 июни соли 2025, № 1296² ба қайди давлатӣ

гирифта шудааст

АГЕНТИИ ИННОВАТСИЯ ВА ТЕХНОЛОГИЯҲОИ РАҚАМИИ НАЗДИ ПРЕЗИДЕНТИ ҶУМҲУРИИ ТОҶИКИСТОН

ФАРМОИШ

Мутобиқи моддаи 56 Қонуни Ҷумҳурии Тоҷикистон «Дар бораи санадҳои меъёрии ҳуқуқӣ»,

1.Ба Тартиби татбиқи лоиҳаи озмоишӣ дар соҳаи фаъолияти букмекерӣ, ки бо фармоиши директори Агентии инноватсия ва технологияҳои рақамии назди Президенти Ҷумҳурии Тоҷикистон аз 9 августи соли 2024, №1/32 «Дар бораи муқаррар кардани реҷаи махсуси танзимӣ оид ба амалисозии лоиҳаи озмоишӣ дар соҳаи фаъолияти букмекерӣ» тасдиқ гардида, дар Вазорати адлияи Ҷумҳурии Тоҷикистон 19 августи соли 2024, №1296 ба қайди давлатӣ гирифта шудааст, тағйиру иловаҳои зерин ворид карда шаванд:

- дар банди 18 ҷумлаи дуюм бо мазмуни зерин илова карда шавад:

«Дар ҳолати аз ҷониби иштирокдорони бозӣ ворид намудани маблағ тавассути кортҳои пардохтии бонкӣ ва ҳамёни электронӣ, маблағи интиқолшаванда танҳо тавассути суратҳисоби бонкие, ки дар ташкилоти қарзӣ кушода шудааст, ба суратҳисоби дахлдори ташкилкунандаи фаъолияти букмекерӣ, интиқол дода мешавад.»;

- банди 19 дар таҳрири зерин ифода карда шавад:

«19. Пардохти бурдҳо ба иштирокдорони бозӣ дар асоси маълумотномаи ташкилкунандаи фаъолияти букмекерӣ, ки ба МИП тариқи Низоми ягонаи МИП пешниҳод карда мешавад, сурат мегирад. МИП дар асоси маълумотномаи дарҷгардида ба ташкилоти қарзӣ супориш оид ба пардохти бурд ба иштирокдорони бозиро медиҳад. Баъд аз пардохти бурд аз ҷониби ташкилоти қарзӣ ба иштирокдорони бозӣ, ташкилоти қарзӣ маблағи пардохти бурдро аз суратҳисоби ташкилкунандаи фаъолияти букмекерӣ, ки дар ин ташкилоти қарзӣ кушода шудааст, ҳисобӣ менамояд.»;

-дар банди 22 ҷумлаи якум бо мазмуни зерин илова карда шавад:

«Бо мақсади татбиқи муқаррароти Тартиби мазкур ташкилкунандагони фаъолияти букмекерӣ бо ташкилоти қарзӣ шартнома ба имзо мерасонанд.»;

-дар банди 24 сархати понздаҳум бо мазмуни зерин илова карда шавад:

« - таъмини нигоҳдории маълумоти шахсии иштирокдорони бозӣ ва истифодаи таҷҳизоти дахлдор ҷиҳати амалӣ намудани ҳамин уҳдадорӣ тибқи муқаррароти санадҳои меъёрии ҳуқуқии амалкунандаи Ҷумҳурии Тоҷикистон;»;

-дар банди 27 ҷумлаи дуюм бо мазмуни зерин илова карда шавад:

«Мақомоти ваколатдори давлатӣ ва Бонки миллии Тоҷикистон уҳдадоранд дар асоси дархости Танзимгари ягона ҷиҳати пешгирии ҳолатҳои вайрон намудани муқаррароти Тартиби мазкур аз ҷониби ташкилкунандагони фаъолияти букмекерӣ ва ташкилотҳои қарзие, ки ба онҳо хизматрасониҳои бонкиро тибқи муқаррароти санадҳои меъёрии ҳуқуқии Ҷумҳурии Тоҷикистон ва шартномаҳои дахлдор пешниҳод менамоянд, чораҳои фаврии ислоҳӣ ва таъсиррасониро татбиқ намоянд. Инчунин, дар асоси дархости Танзимгари ягона мақомоти дахлдори давлатӣ дар соҳаи алоқа уҳдадор аст, ки дастрасиро ба хизматрасониҳои ташкилкунандагони фаъолияти букмекерӣ, ки фаъолияти худро дар ҳудуди Ҷумҳурии Тоҷикистон ғайриқонунӣ ба роҳ мондаанд, қатъ намояд»;

- банди 29 дар таҳрири зерин ифода карда шавад:

«29. Феҳристи сиёҳ маълумотро оид ба ташкилкунандагони фаъолияти букмекерӣ, ки дар фаъолияти худ муқаррароти Тартиби мазкур ва дигар санадҳои меъёрии ҳуқуқии Ҷумҳурии Тоҷикистонро мунтазам вайрон мекунанд, инчунин маълумотро оид ба ташкилкунандагони фаъолияти букмекерӣ, ки бинобар сабаби вайрон намудани муқаррароти Тартиби мазкур ва санадҳои меъёрии ҳуқуқии Ҷумҳурии Тоҷикистон ба феҳристи хокистарранг қаблан ворид карда шуда, баъди хориҷ намудани маълумот нисбати чунин ташкилкунандагони фаъолияти букмекерӣ аз феҳристи хокистарранг, такроран муқаррароти Тартиби мазкур ва дигар санадҳои меъёрии ҳуқуқии Ҷумҳурии Тоҷикистонро вайрон менамоянд, дар бар мегирад.»;

- дар банди 47 рақами «5» ба рақами «3» иваз карда шавад;

- банди 48 дар таҳрири зерин ифода карда шавад:

«48. Пардохтпулиҳои мақсаднок тариқи зайл тақсим карда мешаванд:

- 1% ба Федератсияи футболи Тоҷикистон;

- 1% ба Танзимгари ягона;

- 1% ба Маркази идоракунии пардохтҳо.».

2. Фармоиши мазкур барои бақайдгирии давлатӣ ба Вазорати адлияи Ҷумҳурии Тоҷикистон пешниҳод карда шуда, пас аз бақайдгирии давлатӣ ва интишори расмӣ мавриди амал қарор дода шавад.

3. Шуъбаи молия ва хоҷагидорӣ барои дар рӯзномаи «Ҷумҳурият» нашр намудани фармоиши мазкур чораҷӯйӣ намояд.