Созишнома байни Ҳукумати Ҷумҳурии Тоҷикистон ва Ҳукумати Иттиҳоди Доминика оид ба мутақобилан озод намудани талаб раводид барои дорандагони шиносномаҳои дипломатӣ, хизматӣ ва умумишаҳрвандии хориҷӣ

Ҳукумати Ҷумҳурии Тоҷикистон ва Ҳукумати Иттиҳоди Доминика, ки минбаъд Тарафҳо номида мешаванд,

Бо нияти таҳким ва густариши муносибатҳои дӯстонаи ҳамдигар

Ба мувофнқаи зайл расиданд:

Моддаи 1

Шиносномаҳои дар Созишномаи мазкур дарҷшуда инҳоянд:

1.Дар Ҷумҳурии Тоҷикистон: шиносномаҳои амалкунандаи дипломатӣ, хизматӣ ва умумишаҳрвандии хориҷӣ.

2.Дар Иттиҳоди Доминика: шиносномаҳои амалкунандаи дипломатӣ, хизматӣ ва оддӣ.

Моддаи 2

Шаҳрвандони Тарафҳо, ки дорандагони шиносномаҳои дар моддаи 1 Созишномаи мазкур мушаххасшуда мебошанд метавонанд дар муддати навад (90) рӯз, аз рӯзи воридшавӣ ба қаламрави Тарафи дигар бе раводиди воридшавӣ вуруд, убур ва хуруҷ шаванд.

Моддаи 3

Шаҳрвандони Тарафҳо, ки дорандагони шиносномаҳои дар моддаи 1 Созишномаи мазкур мушаххасшуда мебошанд ва аъзои ҳайати дипломатӣ/консулӣ ё созмонҳои байналмилалии дар қаламрави Тарафи дигар аккредитатсияшуда ҳастанд, дар илова ба аъзои оилаи бо онҳо иқоматкунанда, ки дорандагони шиносномаҳои дар моддаи 1 Созишномаи мазкур мушаххасшуда мебошанд, бо шарте ки расмияти аккредитатсияро дар муддати сӣ (30) рӯз аз рӯзи воридшавӣ ба итмом расонанд, метавонанд ба қаламрави Тарафи дигар бе раводиди воридшавӣ дар муҳлати фаъолияти таъиноти худ вуруд, убур ё хуруҷ шаванд.

Моддаи 4

Дорандагони шиносномаҳои дар моддаи 1 Созишномаи мазкур мушаххасшуда метавонанд танҳо аз нуқтаҳои гузаргоҳи байналмилалии сарҳадии қонунӣ сарҳадро гузар намоянд.

Моддаи 5

Ҳар Тараф ҳуқуқ дорад:

1.Воридшавӣ ё будубоши шаҳрвандони Тарафи дигарро бо сабабҳои амнияти давлатӣ, тартиботи ҷамъиятӣ ё саломатии аҳолӣ рад намояд.

2.Муддати будубоши шаҳрвандони Тарафи дигарро мутобиқ қонун ва қоидаҳои амаликунандаи кишвари қабулкунанда кӯтоҳ ё қатъ намояд.

Моддаи 6

Шаҳрвандони Тарафҳо, ки дорандагони шиносномаҳои дар моддаи 1 Созишномаи мазкур мушаххасшуда мебошанд бояд қонунҳо ва қоидаҳои дар қаламрави Тарафи дигар амалкунандаро ҳангоми убури сарҳад ё будубош дар қаламрави Тарафи қабулкунанда риоя намоянд.

Моддаи 7

Ҳар як Тараф ҳуқуқи боздоштани татбиқшавии пурра ё қисми Созишномаи мазкурро бо сабабҳои марбут ба амнияти давлатӣ, тартиботи ҷамъиятӣ ё саломотии аҳолӣ, нигоҳ медорад. Дар ҳолати қабули чунин қарор, Тарафи дигар бояд дар шакли хаттӣ тавассути роҳҳои дипломатӣ огоҳонида шавад.

Моддаи 8

1. Бо мақсади татбиқи Созишномаи мазкур, мақомоти дахлдори Тарафҳо намунаи шиносномаҳои амалкунандаи дипломатӣ, хизматӣ ва умумишаҳрвандиро дар муддати сӣ (30) рӯзи пас аз баимзорасонии Созишномаи мазкур мубодила менамоянд.

2. Дар ҳолате, ки яке аз Тарафҳо шиносномаҳои дипломатӣ, хидматӣ ё умумишаҳрвандии навро судур намояд, ё онҳоро иваз намояд, мақомоти ваколатдори ин ҷониб бояд мақомоти ваколатдори Тарафи дигарро огоҳ намуда, бо намунаи шиносномаҳои нав тавассути роҳҳои дипломатӣ сӣ (30) рӯз пеш аз истифодабарии чунин намуди шиносномаҳо таъмин намояд.

Моддаи 9

Ҳама гуна баҳсҳое, ки аз тафсир ва/ё татбиқи муқаррароти ин Созишнома бармеоянд, бо роҳи машварат ва гуфтушунидҳо байни Тарафҳо тавассути роҳҳои дипломатӣ ҳаллу фасл карда мешаванд.

Моддаи 10

Созишномаи мазкур ё муқаррароти он метавонад дар шакли розигии хаттии Тарафҳо тағйир дода шавад; чунин тағйирот бо тартиби дар моддаи 11 Созишномаи мазкур пешбинишуда эътибор пайдо мекунад.

Моддаи 11

1. Созишномаи мазкур пас аз сӣ (30) рӯзи гирифтани огоҳиномаи охирини хаттӣ, ки дар он Тарафҳо ба яқдигар тавассути роҳҳои дипломатӣ оид ба анҷом ёфтани расмиёти дохилидавлатие, ки барои эътибор пайдо кардани Созишномаи мазкур заруранд, эътибор пайдо мекунад.

2. Созишномаи мазкур ба муҳлати номуайян то лаҳзае, ки як Тараф Тарафи дигарро дар шакли хаттӣ тавассути роҳҳои дипломатӣ роҷеъ ба нияти худ оид ба қатъ намудани он хабар медиҳад, эътибор дорад. Дар ин ҳолат Созишномаи мазкур баъд аз навад (90) рӯзи гирифтани чунин огоҳинома қатъ мегардад.

Бо тасдиқи он, ки имзокунандагони зерин аз ҷониби ҳукуматҳои худ бо тартиби муқарраргардида ваколатдор шудаанд, Созишномаи мазкурро ба имзо мерасонанд.

Дар ш. Ню-Ӣорк 11 феврали соли 2025 дар ду нусха, ҳар яке бо забони тоҷикӣ ва англисӣ, ки ҳар ду матн эътибори яксон доранд, ба имзо расид. Дар мақсади тавсир муқаррароти Созишнома матни забони англисӣ истифода мешавад.